1 Kronika11
Dawid Labale Ɔka Di Israel Ku Yuda
1Israel batii bamuu lasi baawa Dawid ɔkyɛ di Hebron baababuɛ alɛ, “Suoto sina ku ntɔ lɛfɔ omu bule.2Di saa yi, bia di Saul lale ni ɔka, afɔ niale otii wɔ nialeko ni Israel katũ di kakpɛ lɛma ɔkyɛ kamɛ. Ni di SAATE Yaa lɛfɔ nwu labuɛ aatɔkɔ fɔ alɛ, ‘Afɔ nimakpaa batii nii Israel, fabale kafɔɔ tunletɛ lɛma.’”3Di Israel banɔɔfo bamuu lawa ni Ɔka Dawid nfũ di Hebron yi, aabla kanya ninii ku mma di Hebron di SAATE nwu anu, ni baapɛ Dawid ɔfɔɔ fɛ ɔka di Israel suoto fɛ mmle di SAATE nwu labuɛ aatɛ aafenko ni di Samuel suoto nɛ.4Dawid ku Israel batii bamuu ladie baakyɛ Yerusalem (ninle ni Yebus). Ni di Yebus batii nwu niasiɛ ni ninfa5latɔkɔ Dawid alɛ, “Flɔbabuo nfũ mmle.” Kafɔɔ, Dawid lafũ Sion kawofakɔ nwu ninle ni Dawid Okpoo kplɛ nwu.6Dawid labuɛ alɛ, “Olele niele katũ eedieko Yebus batii kamale kakpɛ kanyayilatɛ-nɔɔfo.” Seruia obisuɔtɔbi Yoab niakasa ɔkata ɔkyɛ, nioso nnwɔɔ niale kanyayilatɛ-nɔɔfo nwu nɛ.7Ninfɛ di Dawid lakata aakyɛ aalaasiɛ di kawofakɔ ayo nwu kamɛ, nioso baalɛɛ nwu alɛ Dawid Okpoo kplɛ nɛ.8Aatofo seyoyiɛ aakyisa nwu, aakyeko kamɛ seyoyiɛ lɛkyɛ aawako oyoyiɛ wɔ niamana nwu kuakyi nii, Yoab kafɔɔ lalolaa okpoo nwu bule.9Ni di Dawid latɔɔwɛ osie aatɔɔkyakaa nɛ, diekye SAATE wɔ Ninlenke ni lasiɛko nwɔ.Dawid Bakpɛtɛ Sientɛ
10Mba mmle niale Dawid baka siene nwu nɛ- mma niakyakaa di Israel omuu suoto baata lɛkyakaako alɛ sɛka ole nɔɔ lakpɛ siakyaka kasɔ nwu kamuu, fɛ mmle di SAATE nwu labuɛ aatɛ ni nɛ-11mba mmle ninle Dawid basuɔtɔ sientɛ nwu nɛ:Yasobeam, niale ni Hakmon otii nwu niale bakpɛtɛ nwu kanyayilatɛ-nɔɔfo, aatakatɛ lɛkplɔ nɔɔ di basuɔtɔ alafa-atiɛ suoto, aalo ma di didieko ninwii kamɛ.12Nnwɔ niatikanko nwɔ ni niale Dodo, Ahohi otii nwu obisuɔtɔbi Eleasar, basuɔtɔ sientɛ batiɛ nwu onwii lɛma.13Aawɛ ku Dawid di Pas Damim di obe wɔ di Filisti batii lasi ni ninfa baata ni kakpɛ. Bakpɛtɛ dikudi nwu latoso Filisti batii nwu, di lɛbale di kofe kunwii ko niayii ni ku kamɔɔ lawɛ nii.14Kafɔɔ Dawid ku Eleaser lalaayila di kofe nwu ntɛɛntɛɛ. Baakpɛ baata kofe nwu, ni baalo Filisti batii nwu baatɛ, ni di SAATE nwu lata ma lelenkee kplɛ nɛ.15Baka batiɛ di baka afosi-atiɛ nwu kamɛ lasoo baawa Dawid nfũ di difuɔnkpaa nwu di Adulam ofuɔntuu nwu, di obe wɔ di Filisti batii bapɔnkɔ basiɛtɛ dikudi lalaasiɛ ni di Refaim Ɔtaata.16Di obe nwu kamɛ yi, Dawid lasiɛ di kawofakɔ nwu kamɛ, Filisti batii bakpɛtɛ dikudi nwu kafɔɔ lawɛ di Betlehem.17Otukɔnsɔ laklee Dawid osie kanya ni aabuɛ alɛ, “Oo, alɛ otii owo atɛɛ ntu di ditubiɔ le ninkaako ni Betlehem kayoko nnyi!”18Nioso bakpɛtɛ sientɛ Batiɛ nwu labɛ baabuo di Filisti batii kamɛ baafe, baaladu ntu di ditubiɔ nwu ninkaako ni Betlehem kayoko nwu, baatuka mi baawako Dawid. Kafɔɔ aasĩ mi onyi; kafɔɔ yi, aanyɛɛnɛ mi aawii di SAATE nwu anu.19Ni aabuɛ alɛ, “Yaa ata dikyɛdiokyo alɛ kaabla nle mmle! Kanyi basuɔtɔ ba mmle niɛyɔ nkpa lɛma beekpee ni di ɔɔla ntɔ?” Ta bɛɛyɔ nkpa lɛma beekpee ni di ɔlaa, beekplesa mi bɛɛwako ni oso yi, Dawid dilɔbanyi mi.
