Yeremia8
1“ ‘Di obe nwu kamɛ yi, babadiki baka ku Yuda banɔɔfotii akufi, olebatatɛ ku ɔlaababuɛtɛtɛ akufi, ku Yerusalem batii akufi di sɛkya lɛma kamɛ, SAATE nwu niebuɛ.2Babadiki nya manlakasa di kufĩ ku kɔwɛntɛ ku osi awɛntrɛbi amuu kalɔ. Asaa ya baabɔmbɔ baale nya ni bakpɛmblatɛ ku nnya, baatikanko nya baakaalɛ ni asaa baakyeko ni ɔkyɛ lɛma, ni baasumu nya kafɔɔ nɛ. Blɔbasiisa ma ee bakookaa ma, kafɔɔ abate fɛle aku ya ninte ni kaasɔ.3Kakɔlele letososa ma lekpee yi, batii ba niebu basi ni nkpa di kale kpile ka mmle kamɛ kamamiɛ kukpi manlenkee nkpa, SAATE wɔ Ninlenke ni niebuɛ.’
Okpile Ku Letokonanfi
4“Tɔkɔ ma falɛ, ‘Nnya ɔlaa wɔ di SAATE nwu kobuɛ ni alɛ:“ ‘Nse batii lɛnɔɔ, mansintaka baayila?Nse otii lemunikĩi eesifi, ansimpɛakple aawa?5Ni obe oso di batii ba mmle ntomunikĩi beesifi?Obe oso di Yerusalem mmunikĩi ansifi obe lele?Beenu-baka di kakyɔnkyɔ suoto;Beesĩ alɛ blɔpɛbakple.6Ntɔɔkyɔɔ atoko nwaa,kafɔɔ mammbuɛ ɔlaa wɔ ninlɛ nii.Otii kuonwii ninkyi di akpilesaa nɔɔ ɔbla suoto,ankaalɛ alɛ, “Obe lɛsaa ninle nle lɛbla ni?”Obiala lɛyɔ osuku nɔɔfɛle pɔnkɔ wɔ di ninu lɛsɛɛ oofe ni kakpɛ.7Bia kakyɛnyi di kolon-ye obe nɔɔ,lɛlaapɔɔ, yaakɔɔkɔ ku ntĩtĩi kafɔɔntofo obe wɔ mandie mansifi ni lɛba bamba lɛma.Kafɔɔ batii nii dieyeSAATE nwu abiesaa.8“ ‘Lɛ kanya oso biobuɛ bilɛ, “Buobe anu,diekye bukpe SAATE nwu kufiofa,”obe wɔ di nwaako asaabatuotɛ kakpanaweseelemunikĩisa nwu kuɔbla ni sɛlaa ku afunu?9Sinunsɔ kamakpɛ banumbentɛ;nnɛɛ kamafee ma mambuo nnɛɛ kafɔɔ.Di obe wɔ batoosĩ ni SAATE nwu ɔlaa,lɛmɛ-ninumbe okle bakpe?10Nkpo oso yi, kamayɔ basɔfɔ lɛma nta basuɔtɔ bamban-yɔ kafɔɔ afe lɛma nta basaate fɔle.Diɛyɔ ni di obisɔ diɛlaadu ni ɔnɔɔfo yi,bamuu kɔsɛɛsa anu manta asaa ɔwɛ;ɔlaababuɛtɛtɛ ku olebatatɛ nkyakaa,bamuu nkpe kakyɔnkyɔ.11Mankaasa batii nii nkɔfɛ ninu diɛsɛɛ ma.Mambuɛ alɛ “Atoko ɔkyɛ ole, atoko ɔkyɛ ole,”di obe wɔ di atoko ɔkyɛ ole nnaa nii.12Sinunsɔ kɔkpɛ ma di ayududusaa lɛma nwu ɔbla suoto?Oowo, sinunsɔ dilɔkpɛ ma saa;baaye bia mmle manunsɔ nii.Nioso babanɔɔ di banɔɔtɛ kamɛ;babawakosa ma kasɔ nse bɛɛnanfi ma kootoko,SAATE nwu niebuɛ.13“ ‘Kamafũ alesaa lɛma ya manwako ni nsifiko,SAATE nwu niebuɛ.Awosobi dilɔbatika di nta awoso suoto.Abue abi dilɔbatika di kowoso suoto,afata ninya kafɔɔ kamayɔɔ.Babaklee lɛsaa le lata ma nimanfũ ma ninɛɛ.’ ”14“Obe oso busi ninfũ?Bibasi dikudi!Biɛta butoso busifi sekpoo kplɛ siene nwubuɔlaawɔɔ ninfa!Diekye SAATE Yaa loo nwu ntoodiki wo ɛɛta kawɔɔni ɛɛta wo kafɔɔ kɔfa kpile ntu alɛ bunyi nɛ,diekye buɔɔbla okpile di suoto nɔɔ.15Buonyu osuku munta atoko ɔkyɛ ole,kafɔɔ dibiene kuninwii diiwa,diɛta ni ofiɛ ɔyɔɔsabeekafɔɔ difu lete ninkpe.16Balo bapɔnkɔ nwu ninwuna hɛɛhɛɛ nwukodie ninkye Dan;bapɔnkɔ-suɔtɔ lɛma diwikotũkunsa kasɔ kamuu.Batɔɔwa alɛ bɔɔbalalaasakasɔ nwu ku lɛsaa biala ninka suoto,okpoo kplɛ nwu ku batii ba bamuu ninsi ni ninfa.”17“Nyu lo, kamadiki asaanwu kpile nkpee ye kaamɛ,ku awɛɛfɛɛ ya di ɔfakũ dilɔbafuo ni omufũ,amanu ye,”SAATE nwu niebuɛ.Yeremia Sɛnyaami Owi Ɔta Batii Nɔɔ
18Oo Kɔnɛɛ kaafutu kpeetɛ nii di sɛnyaami kamɛ,otu nii kɔkpa kaamɛ nii.19Kyɔɔ batii nii kaku atokofakyeko kasɔ ka niekyo ni:“SAATE nwu nnaa di Sion?Ɔka nɔɔ nsinaa ninfa?”“Obe oso beekpee mi ɔblɔ ku atembi lɛma,ku bafɔɔ afiɔ lɛma nwu ninandie ni lɛsalɛsaa?”20“Ofiɛlɛbee ntoofe,kabienle kanya ntoose,ni munadiwɛ didiki kafɔɔ nɛ.”21Di obe wɔ batɔɔwɔsa ni batii nii yi, amii kafɔɔ ntɔɔwɔɔ;lasiɛ kaku, ni di difu lapɛ mi nɛ.22Kɔfa fifiale kukunwii nnaa di Gilead?Fablatɛ kuonwii nnaa ninfa?Ni obe oso di kɔfa ɔblannaa diɛta batii nii nkɔ?The Seed Company