BAKA 216
Yuda Ɔka Ahas
1Di Remalia obisuɔtɔbi, Peka lefosi lɛlɛɛ kuɛnsinle kamɛ, ni di Yotam obisuɔtɔbi, Ahas lakye kasɔ aatole sɛka di Yuda nɛ.2Ahas lafũ alɛɛ afosi-anyɔ fiɛ aabale ɔka, aale sɛka di Yerusalem alɛɛ lefosi-akuɔ. Atate fɛle ote Dawid, atabla nle niasiɛku ni di SAATE, Yaa nɔɔ anu.3Aakyɛ di Israel baka sisuku suoto, aayɔ bia obisuɔtɔbi nɔɔ aata ole di ɔtɔ kamɛ, aatikanko nnle be di SAATE nwu, latososa ni di Israel batii anu ayududusaa sisuku.4Aata sele, aafiɛ olufui di abatakale nwu, akpenkpe nsintɛɛ ku kowoso biala ninfukuti ni kalɔ.5Ninfɛ di Siria ɔka Resin ku Remalia obisuɔtɔbi, Peka wɔ niale ni Israel ɔka lakata baakyɛ baalaakpɛ Yerusalem nɛ. Baamana Ahas baakyi, kafɔɔ batafuo nwɔ olenkee.6Di obe nwu kamɛ, Siria ɔka, Resin latososa Yuda bakpɛtɛ, ni aakple aafũ Elat aata Siria nɛ. Ninfɛ di Edom batii ladie baasifi Elat baalaasiɛ ninfa diɛbadu miɛ dii le mmle nɛ.7Ni di Ahas lakpee batɔkyɛntɛ baalaatɔkɔ Asiria ɔka, Tiglat-Pileser alɛ, “Kpɛmblatɛ ku obisuɔtɔbi lɛfɔ nle. Wa fabafũ mi di Siria ɔka ku Israel ɔka, ninkodie ko mi ni nnɛɛ.”8Ninfɛ di Ahas layɔ koto fututu ku koto sɛɛle ko aanya ni di SAATE nwu olekatakɔ ku lɛkayo asaakatɛkɔ aakyɛnko Asiria ɔka fɛ akyɛsaa nɛ.9Ni di Asiria ɔka latuna aalaadieko Damasko aafũ nwu nɛ. Aadiki okpoo nwu batii aasifiko Kir, ni aalo Resin nɛ.10Ninfɛ di Ɔka Ahas lakyɛ Damasko aalaakyakako Asiria ɔka Tiglat-Pileser nɛ. Aanya oleɔta akyikye anwii di Damasko, ni aayɔ oleɔta akyikye nwu letembi kɔkpana ku mmle kanya mampɛ nya manfenko ni aakyesee oletatɛ nɔɔfo Uria nɛ.11Nioso oletatɛ nɔɔfo Uria lapɛ oleɔta akyikye nwu ku letembi le okle kanya di Ɔka Ahas lakyesee nwɔ aakyeko ni Damasko. Ni aaloo nya ɔpɛ fiɛ di Ɔka Ahas lakple aawa nɛ.12Obe wɔ di ɔka lakple ni di Damasko, aawa aabanya ni oleɔta akyikye nwu yi, ni aakyɛ aalaata asaaɔta ninya suoto nɛ.13Aata ofiɛ asaaɔta ku alesaa asaaɔta nɔɔ, aanyɛɛnɛ nta asaaɔta nɔɔ, aanwanwanyi atoko ɔkyɛ ole asaaɔta nɔɔ ntɔ̀ di oleɔta akyikye nwu suoto.14Ni aalaayɔ abɔɔsaa oleɔta akyikye ya niayila ni di SAATE nwu olekatakɔ anu- di oleɔta akyikye fɔle ku SAATE nwu olekatakɔ obo- di n-ya aase ni di olekatakɔ nwu fɔle katoo kasɔ lɛkyɛ.15Ninfɛ di Ɔka Ahas lata oletatɛ afiofa ya mmle alɛ: “Di oleɔta akyikye kplɛ fɔle nwu suoto faata olesɛ ofiɛ asaaɔta ku kɔtɔɔfɔ alesaa asaaɔta, ɔka ofiɛ asaaɔta ku alesaa asaaɔta nɔɔ ku batii nwu bamuu kaasɔ suoto ofiɛ asaaɔta ku alesaa asaaɔta lɛma ku nta asaaɔta ɔta lɛma. Faanwanwanyi ofiɛ asaaɔta ku oleɔta ntɔ nwu mmuu di oleɔta akyikye suoto. Kafɔɔ kamayɔ abɔɔsaa oleɔta akyikye nwu ntɔɔkaalaa asaa.”16Ni di oletatɛ nɔɔfo Uria labla fɛ mmle kanya di Ɔka Ahas ladiki nwɔ ni kanya nɛ.17Ni di Ɔka Ahas labɔkɔtɛ sɛlɔɔkɔ sewoso, aatekete kafɔɔ bɛɛsi nwu di atikasaa ya mankyisa ni suoto. Ni aatekete Lekpo bɛɛsi nwu di abɔɔsaa banankyue-suɔtɔ ba niasiɛ ni kaalɔ nini, ni aayɔ aatika di afuɔ kayiɛkuu suoto nɛ.18Ni aakpa Lɛnyɛɛtɛyi akpanta ya baapɛ ni di lɛkayo nwu, aakpakpaa kafɔɔ ɔka kayoko ka di SAATE nwu olekatakɔ kayi, ta aayɔ dibu anta ni Asiria ɔka oso.19Di Ahas sɛka ole sɛsaabla bamba ku n-ya aabla nii yi, bɛɛkpana nya di Yuda baka sekofolaa kukũ kamɛ.20Ni di Ahas latɛ ɔnyɛɛ ku bate nɔɔ, ni baakookaa nwɔ ku mma di Dawid Okpoo kplɛ kamɛ nɛ. Ni di obisuɔtɔbi nɔɔ Hesekia layila nwɔ kaanya fɛ ɔka nɛ.The Seed Company