1VAKOLINDO15
1Lelo vang'olotsangu, ntsin'gana ntsiviwuse yila Ndongwa Nofu yo ntsavavikulye, nanye mukayanuche na kwa yiyo mwimile kwa wukangatso.2Kwa Ndongwa yino Nofu ya Mulungu yo ntsavavikulye munkuluswa, manyi mukibatilitsa finofu. Tebe na ihyo, mukuva mwitumbye chinu chinji.3Heni ntsavakabitse chinu chikomi chila cho ntsanuche, kuta Chilisito afweye kwasawuli ya ndongwa tsetu ntsibi, kota fyo ganlonga Mandiko ga Mulungu,4kuta atsisilwe na akatsilipukaje siku ya kadatu, kota fyo ganlonga mu Mandiko ga Mulungu,5nayo akamuhumilaje Chefwa, na kahi akavahumilaje vala vatumi kumi na vavili.6Kaha akavahumilaje hohamwe vala vang'olotsetu tsaidi ya miya tanu, hagati ha iwo vamwe vang'acha wumi mbaka sambi, lechelelo vamwinga mwanga vafweye.7Hambele akamuhumilaje Yakobo, na kahi akavahumilaje vatumi veka.8Hoavaga kuvahumila veka, akanyumilaje na heni, yo ntsavaga kota munu yo aleliche luvala lo silwaganikaga.9Kwakuva heni yo ntsili mudodo kulutila vatumi veka, na singanikije kuchemwa mutumi, kwa hila fyo ntsavakodite vanu vanya litumbilo lya Chilisito.10Lechelelo kwa wuwuya wa Mulungu mbeye kota fyontsili, na wuwuya wake kwa heni siwuveye wa bule hela. Heni ndisile katsi kulutila vatumi veka, sintsadisile ihyo kwa wuvetso wangu hela, ila kwa wuwuya wa Mulungu wo wunkola katsi hamwe na heni.11Lechelelo nayivaje ihyo, manyi ntsive heni awu vatumi vanji, tunguchivikula Ndongwa Nofu, hetwe tweka tunvikula chinu chimwe, na icho cho muchitumbye.12Lelo manyi tuvikwe kuta Chilisito atsilipuche, yiveye ndawuli vanu vanji hagati henyu vanlonga kuta vanu wo vafweye sivakutsilipulwa?13Lechelelo manyi yive wukweli kuta kuduhu wutsilipuko, duve nambe Chilisito nayo si akatsilipuche,14na manyi yive Chilisito si akatsilipuche, duve nambe mbikulo tsetu tsilihela mana yoyive na litumbilo lyenyu linkuva si chinu ndaya.15Kulutila ifyo fyeka, tukakuva vadesi halutalo ha Mulungu kwa chila cho twahuliche na kulonga, kwasawuli twavaga tulontsile kuta Mulungu amutsilipwe Chilisito, lulongwa ulo lukakuva lwa wukweli manyi vanu wo vafweye sivatsilipulwaga.16Manyi yive kweli kuta vanu wo vafweye sivatsilipulwaga, duve nambe Chilisito siakatsilipuche.17Na kaha manyi Chilisito siakatsilipuche, duve litumbilo lyenu liveye lya bule hela, mung'acha mungikala mu ndongwa tsenyu ntsibi.18Ihyo lelo, na vala veka wo vafweye kuno vamutumbye Chilisito vakuva vayatsile hela.19Manyi lihuvilo lyetu kwa Chilisito lili kwasawuli ya wumi wuno hela, hetwe tun'ganika kuwonelwa lusungu kulutila vanu veka va mu inyi.20Lechelelo wukweli wuli hino, Chilisito atsilipuche, mwene yo mulongola va vala veka wo valongwe kuvasa mu chifo kota fyofili fibetwa filongola.21Kwakuva kota hila chifo fyo chatsitse mu inyi kukolela kwa munu yumwe, nayo yo Adamu, ho hihyo na kutsilipuka kwa vanu kutsitse kukolela kwa munu yumwe, nayo yo Chilisito.22Kota