1 Kronika12
Dawid Batikankotɛ Kasale Ba Niakye Ni Benyamin Kɔna Kamɛ
1Mba mmle niale basuɔtɔ ba niawa ni Dawid nfũ di Siklag, di obe wɔ baatososɔɔ ni di Kis obisuɔtɔbi Saul anu nɛ, (baasiɛ di bakpɛtɛ ba niakyakaako nwɔ aakpɛ ni kakpɛ kamɛ;2baakpakũ àtaa manfuo ni kafɔɔ akplɔ oyu ee afuɔ ofuki di seletanɛɛ ee sɛmɛntunɛɛ kanya; baale Saul asaabaletɛ ba niakye ni Benyamin kɔna nɛ):3Kanyayilatɛ lɛma niale Ahieser ku Yoas Gibea otii nwu Semaa babisuɔtɔbi nɛ; Asmawet babisuɔtɔbi Yesiel ku Pelet; Beraka, Anatot otii nwu Yehu,4ku Gibeon otii nwu Ismaia, osuɔtɔ sientɛ onwii di basuɔtɔ sientɛ Afosi-Atiɛ nwu kamɛ, nnwɔɔ niale Afosi-Atiɛ nwu kanyayilatɛ nɛ; Yeremia, Yahasiel, Yohanan, Gederat otii nwu Yosabad,5Elusai, Yerimot, Bealia, Semaria ku Haruf otii nwu Sefatia;6Elkana, Yesia, Asarel, Yoeser ku Kora otii nwu Yasobeam;7ku Yeroham wɔ niakye ni Gedor babisuɔtɔbi Yeola ku Sebadia.Dawid Batikankotɛ Ba Niakye Ni Gad Kɔna Kamɛ
8Gad batii bawo ladie baasifi Dawid ɔkyɛ di kawofakɔ nɔɔ nwu di ɔfaafuu kamɛ. Baale bakpɛtɛ ku sɛkambi, baalolaa suoto baata ni kakpɛ, manfuo ni kafɔɔ kubidifunsaa ku lɛkplɔ ɔkpɛ ɔblako. Anu lɛma lawɛ difu fɛle bakyata anu, mampɛsɛwa kafɔɔ fɛ nfɛ̀ di abokote suoto.9Eser niale kanyayilatɛ, Obadia kanyayilatɛ nyɔɔfa, Eliab otiɛfa,10Mismana lale ɔnaafa, Yeremia ɔnɔnle,11Atai okuɔnle, Eliel okuɛnsinle,12Yohanan ɔnɛnle, Elsabad ɔnaasinle,13Yeremia ofosile ku Makbanai lefosi-ɔkasale.14Gad batii ba mmle niale bakpɛtɛ kanyabayilatɛ nɛ; nnwɔ ninaa ni ɔnyɛɛ kafuo kɔlafa oyilako, sientɛ kplɛ kafɔɔ kakpe oyilako.15Mma niale batii ba niataalɛ ni Yordan okle di kɔwɛntɛ kasale kamɛ di obe wɔ kuayii kuawaalɛ ni atokosi ninwu omuu, ni baalaadiki obiala niasiɛ ni di sɛtaata nwu baasifiko kufĩ katunkɔ ku kufĩ Kamɛɛkɔ lɛkyɛ nɛ.16Benyamin batii bamba ku batii bawo niakye ni Yuda lawa Dawid nfũ di kawofakɔ nɔɔ nwu.17Dawid ladie aakyɛ aalaakyakako ma aatɔkɔ ma alɛ, “Nse atokoko ɔkyɛ ole kamɛ biɛwa bilɛ biɔbakyakaakoe yi, ni lelolaa suoto nlɛ kaata ye mimbla onwii ku ami. Kafɔɔ nse ɔwa biɛwa bilɛ biɔbadiki mi minta balo nii, di obe wɔ di nnɛɛ nii leklekle ni di kudu okpee kamɛ suoto yi, ni bate loo Yaa abuo nwu kaamɛ, aakanko ye.”18Ninfɛ di Ninwuna ninwii labuo di Amasai suoto, basuɔtɔ Afosi-Atiɛ nwu kanyayilatɛ suoto, ni aabuɛ alɛ:“Oo Dawid, balefɔ bule!Oo Yese obisuɔtɔbi, ɔkyɛ lɛfɔ bukpe!Atoko ɔkyɛ ole, atoko ɔkyɛ ole asiɛko fɔ,atoko ɔkyɛ ole kafɔɔ asiɛko mba niɛkyakaako fɔ ni,diekye Yaa lɛfɔ kamakyakaako fɔ.”Nioso Dawid lafũ ma aabla ma kanyabayilatɛ di bakpɛtɛ nɔɔ ba nindieko ni batii kanya.Dawid Batikonkotɛ Ba Niakye Ni Manase Kɔna Kamɛ
