YOSUA10
Israel Batii Lalenkee Amori Batii
1Ninfɛ di Yerusalem ɔka Adoni-Sedek lanu alɛ Yosua ntoofũ Ai okpoo kplɛ nwu, ɛɛwɔɔsa nwu kafɔɔ fɛɛ, ɛɛbla Ai fɛ mmle aabla ni Yeriko ku ɔka lɛma, ni di Gibeon batii kafɔɔ ntɔɔbla atoko ɔkyɛ ole kanya ninii ku Israel, nioso nfɛ basi bakaako ma.2Diatɛ diabla Yerusalem ɔka ku batii nɔɔ ɔkpɛ di nle mmle nwu oso, diekye Gibeon lale okpoo kplɛ finle, fɛle baka sekpoo kplɛ onwii; kuamuɔ kualenkee Ai, basuɔtɔ ninwu bamuu kafɔɔ lale bakpɛtɛ nwaa.3Nioso Yerusalem ɔka Adoni-Sedek latikiti Hebron ɔka Hoham, Yarmut ɔka Piram, Lakis ɔka Yafia ku Eglon ɔka Debir lekoto.4Aabuɛ alɛ, “Biwa biɛbakyakaako mi buɔlaakpɛ Gibeon, diekye batoonii atoko ɔkyɛ ole kanya ku Yosua ku Israel batii.”5Ninfɛ di Amori batii baka banɔɔ nwu-Yerusalem, Hebron, Yarmut, Lakis ku Eglon baka-lasiisa bakpɛtɛ lɛma dikudi. Ni baadie baakata baasifi ku bakpɛtɛ lɛma bamuu baalaayila baakpɛko Gibeon nɛ.6Ni di Gibeon batii lata Yosua kanya di kasiɛkɔ nɔɔ di Gilgal alɛ, “Tandiɛ bakpɛmblatɛ lɛfɔ nnɛɛ. Wa wla faabafũ wo! Kyakaako wo, diekye Amori batii baka bamuu niekye ni akpenkpe kale nwu lesiisa bakpɛtɛ dikudi di suoto loo.”7Nioso Yosua lakata aakye Gilgal ku bakpɛtɛ nɔɔ bamuu, di basuɔtɔ ba bamuu niɛtɛ baye ni kakpɛ nwaa lasiɛ ni kaamɛ.8Ni di SAATE nwu latɔkɔ Yosua alɛ, “Tanyɛkɛ ma; ntɔɔyɔ ma lekpee di nnɛɛ lɛfɔ. Kuonwii lɛma dilɔbafuo fɔ oyilako.”9Yosua ladie di Gilgal, baakyɛ kakyɛ-kamuu baalaafua ma.10Ni di SAATE nwu lakpɔkpɔtɔsa ma di Israel batii anu, ni baalenkee ma di lelenkee kplɛ kamɛ di Gibeon nɛ. Israel batii latikanko ma di osuku wɔ ninte kuosifi ni Bet Horon, baalaalo ma bamuu baatɛ di osuku baalaadu Aseka ku Makeda.11Baatootoso ni di Israel batii anu di osuku wɔ niekye ni Bet Horon kuosifi ni Aseka, SAATE lafuki atubakani kplɛkplɛ aakye osi aakpete ma di suoto. Kpinwu lɛma lakpi di atubakani nwu kamɛ baalenkee mba baalo ni ku Israel batii mpamii.12Di dii le di SAATE nwu layɔ Amori batii aakpee ni di Israel nnɛɛ yi, Yosua latɔkɔ SAATE nwu di Israel batii anu alɛ:“Oo kufĩ, yila kloklo di Gibeon suoto,Oo kɔwɛntɛ, layila di Ayalon Ɔtaata nwu suoto.”13Nioso kufĩ layila kloklo,kɔwɛntɛ kafɔɔ layila,dialaase di obe wɔ di kale nwu labla balo lɛma baakyisa nii,fɛ mmle bɛɛkpana ni di Yasser Kukũ kamɛ alɛ.Kufĩ layila di kolo ntɛɛntɛɛ, kuaku nkpaa kuamɛɛ nii, fɛ dii kufĩ kumu.14Dii fɛ nle mmle diiwa diidii ee saa, dii le di SAATE nwu lakyɔɔ ni otii atoko. Nwaako SAATE nwu latɔɔkpɛ aatɔɔta Israel!15Ninfɛ di Yosua ku Israel batii bamuu lakple baasifi kasiɛkɔ lɛma di Gilgal nɛ.
