BAKA 217
Israel Ɔka Hosea
1Di Yuda ɔka Ahas lefosi lɛlɛɛ nyɔɔfa kamɛ yi, ni di Ela obisuɔtɔbi, Hosea labale Israel ɔka di Samaria, ni aale sɛka alɛɛ anaasĩ nɛ.2Aabla okpile di SAATE nwu anu, kafɔɔ ditate fɛle Israel baka ba niale nwɔ ni katũ.3Ni di Asiria ɔka Salmaneser lataka di Hosea suoto, ni aabakple Salmaneser kpɛmblatɛ, aatɔɔta kɔsɔsĩ aatɔɔtɔɔ nɛ.4Kafɔɔ Asiria ɔka lanya alɛ okpoo biɛtɛ di Hosea lale, diekye aakpee batii baakyɛ Egipte ɔka So nfũ, ni atasintɔɔta kɔsɔsĩ atɔɔta Asiria ɔka fɛ mmle aatɔɔbla ni lɛlɛɛ biala nɛ. Nioso Salmaneser lamufũ Hosea aalaatɛ di leyo katenkɔ.Samaria Kanɔɔkɔ
5Ninfɛ di Asiria ɔka lakata aakyɛ kasɔ nwu kamuu aalaadieko Samaria okpoo, baamana nwu baakyi alɛɛ atiɛ nɛ.6Di Hosea lɛlɛɛ nansinle kamɛ yi, Asiria ɔka lafũ Samaria, ni aadiki Israel batii bamuu aasifiko Asiria nɛ. Ni aalaasiɛsa ma di Hala di Gosan di Habor Okle-lɔɔkɔ ku Media sekpoo nwu kamɛ nɛ.7N-ya mmle amuu lawa ta mmle di Israel batii labla ni okpile di SAATE, Yaa lɛma suoto. Nnwɔ niakpaa ma aadieko ni di Egipte, di Egipte ɔka Farao osie nwu kalɔ. Baasumu bayaa bamba,8baatikanko nnle be di SAATE nwu latososa ni di anu lɛma sɛsaabla, ku sɛsaabla se di Israel baka latɛ nii.9Israel batii labla asaa di lewofa kamɛ di SAATE, Yaa lɛma suoto, atasiɛko nii. Baatofo ntakalekɔ di sekpoo nwu simuu kamɛ baata suoto lɛma. Diayɔ ni di lɛbatakale le manyila man-nyu ni dialaadu ni okpoo kplɛ wɔ baatofo seyoyiɛ baakyisa nii.10Baatɛ afiɔtii ku afiɔ ya bɔɔlɛɛ ni Asera sewoso di lekpenkpe biala ku kowoso biala niefukuti ni kalɔ.11Di katakalekɔ biala, baafiɛ olufui fɛ mmle di nnle be di SAATE nwu latososa ni di anu lɛma labla nii. Baabla ansiesiensaa ya niata ɔblɔ lafiɛ ni SAATE nwu.12Baasumu afiɔ, nu di SAATE nwu labuɛ alɛ, “Bitambla nle mmle.”13SAATE nwu lasĩ ɔlaa aata Israel ku Yuda, diafe ni di ɔlaababuɛtɛtɛ ku asaa banyatɛ nɔɔ suoto alɛ: “Bidiɛ ɔkyɛ di sisuku kpile lee nwu suoto. Bile afiofa ku sɛsaabla nii, di mmle dikaatɛ ni ku Afiofa ya amuu latɔkɔ ni bate lee, layɔ lata ye ni diafe ni di bakpɛmblatɛ ku Yaa ɔlaababuɛtɛtɛ nii suoto.”14Kafɔɔ batanu, ni baale batokopĩtɛ fɛ bate lɛma ba nitatika ni disi di SAATE, Yaa lɛma suoto nɛ.15Baasĩ sɛsaabla nɔɔ ku kanya ninii le aabla ni ku bate lɛma ku ɔlaa wɔ aasĩ aata ma nii. Baatikanko afiɔ ya ninaa ni ɔnyɛɛ, ni di mma kafɔɔ baabakple mba ninaa ni ɔnyɛɛ nɛ. Baanyunko nnle be niamana ma diakyi nii, nu di SAATE nwu latɔkɔ ma alɛ, “Bitambla fɛ mmle bɔɔbla nii,” ni baabla asaa ya di SAATE nwu latĩi ma osuku alɛ batambla ni nɛ.16Baasĩ SAATE, Yaa lɛma afiofa amuu, ni baabla afiɔ anyɔ, baabla ni di anankyuebi letembi kanya ku Asera sewoso baata suoto lɛma nɛ. Ni baawakasɔ baata osi asaa amuu, baasumu Baal nɛ.17Baayɔ babisuɔtɔbi ku babisankobi lɛma baata ole di ɔtɔ kamɛ. Baatɔɔpɛ sɛbɔ, baatɔɔbla afasaa, baasunsũ suoto lɛma kafɔɔ baata sikpile ɔbla di SAATE nwu anu, baata ɔblɔ lafiɛ nwɔ.18Nioso ɔblɔ lafiɛ SAATE nwu, ni aakyisa ma di anu nɔɔ nɛ. Yuda kɔna lete niabu,19bia Yuda ditale SAATE, Yaa lɛma afiofa nwu. Baatikanko sɛsaabla se di Israel latɛ nii.20Nioso SAATE nwu lasĩ Israel batii bamuu; aata diabuo ma, ni aayɔ ma aakpee di asaa-balalaasatɛ nnɛɛ, dialaase di obe wɔ aawɔɔsa