hila vanu veka fyo vankufwa kwasawuli ya kihatsa na Adamu, ho hihyo na vanu veka vakutsilipulwa kwa kihantsa na Chilisito.23Lechelelo chila munu akutsilipulwa kwa luvala lwake! Chilisito yo mulongola kutsilipuka, hambele vakutsilipuka vala veka wo vanu vake hala ho akuva kutsa mwene.24Hambele wukufika wula wudugo, Chilisito akumukabitsa Dada Mulungu wuntsajila wake, hala Chilisito ho akuva anantsile chila wutavala na mamulaka na wuvetso wake.25Kwakuva latsima Chilisito atavale mbaka hala ho akuva avasumile vatelani vake na kuvavika hasi ha magulu gake.26Vatelani veka vakwanagwa na hawudugo chikwanangwa chifo.27Mandiko ga Mulungu ganlonga, “Mulungu afivisile finu fyeka hasi ha wutavala wake.” Lechelelo mandiko ho ganlonga kuta, “Finu fyeka fivisilwe hasi hake.” Yinlajila kuta Mulungu yo afivisile finu fyeka hasi ya Chilisto, na Mulungu si afuluche ave yumwe va finu ifyo, kwasawuli mwene yo afivisile finu ifyo fyeka mu mamulaka ga Chilisito.28Lechelelo finu fyeka ho fikuvikwa mu wutavala wa Chilisito, ho iho nayo Mwana ho akivika hasi ha wutavala wa Mulungu yo avisile fyeka hasi ha wutavala wake, ili Mulungu afitavale finu fyeka.29Lelo manyi kuduhu wutsilipuko, vanu vala wo vam'batitswa kwajili ya vanu wo vafweye vangihuvila kupata chinu chachi? Manyi vanu wo vafweye sinambe vatsilipulwe, kuna mana yachi kubatitswa kwasawuli ya vanu wo vafweye?30Na hetwe natwe, kwasawuli yachi tungiyingitsa mu ng'oko chila luvala?31Nyee vang'olotsangu chifo chili halutalo hangu chila siku! Ntsingidutsa kwasawuli ya henye fyo mwihantsitse na Chilisito Yesu Mutwa vetu, icho chochin'ndita ndonje lulongwa ulo.32Manyi chila cho ntsin'gana chika chive kota fyo vahotsaga vanu va mu inyi, kula kisumana kwangu na vanu vabi wo vavaga kota minyama mibi hano ha Efweso, kuna mana yachi? Manyi wo vafweye sinambe vatsilipuche ntsika kulonga, “Chiba tulye na kung'wa, kwakuva mitondo tukufwa.”33Mulekaje kudeteletswa! “Kihantsa na vanu vabi, kwanangaga tabiya nofu.”34Nyee, mulamuche! Mwikalaje finofu! Mulekaje kudita ndongwa ntsibi. Ntsinguvalonjela ndongwa itso ili ntsivadite muwone nyoni kwasawuli vanu vamwinga hagati henyu sinambevamutsele Mulungu.35Lechelelo munu afuluche aputse, “Vanu wovafweye vakutsilipulwa chinya ndawuli? Kaha vakuva na muvili gwa chinya ndawuli?”36Itso mbutso tsa chipuva! Manyi uyale nyadikwa mu lilongo, na manyi nyadikwa iyo yileche kugaluka hila fyoyili, nyadikwa iyo siyifuluche yote.37Chila cho mun'yala chivaga nyadikwa hela, yifuluche yive nyadikwa ya mibangayeye awu ya chinu chinji, si mun'yala lila lisina lyo likota hambele.38Lechelelo Mulungu ayipelaga muvili iyo nyadikwa kota fyo an'gana mwene. Chila nyadikwa yipataga muvili gwake gwa wiyeka.39Mivili ja fiwumbe fyeka sijili sava ndaya. Mivili ja vanu jihwanaga, na ja minyama najo jihwanaga, na hihilaga kwa mideje, na