Yeremia50
Baafũ Babel
1Nnya ɔlaa wɔ di SAATE nwu labuɛ aafenko ni di ɔlaabuɛtɛtɛ Yeremia suoto aakyeko ni Babel ku Babel batii kasɔ suoto alɛ:2“Bibuɛ, bieyie lɛkya di nnle nwu kamɛ,bitakatɛ flankaa katoo bieyie nwu lɛkya;bitanwofasa lɛsalɛsaa, kafɔɔ bibuɛ bilɛ,‘Babafũ Babel;babakpee Bel sinunsɔ,difu kamapɛ Marduk.Babakpee asaa atembi nɔɔ nwu sinunsɔdifu kafɔɔ kamapɛ afiɔtii nɔɔ nwu.’3Kale kawo ka niekye ni katookasɔ kamadieko nwɔ,kamalalaasa kasɔ nɔɔ antɛ.Kuonwii dilɔbasiɛ ninka suoto;batii ku babɔkɛɛ, akyuu nwu anyɔ kamatoso mansifi.Israel Okple Ɔwa
4“Di ayi nwu kamɛ, di obe nwu kamɛ,”SAATE nwu niebuɛ,“Israel batii ku Yuda batii kamasimankyɛ ku nnumɛɛ manaawolaa SAATE Yaa lɛma nwu.5Babakaalɛ osuku wɔ manfe mansifi ni Sionmammunikĩisa anu lɛma mankyɔɔ nwu.Babawa mamanii mankaa di SAATE nwu suotodi kanya ninii ka ninaa ni kaloo kamɛka manamayee ni diidii.6“Batii nii lale bafoso ba niayu nii;bafoso bakpatɛ lɛma laleko ma katũ baakyu osukuni baata ma baakyɛ baakyikyii di abokote nwu suoto nɛ.Baalalaa baakyi abokote ku akpenkpe,ni baayee mma bamu ɔnyɛɛ katɛkɔ nɛ.7Otii lele niɛnya ma mbɛbɛɛ ma;balo lɛma labuɛ alɛ, ‘Buole lɛpɔɔ bakpitɛ,diekye baabla okpile di SAATE nwu suoto, nwaako sɛfakaweekɔ lɛma nwu,SAATE nwu, bate lɛma osuku onyu nwu.’8“Bitoso bidie di Babel;bidie di Babel batii kasɔ suoto,biɛbla fɛle batie ba ninleko ni bafoso katũ.9Diekye kamasɛnkɛsa nnle siene akudi kplɛ awo nkyeko katookasɔn-wako di Babel suoto.Babayɔ akpɛsaa lɛma di suoto nɔɔ,katookasɔ kafɔɔ babakye mamamufũ nwɔ.Akplɔ lɛma kamate fɛle bakpɛtɛ ba ninkpe ni lɛsaatofo di akplɔ ɔtaa kamɛmanampɛbaakple ni ku nnɛɛ fukuti.10Nioso babafũ Babel batii kakpɛ kamɛ asaa;mba bamuu nimafũ nwɔ ni kakpɛ kamɛ asaa kamamiɛ,”SAATE nwu niebuɛ.Babel Okpoo Obiɛ
11“Ta biɔpɔ̀, minnya ni suoto lɛyɔɔ oso yi,aye ba nikoyu ni atesaa nii,ta biokpee kɔkyɔ minkyi ni fɛle nankyue-sanko wɔ nikowee ni kamɔɔbiɔfafaa ni kafɔɔ fɛle bapɔnkɔ-suɔtɔ oso yi,12sinunsɔ kamakpɛ yaaye osie kanya;mankpee nnwɔ nielofo ye ni sinunsɔ.Abale ɔyɛntɛle di nnle kamɛ-lepookuu, kasɔ kosole ku ɔfaafuu.13Ta SAATE nwu ɔblɔ oso yi, otii kuonwii dilɔbasiɛ nwɔ kaamɛkafɔɔ bababla nwɔ ante ofukuti diesifi nii.Lɛyɛkɛ kamapɛ batii ba bamuu ninfe ni di Babel mankpa sinwu,ta nkɔ nɔɔ nwu mmuu oso.14“Aye ba bamuu nintaa ni kɔtaa,biyila bikyi Babel.Bitaa nwɔ! Bitantaa akplɔ kuanwii biayu,diekye aabla okpile di SAATE nwu suoto.15Biyiisa kudu bikpee nwɔ di ɔfankyi biala!Atɔɔta disi, ayo takale nɔɔ nwu ntɔɔnɔɔ,seyoyiɛ nɔɔ ntoobiɛ site kaasɔ.Di nle mmle nle ni SAATE nwu ɔbla okyisa oso yi,bibla nwɔ bikyisa;biblɔɔ fɛ mmle aabla ni bawo nɔɔ.16Biwɔɔsa alesaa-kpeetɛ,ku asaafiɛlɛtɛ ku kasaka nɔɔ bidiki di Babel.Ta nyinkatɛ nwu kapamii oso yi,otii biala apɛakple asifi nnwɔɔ omu nɔɔ batii nfũ,di otii biala atoso asifi nnwɔɔ omu nɔɔ kasɔ suoto.Israel Ɔpɛokple Osifi
