Yeremia13
Yeremia Laya Dibula Fɛnɛnɛ Ofiamɛ
1Nnya ɔlaa wɔ di SAATE nwu labuɛ aatɔkɔ mi ni alɛ: “Tɔɔkyɛ faalaaya dibula fɛnɛnɛ ofiamɛ faayɔ nwu fatika di ɔtɔ̀ lɛfɔ, kafɔɔ tanta ntu lakaa nwu di suoto.”2Nioso laya ofiamɛ latika di ɔtɔ̀ nii fɛ mmle di SAATE nwu labuɛ ni kanya.3Ninfɛ di SAATE nwu ɔlaa lawa kuatɛɛ lɛnyɔɔfa alɛ:4“Yɔ ofiamɛ wɔ faaya ni feetika ni di ɔtɔ̀ lɛfɔ faasifi Perat falaakokaa nwu ninfa, di afuɔnkpaa kɔkà kamɛ.”5Nioso lakyɛ lalaakookaa nwu di Perat, fɛ mmle di SAATE nwu latɔkɔ mi nii.6Ni di ayi kpinwu sɛmaa, SAATE nwu latɔkɔ mi alɛ, “Tɔɔkyɛ Perat nfɛ falaayɔ ofiamɛ wɔ latɔkɔ fɔ nlɛ laakookaa ni ninfa.”7Nioso lakyɛ Perat lalaakutu ofiamɛ nwu ladiki, ni layɔ nwu di lɛba le lakookaa nwu ni nɛ, kafɔɔ ofiamɛ nwu latɔ̀, kutasinlɛ kafɔɔ kuata ni lɛsalɛsaa ɔblako.8Ninfɛ di SAATE nwu ɔlaa lawa kuatɛɛ alɛ:9“Nnya ɔlaa wɔ di SAATE nwu kobuɛ ni alɛ: ‘Nkpo okle kafɔɔ kamawɔɔsa Yuda lɛkanta nwu ku Yerusalem lɛkanta kplɛ nwu nɛ.10Batii kpile ba mmle niesĩ ni ɔlaa nii atoko ɔkyɔɔ, batikanko ni situ lɛma atokopĩsaa, bɛɛkyɛ batikanko ni bayaa bamba, bɔɔbla ni sɛkpɛ lɛma, mantɔ ma ni kamate fɛle ofiamɛ wɔ mmle- blɔbadie lɛsalɛsaa saa!11Diekye fɛ mmle man-nii ofiamɛ mankyisa ni di otii ɔtɔ̀ yi, nkpo lenii Israel leyo nimuu ku Yerusalem leyo nimuu lɛkaasa di suoto nɛ, alɛ baale batii nii manta leyooto nii ku katansa nii ku dibu nii. Kafɔɔ baakyɔɔ atoko.’ SAATE nwu niebuɛ.Nta Dikuuku Nwu
12“Tɔkɔ ma falɛ: ‘Nnya ɔlaa wɔ di SAATE Israel Yaa nwu kobuɛ ni alɛ: Bakpete nta bayiisa dikuuku biala.’ Nse bɛɛkaalɛ fɔ kafɔɔ alɛ, ‘Buoye bulɛ baakpete nta man-yiisa dikuuku biala kamɛ?’ yi,13ni faatɔtɔkɔ ma falɛ, ‘Nnya ɔlaa wɔ di SAATE nwu kobuɛ ni alɛ: Kamata lɛtansiɛ n-yii batii ba bamuu ninsi ni di kasɔ ka mmle suoto, di baka ba ninsi ni di Dawid lɛkakpomii suoto, olebatatɛ, ɔlaababuɛtɛtɛ ku batii ba bamuu ninsi ni di Yerusalem nkyaakaa nii.14Kamasansa ma onwii, onwii di owo suoto, babi ku bate kyɛkyɛ, SAATE nwu niebuɛ. Nɔmata nyaami ɔnya ee sifutule ole ee kafutu onu ditĩi mi osuku di ɔwɔɔsa lɛma suoto.’ ”Yeremia Lasĩ Ɔlaa Aata Di Lɛkanta Suoto
15Binu, biɛkyɔɔ atoko nwaa kafɔɔ,bitantakatɛ suoto katoo,diekye SAATE nwu niɛkakatɛ.16Biyɔ dibu bita SAATE Yaa lee nwufiɛ aayɔ ditunu awako,fiɛ di nkpaa lee dituuladi akpenkpe tununtunu nwu suoto.Bionyu osuku minta lɛkpa,kafɔɔ abamunikĩisa ni ambla ditunu le nikpe ni opĩammunikĩisa ni kafɔɔ ambla ditunu tununtunu.17Kafɔɔ nse biɛkyɔɔ atoko,kamawi kaku di lewofa kamɛta lɛkanta lee oso;anumbi nii kamawi kaku osie kanya,ansoo ku nnumɛɛ blɔblɔblɔ,diekye babakpaa SAATE nwu bafoso mansifiko sɛlanle kamɛ.18Tɔkɔ ɔka ku ɔkasanko falɛ,“Bisoo di akakpomii lee suoto biwa,diekye dibu akakoto lee nwukamakpa di asi lee suoto.”19Babasɛɛ sekpoo kplɛ lee nwu di Kalakasɔ manse,di otii kuonwii kafɔɔ dilɔbawɛ abasɛkɛtɛ sĩ nii.Babakpaa Yuda batii bamuu mansifiko sɛlanle kamɛ,babakpaa ma fɛɛ mansifiko.20Takatɛ anu lɛfɔ faanyubatii ba niekye katookasɔ bɔɔwa ni.Ɔfɛ di bafoso ba beekpee fɔ ni ninnɛɛ nkpe,bafoso ba suoto faakanta ni?21Obe fababuɛ nse SAATE nwu lɛyɔbatii ba faanyu ni fɛ basiɛwo lɛfɔ nwaa eese kanyabayilatɛ lɛfɔ?Flɔbanu dibuofɛle ɔsanko wɔ di lɛmɛ konu ni?22Nse fɛɛkaalɛ suoto lɛfɔ falɛ,“Obe oso di nle mmle lɛwa mi di suoto?”-ta sikpile lɛfɔ kpinwu oso diakpeele wua lɛfɔ ntɔɔbɛbɛɛni fɛɛbla kafɔɔ suoto lɛfɔ amumu nɛ.23Etiopia otii kamafuo suoto nɔɔ kukũ ɔkyɛlɛnsaee nɛɛfɔɔtɛ nkyɛlɛnsa apa nɔɔ?Nkpo di batii ba nimbla ni okpiledilɔbafuo dibiene ɔbla nɛ.24“Kamasamiisa ye fɛle sɛsɔse di ɔfaafuu afɛɛfɔ nfɛ nii.25Nle mmle ninle lele fɔ di atrebi owii kamɛ nɛ,kalekɔ ka lɛtɛ lɛta fɔ ni nɛ,”SAATE nwu niebuɛ alɛ,“Ta fatoyee mifeetika ni disi di sɛlaa ku afunu bayaa suoto oso.26Kamananfi akpeele wua lɛfɔ ntĩi fɔ anualɛ baanya sinunsɔ lɛfɔ-27asɔnɔ lɛfɔ okpee ku lɛkɔnsɔklee kpile nwu fɛle pɔnkɔ lele,sinunsɔ lɛsɔnɔkpee lɛfɔ nwu!Ntɔɔnya ayududusaa lɛfɔ sɛsaabladi akpenkpe suoto ku afe kamɛ.Oo Yerusalem, yɔɔsa!Ɔmɛmbe fabakpɔnɔfɔsa suoto fanaase?”The Seed Company