Yeremia49
SAATE Nwu Letokonanfi Di Amon Suoto
1Ɔlaa di Amon batii suoto:Nnya ɔlaa wɔ di SAATE nwu kobuɛ ni alɛ:“Israel nnaa babisuɔtɔbi?Anaa atesaa baletɛ?Ni obe oso di Molek ntoofũ Gad ɛɛbla ole nwɔ?Obe oso di batii nɔɔ nsi di sekpoo nɔɔ kamɛ?2Kafɔɔ obe kɔwa,”SAATE nwu niebuɛ,“kamata ni kakpɛ kudú ndie nidi Amon batii Raba suoto;dibakple ni kawɔɔ ditii,babakpee ni kafɔɔ sekpoenyii se niɛmana nwɔ siekyi ni ɔtɔ.Nse Israel ntootososabatii ba niatososa nwɔ nii,”SAATE nwu niebuɛ.3“Ao Hesbon, biwi kaku, diekye batɔɔwɔɔsa Ai!Ao Raba batii, biyiisa kudu!Bi-nyukũ aboko biesiɛ kaku;biekusa bife katoo ku kala di seyoyiɛ nwu kamɛ,diekye Molek kamasifi sɛlanle kamɛ,diɛkyakaa ni di olebatatɛ ku banɔɔfotii nɔɔ.4Obe oso biɔkanta di sɛtaata lee suoto,biɔkanta di sɛtaata lee lɛlɛ suoto nkpo?Oo onukwale ɔtanletɛ obisankobi,feetika disi di lɛsaawɛ lɛfɔ suoto foobuɛ falɛ,‘Owe nimadieko mi?’5Kamata difu mpɛ fɔdibakye ni batii ba bamuu niɛmana fɔ beekyi ni nfũ,”SAATE nwu, SAATE wɔ Nilenke ni niebuɛ.“Babatososa obiala lee minsifi,kuonwii kafɔɔ dilɔbasiisa mba nietoso nii.6“Kafɔɔ sɛmaa yi, kamakple n-se Amon batii lɛlɛ ɔyɔ ɔta ma,”SAATE nwu niebuɛ.
SAATE Nwu Lɛkanko Di Edom Suoto
7Ɔlaa di Edom suoto:Nnya ɔlaa wɔ di SAATE wɔ Nilenke ni kobuɛ ni alɛ:“Ninumbe nsinnaa di Teman?Banumbentɛ kɔkà ntɔɔwɔɔ?Ninumbe lɛma nwu ntooyu?8Aye ba ninsi ni di Dedanbimunikĩi bietoso bilaawofa di sifuɔntuu se niekyofo ni kamɛ,diekye kamata ɔlaa kpile ntũ Esaudi obe wɔ kamananfi nwɔ ni kootoko.9Nse awosobi basɛsɛɛtɛ lɛwa ɔkyɛ lee,blɔbadiɛ awosobi kafui batɛ?Nse bayu lɛwa kayukɔ ku kakyɛ,diele asaa ya boomiɛ ni di lɛpɔ kanya lete babayu?10Kafɔɔ kamadiki Esau lɛkyɔtɔ;kamatikiti nwofakɔ nɔɔ ntɛ kaayi,di mmle anaafuo ni suoto nɔɔ owofasa.Babi nɔɔ, banantii nɔɔ ku mba ninsi bakaako nwɔ ni kamawɔɔ,nnwɔɔ kafɔɔ ɔlɔbasinwɛ.11Bidiɛ bakuɛbi lee bitɛ; kamanyu ma man-wɛ nkpa.Bakpisɔfɔ lee kafɔɔ kafuo mi