Yosua Lamufũ Amori Batii Baka Nwu Banɔɔ
16Ninfɛ di baka nwu banɔɔ latoso baalaawofa di ofuɔntuu kamɛ di Makeda nɛ.17Obe wɔ baatɔkɔ ni Yosua alɛ bɛɛnya baka nwu banɔɔ lewofa ni di ofuɔntuu kamɛ di Makeda yi,18ni aabuɛ alɛ, “Bimunusa afuɔ kplɛ bitĩi ofuɔntuu nwu kanya, biɛta basuɔtɔ bawo bawɛ ninfa batoonyu nwu.19Kafɔɔ bitanyila! Bitikanko balo lee, bilo ma bikyeko sɛmaa, sɛmaa, bitanta ma balaadu sekpoo kplɛ lɛma, diekye SAATE, Yaa lee nwu ntɔɔyɔ ma eekpee ye ninnɛɛ.”20Nioso Yosua ku Israel batii lawɔɔsa ma fɛɛ-kɛɛkɛɛ nse otii kuonwii ditabu-kafɔɔ basɛɛ ba niabu ni lalabuo sekpoo kplɛ lɛma se baatofo seyoyiɛ baakyisa nii.21Ninfɛ di bakpɛtɛ nwu bamuu lakple buɛɛ baasifi Yosua nfũ di kasiɛkɔ nwu di Makeda nɛ. Kuonwii kafɔɔ ditabɛ kanya di Israel batii suoto.22Ninfɛ di Yosua labuɛ alɛ, “Bitikiti ofuɔntuu nwu kanya biediki baka nwu banɔɔ bawakoe.”23Nioso baalaadiki baka nwu banɔɔ di ofuɔntuu nwu kamɛ baawako- Yerusalem, Hebron, Yarmut, Lakis ku Eglon baka nwu.24Obe wɔ baakpaa baka ba mmle baawako ni Yosua, aalɛɛ Israel basuɔtɔ bamuu, ni aatɔkɔ kakpɛ kanyabayilatɛ ba niawa ni ku nnwɔɔ alɛ, “Biwa ninfũ biɛbayɔ nkpaa lee bitika di baka ba mmle simu.” Nioso baadie baawa sitũ babayɔ nkpaa lɛma baatika di simu lɛma.25Ni di Yosua latɔkɔ kakpɛ kanyabayilatɛ nwu alɛ, “Bitanyɛkɛ; bitanta nnɛɛ lafee ye. Biwɛ osie biekpee otu kafɔɔ. Nnya nle di SAATE nwu kamabla ni balo ba bamuu biofe ni ɔkpɛko.”26Ninfɛ di Yosua lalo baka nwu, aayɔ ma aasaka di awoso anɔɔ suoto, ni baadiɛ ma baasaka di awoso nwu suoto dialaadu kɔtɔɔfɔ nɛ.27Di kufĩ lamɛɛ nii, Yosua lata osuku alɛ basakatɛ ma di awoso nwu suoto baafuki ma baakpee di ofuɔntuu wɔ baawofa ni kamɛ. Baayɔ afuɔ kplɛkplɛ baatĩi ofuɔntuu nwu kanya, ate ninfa diɛbadu miɛ dii le mmle.Yosua Lafũ Amori Batii Kasɔ Aakyakaa
