2 Samweli9
Dawidi na Mefibosheti
1Dawidi arabaza ati: “Mbega hoba hari umuntu n’umwe agisigaye mu bo mu muryango wa Sawuli kugira ngo ndamugirire neza kubera Yonatani?”2Hariho umusuku mu bakozi ba Sawuli yitwa Ziba. Baramuhamagara ngo arenguke imbere ya Dawidi, maze umwami aramubaza ati: “Ni wewe Ziba?”Aramwishura ati: “Umusavyi wawe ndi hano.”3Umwami aramubaza ati: “Nta n’umwe yoba agisigaye mu bantu bo mu muryango wa Sawuli, noshobora kwereka ukugira neza kw’Imana?”
Ziba yishura umwami ati: “Hariho umuhungu wa Yonatani; amugaye amaguru yose.”4Umwami amubaza ati: “Ari hehe?”
Ziba aramwishura ati: “Aba kwa Makiri mwene Amiyeli i Lo Debari.”5Nuko umwami Dawidi asaba ko bamukura i Lo Debari, kwa Makiri mwene Amiyeli.6Mefibosheti mwene Yonatani, umuhungu wa Sawuli ashitse kwa Dawidi, aramwunamira amuha icubahiro.
Dawidi aravuga ati: “Mefibosheti!”
Aramwishura ati: “Ndi hano umusavyi wawe.”7Dawidi amubwira ati: “Ntutinye, kuko nzokugirira neza kubera so Yonatani. Nzogukomorera ivyari ivya sogokuru wawe Sawuli, kandi uzohora usangira nanje ku meza yanje.”8Mefibosheti arunama avuga ati: “Jewe umusavyi wawe ndi iki, aho unyitaho meze nk’imbwa ipfuye?”9Nuko umwami atumako Ziba, umusuku wa Sawuli, aramubwira ati: “Mpaye umwuzukuru wa shobuja ivyari ivya Sawuli n’umuryango wiwe.10Wewe n’abahungu bawe n’abagurano bawe muzomurimira mumuzanire ivyimburwa, kugira ngo umwuzukuru wa shobuja yamane ibikwiye. Kandi Mefibosheti, umwuzukuru wa shobuja, azokwama afungurira ku meza yanje.” (Ico gihe Ziba yari afise abahungu icumi na batanu n’abagurano mirongo ibiri.)11Maze Ziba abwira umwami ati: “Umusavyi wawe nzokora ivyo databuja umwami avuze vyose.” Nuko Mefibosheti afungurira ku meza ya Dawidi nk’umwe wo mu bana b’umwami.12Mefibosheti yari afise umuhungu yitwa Mika, kandi abo mu rugo kwa Ziba bose bari abagurano ba Mefibosheti.13Maze Mefibosheti aba i Yerusalemu, kuko imisi yose yafungura ku meza y’umwami, kandi yari amugaye amaguru yose.
Biblica, Inc.