ja somba najo.40Hihilaga kojili mivili ja kilanga kwa Mulungu na mivili ja muinyi. Wunofu wa mivili ja kilanga kwa Mulungu wuli finji, na wunofu wa mivili ja mu inyi nawo wuli finji.41Litsuva lina wunofu wake, na mwetsi nago guna wunofu wake, na nyenyetsi natso sitsihwanaga wunofu wake.42Hohihyo fyo yikuva hala vanu wo vafweye ho vakutsilipulwa. Muvili gutsikwaga na kuwola, lechelelo ho gukuva gun'tsilipulwa gunkuva na wumi.43Hala muvili ho gutsikwaga guvaga mutenyanjifu, ila gukutsilipulwa kwa wumelemo, gun'tsikwa kwa wutenyanjifu, ila gutsilipulwaga guna wuvetso.44Hogun'tsikwa gunkuva muvili gwa kawaida hela, hala ho gun'tsilipulwa gunkuva muvili gwa chimuhe. Ihyo kuna muvili gwa kawayida na kaha kukuva na muvili gwa chimuhe.45Kwakuva Mandiko ganlonga, “Munu va kwantsa yo Adamu, avaga awumbitwe na wumi mugati mwake,” lechelelo Adamu va wudugo yo Muhe yo avapelaga vanu wumi.46Lechelelo muvili gogunlongola siyo gula gwa chimuhe, ila gula muvili gwa kawayida, hambele gula muvili gwa chimuhe.47Munu mulongola yo Adamu awumbitwe mu inyi na ahumye mu lilongo, munu va kavili ahumye kilanga kwa Mulungu.48Vanu veka wo vali mu inyi vanakota uyo munu yo awumbitwe kwa lilongo, ila vala veka va kilanga kwa Mulungu vanakota yula yo ahumye kilanga kwa Mulungu.49Sambi twihwanile na munu yula va mu inyi, hambele tukihwana na yula munu yo ahumye kilanga kwa Mulungu.50Lelo vang'olotsangu, ntsinlonga kuta chila cho chidisilwe kwa muvili na danda si chifuluche chihantse mu wuntsajila wa Mulungu, na chila chinya kwananjika sichifuluche chikale hihyo bila kwananjika.51Muhulikitse ntsivalonjele henye chila Mulungu cho ang'ali kuvalonjela vanu vake. Hetwe tweka situkufwa, ila tweka tukugalulwa,52simusika kota kufutitsa miho, likuhulikwa litsi lya palapanda ya wudugo, nawo vanu wo vafweye vakutsilipulwa na mivili jo sijifuluche jifwe kanji, natwe tweka tukugalulwa na kuva mivili josinambe jifwe.53Kwakuva latsima chila chinya kwananjika chifwale hali yosi nambe yananjiche, na muvili gunya kufwa gufwale hali yo sinambe yifwe.54Ihyo muvili guno gunya kwananjika hala ho gukugalulwa na kuva sinambegufwe, na chila chinya kufwa chikugalulwa ili chileche kufwa, iho ho lukukwila lula lulongwa lo lwandikwe mu Mandiko ga Mulungu kuta, “Chifo chanantsilwe, na wusumi wutsitse!”55Bee, chifo kulikwiya kusuma kwako? Bee chifo kulikwiya kutama kwako?56Chifo chipataga wuvetso wa kutetsa kwasawuli ya ndongwa ntsibi, nayo ndongwa ntsibi yipataga wuvetso kuhuma ku malajitso ga Mulungu go amupelye Musa.57Lechelelo ahongetswaje Mulungu yo angutupela wusumi kukolela kwa Mutwa vetu Yesu Chilisito!58Ihyo vang'olotsangu wo ntsinguvagana, mwimaje kwa wukangatso. Mwendelelaje kukola katsi ya Mutwa bila kufulugala, kuno mutselaje kuta katsi yo munkola mu wutantsi wa Mutwa siyikuyaga hihi hela.
The Word for the World International