2 KORINTOFOƐ13
1Sɛ meba ɛmɔ berɛ he a, me pɛn nza so ɛne. “Na odikyɛ edwirɛ biala gyina mmenia nyɔ anaa nza adanzeɛ so.”2Ɔwɔ nu kyɛ kesaalae de nne berɛ, nakoso ɔte kyɛ bɔ nwɔ ɛmɔ berɛ, mmerɛ bɔ mma nzrale ɛmɔ pɛn nyɔ so ne. Na medi moa mebɔ bɛ bɔ bɛyɛle bɔne, ɔne bɛ bɔ baha ne kɔkɔ kyɛ, sɛ meba a, mengɔfa bɛ nwo mengɔhyɛ bɛ,3ofikyɛ ɛmɔpena adanzeɛ bɔ okyire kyɛ, ɔte amba kyɛ Kristo yeɛ ɔfa me so dwudwo ɔ. Kristo nyɛ mmerɛ wɔ ɛmɔ so, mmom ole tumi wɔ ɛmɔ nu.4Ɔwɔ nu, mmerɛyɛ ti yeɛ bɛbɔle ye asɛnnua nu ɔ, nakoso Nyameɛ tumi ti, ɔte ase. Yɛ koso, yɛyɛ mmerɛ kyɛbɔ ne ɔyɛ mmerɛ nala, nakoso Nyameɛ tumi bɔ wala ye ali wɔ ɛmɔ so nati, yɛne ye kɔtena ase.5Ɛmɔneɛnea ɛmɔ nu bɛnea, sɛ ɛmɔtɛ́ wɔ gyidie nanu a; ɛmɔsɔ ɛmɔ nwo bɛnea, ná ɛmɔnwu kyɛbɔ ɛmɔte deinn. Anaa ɛmɔnwu ye kyɛ Yesu Kristo wɔ ɛmɔ nu? Sana ebie a, ɛmɔ mvata.6Nne anidasoɛ kyɛ, ɛmɔ konwu yɛ kyɛ mmenia bɔ bɛfata.7Na yɛbɔ Nyameɛ mbaeɛ kyɛ, ɛmɔngɔyɛ bɔne biala, nná kyɛ yɛpena kyɛ mmenia nwu yɛ kyɛ yɛ de yɛfata, mmom sɛ mmenia nwu yɛ kyɛ yɛmvata po a, ɛmɔ de, ɛmɔ kɔyɛ bɔ ɔte pa.8Ofikyɛ yɛngɔhora yɛngɔyɛ nikye fee yɛngotia nahorɛ ne, mmom bɔ yɛyɛ biala ne, yɛyɛ yɛma nahorɛ ne.9Mmerɛ biala bɔ yɛkɔyɛ mmerɛ maa ɛmɔ kɔyɛ se ne, yɛ nye gye paa. Na yɛ mbaeɛ ala yeɛ ole kyɛ, bɛkɔhɔ so bɛkosiesie ɛmɔ.10Ɛhe ati yeɛ nnne berɛ, nakoso metworɔ sɔ dwirɛ he mebrɛ ɛmɔ ne, na sɛ meba a, tumi bɔ Awurade afa ama me ne, mamva manni dwumaa ma wammo so, ofikyɛ ɛmɔ ngɔsoɛ ti yeɛ ɔfa mane me ɔ, wamva wamma me kyɛ mva mmu ɛmɔ abanu.11Aliemaa mɔ, bɔ ɔpɛ yebo koraa ne, ɛmɔma ɛmɔ nye gye, ɛmɔma bɛsiesie ɛmɔ, ɛmɔkyekye ɛmɔ nwo wora, ɛmɔnya adwene kõ, ɛmɔtena asomdwie nu; ná ɔdɔ ne asomdwie Nyameɛ ne, ɔne ɛmɔ kɔtena.12Ɛmɔfa mveanoɛ bɔ ɔte krongron bɛhyeɛhyea ɛmɔ nwo.13Akrongronfoɛ namukoraati nwa bɛkyea ɛmɔ.14Y'Awurade Yesu Kristo adom, Nyameɛ dɔ, ɔne honhom krongron bɔ ɔboka ɛmɔ ne, ɔha ɛmɔ mukoraati.
Lexihub