HESEKIEL26
Ɔlaa Obuɛ Ɔtɛ Di Tiro Suoto
1Di lefosi lɛlɛɛ kasale kamɛ, di dii kasale suoto di kɔwɛntɛ nwu kamɛ yi, SAATE nwu ɔlaa lawa kuatɛɛ alɛ:2“Otii obi, ta Tiro labuɛ ni di Yerusalem suoto alɛ, ‘Ɛhɛɛ! Nnle nwu kayoko ntoobiɛ, bɛɛsɛkɛtɛ kafɔɔ akloo ninya bɛɛtɛɛ; ni lɛlɛ nfɛ kamalɛ mi diekye kutoobiɛ kate ni yi,’3nioso nnya ɔlaa wɔ di SAATE Kplɛ nwu kobuɛ ni alɛ: Oo Tiro, n-yɛ fɔ di suoto, kamatakatɛ nnle kpinwu kafɔɔ nkpee fɔ, fɛ mmle di lekpo nkpɛ ni afɛɛfɔ nɔɔ.4Bababiɛ Tiro seyoyiɛ, mambibiɛ kafɔɔ ayo takale nɔɔ nwu mantɛ kaasɔ; kamafiɛ kɔtɛ ntekete di kasɔ nɔɔ suoto mbla ka difuɔnkpaa fukuti.5Abakple lɛba le manlakasa ni asawu di lekpo ntɛɛntɛɛ, diekye SAATE Kplɛ nwu niebuɛ alɛ, ami niɛkakatɛ. Abakple kakpɛ kamɛ asaa anta nnle.6Babalo kafɔɔ sekpoo nɔɔ batii di kasɔ nwu kamu suoto ku kapamii. Ninfɛ babatofo alɛ ami ninle SAATE nwu nɛ.7“Diekye nnya ɔlaa wɔ di SAATE Kplɛ nwu kobuɛ ni alɛ: Kamakpaa Babel ɔka Nebukadnesar, baka ɔka, ku bapɔnkɔ ku bakeke ba di bapɔnkɔ nnanfi ni, ku bapɔnkɔ basiɛtɛ ku bakpɛtɛ kpinwu nkyeko katookasɔ n-wako di Tiro suoto.8Abalo sekpoo lɛfɔ batii di kasɔ nwu kamu suoto ku kapamii; abatofo banyuntɛ ayo takale di suoto lɛfɔ, ampɛ ditii aanadunko seyoyiɛ lɛfɔ, antakatɛ kubiafunsaa nɔɔ kafɔɔ di suoto lɛfɔ.9Abayɔ ayo abiɛsaa nɔɔ ankyɔɔ di seyoyiɛ lɛfɔ suoto, ambibiɛ kafɔɔ ayo takale lɛfɔ nwu antɛ kaasɔ ku akpɛnsaa nɔɔ.10Bapɔnkɔ nɔɔ kamatɛ mampɔ alɛ kudu ko babatakatɛ ni kamatĩi fɔ suoto. Seyoyiɛ lɛfɔ kamatũtũkũ di kakpɛ bapɔnkɔ kudu oyiisa nwu, atoo atukasaa ku bakeke, nse eebuo n-yoko lɛfɔ fɛ mmle di batii mbuo ni okpoo kplɛ wɔ seyoyiɛ se kamɛ beebiɛ beebuo nii.11Bapɔnkɔ nɔɔ akpɔbi kamananafu di sisuku lɛfɔ simuu suoto; abalo batii lɛfɔ ku kapamii, akpaka siene lɛfɔ nwu kafɔɔ kamanɔɔ ante kaasɔ.12Babalɛ lɛsaawɛ lɛfɔ fɛ kakpɛ kamɛ asaa, man-yu kafɔɔ asunsũsaa lɛfɔ; bababiɛ seyoyiɛ lɛfɔ mantɛ kaasɔ, mambibiɛ kafɔɔ ayo lɛfɔ biene nwu, manfuki afuɔ, sewoso ku atɛnkudi lɛfɔ mankpee di lekpo kamɛ.13Kamata sinu kudu lɛfɔ nwu n-wa kasekɔ, blɔbasinnu kafɔɔ bakyitaa lɛfɔ sinu diidii.14Kamabla fɔ difuɔnkpaa fukuti, fabakple kafɔɔ lɛba le manlakasa ni asawu. Blɔbasinse fɔ letofo diidii, diekye ami SAATE nwu niɛkakatɛ, SAATE Kplɛ nwu niebuɛ.15“Nnya ɔlaa wɔ di SAATE Kplɛ nwu kobuɛ antɔkɔ ni Tiro alɛ: Lekpo kotoko nsɔ nwu dilɔbatũkũ nse beenu lɛnɔɔ lɛfɔ kudu, nse batii ba niefũ ni nkɔ letũuni, beelo batii kafɔɔ di kamɛ lɛfɔ?16Ni baka bamuu di lekpo kotoko kamasoo di akakpomii lɛma suoto, man-yɔ kafɔɔ akpeele wua lɛma mantɛ di ɔlɔɔkɔ, mandiki kafɔɔ akpeele lɛma ya beeloso ni ku sikũ ateate mantɛ. Babasiɛ di lɛyɛkɛ kamɛ, mantaba kaasɔ, mantootũtũkũ obe lele, nimbla ma ɔkpɛ di suoto lɛfɔ.17Babawola okunu di suoto lɛfɔ, mansa nwu manta fɔ alɛ:“ ‘Oo okpoo kplɛ wɔ niefũ ni leyooto, di lekpo batii nsi ni,lɛ nfɛ fɛɛwɔɔ nkpo!Afɔ wɔ niale ni sientɛ di lekpo suoto,afɔ ku okpoo lɛfɔ batii;biayɔ lɛyɛkɛ leebiakpee di batii ba bamuu niasiɛ ni ninfa.18Kanunua yi, lekpo kotoko nsɔ nwu kotũtũkũdi dii le fɛɛnɔɔ ni suoto;nsɔ nwu di lekpo kamɛlayɛkɛ di lɛwɔɔ lɛfɔ suoto.’19“Nnya ɔlaa wɔ di SAATE Kplɛ nwu kobuɛ ni alɛ: Nse lɛbla fɔ okpoo kplɛ wɔ ninte ni ofukuti, fɛle sekpoo kplɛ se di batii diesinsi sĩ ni kaamɛ, ni nse lɛyɔ lekpo kplɛ nwu nkyofokɔ lefuusa fɔ di suoto, di ntu nɔɔ nwu kpinwu kafɔɔ letĩi fɔ suoto yi,20ni kamamɛɛsa fɔ kaasɔ ku mba ninsoo mambuo ni di dibiɔ kamɛ, mansifi ni bakofo nfũ. Kamata fɔ fansiɛ di ɔkya kamɛ, fɛ mmle dite ni di saa lɛwɔɔ kamɛ, ku batii ba ninsoo mansifi ni dibiɔ kamɛ, ni flɔbasinkple fawa ee fabafũ kasiɛkɔ lɛfɔ di nkpa basiɛtɛ kasɔ suoto.21Kamata kayɛntɛkɔ lɛfɔ nwɛ difu, di diidii flɔbasinwɛ ni kafɔɔ. Babawolaa fɔ, kafɔɔ blɔbasinnya fɔ diidii, SAATE Kplɛ nwu niebuɛ.”The Seed Company