1 SAMUEL18
Saul Lasɛɛsa Anu Di Dawid Suoto
1Di Dawid laloo ni ɔkakatɛ ku Saul, Yonatan lababla onwii ku Dawid, ni aabɔmbɔ nwɔ fɛ nnwɔɔ omu nɔɔ suoto nɛ.2Diayɔ ni di dii nwu nkpo, Saul lata Dawid lawɛ di ɔkyɛ nɔɔ, atatɔɔ aakple aasifi ote leyo.3Ni di Yonatan lanii kanya ku Dawid nɛ, ta aabɔmbɔ nwɔ ni fɛ nnwɔɔ omu nɔɔ suoto oso.4Yonatan ladiki akpeele wua nɔɔ ya aakpee ni ku akpɛsaa nɔɔ, bia ku kapamii, kɔtaa ku ofiamɛ nɔɔ aata Dawid.5Kɔtɔ lele di Saul lakpee nwɔ ɔbla yi, Dawid ntɛ anlolaa ambla nwaa, nioso, Saul latɔɔ kayilakɔ kplɛ di bakpɛtɛ nwu kamɛ. Nle mmle labuo batii nwu bamuu ku Saul banɔɔfotii anu.6Obe wɔ di Dawid lalo ni Filisti otii nwu kamaa, di basuɔtɔ nwu latookple baatoofe ni leyo yi, basanko ladie di Israel sekpoo simuu kamɛ baabakyakako Ɔka Saul ku sinu ɔsa ku katũ ku suoto lɛyɔɔ sinu ku akasa ateate.7Bootũ nii, baasa alɛ:“Saul lalo nkpe nɔɔ,kafɔɔ Dawid nkpe afosi nɔɔ.”8Saul lanya ɔblɔ osie kanya; nle mmle ditawɛ nwɔ ɔmɛnɛfɛ, ni aabuɛ alɛ, “Bɛɛtakatɛsa Dawid katoo ku nkpe afosi, kafɔɔ ami nkpe, nkpe lete. Ɔbe lɛsaa abakple anwɛ, nse diele sɛka kalekɔ nwu?’9Nioso diayɔ ni di obe nwu diasifi nii, Saul layɔ onunsɛɛ di Dawid suoto.10Kaleesɛ ninwuna kpile ninwii niakye ni Yaa nfũ labuo di Saul suoto ku osie. Aatɔɔbla asaa fɛ otii wɔ ditate ni nwaa di leyo nɔɔ kamɛ, di obe nwu kamɛ Dawid latɔɔpɛ kyitaa, fɛ mmle ambla ni obe lele. Saul laklee lɛkplɔ di kɔnɛɛ nɔɔ,11ni aayu ni, aatɔɔtɔkɔ suoto alɛ, “Kamamiinasa Dawid nkaasa di oyoyiɛ.” Kafɔɔ Dawid latà suoto aadie di ɔkyɛ nɔɔ sɛnyɔ.12Saul layɛkɛ Dawid, diekye SAATE nwu lasiɛko Dawid, kafɔɔ atoodie di Saul kamɛ.13Nioso Saul latososa Dawid di suoto nɔɔ, ni aabla nwɔ bakpɛtɛ kakpe kanyayilatɛ nɛ. Dawid kafɔɔ laleko bakpɛtɛ katũ baakyɛ nkpɛ kamɛ.14Lɛsaa lele di Dawid lɛbla, ninlɛ nintɔɔ osie kanya, diekye SAATE nwu lasiɛko nwɔ.15Di Saul lanya ni mmle di asaa latɔɔlɛ ni Dawid ɔkyɛ yi, aayɛkɛ nwɔ.16Kafɔɔ Israel ku Yuda omuu labɔmbɔ Dawid, diekye aaleko ma katũ di nkpɛ lɛma kamɛ.Dawid Layɔ Saul Obisankobi