19Manase batii bawo ladie baawa Dawid kakyɛ, di obe wɔ aakyɛ ni ku Filisti batii alɛ bɔɔlaakpɛko ni Saul. (Nnwɔɔ ku batii nɔɔ ditakyakaako Filisti batii, diekye baatitika sɛlaa baaloo nii, batunlentɛ lɛma ladiki nwɔ osuku aasifi. Baabuɛ alɛ, “Abayɔ asi loo anta, nse ɛɛpɛ eekple eesifi saate nɔɔ Saul nfũ.”)20Mba mmle niale Manase batii ba niasifi baawa ni Dawid kakyɛ di obe wɔ aasifi ni di Siklag nɛ: Adna, Yosabad, Yediael, Mikael, Yosabad, Elihu ku Siletai, mma niale kanyabayilatɛ di akudi kakpe di Manase batii kamɛ nɛ.21Baakyakaako Dawid di akudi ya nindieko nwɔ ni suoto, diekye bamuu lɛma lale bakpɛtɛ ku sɛkambi, baale kafɔɔ kanyabayilatɛ di bakpɛtɛ nɔɔ kamɛ.22Dii biala batii lawa babatɔɔkyakaako Dawid, dialase di obe wɔ di bakpɛtɛ nɔɔ lapɔ ni fɛle Yaa bakpɛtɛ okle.Dawid Bakpɛtɛ Ayooto
23Mba mmle ninle basuɔtɔ bakpɛtɛ lɛpɔ le niawa ni Dawid nfũ di Hebron alɛ bomunikĩisa ni Saul sɛka kalekɔ manta ni Dawid, fɛ mmle di SAATE nwu labuɛ ni nɛ:24Yuda basuɔtɔ, mba ninklee ni kubidifunsaa ku lɛkplɔ labla- nkpe-nkuɔ-alafa-anɛ baaminisa akpakyaa baata ni kakpɛ;25Simeon basuɔtɔ, bakpɛtɛ ba nialolaa suoto baata ni kakpɛ labla- nkpe-nkuɛnsĩ-kɔlafa;26Lewi basuɔtɔ- nkpe-nna-alafa-akuɔ,27di Yehoiada, Aron leyo kamɛ ɔnɔɔfo lakyakaa ni, ku basuɔtɔ nkpe-ntiɛ-alafa-akuɛnsĩ,28ku Sadok, okosopo kpɛtɛ onwii ku sɛkambi, ku banɔɔfotii afosi-anyɔ-banyɔ niakye ni leyo nɔɔ kamɛ;29Benyamin basuɔtɔ, Saul babilɛma- nkpe-ntiɛ. Kpinwu lale onukwale baata ni Saul leyo batii dialaase di obe nwu.30Efraim basuɔtɔ lale bakpɛtɛ ku sɛkambi, baafũ ni leyooto di nfaabi lɛma mmu kamɛ labla- nkpe-afosi-anyɔ-alafa-anɛ.31Manase kɔna-kakyɛ basuɔtɔ ba baadiki ni di ayooto lɛma kanya alɛ babase ni Dawid seka labla- lefosi-nkpe-nnɛ.32Isakar basuɔtɔ ba nianu ni obe nwu kasɔ, baatofo ni kafɔɔ lɛsaa le di Israel kabla ni labla- baka alafa-anyɔ, ku banantii lɛma ba bamuu niasiɛ ni di kalɔ lɛma.33Sebulon basuɔtɔ, bakpɛtɛ ba niatofo ni kakpɛ nwaa, baalolaa suoto baata ni kakpɛ ku lɛkpɛsaa biala, alɛ bɔɔlaakyakaako ni Dawid ku onukwale ole kanya labla- nkpe-afosi-anɔɔ.34Naftali basuɔtɔ labla- banɔɔfotii kakpe, di basuɔtɔ ba niaklee ni kubiafunsaa ku akplɔ, nkpe-afosi-atiɛ, nkpe-akuɛnsĩ lakyakaa nii.35Dan basuɔtɔ ba nialolaa suoto baata ni kakpɛ labla- nkpe-afosi-anyɔ, nkpe-nnɛ-alafa-akuɔ.36Aser basuɔtɔ bakpɛtɛ ba niatofo ni kakpɛ nwaa baalolaa suoto baata ni kakpɛ labla- nkpe-afosi-ana.37Diakye ni kafɔɔ di Yordan kufĩ katunkɔ yi, Ruben basuɔtɔ, Gad basuɔtɔ ku Manase kɔna-kakyɛ nwu niaklee ni lɛkpɛsaa di letembi biala kanya labla- nkpe- kɔlafa-afosi-anyɔ.38Mba mmle bamuu niale basuɔtɔ bakpɛtɛ ba niayɔ suoto baata alɛ bɔɔbla ni ɔkpɛ di akudi nwu kamɛ nɛ. Baapɛ atapo osie kanya baawa Hebron alɛ bɔɔbase Dawid sɛka di Israel omuu suoto. Israel batii bamuu bule kafɔɔ lawɛ disibu ninwii alɛ boose Dawid sɛka.39Basuɔtɔ nwu lale ayi atiɛ ninfa ku Dawid, baatoole, baatoonyi kafɔɔ, diekye banantii lɛma lanyu ma kamaa nwaa.40Diɛkyakaa nii yi, bawo lɛma ba niakye ni bia fanfa fɛ Isakar, Sebulon ku Naftali layɔ alesaa baatika di kapu bapɔnkɔ, babɔkɛɛ ba nintuka ni atoo, babɔkɛɛ ba ninte ni fɛle bapɔnkɔ ku banankyue-suɔtɔ suoto baatɔɔwako ma. Nioso bawɛ nnaafũ, asɛnsaa, bloblo-kosole, nta, nnɔnyi, banankyue ku bafoso kpinwu, diekye suoto lɛyɔ lawɛ di Israel.The Seed Company