Yeremia14
Koleele Kpile Nwu
1Nnya ɔlaa wɔ di SAATE nwu latɔkɔ ni Yeremia di koleele nwu suoto alɛ:2“Yuda nsi kaku,sekpoo kplɛ nɔɔ kowi sikududu;boowi kaku osie kanya manta kasɔ nwu,lɛfaa kafɔɔ kodie ninkye Yerusalem.3Banɔɔfotii nkpee bakpɛmblatɛ lɛma alɛ balaadu ntu bawako;mankyɛ ntu adubiɔ nwukafɔɔ man-wɛ ntu kunwii.Mankplesa akuuku lɛma fukuti manwako;nnɛɛ nfee ma mankpɔkpɔtɔ,mantĩi asi lɛma.4Kasɔ nwu ntoomumuɛta kanto dilɔnɔɔ akpete ni di kasɔ nwu suoto oso;nnɛɛ ntoofee afe bakpɛntɛ, nibeetĩi asi lɛma kafɔɔ nɛ.5Bia kakpĩni di lepoo kamɛntoso andiɛ dibi nɔɔ le eelofo ni,ta di sɛfa nnaa ni oso.6Lepoo kamɛ babɔkɛɛ ba nintuka ni atoo n-yila di abokote fukuti suotomanwuna hɛɛhɛɛ fɛle lepoo kamɛ bawewee;anumbi lɛma ninnyata alesaa kaweekɔ ka ninnaa ma ni oso.”7Kuntɛ sikpile loo nle kamaa oyila ɔlaa di suoto loo yi,Oo SAATE, bla lɛsaa ta leyooto lɛfɔ oso.Diekye nkpaamaa okple loo mpɔ osie kanya;butɔɔbla okpile di suoto lɛfɔ.8Oo Israel Osuku Onyu,Dikitɛ nɔɔ di nimiina obe kamɛ,obe oso fate fɛle ɔfɔɔ di kasɔ nwu suoto,fɛle osuku kyɛntɛ wɔ ninsiɛ ni kakyɛ kanwii lete?9Obe oso fate fɛle osuɔtɔ wɔ niɛkpɔkpɔtɔ nifɛle kpɛtɛ wɔ ninaa ni osie alɛ aafũ ni batii nkpa?Oo SAATE, fasi di kamɛ loo,leyooto lɛfɔ kafɔɔ manlɛɛ wo;tansĩ wo!10Nnya ɔlaa wɔ di SAATE nwu kobuɛ ni di batii ba mmle suoto alɛ:“Mambɔmbɔ ɔkyɛ ɔlalaa okyi nwaa;mannkunkudusa nkpaa lɛma.Nkpo oso SAATE nwu ninnfũ ma aakpee;nfɛ abanyuma amumu lɛma nwuannanfi ma kootoko ta sikpile lɛma oso.”11Ninfɛ di SAATE nwu latɔkɔ mi alɛ, “Tampɛ ɔlaa faata batii ba mmle sitũ ɔkyɛ.12Kuntɛ man-nii kanya yi, nɔmanu kaku lɛma owi; kuntɛ manta ofiɛ asaaɔta ku alesaa asaaɔta yi, nɔmafũ nya. Kafɔɔ kamawɔɔsa ma ku kapamii, kɔka-ɔkpɛ ku ofiɛ kpile.”13Kafɔɔ labuɛ nlɛ, “Ao, SAATE Kplɛ, ɔlaababuɛtɛtɛ nwu kɔtɔkɔ ma ɔtɔkɔ, ‘Bilɔbanya kapamii nwu ee kɔka kukpɛ ye. Nwaako kamata ye atoko ɔkyɛ ole wɔ ninaa ni kaloo di lɛba le mmle.’ ”14Ninfɛ di SAATE nwu latɔkɔ mi alɛ, “Ɔlaababuɛtɛtɛ nwu kobuɛ kakyɔnkyɔ sɛlaa mantɛ di leyooto nii kamɛ. Ninkpee ma ee ndiki ma ee nkakatɛ nta ma. Sɛlaa ku afunu asaaɔnya, sɛbɔ ɔpɛ, afiɔ ɔtɔ ku mma bamu asibu kpile lɛma sɛlaa boobuɛ mantɛ manta ye.15Nkpo oso nnya ɔlaa wɔ di SAATE nwu kobuɛ ni di ɔlaababuɛtɛtɛ ba nikobuɛ sɛlaa mantɛ ni di leyooto nii kamɛ alɛ: Ninkpee ma, kafɔɔ boobuɛ alɛ, ‘Kapamii ee kɔka-ɔkpɛ kukunwii dilɔbawa di kasɔ ka mmle suoto.’ Ɔlaababuɛtɛtɛ nwu kamawɔɔ di kapamii ku kɔka-ɔkpɛ kanya.16Babafuki batii ba kafɔɔ boobuɛ sɛlaa mantɛ manta ni man-yu di Yerusalem akpaka suoto ta kɔka-ɔkpɛ ku kapamii nwu oso. Otii kuonwii dilɔbawɛ abakookaa ma nii ee basɔfɔ lɛma, babisuɔtɔbi lɛma ee babisankobi lɛma. Kamanyɛɛnɛ sɛlaa kpile otũ se niesiɛko ma ni nkpete ma di suoto.17“Tɔkɔ ma sɛlaa se mmle falɛ:“ ‘Ta anumbi nii ayii ku nnumɛɛ blɔblɔblɔkakũ ku kakyɛ obe lele;diekye kakpeelebitɛ nii- batii nii-ntoofũ kakɔ osie kanya,kakɔ dibinte.18Nse lɛkyɛ kasɔ nwu yi,nnya batii ba beelo ni ku kapamii;nse lɛkyɛ okpoo kplɛ nwu kamɛ,nnya batii ba nikokpi ni di kɔka-ɔkpɛ kanya.Ɔlaabuɛtɛtɛ ku oletatɛ akyuu nwu anyɔ,ntoosifi kasɔ ka manan-ye ni suoto.’ ”Batii Nwu Latikiti SAATE Nwu Lekoto
19Faasin-yɔ nwu ole di Yuda suoto saa?Fatookyidi Sion?Obe oso fatoopila wo nkpoalɛ blaafuo wo ofiɛ ɔyɔɔsa?Buonyu osuku munta atoko ɔkyɛ ole,kafɔɔ dibiene kuninwii diiwa,diɛta ni ofiɛ ɔyɔɔsabee,kafɔɔ difu lete ninkpe.20Oo SAATE, butootofo amumu looku bate loo lɛpɔɔ okpi nwu;nwaako butɔɔbla okpile di suoto lɛfɔ.21Ta leyooto lɛfɔ nwu oso yi, tansĩ wo;tantekete dibu di lɛkakpomii klekle lɛfɔ suoto.Nyuma kanya ninii lɛfɔ le faabla ni ku awo,tanlalaasa ni.22Nnle nwu afiɔ ya ninandie ni lɛsalɛsaa kawo nta kanto?Kolo di nkũ kumu nta kanto n-wiwii?Oo SAATE Yaa loo, oowo, afɔ ninta wo.Nkpo oso osuku loo onyu nsi di kamɛ lɛfɔ,diekye afɔ ninle nnwɔ nimbla ni n-ya mmle amuu.The Seed Company