HESEKIEL27
Okunu Kuɔta Ni Tiro
1Ni di SAATE nwu ɔlaa lawa kuatɛɛ alɛ:2“Otii obi, sa okunu di Tiro suoto.3Tɔkɔ Tiro, okpoo wɔ ninte ni di lekpo kasukunya, mansunsũ ni asaa ku lekpo kotoko batii kpinwu falɛ, ‘Nnya ɔlaa wɔ di SAATE Kplɛ nwu kobuɛ ni alɛ:“ ‘Oo Tiro, feebuɛ falɛ,“Lɛtɛ nlɛ sekpeele nwaa.”4Kasɔ lɛfɔ amɛ lawɛ di lekpo nwu ntɛɛntɛɛ;batii ba niatɛ fɔ ni latɛ baalɛ sekpeele nwaa.5Baabɛ ɛfram sewoso lɛfɔ simuubaakyeko Senir baawako;baayɔ sida baakyeko Lebanonbaawola oklo abula asakasaa baata fɔ.6Akpɛ awoso ya niakye ni Basanbaayɔ baawola seklo nflɛ lɛfɔ;Odum sewoso se baakyeko ni Kitim lekpo kotokobaayɔ baatĩi oklo lɛfɔ kalɔ, baatĩtĩi kamɛ ku bato oblè.7Dibula fɛnɛnɛɛ biene le beeloso ni ku sikũ ateate se niakye ni Egipte fan-yɔ fankyɛ di ntu osidiale fɛ flankaa lɛfɔ;abansaa lɛfɔ late bluu ku n-ya niɛbla ni fɛ ɔsɛɛ,aakye ni Elisa lekpo kotoko.8Sidon batii ku Arwad batii niale seklo bawantɛ lɛfɔ;Oo Tiro, batii lɛfɔ ba nin-ye ni sɛkpɛ nwu kamɛ nwaa niasiɛ kaamɛ fɛ oklo kamɛ bakpɛmblatɛ lɛfɔ.9Kɔnɛɛ kamɛ sɛkpɛ bablatɛ nɔɔfo ba niakye ni Gebal lasiɛ di oklo kamɛfɛ batii ba ninlolaa ni oklo lɛfɔ aba ya niebiɛ ni, mantĩtĩi ni kafɔɔ aba lɛfɔ ya niedufu nii.Seklo nwu simuu di lekpo suoto ku batii ba ninsiɛ ni kaamɛn-wa mamatɔɔya atoo lɛfɔ.10“ ‘Persia, Lidia ku Put batiilale bakpɛtɛ di bakpɛtɛ lɛfɔ kamɛ.Man-yɔ kubiafunsaa ku abɔɔsaa akoto lɛma mansaka di seyoyiɛ lɛfɔ suoto,manta fanfũ leyooto.11Arwad ku Helek basuɔtɔlale banyuntɛ di seyoyiɛ lɛfɔ di ɔfankyi biala suoto;Gamad basuɔtɔ lawɛ di banyuntɛ ayo takale lɛfɔ kamɛ.Baayɔ kubiafunsaa lɛma baasaka di seyoyiɛ lɛfɔ suoto baakyisa;baata faatɛ faalɛ sekpeele nwaa.12“ ‘Tarsis labla ɔkpɛ ku afɔ ta asaa ateate lɛsaawɛ kpinwu le niawɛ fɔ ni oso; baakyɛlɛnsa koto fututu, abɔɔsaa wɛɛfɛɛ, abɔɔsaa fututu ku abɔɔsaa nutũle, baafũ asunsũsaa lɛfɔ.13“ ‘Tawan, Tubal ku Mesek lasunsũ asaa ku afɔ; baayɔ balanle ku abɔɔsaa sɛɛle asaa baakyɛlɛnsa baafũ asunsũsaa lɛfɔ.14“ ‘Bet-Togarma batii lakyɛnlɛnsa bapɔnkɔ ba nimbla ni ɔkpɛ, bapɔnkɔ ba ninkyɛ ni kakpɛ ku babɔkɛɛ ba ninte ni fɛle pɔnkɔ baafũ asunsũsaa lɛfɔ.15“ ‘Rodes batii lasunsũ asaa ku afɔ. Lekpo kotoko nsɔ batii kpinwu kafɔɔ niale asaabayatɛ lɛfɔ; bato anyɛɛ ku lɛkambe sewoso baayɔ baata fɔ koto.16“ ‘Siria labla ɔkpɛ ku afɔ ta asunsũsaa kpinwu lɛfɔ oso; baayɔ afuɔ ya manlɛɛ ni turkuoise, abula ya niɛbla ni fɛ ɔsɛɛ, dibula le beeloso ni ku sikũ ateate, dibula biene fɛnɛnɛɛ fututu, lɛsaa le bɔɔlɛɛ ni koral ku afuɔ sɛɛle baakyɛlɛnssa baafũ asunsũsaa lɛfɔ.17“ ‘Yuda ku Israel lasunsũ asaa ku afɔ; baayɔ kamɔɔ ku amɛnɛmɛnɛsaa ya niakye ni Minit, bablɔ, nnɔnyi ku kɔfafifiale baakyɛlɛnsa