2 KRONIKA12
Sisak Egipte Otii Nwu Ladieko Yuda Kakpɛ
1Obe wɔ di Rehoboam sɛka ole layila ni, kuabawɛ ni osie sɛmaa yi, nnwɔɔ ku Israel bamuu ba niawɛ ni ku nnwɔɔ lasĩ SAATE nwu kufiofa.2Ta batale ni onukwale baata ni SAATE nwu oso yi, Egipte ɔka Sisak ladieko Yerusalem di Ɔka Rehoboam sɛka ole lɛlɛɛ nɔnle kamɛ.3Aadieko ma ku bakeke ba di bapɔnkɔ nnanfi ni kakpe alafa-anyɔ ku bapɔnkɔ basiɛtɛ nkpe afosi-akuɔ ku Libia batii, Suki batii ku Kus batii bakpɛtɛ ba batafuo ni ɔka, baakye Egipte baawa ni ku nnwɔɔ.4Aafũ Yuda sekpoo kplɛ se baatofo seyoyiɛ baakyisa ni aalaadu bia Yerusalem.5Ninfɛ di ɔlaabuɛtɛtɛ nwu Semaia lawa Rehoboam ku Yuda batunletɛ ba niasi ni di Yerusalem ɔkyɛ, ta baatɔɔyɛkɛ ni Sisak oso. Ni aabuɛ aatɔkɔ ma alɛ, “Nnya ɔlaa wɔ di SAATE nwu kobuɛ ni alɛ, ‘Bitoodiɛ mi nnɛɛ; nkpo oso, kanunua amii ntoodiɛ ye lɛta Sisak.’ ”6Ninfɛ di Israel batunletɛ ku ɔka lawakosa suoto lɛma kasɔ baabuɛ alɛ, “SAATE nwu nte tinini.”7Di SAATE nwu lanya alɛ batɔɔwakosa ni suoto lɛma kasɔ yi, ni di SAATE nwu ɔlaa wɔ mmle lawa kuata Semaia alɛ: “Ta batɔɔwakosa ni suoto lɛma kasɔ oso yi, nɔmawɔɔsa ma, kafɔɔ kamata ma didiki nunua. Nɔmasoosa ɔblɔ yakayaka nii di Yerusalem diefe ni di Sisak suoto.8Kafɔɔ yi, babasiɛ nwɔ kaalɔ, di mmle babatekete ni lɛsaa mankyeko ni kakyi ka ninsi ni di ami osumu ku kasɔ bamba baka osumu kamɛ.”9Di Egipte ɔka Sisak ladieko ni Yerusalem yi, aatuka SAATE nwu olekatakɔ lɛsaawɛ ku lɛkayo lɛsaawɛ aasifiko. Aayɔ lɛsaa biala, di koto sɛɛle kubiafunsaa ya di Solomon labla nii.10Nioso Ɔka Rehoboam labla abɔɔsaa sɛɛle kubiafunsaa aase di nnya nkpo kanya, ni aayɔ nya aakpee di banyuntɛ nwu kanyabayilatɛ ba niatɔɔbla ni ɔkpɛ di lɛkayo kayoko kamɛ nnɛɛ nɛ.11Obe lele di ɔka kɔkyɛ SAATE nwu olekatakɔ yi, banyuntɛ nwu nklee kubiafunsaa nwu, nni sɛmaa, mankplesa nya manaatɛ di banyuntɛ nwu leyo.12Ta Rehoboam lawakosa ni suoto kasɔ oso yi, SAATE nwu ɔblɔ di suoto nɔɔ lakyi, nioso ataloo nwɔ ɔwɔɔsa. Nwaako lɛsaa biene lewo lawɛ di Yuda.Rehoboam Sɛka Ole Suoto Ɔlaa Kakui
13Ninfɛ di Ɔka Rehoboam lase suoto nɔɔ kpinkpĩ di Yerusalem ni atoole sɛka nɛ. Alɛɛ afosi-ana-lɛlɛɛ-ninwii aafũ fiɛ aabale ɔka, ni aale sɛka alɛɛ lefosi-akuɛnsĩ di Yerusalem nɛ, okpoo kplɛ nwu di SAATE nwu ladiki ni di Israel ana nwu amuu kamɛ alɛ ɔɔtɛ ni Leyooto nɔɔ. Rehoboam ɔya leyooto niale Naama; Amon otii aale.14Rehoboam labla dikpilesaa diekye atayɔ otu nɔɔ aawolaa SAATE nwu.15Asaa ya di Rehoboam labla ni di sɛka olebee nɔɔ, diayɔ ni di kasɔ kakyekɔ dialaase ni di kayɛntɛlekɔ nnya yi, bɛɛkpana nya beekpee di ɔlaabuɛtɛtɛ Semaia ku asaanyatɛ, Ido otii nwu nimblako ni sekofolaa ɔkpɛ akũ kamɛ. Kakpɛ lasiɛ di Rehoboam ku Yeroboam ntɛɛ obe lele.16Rehoboam latɛ ɔnyɛɛ ku bate nɔɔ, ni baakookaa nwɔ di Dawid Okpoo kplɛ nɛ. Ni di obisuɔtɔbi nɔɔ Abigya layila nwɔ kaanya fɛ ɔka nɛ.The Seed Company