Nkpo niale sɛkambi kplɛ se di basuɔtɔ sientɛ batiɛ nwu labla ni nɛ.20Yoab obilɛma-suɔtɔbi Abisai niale Batiɛ nwu kanyayilatɛ. Aatakatɛ lɛkplɔ nɔɔ di basuɔtɔ alafa-atiɛ suoto, aalo ma, nioso kafɔɔ aabawɛ dibu fɛ Batiɛ nwu nɛ.21Baatɔɔ dibu sɛnyɔ baalenkee Batiɛ nwu, ni aabakple ma kakpɛ kanyayilatɛ nɛ, nu kuntɛ atasiɛ di batiɛ nwu kamɛ.22Yehoiada obisuɔtɔbi Benaia lale kpɛtɛ wɔ niawɛ ni sɛkambi, aakye ni Kabseel, aabla ni asiensaa kplɛ. Aalo Moab batii basuɔtɔ sientɛ nwaa banyɔ. Aasoo kafɔɔ aakyɛ dibiɔ ninwii kamɛ aalaalo kyata di atubakani ɔkpakpaa dii suoto.23Aalo kafɔɔ Egipte otii onwii wɔ niayefe ni kasɔ, nkpaa nkuɛnsĩ-anɛɛkpa-akuɔ. Nu di Egipte otii nwu laklee lɛkplɔ fɛle asaalosotɛ kawesee di kɔnɛɛ nɔɔ yi, Benaia latu aabuo nwɔ di suoto ku kawosoku. Aakpafɛ lɛkplɔ nwu aafũ di Egipte otii nwu kɔnɛɛ, ni aalo nwɔ ku nnwɔɔ omu nɔɔ lɛkplɔ nɛ.24Nkpo niale Yehoiada obisuɔtɔbi Benaia sɛkambi se aabla ni nɛ; nnwɔɔ kafɔɔ aale otii finle fɛ basuɔtɔ sientɛ batiɛ nwu.25Baatɔɔ dibu kplɛ baalenkee bakpɛtɛ Afosi-atiɛ nwu, kafɔɔ batakpee nwɔ di basuɔtɔ sientɛ Batiɛ nwu kamɛ. Ni di Dawid layɔ nwɔ aase di banyuntɛ nɔɔ kanya nɛ.26Basuɔtɔ sientɛ nwu niale: Yoab obilɛma-suɔtɔbi Asahel, Dodo wɔ niakye ni Betlehem obisuɔtɔbi Elhanan,27Harod otii nwu Samot, Pelon otii nwu Heles,28Ikes wɔ niakye ni Tekoa obisuɔtɔbi Ira, Anatot otii nwu Abieser,29Husa otii nwu Sibekai, Ahohi otii nwu Ilai,30Netofat otii nwu Maharai, Netofat otii nwu Baana obisuɔtɔbi Heled,31Ribai wɔ niakye ni Gibea di Benyamin obisuɔtɔbi Itai, Pirato otii nwu Benaia,32Hurai wɔ niakye ni Gaas awɛ nwu, Aribat otii nwu Abiel,33Baharum otii nwu Asmawet, Saalbon otii nwu Eliahba,34Gison otii nwu Hasem babisuɔtɔbi, Harari otii nwu Sage obisuɔtɔbi Yonatan,35Harari otii nwu Sakar obisuɔtɔbi Ahiam, Ur obisuɔtɔbi Elifal,36Mekerat otii nwu Hefer, Pelon otii nwu Ahiya,37Karmel otii nwu Hesro, Esbai obisuɔtɔbi Naarai,38Natan obilɛma-suɔtɔbi Yoel, Hagri obisuɔtɔbi Mibhar,39Selek Amon otii nwu, Berot otii nwu Naharai, aale ni Seruia obisuɔtɔbi Yoab akpɛsaa-kleetɛ,40Yitri otii nwu Ira, Yitri otii nwu Gareb,41Hiti otii nwu Uria, Ahlai obisuɔtɔbi Sabad,42Ruben otii nwu Sisa obisuɔtɔbi Adina, wɔ niale ni Ruben batii ɔka, di basuɔtɔ sientɛ afosi-atiɛ nwu lawɛ ni ku nnwɔɔ,43Maaka obisuɔtɔbi Hanan, Mit otii nwu Yosafat,44Asterat otii nwu Usia, Aroer otii nwu Hotam babisuɔtɔbi Sama ku Yeiel,45Simri obisuɔtɔbi Yediael, obilɛma-suɔtɔbi Yoha Tisi otii nwu,46Mahawi otii nwu Eliel, Elnaam babisuɔtɔbi Yeribai ku Yosawia, Moab otii nwu Yitma,47Mesobai otii nwu Eliel, Obed ku Yaasiel.
The Seed Company