17“Israel nle bafoso ba bɛɛsamiisa nidi bakyata latososa baasifiko nii.Nnwɔ niakasa nwɔ ni ɔbɛbɛɛniale Asiria ɔka nɛ;nnwɔ niayɛntɛ nwɔ ni akufi obibiɛniale Babel ɔka Nebukadnesar nɛ.”18Nkpo oso, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ:“Kamananfi Babel ɔka ku kasɔ nɔɔ kootokofɛ mmle lananfi ni Asiria ɔka kootoko.19Kafɔɔ kamakplesa Israel n-wako alesaa nɔɔ kalekɔ kamuamale asaa di Karmel ku Basan;abawɛ anle ammiɛdi Efraim ku Gilead akpenkpe suoto.20Di ayi nwu kamɛ, di obe nwu nkpo kamɛ,”SAATE nwu niebuɛ,“bababuo di Israel lɛpɔɔ okpi kamɛ mannyu,kafɔɔ kuonwii dilɔbawɛ,bababuo kafɔɔ di Yuda sikpile kamɛ mannyu,kafɔɔ blɔbanya kuonwii,diekye kamayɔ nkyɛ mba lediɛ bɛɛwɛ ni nkpa.SAATE Nwu Lɛkanko Di Babel Suoto
21“Bidieko Merataim kasɔ nwuku mba ninsi ni di Pekod.Bitikanko, bielo, biɛwɔɔsa ma fɛɛ,”SAATE nwu niebuɛ.Bibla lɛsaa biala lɛtɔkɔ ye ni.22Kakpɛ kudú nkpe di kasɔ nwu suoto,kawɔɔ kplɛ kudú kule!23Nyu mmle di kasɔ kamuu ntɔɔlalaakeebibiɛ, kɛɛkpakpaa ni lo!Nyu mmle di Babel nte ni ofukuti,di nnle nwu kamɛ lo!24Oo Babel, lɛkyɔɔ fɔ okũ,ni kuamufũ fɔ fiɛ faatofo nwu ole nɛ;ni baanya fɔ baamufũ nɛ,ta faakyidi ni SAATE nwu ɔlaa oso.25SAATE nwu ntɔɔsɛkɛtɛ akpɛsaa nɔɔ katɛkɔeedieko ɔblɔ yakayaka nɔɔ akpɛsaa,diekye SAATE Kplɛ wɔ Ninlenke ni nkpe ɔkpɛ ɔbladi Babel batii kasɔ suoto.26Bikye kakyonkɔ biwa nwɔ di suoto.Bibiɛ bibio di alesaa nɔɔ ntɛkɔ;bikyankyii nwɔ bitɛ fɛle alesaa ya beesiisa bɛɛtɛ ni.Biwɔɔsa nwɔ fɛɛ, bitandiɛ otii kuonwii kafɔɔ aawɛ nkpa atɔɔ.27Bilo banankyue-suɔtɔ nɔɔ bamuu;bita ma basoo basifi babɔkɛɛ kalokɔ nwu!Bayɔɔsa! Diekye dii lɛma nwu ntoowo ,obe wɔ dikaatɛ alɛ baananfi ma ni kootoko.28Bikyɔɔ batosotɛ ku batanikotɛ ba niekye ni Babel atoko,boobuɛ ni di Sionmmle di SAATE Yaa loo nwu ntɔɔbla ni ɔbla okyisa,ɔbla okyisa kuɔta ni olekatakɔ nɔɔ nwu.29“Bilɛɛ akplɔ bataatɛ di Babel suoto,aye ba bamuu nintaa ni kɔtaa.Bimana nwɔ omuu bikyi;bitanta kuonwii latoso.Bitɔɔ letota di sɛsaabla nɔɔ suoto;biblɔɔ fɛ mmle atɔɔbla ni.Diekye atɔɔkpɔnɔfɔsa SAATE nwu,Israel Klekletɛ nwu.30Nkpo oso, bakosopo nɔɔ kamakpi mante di akpaka;bakpɛtɛ nɔɔ bamuu kafɔɔ kamalo kanana di dii nwu nkpo suoto,”SAATE nwu niebuɛ.31“Oo afɔ wɔ nintakatɛ ni suoto katoo, nyu lo, lɛtaka n-yɛ fɔ di suoto,”SAATE nwu, SAATE wɔ Ninlenke ni niebuɛ,“diekye dii lɛfɔ nwu ntoowo,obe