YESAYA46
Babilon Batii Afiɔ Diedie Lɛsalɛsaa
1Bel afiɔ lɛwakosa disi kasɔ, Nebo afiɔ lekpee disi kaasɔ;afiɔ lɛma nwu babɔkɛɛ ba nintuka ni atoo ku banankyue ntuka nya oosifiko.Afiɔ nwu batuka ni ntookple dibuo kplɛ,diɛta babɔkɛɛ nwu nintuka nya nii.2Beesi beekpee asi kaasɔ;boloofuo dibuo nwu ofũ,mma bamu boosifi sɛlanle kamɛ.3“Oo Yakob leyo batii, bikyɔɔ mi atoko,aye ba bamuu niebu ni di Israel leyo kamɛ,aye ba ntooklee diɛyɔ ni di obe wɔ baalaka ye ni amɛ,lekunu ye diɛyɔ ni di obe wɔ baalofo ye ni.4Diɛlaase bia obe wɔ bitoomuɔ ni ku asi puleAmi ninle nnwɔ, Ami ninle nnwɔ nimanyu ye nii.Ami niɛbla ye, kamaklee ye kafɔɔ;kamanyu ye ndiki ye kafɔɔ.5“Owe bibayɔ mi minkaatɛsako ee minnyu bilɛ bukyɛkyɛ?Owe bibayɔ mi minnyu bilɛ buodie bawo?6Batii bawo nnyɛɛnɛ koto sɛɛle di ntofoe lɛma kamɛmanklaapoosa koto fututu kafɔɔ di lɛklapoosaa suoto;mammiɛ koto sɛɛle bakpɛmblatɛ, mambla yaa manta ma,mampɛ akunkyi mantɔ nya.7Mantakatɛsa nya mantika di amuusiman-yɔ manaase di lɛkplɛyo, nfa anyila nɛ.Alabafuo ɔkyɛ̀ ninfa.Mintɛ otii lewi ɛɛlɛɛ nya, anntuna;ɔlabafuo otii nwu odiki di dibuo nɔɔ kamɛ.8“Binyuma nle mmle, biɛta disiɛ ye diisi kamɛ,biɛyɔ bikpee di otu kamɛ, aye batokopĩtɛ.9Binyuma asaa ya nintɔɔwa ɛɛbafe ni, saa ale nwu;Ami ninle Yaa, kuonwii kafɔɔ nsinnaa;Ami ninle Yaa, kuonwii kafɔɔ nsinnaa fɛle ami.10Ami niadiki kalookɔ ɔlaa labuɛ di kasɔkakyekɔ,ku asaa ya nimawa ni bia saa.Labuɛ nlɛ: Dibiesaa nii kamawa kaanya,kamabla kafɔɔ asaa ya amuu lɛtɛ nlɛ kamabla nii.11Ntɔɔlɛɛ kansiɛ wɔ ninkyɔkyɔfɛ ni sina lekyeko kufĩ katunkɔ;kasɔ fanfa suoto di osuɔtɔ wɔ nimabla ni lɛsaa le lɛtɛ ni ɔbla lekye.Ɔlaa wɔ lebuɛ nii, nnwu kamata kunwa kaanya nɛ;disibu le ntoodiki nii, nni kamabla nɛ.12Bikyɔ mi atoko, aye ba di situ nkpe ni osie,biekyo di ɔsaabla tinini nfũ.13Ntɔɔta ɔsaabla tinini nii, lɛtɛɛtɛɛ,dieekyo;didiki nii kafɔɔ dilabakpi kamaa.Kamata Sion didikidibu nii kafɔɔ ntika di Israel suoto.The Seed Company