Re Tabtôan21
1Warsangul konnê Seera nga papanê ane i m'pe, aê eômnê nga papanê ane i m'patpatnê banê Seera.2Seera m'sek pa wanju Ebraham aê epasu i lon nan môtômtôan nga jijinga re wamran ane Bwatkôlkôl m'patpatnê, aê i m'be admwan.3Ebraham kanê sê wanjun admwan ane Seera m'pasu epe Aesak.4Aê Ebraham tawabo re wanjun admwan an Aesak re wamran ane an bông belêêtêl, nga papanê ane Bwatkôlkôl pat pwirisnê banê i.5Dam a Ebraham be nuulsangul sure wamran ane wanjun admwan anbe Aesak do.6Seera m'pea, “Bwatkôlkôl mwamwê ne nê man, aê antôn êr bonga an meterngo rorok aê êr met'man mek.”7Aê i mo pea, “?Sê mwangrê ane epe banê Ebraham epe Seera met'gogtanê watloji êr? I nga re, ape nê m'po pasu wanjun admwan su tê lon nan môtômtôan.”8Aê watloji mi betlap aê elngi sus, aê ran bông ane Aesak mwalngi sus aê Ebraham môômnê bwangbwangan na ganan su re atlap olin.9Ape Seera mwalsê ane wanju Heega na ôt Ijip anbe admwan, ane Ebraham mwalngi re i, ne i manman lêêlêêlnê Aesak.10Aê i m'pe banê Ebraham epea, “O tehrô êsên na ômwan anla, me wanjun admwan aê rakô t'pii; wanju êsên na ômwan anlo aê i taet'billon ane elê tatesu re nam soksok, i metebe na Aesak nga bonga.”11Dal anlo aê i m'longlongmê Ebraham balêp nga, olin ane i m'be wanjun admwan.12Ape Bwatkôlkôl pe banê Ebraham epea, “O ngalorngo m'sanga oli watloji admwan me nam êsên na ômwan. O tong banê ta êr ane Seera m'sahra banêk, olin ane mabim êr an metadodo ma pom ronga aê êr metemra re Aesak.13Re wanju êsên na ômwan anre môn, aê nê metemwê ne i met'mibe or na antôn an met'ma gatgat balêp, olin ane i môn aê i m'be wanjum.”14Ebraham mwakrê ngatê re ta pangrankonkon aê ehgo anin aê bwela wa su ane wa m'pwer lon aê esunê banê Heega. I mwalngi ta rakô anre ran bwa Heega aê ehrô i me watloji aê rakô m'pii aê eba sala nêtnêng nga re ôt an mwabwilbwil an Beaseba.15Aê wa an lon bwela wa anre m'ba nok, aê i mwalngi watloji mwalgel nga lon wabu bubuôt su nga re.16Aê i m'ba aê eba hlôô keekes nga; ne masêa natê jingi mwalgel aê i m'papanê masêa na bôtôô ane met'pennê aê i metahret. I m'pea, “Nê taangrê ane nê telsê ane watloji mwalgel anlo temat a.” Aê wamran ane i mwahlôô nga têtên jingi watloji, aê engar.17Bwatkôlkôl mwarngo tolo watloji mwalgel anre aê absôbsôr kon na Bwatkôlkôl ka lon tôngtông banê Heega aê epea, “?Sa m'sanga re êk, Heega? O ngalomta, Bwatkôlkôl mwarngo tolo watloji mwalgel re ôt ane i m'pwat re.18O temra aê eba tang re era watloji mwalgel aê egel pôôpôsnê i, olin ane nê metemwê ne or antôn an metemra re i aê êr met'mi gatgat balêp.”19Aê Bwatkôlkôl mwasêanê mta Heega rakô aê i mwalsê jungu tan su ane wa pwer lon. Aê i m'ba uji balon bwela wa anre aê eba sunê banê watloji mwalgel.20Bwatkôlkôl du me watloji mwalgel lon ane i mwaklo ma keket. Aê i m'sek re ôt an mwabwilbwil aê emibe antôn na penan ran isu mêlêsia.21I m'sek re ôt an mwabwilbwil an Paran aê dasên ba ka nan êsên su ran tan na ôt Ijip.
Pioneer Bible Translators