wɔ dikaatɛ alɛ baananfi fɔ ni kootoko.32Otii wɔ nintakatɛ ni suoto katoo kamatuula annɔɔkuonwii kafɔɔ dilɔbakyakaako nwɔ ataka;kamakɛsɛɛsa ɔtɔ di sekpoo nɔɔ nwu kamɛ,nnwɔ nimafiɛ batii ba bamuu niɛmana nwɔ beekyi nii.”33Nnya ɔlaa wɔ di SAATE wɔ Ninlenke ni kobuɛ ni alɛ:“Beenyinka Israel batii,ku Yuda batii kafɔɔ.Bamufũtɛ lɛma lemufũ ma osie kanya,beesĩ alɛ bloodiɛ ma basifi.34Kafɔɔ dikitɛ lɛma nkpe osie;Leyooto nɔɔ ninle SAATE wɔ Ninlenke ni nɛ.Nnwɔɔ nimakpɛ osie kanya anta maalɛ aayɔ ɔnyɛɛ ɔtɛ anwako di kasɔ lɛma suoto nɛ,kafɔɔ ɔlɔbata batii ba ninsi ni di Babel ɔnyɛɛ ɔtɛ.35Kapamii di Babel batii suoto!”SAATE nwu niebuɛ-“di mba ninsi ni di Babel suotoku banɔɔfotii ku banumbentɛ nɔɔ suoto!36Kapamii di balaatɛ ɔlaababuɛtɛtɛ nɔɔ suoto!Babakple babuutɛ!Kapamii di bakpɛtɛ nɔɔ suoto!Difu kamayii ma kamɛ.37Kapamii di bapɔnkɔ ku bakeke nɔɔ suotoku bafɔɔ bakpɛtɛ ba bamuu ninsi ni di kamɛ nɔɔ suoto!Bɔɔwa basanko ɔbakple.Kapamii di lɛsaawɛ nɔɔ suoto!Babayɔ asaa lɛma fɛ kakpɛ kamɛ asaa.38Koleele kudie di ntu nɔɔ suoto!Sekle nɔɔ kamasɔɔ.Diekye afiɔ kasɔ kale,afiɔ ya nimabuo ni afĩi ku difu.39“Nioso ɔfaafuu kamɛ babɔkɛɛ ku lepoo kamɛ baweewee kamasiɛ ninfa,nfa kafɔɔ di asukusuku kamasiɛ nɛ.Batii dilɔbasinsiɛ ninwu kamɛ diidiiee basiɛ ninwu kamɛ diɛyɔ ni di kɔna diesifi ni kɔna.40Fɛ mmle di Yaa lawɔɔsa ni Sodom ku Gomoradiɛkyakaa ni di sekpoo se niakaako ma ni,”SAATE nwu niebuɛ,“nkpo di otii kuonwii dilɔbasiɛ ninfa nɛ;otii kuonwii dilɔbasiɛ ninwu kamɛ.41“Nyu lo! Bakpɛtɛ banwii lekye katookasɔ bɔɔwa;kale kplɛ ku baka kpinwukodie mankye kasɔ nwu nyɛntɛlekɔ man-wa.42Bakpakũ kɔtaa ku akplɔ;bakpe amumu, mananya ni kafɔɔ nyaami.Kudú lɛma kodie fɛle lekpo le nikɔpɛ nii,nse basi di bapɔnkɔ lɛma suoto bɔɔwa;bɔɔwa fɛ basuɔtɔ ba nikpe ni di kakpɛ kamɛalɛ bɔɔbadieko fɔ nii, Oo Babel Obisankobi.43Babel ɔka ntonu sɛlaa eekyeko suoto lɛma,ni di nnɛɛ lefee nwɔ nɛ.Lɛyɛkɛ lɛpɛ nwɔ osie kanya,oonu dibuo fɛle osanko wɔ di kolofo koonu nii.44Fɛle kyata wɔ nikoedie ankye ni Yordan lepookuu kamɛ an-wa nisɛfakaweekɔ ka ninsi ni lɛla.Kamatososa Babel di kasɔ nɔɔ suoto di ninumpoo lɛpɛ kamɛ.Owe ninle nnwɔ beediki ni alɛ kadiki nwɔ nta ni nle mmle?Owe ninte fɛle ami, owe kafɔɔ nimafuo mi oyilako?Ɔmɛ fosokpatɛ kafɔɔ nimafuo mi oyila di suoto?”45Nkpo oso, binu disibu le di SAATE nwu ntɔɔbla ni di Babel suoto,lɛsaa le atɔɔtɛ ni ɔbla di Babel batii kasɔ suoto:Babawududusa bafoso mbitɛ mansifiko;abawɔɔsa sɛfakaweekɔ lɛma nwu klekle ta mma oso.46Kasɔ kamatukũ ta Babel omufũ kudú didie oso;kaku nɔɔ owi kamadie kanaadu nnle nwu kamɛ.The Seed Company