Yosuwa20
Ibisagara vy’ubuhungiro
1Maze Uhoraho abarira Yosuwa ati:2“Barira Abisirayeli bategekanye ibisagara vy’ubuhungiro, nk’uko nabibategetse nciye kuri Mose,3kugira ngo nihagira uwica umuntu atabishaka canke atabiteguye, azoshobore kuronka aho ahungira uwuzoba ajejwe guhora amaraso mu muryango w’uwapfuye.4Niyamara guhungira muri kimwe muri ivyo bisagara, azohagarare kw’irembo ryaco yiregure ku bakuru baco. Bazoheze bamwakire muri ico gisagara, bamuhe aho aba, abane na bo.5Uwujejwe guhora amaraso niyamukurikirana, ntibaze bamutange, kuko azoba yishe mugenziwe atabishaka, atahora ari umwansi wiwe.6Azogume muri ico gisagara gushika yumvirijwe n’ikoraniro, yongere arindire gushika umuherezi mukuru azoba ariho ico gihe apfuye. Ni ho azoheza agasubira mu gisagara ciwe, ico yari yahunze avamwo.”7Nuko baca bategekanya Kedeshi i Galilaya mu misozi iri mu ntara ya Nafutali, Shekemu mu misozi iri mu ntara ya Efurayimu, na Kiriyati-Araba ari co Heburoni, mu misozi iri mu ntara ya Yuda.8Mu buseruko bwa Yorodani ahaherereye i Yeriko, bategekanya Bezeri mu bugaragwa no mu misozi migufimigufi mu muryango wa Reyubeni, Ramoti i Gileyadi mu muryango wa Gadi, n’i Golani i Bashani mu muryango wa Manase.9Umwisirayeli wese canke umunyamahanga yabana n’Abisirayeli yishe umuntu atabishaka yaca ahungira muri ivyo bisagara vyateguriwe ico kugira ngo uwujejwe guhora amaraso y’umuryango ntahave amwica ataraburana imbere y’ikoraniro.Biblica, Inc.