YESAYA36
Asiria Batii Lafunaa Yerusalem Batii
1Di lefosi lɛlɛɛ naafa kamɛ di Ɔka Yesekia latoole ni sɛka, ni di Asiria ɔka Senakerib ladieko Yuda sekpoo kplɛ se beetofo seyoyiɛ beekyisa ni simuu aalenkee sĩ nɛ.2Ninfɛ di Asiria ɔka lakpee bakpɛtɛ kanyayilatɛ ku bakpɛtɛ ɔlambu kplɛ baakye Lakis, baakyɛ Ɔka Yesekia nfũ di Yerusalem nɛ. Obe wɔ di bakpɛtɛ kanyayilatɛ nwu layila ni di Katoo Ntu Lɛpanta nwu katũ, di osuku wɔ niefe ni Asaafototɛ nwu Kofe,3ni di Yilkia obisuɔtɔbi, Eliakim wɔ niale ni lɛkayo asaa nyuntɛ, kukũ kpanatɛ, Sebna ku Asaf obisuɔtɔbi, Yoa wɔ ninyu ni nfũ beekookaa ni sɛlaa se bɛɛkpana bɛɛtɛ ni, ladie baakyɛ ɔkyɛ nɔɔ nɛ.4Ninfɛ di bakpɛtɛ kanyayilatɛ nwu latɔkɔ ma alɛ, “Bitɔkɔ Yesekia bilɛ,“ ‘Nnya ɔlaa wɔ di ɔka kplɛ, Asiria ɔka nwu kobuɛ ni alɛ: Obe lɛsaa suoto fɛɛtɛ feetika anu?5Foobuɛ falɛ faye kakpɛ sisuku, fakpe bakpɛtɛ kafɔɔ fapɔɔsa- kafɔɔ sɛlaa fukuti, lete foobuɛ. Owe feetika disi oso fɛɛtaka fayɛ mi di suoto?6Nyu lo, footika disi di Egipte, ninle ni lɛkpɛnyi ɔkyɛn-woso wɔ nintofo ni otii wɔ niɛkpɛ nwu ni suoto kɔnɛɛ kuntika nwɔ ni nkɔ! Nkpo di Farao, Egipte ɔka nte ɛɛta batii ba bamuu nietika nwɔ ni disi nɛ.7Kafɔɔ nse fɛɛtɔkɔ mi kafɔɔ falɛ, “Saate Yaa loo suoto buotika disi”- diele nnwɔɔ ninle nwɔ aba takale ku oleɔta akyikye ya di Yesekia laklee aakyisa ni, aatɔkɔ ni Yuda ku Yerusalem batii alɛ, “Dikpe nii biesumu ni di oleɔta akyikye ya mmle katũ di Yerusalem nɛ”?8“ ‘Nunua wa, biebuɛ bita baawo minko saate nii Asiria ɔka: Kamata fɔ bapɔnkɔ nkpe nnyɔ- nse fabawɛ basiɛtɛ fanta ma!9Lɛ fabafuo saate nii banɔɔfotii wɔ ninaa ni osie di kamɛ lɛma oyilasa, di obe wɔ feetika ni anu di Egipte bakeke ba di bapɔnkɔ nnanfi ni ku bapɔnkɔ basiɛtɛ suoto?10Diɛkyakaa nii, ɔwa lɛwa nlɛ kɔbadieko, ninwɔɔsa kasɔ ka mmle di SAATE nwu diesi ni kaamɛ? SAATE nwu omu niatɔkɔ mi alɛ nwa nimadieko kale ka mmle ninwɔɔsa ka.’ ”11Ninfɛ di Eliakim, Sebna ku Yoa latɔkɔ kakpɛ kanyayilatɛ nwu alɛ, “Lekoto kakatɛko bakpɛmblatɛ lɛfɔ di Aramaik sele kamɛ, di obe wɔ buonu sĩ ni. Tankakatɛ faata wo di Hebri sele kamɛ alɛ batii ba ninsi ni di oyoyiɛ nwu suoto kanu ni.”12Kafɔɔ kakpɛ kanyayilatɛ nɔɔfo nwu ladiki kanya alɛ, “Feenyu falɛ saate lɛfɔ ku afɔ lete nfũ di saate nii lekpee alɛ matɔkɔ sɛlaa se mmle, ni diele ku batii ba ninsi ni di oyoyiɛ nwu suoto- di obe wɔ di otii fɛle afɔ okle ku mma nimale ni aye bamu mbi, minnyi ni kafɔɔ aye bamu kɔsɔ?”13Ninfɛ di kakpɛ kanyayilatɛ nwu lataka aayila aafaa di Hebri sele aabuɛ alɛ, “Binu ɔlaa wɔ di ɔka kplɛ Asiria ɔka kobuɛ ni!14Nnya ɔlaa wɔ di ɔka nwu kobuɛ ni alɛ: Bitanta Yesekia lakyɔnkyɔ ye. Alɔbafuo ye odiki!15Bitanta Yesekia lakpee ye kadu biatika SAATE nwu disi, di obe wɔ oobuɛ ni alɛ, ‘Nwaako SAATE nwu kamadiki wo; blɔbayɔ okpoo kplɛ wɔ mmle bakpee di Asiria ɔka kɔnɛɛ.’16“Bitankyɔɔ Yesekia kotoko. Nnya ɔlaa wɔ di Asiria ɔka kobuɛ ni alɛ: Binii atoko ɔkyɛ ole kanya ku ami, biedie biwa ɔkyɛ nii. Ni obiala lee kamale di nnwɔɔ omu nɔɔ nta awosobi ku abue abi, annyi ntu kafɔɔ di nnwɔɔ omu nɔɔ ntu dibiɔ,17ninaase di obe wɔ kamawa makpaa ye nsifiko ni kasɔ ka ninte ni fɛle aye bamu kale- kasɔ ka di atitabi ku nta fɔle nkpe nii, kasɔ ka di bloblo ku nta awosobi afe nkpe ni.18“Bitanta Yesekia lakyɔnkyɔ ye di obe wɔ oobuɛ ni alɛ, ‘Saate nwu kamadiki wo ni.’ Kale kawo afiɔ ntoodifuo kasɔ nɔɔ odiki di Asiria ɔka nnɛɛ?19Ɔfɛ di Hamat ku Arpad afiɔ nkpe? Ɔfɛ di Sefarwaim afiɔ nkpe? Batoofuo Samaria ofũ di nnɛɛ nii?20Amɛnfiɔ di nnle be mmle mmuu kamɛ nintoofuo kasɔ nɔɔ odiki di nnɛɛ nii? Ni lɛ nfɛ di SAATE nwu kamafuo Yerusalem odiki di nnɛɛ nii?”21Kafɔɔ batii nwu lalo kanana, batabuɛ ɔlaa kuonwii baadiki kanya, diekye ɔka nwu lakpee ma kufiofa alɛ, “Bitandiki nwɔ kanya.”22Ninfɛ di Yilkia obisuɔtɔbi, Eliakim wɔ niale ni lɛkayo asaa nyuntɛ, kukũ kpanatɛ Sebna ku Asaf obisuɔtɔbi, Yoa wɔ ninnyu ni nfũ beekookaa ni sɛlaa se bɛɛkpana bɛɛtɛ ni, ladie baakyɛ Yesekia nfũ ku akpeele bɛbɛɛle lɛma, ni baalaatɔkɔ nwɔ ɔlaa wɔ di kakpɛ kanyayilatɛ nwu labuɛ ni nɛ.
The Seed Company