EFESOFOƐ2
1Ɔwɔ nu, né ɛmɔ awu ɛmɔ mvomsoɛ ne ɛmɔ bɔne nu, nakoso Nyameɛ amaa ɛmɔ awa ngoa nu,2ɛhene anu yeɛ mmerɛ bie ɛmɔbɔle ɛmɔ bra kyɛbɔ wiase ne kuro, kyɛbɔ mvrama bɔ ɔbɔ né panyi ne kuro ne, na sɔ mvrama ne yeɛ ole tumi bɔ ɔyɛ adwuma wɔ ngwalaa bɔ bɛ so yɛ se ne nu ne.3Mmerɛ bie, sɔ ala yeɛ ne yɛ mukoraati yɛbɔ yɛ bra ɔ, yɛlili y'akɔnnɔ si, ná bɔ yɛ nwonaen ne y'adwene kyire yɛ ne, ɛhene yeɛ ne yɛyɛ ɔ. Na yɛ koso, né yɛte mmaa bɔ Nyameɛ afɛ bɛ so yaa, te kyɛ bɛ bɔ baha nala.4Nakoso, Nyameɛ bɔ y'awunvoin sone ne, ɔnate kyɛ ɔdɔ yɛ paa nati,5wamaa yɛne Kristo mukoraati anya ngoa, ɔmva ye nwo kyɛ ne yawu wɔ yɛ mvomsoɛ nu ne. Ye adom ti, olɛle ɛmɔ ngoa.6Afei koso, watingye yɛne Kristo, na wafa yɛ waatena anwuro maa yɛne Kristo Yesu ayɛ kõ.7Na ɔnate kyɛ ye tianu nyɛ se nati, wɔ ewiase bɔ ɔba nanu ne, ɔkɔla ye adom bɔ ɔsone ne ali kohyire yɛ bɔ yɛne Kristo Yesu ayɛ kõ ne.8Ye adom ti, ɔnate ɛmɔ gyidie so alɛ́ ɛmɔ ngoa, ɛhe de, nná ɛmɔ yeɛ ɛmɔyɛle ɔ, ɔte Nyameɛ akyɛdeɛ.9Oggyi ebie adwuma so, ná ebiala amva anhoɔhoa ye nwo.10Yɛte Nyameɛ sa noa adwuma, na ɔbɔle yɛ wɔ Kristo Yesu nu kyɛ yɛɛyɛ adwuma pa, adwuma bɔ Nyameɛ ali moa asiesie ato berɛ kyɛ yɛɛyɛ ne.11Yeti ɛmɔkaye kyɛ, mmerɛ bie bɔ wapɛ nu ne, aworɛ nu de, né ɛmɔte maen-maen nufoɛ. Ná ne bɛ bɔ bapɛ bɛ toa ne ka kyɛ ɛmɔte “ɛtó.” 12Sɔ mmerɛ ne, né ɛmɔnze Kristo, né ɛmɔ ahwe ɛmɔ nwo koraa bafi Israel maen nanwo, ná bɔhyɛ nanwo apam ne koso, ne ɛmɔ bokka ye; né ɛmɔlle anidasoɛ biala wɔ wiase, na ne ɛmɔnze Nyameɛ koso.13Nakoso afei de, ɛmɔ bɔ ahaa né ɛmɔ wɔ dede ne, ɛmɔ ne Kristo Yesu ayɛ kõ, na ɛmɔnate ye mogya naso apingye Nyameɛ.14Ye yeɛ wamaa yanya asomdwie, na waha kue nyɔ namukoraati wabɔ nu ne. Ná fasue bɔ ne wahyɛ yɛ nu ne, wadwiri wagua.15Wafa ye nipadua ne waye ɔtaen ne wafi berɛ, ɛhene yeɛ ole Mmeraa bɔ ne ahyɛdeɛ wɔ nu ne, kyɛbɔ ɔkɔyɛ a ɔkɔmaa kue nyɔ namukoraati kɔbɔ nu kɔyɛ sona foforɛ, ná wamaa asomdwie awa;16na ɔnate asɛnnua naso asiesie kue nyɔ ne né Nyameɛ afia, ná kue nyɔ ne ayɛ nipadua kõ, ofikyɛ ye bɔbɔ wahu ɔtaen ne.17Ɔwale ne, ɔhane asomdwie nzɛmba ne hyirele ɛmɔ bɔ ne ɛmɔ wɔ dede, ɔne bɛ bɔ ne bɛpingye ne,18ofikyɛ ɔnate ye so yeɛ kue nyɔ namukoraati awa Baba ne berɛ nate honhom kõ aso.19Yeti kesaalae de, ɛmɔtte ɛwɔfoɛ ne amanfrafoɛ kõ, mmom ɛmɔ ne akrongronfoɛ bɔ baha ne te maen mmaa, na ɛmɔte Nyameɛ awurofoɛ,20ná bato ɛmɔ basie asomafoɛ ne adiifoɛ fapem naso, na Kristo Yesu bɔbɔ yeɛ ɔte fapem né nyɔboɛ titire ne.21Ye nu yeɛ sua namukoraati atoɔtoa nu pɛpɛɛpɛ, ná onyi yɛ asɔre awuro krongron ma Awurade.22Bamaa ɛmɔ ne Kristo ayɛ kõ, na bɛsi ɛmɔ bɛbɔnu maa ɔyɛ nekaa bɔ Nyameɛ nate ye honhom naso kɔtena ɔ.
Lexihub