1 Mose Kukũ Nɔnle34
Mose Kukpi
1Ninfɛ di Mose lafe di Moab ɔtaata aakata Nebo Kobokote aasifi Pisga kobokote osi diɛkyɔɔ ni Yeriko anu nɛ. Nfa di SAATE nwu latuo nwɔ kasɔ nwu kamuu nɛ- diayɔ ni di Gilead kaalaase ni di Dan,2Naftali kasɔ kamuu ku kasɔ ka ninle ni Efraim ku Manase kale ku Yuda kasɔ kamuu kaalaadu ni kufĩ kamɛɛkɔ lekpo,3Nkpaalɔ kasɔ nwu ku kasɔ nwu kamuu, diayɔ ni di Yeriko Ɔtaata, Awɔsɔ Okpoo Kplɛ nwu dialaadu Soar.4Ninfɛ di SAATE nwu latɔkɔ nwɔ alɛ, “Nnya kasɔ ka laka ntam labuɛ latɛ lata ni Abraham, Isak ku Yakob di obe wɔ labuɛ ni nlɛ, ‘Kamayɔ ka nta ni banantii lee nɛ.’ Ntɔɔta fɔ fɛɛnya ka ku anu lɛfɔ, kafɔɔ flɔbawaalɛ falaabuo ka.”5Ni di Mose, SAATE nwu kpɛmblatɛ lakpi di Moab ninfa, fɛle mmle di SAATE nwu labuɛ aatɛ ni nɛ.6SAATE nwu lakookaa nwɔ di Moab diɛkyɔɔ ni Bet Peor ɔtaata anu, kafɔɔ diɛbase bia miɛ kuonwii dieye nfũ di ɔkya nɔɔ nte nii.7Mose lafũ kɔlafa alɛɛ afosi-anyɔ fiɛ aakpi, kafɔɔ anu nɔɔ ditabiɛ ee osie nɔɔ kuwakasɔ.8Israel batii lawi Mose ayi afosi-atiɛ di Moab ɔtaata, dialaase di obe wɔ baaloo ni kaku osiɛ, baayɛntɛ ni kaku.9Ninfɛ di lɛsaatofo ninwuna layii Nun obisuɔtɔbi Yosua kamɛ nɛ, diekye Mose latika nwɔ nnɛɛ nɔɔ di suoto. Nioso Israel batii lakyɔɔ nwɔ atoko baabla kafɔɔ nle di SAATE nwu latɔkɔ ni Mose.10Diayɔ ni di obe nwu kamaa, Yaa ɔlaabuɛtɛtɛ kuonwii diisintaka di Israel batii kamɛ fɛle Mose okle, nnwɔ di SAATE nwu latofo ni anu ku anu,11nnwɔ niabla ni atuosaa ya niabla ni ɔkpɛ ku asaa ya niɛbla ni ɔkpɛ amuu di SAATE nwu lakpee nwɔ alɛ alaabla ni di Egipte kasɔ- di Farao ku banɔɔfotii nɔɔ bamuu ku kasɔ nɔɔ kamuu suoto.12Diekye diidii kuonwii diituo osie kplɛ ee sɛsaabla yɛkɛle se mmle okle di Mose labla ni di Israel batii bamuu anu.The Seed Company