ma ni di anu nɔɔ.21Obe wɔ di SAATE nwu lablasa ni Israel di Dawid leyo suoto yi, ni baayɔ Nebat obisuɔtɔbi, Yeroboam baase ɔka lɛma nɛ. Yeroboam latososa Israel di SAATE nwu otikanko suoto, ni aata ma baabla okpile kplɛ onwii nɛ.22Israel batii latikanko Yeroboam sikpile simuu, batadiɛ sĩ ɔbla23dialaase di obe wɔ di SAATE nwu lakyisa ma ni di anu nɔɔ, fɛ mmle aasĩ ɔlaa aata ma diafe ni di bakpɛmblatɛ ku Yaa ɔlaababuɛtɛtɛ bamuu suoto. Nioso baakpaa Israel batii baadieko di kale lɛma kasɔ baasifiko sɛlanle kamɛ di Asiria kasɔ, ni beekple bakpe ninfa nɛ.Asiria Batii Labasiɛ Di Israel Kasɔ
24Ninfɛ di Asiria ɔka lakyeko batii Babel, Kuta, Awa, Hamat ku Sefarwaim aabasiɛsa ma di Samaria sekpoo kamɛ di Israel batii kasiɛkɔ nɛ. Baafũ Samaria, ni baasiɛ di sekpoo ninwu kamɛ nɛ.25Di obe wɔ baasiɛ ni ninfa lɛkasale yi, batasumu SAATE nwu; nioso SAATE nwu ladiki bakyata aakpee kaamɛ lɛma, ni baaloloo batii bawo nɛ.26Ni baatɔkɔ Asiria ɔka alɛ, “Batii ba fɛɛkpaa fɛɛlaasiɛsa ni di Samaria sekpoo nwu kamɛ dieye kale nwu yaa kufiofa. Nioso atoodiki bakyata eekpee kaamɛ lɛma, boololoo ma nɛ, diekye batii nwu dieye kasɔ nwu yaa kufiofa.”27Ninfɛ di Asiria ɔka nwu ladiki kanya alɛ, “Bita olebatatɛ ba biemufũ biekyeko ni Samaria onwii lɛma akple asifi alaasiɛ ninfa, aatuo batii nwu kasɔ nwu yaa kufiofa.”28Nioso oletatɛ onwii niasiɛ ni di sɛlanle kamɛ, aakye ni Samaria lawa aabasiɛ di Betel, ni aatuo ma mmle mansumu ni SAATE nwu nɛ.29Kafɔɔ kale biala dikudi labla bayaa lɛma bamu di sekpoo kpinwu di nfũ baasiɛ nii. Ni baayɔ nya baatɛ di nfiofa be di Samaria batii latɛ ni di ntakalekɔ nwu nɛ.30Ninfɛ di batii ba niakye ni Babel labla Sukot Benot, Kut batii labla Nergal, Hamat batii labla Asima;31Awi batii labla Nibhas ku Tartak, ni di Sefarwi batii lafĩɛ babi lɛma di ɔtɔ kamɛ fɛ ole bɛɛta ni Adramelek ku Anamelek, bale ni Sefarwaim bayaa.32Baasumu SAATE nwu, kafɔɔ batii nwu ladiki batii lɛma bamu kpinwu alɛ babla olebatatɛ ɔkpɛ di nfiofa nwu di ntakalekɔ nwu.33Baasumu SAATE nwu, kafɔɔ baakple baasumu mma bamu bayaa, di nnle be kamɛ baakpaa ma baakyeko ni sɛsaabla osuku kanya.34Beekple bakle okle sɛsaabla lɛma kofole se mmle diɛbadu miɛ dii le mmle. Batasumu SAATE nwu ee bakyɛ di sisuku ku kanya ninii, afiofa ku sɛsaabla se di SAATE nwu lata ni Yakob banantii ba aata ni leyooto alɛ Israel.35Di SAATE nwu lanii ni kanya ku Israel batii yi, aatɔkɔ ma alɛ, “Bitansumu bayaa bamba kuonwii ee biawakasɔ biata ma, biatɔ ma ee biata sele ɔta biata ma.36Kafɔɔ SAATE wɔ niakpaa ye aadieko ni di Egipte ku kɔnɛɛ nɔɔ osie ku kɔnɛɛ lɛnanfi ninle nnwɔ dikpeni biesumu nɛ. Nnwɔɔ bibawakasɔ, minta ole kafɔɔ minta nɛ.37Obe lele bilolaa binyu bilɛ biɛkyɛ di sisuku nɔɔ, biemufũ kanya ninii, afiofa ku sɛsaabla se aakpana aata ye ni bieklee. Bitansumu bayaa bamba.38Bitan-yee kanya ka lanii ni ku aye, batasumu kafɔɔ bayaa bamba.39Kafɔɔ, bisumu SAATE, Yaa lee; nnwɔɔ ninle nwɔ nimadiki ye ni di balo lee bamuu nnɛɛ nɛ.”40Kafɔɔ batanu, baakple baatɔɔbla sɛsaabla lɛma kofole nwu.41Bia di batii ba mmle latoosumu ni SAATE nwu yi, baatɔɔtɔ afiɔ bamba. Diɛbadu ni miɛ dii le mmle, babi ku bawa lɛma kokple mambla fɛ mmle di bate lɛma labla nii.The Seed Company