17Ni di Saul latɔkɔ Dawid alɛ, “Nnya obisankobi nii nɔɔfole Merab. Kamayɔ nwɔ nta fɔ fan-yɔ; sumu mi ku sɛkambi lete, faakpɛ SAATE nwu nkpɛ.” Diekye Saul latɔkɔ suoto nɔɔ alɛ, “Namatakatɛ kɔnɛɛ nii di suoto nɔɔ. Bita Filisti batii babla ninkpo!”18Kafɔɔ Dawid latɔkɔ Saul alɛ, “Owe nle, obe kafɔɔ di leyo nii ee teemi kafaabi di Israel nle, alɛ ami kakple ɔka ɔlɔ?”19Kafɔɔ di obe lawo alɛ bɔɔyɔ Saul obisankobi Merab manta ni Dawid yi, ni baayɔ Merab baata Adriel wɔ niakye ni Mehola aayɔ nɛ.20Kafɔɔ Saul obisankobi Mikal ku Dawid lasiɛ, obe wɔ baatɔkɔ ni Saul ɔlaa nwu, diayɔɔ nwɔ kafutu.21Ni di Saul lanyu alɛ, "Kamayɔ nwɔ ntɔɔ, alɛ aale dikyi anta alɛ Dawid kamakpanko Filisti batii nnɛɛ.” Nioso Saul latɔkɔ Dawid alɛ, “Nunua fatookple fɛɛwɛ osuku lɛnyɔɔfa alɛ fabakple ɔlɔ nii.”22Ninfɛ di Saul lakpee bakpɛmblatɛ nɔɔ alɛ, “Bikakatɛko Dawid di lewofa kamɛ bilɛ, 'Nyu lo, diɛyɔɔ ɔka kafutu di suoto lɛfɔ, bakpɛmblatɛ nɔɔ bamuu kafɔɔ mbɔmbɔ fɔ. Nioso nunua bale ɔlɔ nɔɔ.’ ”23Ni baalaase Dawid sɛlaa se mmle ɔtɔkɔ nɛ. Kafɔɔ Dawid labuɛ alɛ, “Bienyu bilɛ lɛsaa biibii dile alɛ faale ɔka ɔlɔ? Ami osuɔtɔ piitɛ lete nle, ninsiɛko kafɔɔ.”24Obe wɔ di Saul bakpɛmblatɛ lalaatɔkɔ nwɔ ni ɔlaa wɔ di Dawid labuɛ nii,25Saul labuɛ alɛ, “Bitɔkɔ Dawid bilɛ, 'Ɔka diloomiɛ disi asaa bamba kuanwii dilenkee Filisti batii kɔlafa sisuɔtɔ apoo, nikale ni ɔbla okyisa di balo nɔɔ suoto.’ ” Saul disibu niale alɛ Dawid kabuo Filisti batii nnɛɛ.26Nioso obe wɔ di bakpɛmblatɛ nwu lalaatɔkɔ ni Dawid sɛlaa se mmle yi, diayɔɔ nwɔ kafutu alɛ abale ɔka ɔlɔ. Nioso fiɛ di obe wɔ baatɛ ni lawo nii,27Dawid ku batii nɔɔ lakyɛ baalaalo Filisti batii alafa anyɔ. Ni aayɔ sisuɔtɔ apoo lɛma lɛpɔ nwu amuu aawako ɔka, di mmle aale ni ɔka ɔlɔ kanya. Ninfɛ di Saul layɔ obisankobi nɔɔ Mikal aata Dawid layɔ nɛ.28Di Saul lanya alɛ SAATE nwu lasiɛko ni Dawid, obisankobi nɔɔ Mikal kafɔɔ mbɔmbɔ ni Dawid yi,29Saul lakple aatɔɔyɛkɛ nwɔ, ni aakple lo nɔɔ di ayi nɔɔ bule kamɛ nɛ.30Filisti batii bakpɛtɛ kanya bayilatɛ lakple baatɔɔkyɛ kakpɛ, fɛ mmle mantɔɔbla ni ɔbla, Dawid latɔɔwɛ lelenkee kplɛ aatoolenkee Saul banɔɔfotii bule. Nioso Dawid labafũ leyooto nwaa.The Seed Company