disi otika.”12Nnya ɔlaa wɔ di SAATE nwu kobuɛ ni alɛ: “Nse mba ninankaatɛ alɛ baanyi ni di opũ nwu kamɛ lenyi mi, ni obe oso baadiɛ ma alɛ baananfi ma kootoko? Flɔbasifi alɛ baananfi fɔ kootoko. Kafɔɔ dikpeni feenyi mi.13Lɛka di suoto nii,” SAATE nwu niebuɛ, “alɛ Bosra kamakple kawɔɔ ku lɛyɛkɛsaa, lɛmansaa ku lɛkpaani; sekpoo ninwu simuu kafɔɔ kamawɔɔ sinte dinaa ni kaloo.”14Ntoonu ɔlaa lekyeko SAATE nwu nfũ alɛ:Beediki otii beekpee nnle nwu alɛ baalaabuɛ alɛ,“Bisiisa bawo biɛladieko nwu!Bitaka biɛkyɛ kakpɛ!”15“Nunua yi, kamabla fɔ fante bibii di nnle nwu kamɛ,babanyu fɔ nyakatãa di batii kamɛ.16Difu le foonyu falɛ dikpe fɔ niku otu lɛfɔ lɛkanta ntɔɔkyɔnkyɔ fɔ,afɔ wɔ ninsi ni di afuɔnkpaa sebo,feediki ni kasiɛ di lekpenkpe takale osi.Nu fɛɛbla leyo lɛfɔ diɛtaka fɛ klikpo lele yi,kamakpakatɛ fɔ nkyeko nfa n-wako kasɔ,”SAATE nwu niebuɛ.17“Edom kamakple lɛyɛkɛsaa;dibabla mba bamuu ninwaalɛ manfe ni ninfa ɔkpɛ mantũkunsa asita nkɔ ninwu mmuu oso.18Fɛ mmle baawɔɔsa ni Sodom ku Gomora,ku mba niasiɛ baakaako ma nii,nkpo di otii kuonwii dilɔbasiɛ ninfa nɛ;otii kuonwii dilɔbawɛ ninwu kamɛ.”SAATE nwu niebuɛ.19“Fɛle mmle di kyata wɔ niekye Yordan lepookuu kamɛ ɔɔwa nisɛfakaweekɔ ka ninsi ni lɛla yi,nkpo kamatososa Edom ndiki di kasɔ nɔɔ suoto di onumpoo lɛpɛ kamɛ nɛ.Owe ninle nnwɔ beediki ni alɛ kadiki nta ni nle mmle?Owe ninte fɛle ami, abafuo mi ni kafɔɔ ɔwaaniiko?Ɔmɛ fosokpatɛ kafɔɔ nimafuo ɔtaka oyila mi di suoto?”20Nkpo oso, binu lɛsaa le di SAATE nwu ntɔɔtɛ ni ɔbla di Edom suoto,disibu le atɔɔbla ni di mba ninsi ni di Teman suoto:Babawududusa bafoso mbitɛ mansifiko;abawɔɔsa sɛfakaweekɔ lɛma nwu klekle ta mma oso.21Lɛnɔɔ lɛma nwu kudú kamata kasɔ ntũkũ;kaku owi lɛma kamadie ninaadu Lekpo Sɛɛle.22Binyu lo! Klikpo onwii kamasoo an-wa kasɔ,anfukuti afoko nɔɔ antĩi Bosra suoto.Di dii nwu nkpo kale, Edom bakpɛtɛ situkamate fɛle osanko wɔ di kolofo konu ni otu.
