2 TIMOTEO3
1Nakoso kaye kyɛ, awieɛ mmerɛ nanu ne, mmerɛ bɔ enu yɛ se kɔwa.2Ofikyɛ mmenia kɔyɛ pɛsɛmengominya, bɛ nye kɔboro sikaa, bɛkɔhoɔhoa bɛ nwo, bɛkɔyɛ ahomasoɛ, bɛkɔkeka mmusue dwirɛ, bɛkɔyɛ b'awofo so asoserɛ, bɛkɔyɛ bonniayɛ, bɛ bɔ benni nahorɛ,3bɛ bɔ bɛlle tema, bɛ bɔ bɛne bɛ ngora nnyɛ apam, bɛ bɔ bɛsɛkye mmenia dumaa, bɛ bɔ bɛngora bɛnhyɛ bɛ nwo so, anyeserɛ, bɛ bɔ bɛnguro pa,4bɛ bɔ bɛye bɛ mmango bɛma, bɛ bɔ bɛmmu nikye, mbaninzɛm, bɛ bɔ bɛkuro anigye bɛtra Nyameɛ,5bɛkɔyɛ bɛ nwo kyɛ bɛsõ Nyameɛ, nakoso bɛngɔyɛ bɔ okuro ɔ. Sɔ mmenia ne, twe wɔ nwo fi bɛ nwo.6Sɔ mmenia nemɔ bie wiewia bɛ nwo kɔ awuro nu, na mmrasua bɔ bɛyɛ mmerɛ, bɛte bɔne nu, na akɔnnɔ ahoroɛ ahyɛ bɛ so ne, bɛfa bɛ bɛyɛ ngoaa.7Bɛsua nikye daa biala, nakoso bɛngora bennya nahorɛ nanwo nimdeɛ bɔ odi mu ne.8Na kyɛbɔ Jannes ne Jambre dwɔso tiale Mose ne, sɔ mmenia hemɔ koso kɔdwɔso kotia nahorɛ ne. Bɛte mmenia bɔ b'adwene asɛkye koraa, na Nyameɛ nnne bɛ ndonu wɔ gyidie nanu.9Nakoso, bɛngɔhora bɛ nyunu kɔ kõ, ofikyɛ bɛ ngwaseasɛm ne kɔla ali maa ebiala konwu ye, kyɛbɔ Jannes ne Jambre deɛ ne yɛle nala.10Nakoso wɔ de, ali me ngyerɛkyerɛ, m'abrabɔ, bɔ ogyi me nye so, me gyidie, m'aboterɛ, me dɔ, ɔne m'animia si pɛɛ.11Na kyɛbɔ mmenia tane me nye, ɔne amaneɛ bɔ manwu, te kyɛ bɔ ɔtole me wɔ Antiokia, Ikoniom, ne Listra ne, ɛse ye mukoraati. Mmiane me nye ngyinane sɔ haw he amukoraati nu, na Awurade lɛle me fili nu.12Nahorɛ dwirɛ yeɛ ole kyɛ, bɛ bɔ bɛpena kyɛ bɛfa nyamesom pa bɛtena ase wɔ Kristo Yesu nu namukoraati ne de, bɛkɔtane bɛ nye.13Ofikyɛ, amumuyɛfoɛ ne bɛ bɔ bɛlaka-laka mmenia kɔhɔ bɛ nyunu wɔ bɔne nu, bɛkɔlaka-laka ebiemɔ, na ebiemɔ kɔlaka-laka bɛ.14Nakoso wɔ de, bɔ asua, na alɛ́ ali kyɛ ɔte nahorɛ ne, kɔ so ala tira nu yé, ofikyɛ ɛse bɛ bɔ esua fili bɛ berɛ ne.15Efi wɔ ngwalaa nu yeɛ ɛse tworɔ krongron nanu ɔ, ɛhene yeɛ ɔnate Kristo Yesu nu gyidie so kɔhora kɔmaa ekonwu nyanza kɔhɔ daa ngoa nu ɔ.16Tworɔnzɛm namukoraati fi Nyameɛ honhom nu, na mvasoɛ wɔ so, bɛfa bekyirekyire, bɛtengyɛ-tengyɛ nningyein, ɔtengyɛ yɛ so maa yɛyɛ nikye pa,17kyɛbɔ ɔkɔyɛ a Nyameɛ sona kɔfata, bɔ basiesie ye yé bama adwuma pa biala.
Lexihub