2 KRONIKA13
Abigya Lakpɛko Yeroboam
1Di Yeroboam sɛka olebee lɛlɛɛ lefosi-lɛnɛnle kamɛ yi, Abigya labale Yuda ɔka,2ni aale sɛka di Yerusalem alɛɛ atiɛ nɛ. Ɔya leyooto niale Maaka nɛ. Uriel obisankobi aale, aakye ni Gebea.Kakpɛ lasiɛ di Abigya ku Yeroboam ntɛɛ.3Abigya lakyɛ kakpɛ ku bakpɛtɛ ba ninfuo ni ɔkpɛ nwaa nkpe alafa-ana, ni di Yeroboam lakpɛko nwɔ ku bakpɛtɛ ba ninfuo ni ɔkpɛ nwaa nkpe alafa-anɛ nɛ.4Ninfɛ di Abigya layila di Semaraim Kobokote osi, di Efraim lekpenkpe kale, aabuɛ alɛ, “Yeroboam ku Israel omuu, bikyɔɔ mi atoko!5Bieye bilɛ SAATE nwu, Israel Yaa nwu, ntɔɔyɔ Israel sɛka ole nwu ɛɛta Dawid ku banantii nɔɔ di mmba kanya ninii ɔbla kamɛ dinaa ni kaloo?6Kafɔɔ Nebat obisuɔtɔbi Yeroboam, aale ni Dawid obisuɔtɔbi Solomon ɔnɔɔfotii onwii lataka aayila di saate nɔɔ suoto.7Ninfɛ di atiipɛ ya ninandie ni lɛsalɛsaa bawo lamana nwɔ baakyi, ni baataka baayila di Solomon obisuɔtɔbi Rehoboam suoto di obe wɔ aale ni obisɔ anadiyila ni kpinkpĩ anaa ni osie kafɔɔ alɛ aayilako ma ni nɛ.8“Ni di kanunua biɛbla disibu bilɛ biɔtaka di SAATE nwu sɛka kalekɔ ka ninsi ni di Dawid banantii nnɛɛ nɛ. Nwaako bakpɛtɛ kpinwu bile, bikpe kafɔɔ koto sɛɛle anankyuebi ya di Yeroboam labla alɛ ale ye ni bayaa lee.9Kafɔɔ aye bietososa SAATE nwu olebatatɛ, Aron babisuɔtɔbi ku Lewi batii nwu, ni biese aye bamu olebatatɛ fɛ mmle di batii ba di nsɔ bamba mbla ni nɛ. Otii lele niɛwa ɛɛbakleklesa suoto nɔɔ ku lɛnankyuebi-suɔtɔ ku akunumuu akuɛnsĩ kafuo oletatɛ ole anta asaa ya ninanle ni bayaa.10“Kafɔɔ awo yi, SAATE nwu ninle Yaa loo, buosĩ nwɔ kafɔɔ. Olebatatɛ ba ninsumu ni SAATE nwu nle Aron babisuɔtɔbi, di Lewi batii nkyakaako ma ni nɛ.11Olesɛ ku kɔtɔɔfɔ biala manta ofiɛ asaaɔta ku olufuii kɔnɔnkɔnɔ manta SAATE nwu. Mandiki bloblo mantika di opunu kleklesale nwu suoto, mansɔ kafɔɔ bakandiɛ ba di koto sɛɛle kandiɛ ditikasaa suoto kɔtɔɔfɔ biala. Bukyɛ di SAATE Yaa loo ablasaa osuku kanya. Kafɔɔ aye bitoosĩ nwɔ.12Yaa nsiko wo; nnwɔɔ ninle wo tunletɛ nɛ. Olebatatɛ nɔɔ kamafɛ kakpɛ kudu akyukyoo lɛma di suoto lee. Israel batii, bitankpɛko SAATE nwu, bate lee Yaa nwu, diekye dilɔbalɛ ditaye.”13Kafɔɔ Yeroboam lata bakpɛtɛ lamana ma sɛɛmaa baakyi, diata alɛ di obe wɔ aawɛ ni di Yuda sitũ yi, bakpɛtɛ ba niate ni kalá lawɛ di sɛmaa lɛma.14Ninfɛ di Yuda bakpɛtɛ lamunikĩi baanyu, ni baanya alɛ bɔɔkpɛ ma sitũ ku sɛmaa nɛ. Ni baafaa baalɛɛ SAATE nwu nɛ. Olebatatɛ lafɛ akyukyoo lɛma,15ni di Yuda batii layiisa kakpɛ kudù nɛ. Di kakpɛ lɛma kudù kanya didie yi, Yaa lalenkee Yeroboam ku Israel omuu di Abigya ku Yuda anu.16Israel batii latoso kakpɛ di Yuda anu, ni di Yaa layɔ Israel batii aakpee di Yuda batii nnɛɛ nɛ.17Abigya ku bakpɛtɛ nɔɔ lalenkee ma osie kanya, alɛ bakpɛtɛ ba nianɔɔ ni kakpɛ labla nkpe alafa-anɔɔ di Israel bakpɛtɛ siene kamɛ.18Nioso baawakosa Israel batii kasɔ di ɔsaabla nwu kamɛ, ni di Yuda batii lalenkee nɛ, diekye baatika disi di SAATE nwu, bate lɛma Yaa suoto.19Abigya latikanko Yeroboam, ni aalaafũ Betel, Yesana ku Efron sekpoo ku sekpoenyii ninsĩ di nnɛɛ nɔɔ nɛ.20Yeroboam ditansinkple aawɛ ɔnyɛɛ di Abigya obe kamɛ. Ni di SAATE nwu lapɛ nwɔ aatɛ, ni aakpi nɛ.21Kafɔɔ Abigya lawɛ ɔwɛ osie. Aayɔ basanko lefosi-bana ni aalofo babisuɔtɔbi afosi-anyɔ-banyɔ ku babisankobi lefosi-bakuɔ nɛ.22Sɛsaabla bamba se di Abigya labla ni di sɛka olebee nɔɔ kamɛ, asaa ya aabla ni ku nse aabuɛ nii yi, bɛɛkpana nya beekpee di ɔlaabuɛtɛtɛ Ido suoto sɛlaa kukũ kamɛ.
The Seed Company