SAATE Nwu Lɛkanko Di Damasko Suoto
23Ɔlaa di Damasko suoto:“Nnɛɛ ntoofee Hamat ku Arpad,diekye batoonu ɔlaa kpile.Otu ntɔɔkpà ma,diokpee ma ni kubuɛ fɛle lekpo le ninantɛ ni ɔnyɛɛ.24Damasko ntɔɔbla kpiɛkpiɛ,atoomunikĩi alɛ ootoso,lɛyɛkɛ kafɔɔ ntoomufũ nwɔ;ninyinyii ku dibuo ntoolenkee nwɔ nnɛɛ,diobuo nwɔ fɛle osanko wɔ di kolofo konu nii.25Batosĩ okpoo kplɛ nwu niefũ ni leyooto,okpoo wɔ suoto nin-nya ni suoto lɛyɔɔ.26Nwaako, babalo bakosopo nɔɔ mantɛ di akpaka;bakpɛtɛ nɔɔ bamuu kafɔɔ kamalo kanana di dii nwu nkpo suoto,”SAATE wɔ Ninlenke ni niebuɛ.27“Kamakpee Damasko seyoyiɛ ɔtɔ;kubafiɛ Ben-Hadad lɛsaawɛ nwu.”SAATE Nwu Lɛkanko Di Kedar Kɔna Ku Hasor Okpoo Suoto
28Ɔlaa di Kedar ku Hasor sɛka nlekɔ suoto, mbe di Babel ɔka Nebukadnesar ladieko nii:Nnya ɔlaa wɔ di SAATE nwu kobuɛ ni alɛ:“Bitaka, biedieko Kedarbiɛwɔɔsa kufĩkantunkɔ batii nwu.29Babafũ akpanta ku babɔkɛɛ lɛma;babatuka akpaayo lɛma mansifikodiɛkyakaa ni di atoo lɛma ku babɔkɛɛ ba nintuka ni atoo.Batii kamayiisa kudú mantɔkɔ ma alɛ,Difu nkpe di ɔfankyi biala!’30“Bitoso wala bisifi!Aye ba ninsi ni di Hasor, bisiɛ di afuɔntuu kyofole kamɛ,”SAATE nwu niebuɛ.“Babel ɔka Nebukadnesar ntookũ kanwumbe di suoto lee;atɔɔbla disibu kpile di suoto lee.31“Bitaka biedieko kale ka ninte ni buɛɛ,nka niediki suoto atoko kasi ni,”SAATE nwu niebuɛ alɛ,“kale ka ninaa ni n-yoko ee abɔɔsaa sewoso;batii nɔɔ lete ninsi.32Babɔkɛɛ lɛma ba nintuka ni atoo kamakple kakpɛ kamɛ asaa,banankyue ɔlambu lɛma kamakple ayusaa.Kamasamiisa mba ninkpe ni di nkyonkɔ nkpete di kɔfɛɛfɔ kamɛninta kafɔɔ ɔlaa kpile ntũ ma di ɔfankyi biala,”SAATE nwu niebuɛ.33“Hasor kamakple lepoo kamɛ baweewee kasiɛkɔ,lɛba le di batii dilɔbasinwɛ ni dinaa ni kaloo.Kuonwii dilɔbasiɛ ninfa;otii kuonwii dilɔbasiɛ ninwu kamɛ.”
SAATE Nwu Lɛkanko Di Elam Suoto
34Nnya SAATE nwu ɔlaa wɔ niawa kuata ni ɔlaabuɛtɛtɛ Yeremia aakyeko ni Elam suoto, di Yuda ɔka Sedekia sɛka ole kasɔkayekɔ kamɛ:35Nnya ɔlaa wɔ di SAATE wɔ Ninlenke ni kobuɛ ni alɛ:“Nyu lo, kamafee Elam kɔtaa nwu,kɔtaa ko niɛta ma bakpe ni osie.36Kamayɔ afɛɛfɔ ana ya niekye ni osi nsiɛkɔ nna nwun-wako di Elam suoto;kamasamiisa ma nkpete di afɛɛfɔ nwu ana kamɛ,ni kale kukanwii dilɔbawɛdi Elam balanle dilɔbakyɛ nii.37Kamakpee Elam lɛyɛkɛ di balo nɔɔ anu,di batii ba nintikanko alɛ boolo ma ni anu;kamata ɔlaa kpile ntũ ma,bia lɛblɔfiɛ nii yakayaka,”SAATE nwu niebuɛ.“Kamatikanko ma ku kapamiininaase di obe wɔ kamata kunloo ma nii.38Kamase lɛkakpomii nii di Elamnin-wɔɔsa ɔka ku banɔɔfotii,”SAATE nwu niebuɛ.39“Kafɔɔ di obe owo nikɔwa ni kamɛkamakplesa Elam lɛsaawɛ nɔɔ ntɔɔ,”SAATE nwu niebuɛ.The Seed Company