baafũ asunsũsaa lɛfɔ.18“ ‘Damasko, ta asunsũsaa kpinwu ku lɛsaawɛ kplɛ asaa ateate lɛfɔ oso yi, baasunsũ asaa ku afɔ di nta be niakye ni Helbon ku bafoso sinwini se niakye ni Sahar baata fɔ.19“ ‘Dan batii ku Yawan batii ba niakye ni Usal niaya asunsũsaa lɛfɔ; baayɔ abɔɔsaa wɛɛfɛɛ ya bɛɛbɛntɛ ni, kloboo ku owosodu kɔnɔnkɔnɔ wɔ manlɛɛ ni kalamus baakyɛlɛnsa baafũ asunsũsaa lɛfɔ.20“ ‘Dedan lasunsũ bakuntu ba mantika ni di bapɔnkɔ suoto mansiɛ ni aata fɔ.21Arabia ku Kedar baka bamuu niale asaabayatɛ lɛfɔ; baasunsũ afosobi, akunumuu ku batie baata fɔ.22Seba ku Rama asaa basunsũtɛ lasunsũ asaa baata fɔ; baayɔ akɔnɔnkɔnɔsaa biene ku afuɔ ya niefũ ni kɔya ateate amuu, ku koto sɛɛle baakyɛlɛnsa baafũ asunsũsaa lɛfɔ.23“ ‘Haran, Kane, Eden ku Seba asaa basunsũtɛ, Asur ku Kilmad lasunsũ asaa ku afɔ.24Batii ba mmle layɔ akpeele ya nikɔlɛ ni onyu, abula bluu, abula ya baaloso ni ku sikũ ateate ku bakuntu ba baakpee ni afa ateate baafintĩsa nya baakyasa ni baabasunsũ ku afɔ di asaa kasunsũkɔ lɛfɔ.25“ ‘Tarsis seklo niakyɛ sisukufɛ asunsũsaa lɛfɔ batukatɛ.Atoo kpinwu layii fɔ kamɛ pɔdi lekpo ntɛɛntɛɛ.26Oklo lɛfɔ bawantɛ lawá fɔbaawako lekpo ntu kplɛ osi.Kafɔɔ kufĩkatunkɔ kɔfɛɛfɔ kamabibiɛ fɔ wɔkyɔwɔkyɔdi lekpo nwu ntɛɛntɛɛ.27Lɛsaawɛ, asunsũsaa ku atoo lɛfɔ,oklo bawantɛ, oklo kamɛ bakpɛmblatɛ ku oklo balolaatɛ lɛfɔ,asaa basunsũtɛ ku bakpɛtɛ lɛfɔ bamuu,ku otii bamba biala ninsi ni kaamɛkamamɛɛ di lekpo nwu ntɛɛntɛɛdi dii le suoto di oklo lɛfɔ nwu kamabiɛ nii.28Lekpo kotoko nsɔ kamatũkũnse oklo lɛfɔ kamɛ bakpɛmblatɛ leyiisa kudu.29Mba bamuu ninklee ni seklo nflɛkamadiɛ seklo lɛma manse;seklo bawantɛ ku oklo kamɛ bakpɛmblatɛkamayila di lekpo nwu kotoko.30Babatakatɛ sɛlɔ lɛma katooman-wi kaku osie kanya di suoto lɛfɔ;babalɛ kɔtɛ mankpete di asi lɛma,mampɛ mammunu kafɔɔ di ntɔ̀ kamɛ.31Babakpaasu asi lɛma ta afɔ oso,man-nyukũ kafɔɔ aboko.Babawi kaku ku ɔklà kamɛ ninyinyii mankpee fɔ,man-wi ku ɔkɔnsɔlo.32Di obe wɔ boowi, mambla ni kaku di suoto lɛfɔ yi,babasa okunu di suoto lɛfɔ alɛ:“Owe batoodiwɔɔsa fɛle Tiro,di lekpo lamana nwɔ diekyi ni?”33Obe wɔ di asunsũsaa lɛfɔ lakye lekpo osi aawa ni yi,faata nnle kpinwu lamiɛ;ku lɛsaawɛ lɛfɔ kplɛ ku asunsũsaa lɛfɔ,faata baka di kasɔ nwu suoto lawɛ lɛlɛ.34Kanunua lekpo ntoobibiɛ fɔ wɔkyɔwɔkyɔbeekpee di ntu nkyofokɔ kamɛ;asunsũsaa lɛfɔ ku batii lɛfɔ bamuuntoosoo beesifi ntu kalɔ ku afɔ.35Ɔlaa lɛfɔ lablabatii ba bamuu ninsi ni di lekpo kotoko nsɔ suoto ɔkpɛ;ɔfɔɔ osifi ku difu lapɛ baka lɛma,anu lɛma lawolo ku lɛyɛkɛ.36Asaa basunsũtɛ di nnle nwu kamɛ lawi fɔ nlɛ:Fatɔɔwa kayɛntɛkɔ ka ninkpe ni difuflɔbasinwɛ kafɔɔ diidii.’ ”The Seed Company