1 SAMUEL16
Baapɛ Dawid Ɔfɔɔ Fɛ Ɔka
1Ninfɛ di SAATE nwu lakaalɛ Samuel alɛ, “Omɛmbe fabawi Saul fanaase, di ami ntoosĩ nwɔ ni fɛ ɔka di Israel suoto? Kpete ɔfɔɔ di bɔkɛɛ lɛkya lɛfɔ nwu kamɛ, faayefe osuku; kokpee fɔ Yese nfũ di Betlehem. Ntoodiki obisuɔtɔbi nɔɔ onwii nlɛ ale ɔka.”2Kafɔɔ Samuel labuɛ alɛ, “Lɛ kamafuo ɔkyɛ? Saul kamanu nwu ole, anlo mi.”Ni di SAATE nwu latɔkɔ nwɔ alɛ, “Kpaa nankyue dibi-sanko le ninadilofo ni faklee faalaabuɛ falɛ, ‘Lɛwa oleɔta ɔta SAATE nwu.’3Lɛɛ Yese aawa oleɔta katakɔ nwu. Kamatuo fɔ lɛsaa le faabla nii. Faapɛ nnwɔ letuo ni ɔfɔɔ fatɛɛ.”4Samuel labla fɛ mmle di SAATE nwu labuɛ nii. Aabuo ni Betlehem, okpoo banɔɔfo latũtũkũ di obe wɔ baakyakako nwu nii. Ni baakaalɛ nwɔ alɛ, “Fɛɛwa di atoko ɔkyɛ ole kamɛ?”5Ni di Samuel latuna alɛ, “Yii, di atoko ɔkyɛ ole kamɛ lɛwa; Lɛwa oleɔta ɔta SAATE nwu. Bikleklesa suoto lee, biɛwa oleɔta katakɔ nwu ku ami.” Ninfɛ aakleklesa Yese ku babisuɔtɔbi nɔɔ suoto, ni aalɛɛ ma aawako oleɔta katakɔ nwu nɛ.6Obe wɔ baababuo nii, Samuel lanya Eliab ni aanyu alɛ, “Nwaako, nnwɔ di SAATE nwu lɛpɛ ni ɔfɔɔ nin-yɛ ninfũ di SAATE nwu anu nɛ.”7Kafɔɔ SAATE nwu latɔkɔ Samuel alɛ, “Tannyu letembi nɔɔ ee lɛkaana nɔɔ, diekye lesĩ nwɔ. SAATE nwu ninnyu asaa fɛ mmle di batii nnyu nii. Otii nnyu di suoto letembi, kafɔɔ SAATE nwu nnwɔɔ, otu kamɛ aannyu.”8Ninfɛ di Yese lalɛɛ Abinadab, aatɔɔ abafe di Samuel anu nɛ. Kafɔɔ Samuel labuɛ alɛ, “SAATE nwu diediki nnwɔ mmle kafɔɔ.”9Ni di Yese lata Sama labafe, kafɔɔ Samuel labuɛ alɛ, “Nnwɔɔ kafɔɔ SAATE nwu diediki nwɔ.”10Yese lata babisuɔtɔbi nɔɔ bakuɛnsĩ labafe di Samuel anu, kafɔɔ Samuel latɔkɔ nwɔ alɛ, “SAATE nwu diediki mba mmle.”11Nkpo oso aakaalɛ Yese alɛ, “Mba mmle ninle babisuɔtɔbi ba bamuu ninkpe fɔ ni nɛ?”
Ni di Yese labuɛ alɛ, “Diekple diebu obisɔnle, kafɔɔ ɔɔkpa bafoso.”
Ninfɛ di Samuel labuɛ alɛ, “Kpee baalaalɛɛ nwɔ bawako; bulɔbasiɛ kaasɔ diɛlaase di obe wɔ ɛɛwa nii.”12Nioso Yese lakpee baalaakpaa nwɔ baawako. Aale otii sɛɛle, suoto nɔɔ lalɛ otoonyu, aalɛ kafɔɔ sekosopo.
Ninfɛ di SAATE nwu latɔkɔ Samuel alɛ, “Taka faapɛ nwɔ ɔfɔɔ; nnwɔɔ ninle nnwɔ nɛ.”13Nioso Samuel layɔ ɔfɔɔ lɛkya nwu, ni aapɛ nwɔ ɔfɔɔ di babilɛma suɔtɔbi anu nɛ, diayɔ ni di dii nwu kamaa SAATE nwu Ninwuna labuo di Dawid suoto di osie kamɛ. Ninfɛ di Samuel lakple aasifi Rama nɛ.
Dawid Lasifi Saul Leyo
14Ninfɛ di SAATE nwu Ninwuna ladie di Saul suoto, ni di ninwuna kpile ninwii niakye ni SAATE nwu nfũ lakpɛko nwɔ nɛ.15Ni di Saul bakpɛmblatɛ latɔkɔ nwɔ alɛ, “Nyu lo, ninwuna kpile ninwii niekye ni Yaa nfũ kɔkpɛko fɔ.16Bita saate loo adiki bakpɛmblatɛ nɔɔ kanya ninfũ baalaamiɛ otii wɔ nin-ye ni kyitaa ɔpɛ. Nse ninwuna kpile le niekye ni Yaa nfũ lɛwa di suoto lɛfɔ yi, abapɛ kyitaa nwu, nse ditɔyɔɔ fɔ.”17Nioso Saul latɔkɔ bakpɛmblatɛ nɔɔ alɛ, “Bimiɛ otii wɔ nin-ye ni kyitaa ɔpɛ nwaa biɛkpaa nwɔ biwakoe.”18Ni di bakpɛmblatɛ nwu onwii labuɛ alɛ, “Ntɔɔnya Yese wɔ di Betlehem obisuɔtɔbi onwii nin-ye ni kyitaa ɔpɛ. Ale osuɔtɔ wɔ ninkpe ni sɛkambi, ale kafɔɔ kpɛtɛ. Aye lɛkakatɛ nwaa, alɛ sekosopo kafɔɔ. SAATE nwu kafɔɔ nsiko nwɔ.”19Ninfɛ di Saul lakpee batɔkyɛntɛ Yese nfũ alɛ, “Ta obisuɔtɔbi lɛfɔ Dawid wɔ nikonyu ni bafoso awa ɔkyɛ nii.”20Nioso Yese layɔ bɔkɛɛ wɔ nintuka ni atoo, aatukasɔɔ alesaa, nta dikuuku ku tie kabitɛ aayɔ nya ku obisuɔtɔbi nɔɔ Dawid aakyesee Saul.21Ni di Dawid lawa Saul ɔkyɛ, ni aakyako nwɔ osumu nɛ. Saul labɔmbɔ nwɔ osie kanya, nioso Dawid labakple akpɛsaa-kleetɛ nɔɔ onwii lɛma.22Ninfɛ di Saul lata Yese kanya aabuɛ alɛ, “Ta Dawid osuku aasiɛ atoosumu mi, diekye oobuo mi anu.”23Obe lele di ninwuna le niekye ni Yaa nfũ lɛwa di Saul suoto yi, Dawid n-yɔ kyitaa nɔɔ ampɛ. Nse ditoobudi Saul; ninkpa nwɔ, ninwuna kpile nwu kafɔɔ ndie nwɔ kaamɛ.The Seed Company