Ezekiyeli20
Ubugarariji bwa Isirayeli buhanwa
1Mu mwaka ugira indwi, mu kwezi kwa gatanu, ku musi w’icumi, bamwe mu batware ba Isirayeli baza gusiguza Uhoraho, bicara imbere yanje.2Maze Ijambo ry’Uhoraho rimbwira riti:3“Mwana w’umuntu, bwira abatware ba Isirayeli, uti: ‘Uhoraho Nyeninganji arabaza ati: Vy’ukuri mwaje kugira ngo munsiguze? Ni ukuri nk’ukubaho kwanje, sindabemerera ko mugira ico munsiguza, ni jewe Uhoraho Nyeninganji ndabivuze.’4Nta rubanza ubacira? Nta rubanza ubacira ga mwana w’umuntu? Bagirize na birya bizira ba sekuruza bakoze,5maze ubabwire uti: ‘Uku ni ko Uhoraho Nyeninganji avuze: Umusi nahitamwo Isirayeli, narahiye ab’inzu ya Yakobo manitse ukuboko, ndabihishurira bari muri Egiputa. Manitse ukuboko ndababwira nti: Ndi Uhoraho Imana yanyu.6Kuri uwo musi ni ho nabarahira ko nzobakura muri Egiputa, nkabajana mu gihugu nabateguriye, igihugu gitemba amata n’ubuki, igihugu gisumvya ibindi vyose kuba ciza.7Maze ndababwira nti: Umwe wese muri mwebwe nate kure ibishushanyo yahora ahanze amaso, kandi mureke kwihumanisha ibigirwamana vyo muri Egiputa, kuko ndi Uhoraho Imana yanyu.8Ariko barangararije banka kunyumvira. Ntibataye ibishushanyo bari bahanze amaso, canke ngo bahebe ibigirwamana vyo muri Egiputa. Ni ho naca mvuga ko nzobasukako uburake bwanje, nkabimarirako ishavu bakiri muri Egiputa.9Ariko sinabikoze, kuko nashaka gukingira izina ryanje kugira ngo ntiritukirwe mu maso y’amahanga babamwo; kuko yari yarambonye niyerekana mu gukura Abisirayeli muri Egiputa.10Ni ho nabakura muri Egiputa, nkabatwara mu bugaragwa.11Ni ho nabahereye amategeko yanje, ndabamenyesha n’ivyagezwe vyanje, ndababwira ko uwuzoyakurikiza azobaho.12Nongera ndabaha Isabato yanje nk’ikimenyetso hagati yanje na bo, kugira ngo bamenye ko jewe Uhoraho ari jewe ndabeza.13Ariko abantu ba Isirayeli barangarariza mu bugaragwa, ntibakurikiza amategeko yanje, bava mu vyagezwe vyanje, kandi uwari kubikurikiza vyari gutuma abaho, bahumanya amasabato yanje. Maze ndavuga nti nzobasukako uburake bwanje, ndabatikirize mu bugaragwa.14Ariko, ku bw’izina ryanje, nakoze ivyatuma ridatukirwa mu maso y’amahanga, amwe yambona nkura Abisirayeli muri Egiputa.15Maze nca ndongera manika ukuboko, ndabarahirira mu bugaragwa ko ntazobashikana mu gihugu c’isezerano ngo ndakibegurire, igihugu gitemba amata n’ubuki, igihugu gisumvya ibindi kuba ciza.16Ivyo nabibabwiye kuko bari bataye ivyagezwe, bakanka gukurikiza amabwirizwa yanje, bagahumanya n’amasabato yanje. Imitima yabo bari bayeguriye ibigirwamana vyabo.17Ariko ndabagirira impuhwe, sinabarandura canke ngo ndabaherengetereze mu bugaragwa.18Nabwiriye abana babo mu bugaragwa nti: Ntimuzokurikize amabwirizwa ya ba so, canke ngo mugendere mu vyagezwe vyabo, canke ngo mwihumanishe ibigirwamana vyabo.19Ndi Uhoraho Imana yanyu; nimukurikize amabwirizwa yanje, mushire imitima yanyu mu vyagezwe vyanje.20Mweze Isabato yanje, kuko izoba ikimenyetso hagati yanje na mwe, kibibutsa ko ndi Uhoraho Imana yanyu.21Ariko abo bana na bo nyene barangarariza: Banka gukurikiza amabwirizwa yanje, ntibashira imitima yabo ku mabwirizwa yanje, n’aho uwari kuyakurikiza ari yo yari gutuma abaho, bongera bahumanya Amasabato yanje. Ni ho navuga ko nzobasukako uburake bwanje, nkabimarirako ishavu mu bugaragwa.22Ariko narisubiyeko kubera nanka ko izina ryanje ritukwa n’amahanga yambonye ndabakura muri Egiputa.23Nongera manika ukuboko ndarahira ko nzobasabagiriza mu mahanga, nkabashwiragiza mu bihugu,24kuko batakurikije amabwirizwa yanje, bakava mu vyagezwe vyanje, bagahumanya Amasabato yanje, amaso yabo bakayahanga ibigirwamana vya ba se.25Nuko ndabaha amabwirizwa atari meza, n’ivyagezwe bitobabeshaho,26ndabareka bihumanisha ingabire nabahaye, ndabareka bashikanira imana zabo ibimazi vy’abana babo b’imfura, kugira ngo ndabateze agahinda, bamenye ko ndi Uhoraho.’27None rero mwana w’umuntu, bwira Abisirayeli uti: ‘Uku ni ko Uhoraho Nyeninganji avuze: Ba sogokuruza barantutse mu kunta;28kuko igihe nabashikana mu gihugu nari nararahiye ko nzobaha, bashikanye ibimazi, baturirira ibimota neza mu bibanza basengeramwo ibigirwamana vyo ku misozi yose miremire, no musi y’ibiti vyose bitotahaye. Ni ho batangiye ibimazi vyo gukabura ishavu ryanje. Ni ho bashikaniye amashikanwa y’ibiturirwa bikamota neza, n’ibinyobwa.29Maze ndababaza nti: Ivyo bibanza vyo ku misozi mwama mujamwo ni ibiki?’ ” Gushika n’ubu biracitwa ibibanza vyo mu mataba y’imisozi.Ubugarariji bwa Isirayeli buzokurwaho
30“None rero bwira inzu ya Isirayeli, uti: ‘Uku ni ko Uhoraho Nyeninganji avuze: Muzogeza ryari kwihumanisha ibishushanyo nk’uko ba sogokuruza banyu bavyihumanishije, mugasambana n’ibizira vy’ibigirwamana vyabo?31Kuko iyo mubishikaniye ingabire nabahaye, mu gutanga abana banyu b’imfura ku gicaniro, muba muriko murihumanisha ibigirwamana vyanyu gushika n’ubu. None mwumva noshobora nte kubareka ngo mugire ico munsiguje, yemwe Bisirayeli? Ndabarahiye ukubaho kwanje, ni jewe Uhoraho Nyeninganji ndabivuze, sinzobareka ngo munsiguze ikintu na kimwe.32Muravuga muti: Tugomba kumera nk’ayandi mahanga n’ayandi moko yo kw’isi, asenga ibiti n’amabuye.’ Ariko ivyo mwiyumvira ntibizoshika.33Ndabarahiye ukubaho kwanje, ni jewe Uhoraho Nyeninganji ndabivuze, nzobaganzisha ukuboko kw’inkomezi, ndabaramvurireko ukuboko kwanje, ndabasukeko uburake bwanje.34Nzobegeranya ndabakure mu mahanga no mu bihugu nabashwiragirijemwo, ndabazanishije ukuboko gukomeye, ukuboko kuramvuye, mu gusuka uburake bwanje.35Nzobatwara mu bugaragwa mbakuye muri ayo mahanga, abe ari ho ndabahanira imbonankubone.36Nk’uko nahaniye ba sogokuruza banyu mu bugaragwa bwo mu gihugu ca Egiputa, ni ko namwe nzobahana, ni jewe Uhoraho Nyeninganji ndabivuze.37Nzobacisha musi y’inkoni yanje, maze ndabarongorere mw’isezerano ryanje.38Nzobakuramwo abangarariza bose bakancumurako. Naho nzobakura mu bihugu bajanywemwo nk’inyagano, ntibazokwinjira mu gihugu ca Isirayeli. Ni ho muzomenya ko ndi Uhoraho.39Ariko mwebwe bantu ba Isirayeli, uku ni ko jewe Uhoraho Nyeninganji ndababwiye: Umuntu wese muri mwebwe nagende akorere ikigirwamana ciwe! Ariko muzoteba munyumvirize, kandi izina ryanje ntimuzosubira kuritukishisha amashikanwa yanyu n’ibigirwamana vyanyu.40Kuko ku musozi wanje wera, ni wo musozi muremure wa Isirayeli, ni ko jewe Uhoraho Nyeninganji mvuze, muri ico gihugu, ni ho ab’inzu ya Isirayeli bose bazonsengera, kandi nanje nzobemera. Ni ho muzonshikanira amashikanwa yanyu atoranijwe, hamwe n’ibimazi vyanyu vyejejwe.41Nzobakira nk’ibiturirwa bikamota neza, ninabakura mu yandi mahanga, nkabegeranya muvuye mu bihugu mwasanzariyemwo, kandi nzobereka ukwera kwanje imbere y’amahanga.42Ni ho muzomenya ko ndi Uhoraho, ninabashikana mu gihugu ca Isirayeli, igihugu narahiye manitse ukuboko ko nzoha ba sogokuruza.43Ni ho muzokwibuka ingeso zanyu n’ibikorwa mwihumanishije. Muzokwizinukwa ku bw’ibibi vyose mwakoze.44Muzomenya ko ndi Uhoraho ninabikora uko kubera izina ryanje, ntaravye ingeso zanyu mbi n’ibikorwa vyanyu bihumanye, yemwe Bisirayeli, ni jewe Uhoraho Nyeninganji ndabivuze.”Ivyavugishijwe kuri Negebu
45Ijambo ry’Uhoraho rimbwira riti:46“Mwana w’umuntu, raba mu bumanuko, vuga ubutumwa uburire abari mu bumanuko kandi uvugishwe uburire ikibira co mu bumanuko.47Ubwire ishamba ryo mu bumanuko uti: ‘Niwumve ijambo ry’Uhoraho. Uku ni ko Uhoraho Nyeninganji avuze: Ngiye kuguturira, kandi nzotongora ibiti vyawe vyose, ibitotahaye n’ivyumye. Imbeya zawo ntizizozima, kandi ikintu cose uhereye mu bumanuko ukageza mu buraruko kizobabuka.48Abantu bose bazobona ko ari jewe Uhoraho nawudometse, kuko ntuzigera uzima.’ ”49Maze ndavuga nti: “Ewe Uhoraho Nyeninganji, erega bazovuga bati: ‘Mbega uwu avuga mu migani gusa?’ ”Biblica, Inc.