28Dii nwu nkpo Yosua lafũ Makeda. Aalo okpoo kplɛ nwu batii ku ɔka lɛma ku kapamii aawɔɔsa otii biala kaamɛ ninwu fɛɛ. Atabu kubanwii basiɛ nkpa. Ni aabla Makeda ɔka fɛ mmle aabla ni Yeriko ɔka nɛ.29Ninfɛ di Yosua ku Israel batii bamuu di ɔkyɛ nɔɔ ladie di Makeda baasifi baalaakpɛko Libna nɛ.30SAATE nwu kafɔɔ layɔ okpoo kplɛ nwu ku ɔka ninwu aakpee di Israel batii nnɛɛ. Yosua lalo otii biala di okpoo kplɛ nwu ku kapamii. Atabu kubanwii basiɛ nkpa ninfa. Ni aabla ɔka ninwu fɛ mmle aabla ni Yeriko ɔka nɛ.31Ninfɛ di Yosua ku Israel batii bamuu di ɔkyɛ nɔɔ ladie di Libna baasifi Lakis; ni aayila aakpɛko nwu nɛ.32SAATE nwu layɔ Lakis aakpee di Israel nnɛɛ, ni di Yosua lafũ nwu di dii nyɔɔfa suoto nɛ. Aalo otii biala di okpoo kplɛ nwu ku kapamii, fɛ mmle aabla ni Libna.33Nu di Geser ɔka Horam lawa aabakyakaako Lakis, kafɔɔ Yosua lalenkee nnwɔɔ ku bakpɛtɛ nɔɔ- dialaase di obe wɔ di kubanwii ditabu basiɛ ni nkpa.34Ninfɛ di Yosua ku Israel batii bamuu di ɔkyɛ nɔɔ ladie di Lakis baasifi Eglon; ni baayila baakpɛko nwu nɛ.35Baafũ okpoo nwu di dii nwu suoto, baalo ma ku kapamii, baawɔɔsa otii biala fɛɛ ninwu kamɛ, fɛ mmle baabla ni Lakis.36Ninfɛ di Yosua ku Israel batii bamuu di ɔkyɛ nɔɔ ladie di Eglon baasifi Hebron baalaakpɛko nwu nɛ.37Baafũ okpoo kplɛ nwu, baalo ma ku ɔka ninwu ku sekpooenyii ninwu ku otii biala ninwu kamɛ ku kapamii. Batabu kubanwii basiɛ nkpa. Fɛ mmle baabla ni di Eglon, baawɔɔsa Eglon fɛɛ ku otii biala ninwu kamɛ.38Ninfɛ di Yosua ku Israel batii bamuu di ɔkyɛ nɔɔ lamunikĩi baalaakpɛko Debir nɛ.39Baafũ okpoo kplɛ nwu, ni baalo ma ku ɔka ninwu ku sekpooenyii ninwu ku kapamii nɛ. Baawɔɔsa otii biala ninwu kamɛ fɛɛ. Batabu kubanwii basiɛ nkpa. Baabla Debir ku ɔka ninwu fɛ mmle baabla ni di Libna ku ɔka nɔɔ ku Hebron.40Nioso Yosua lalenkee kasɔ nwu kamuu di lekpenkpe kale nkyakaa ni ku Kalakasɔ, ku kufĩkamɛɛkɔ akpenkpe nkpaa ku kobokote nkyɛlɛlɛkɔ nwu ku baka lɛma bamuu. Atabu kubanwii basiɛ nkpa. Aawɔɔsa mba ninwuna ni bamuu fɛɛ, fɛ mmle di SAATE, Israel Yaa nwu ladiki nwɔ ni kanya.41Yosua lalenkee ma diakye ni di Kades Barnea dialaadu ni Gasa, diakye kafɔɔ di Gosen kasɔ kamuu dialaadu Gibeon.42Yosua lalenkee baka ba mmle ku nsɔ lɛma di obe onwii kamɛ, diekye SAATE, Israel Yaa nwu lakpɛ aata Israel.43Ninfɛ di Yosua ku Israel batii bamuu lakple baasifi kasiɛkɔ lɛma nwu di Gilgal nɛ.The Seed Company