Luka15
I parabola bašo našavdo bakhro
1But danočnikija hem javera grešnikija khedinge pe uza ko Isus te šunen le.2A o fariseja hem o učitejla e Zakoneskere počminge te brborinen maškar peste: “Akava priminela ki peste e grešnikon hem hala lencar.”3I adaleske o Isus vakergja lenge akaja parabola:4“Ako nekas tumendar isi le šel bakhre i jekh lendar našavdilo, nane li te mukhel e enjavardešu enjen ki niva hem te džal te rodel adale bakhre sa dži kote na arakhela le.5Koga ka arakhel le, ka radujnel pe, ka čhivel le ko pike6hem ka legarel le khere. I ka vikinel pe amalen hem pe komšijen ki peste hem ka vakerel lenge: ‘Radujnen tumen mancar! Arakhlum me našavde bakhre.’7Vakerava tumenge deka agjar pobari radost ko nebo ka ovel bašo jekh grešniko koga ka pokajnel pe, nego bašo enjavardešu enja pravednikija so na trebela lenge pokajanie.”I parabola baši srebreno para
8O Isus phengja lenge akava da: “Ili ako nesavi romni isi la deš srebrena pare i jekh lendar našavela, nane li te tharel o svetlo hem te šulavel o kher hem šukar te rodel i srebreno para sa dži kote na arakhela la.9I koga ka arakhel la, ka vikinel pe amalinkjen hem pe komšikjen ki peste hem ka phenel lenge: ‘Radujnen tumen mancar! Arakhlum i srebreno para so našagjum.’10Isto agjar, vakerava tumenge, asavki radost isi maškar o angejla e Devleskere bašo jekh grešniko so pokajnela pe.”I parabola bašo našavdo čhavo
11O Isus phengja: “Jekh manuš sine le duj čhave.12O potikno čhavo phengja pe dadeske: ‘Mo dad, de man više mo delo taro to barvalipe so pripadinela mange.’ I o dad delingja lenge po barvalipe.13Palo nekozom dive o potikno čhavo khedingja sa so sine le, gelo ko duripe hem adathe trošingja sa po barvalipe živindor rumimo životo.14Koga trošingja sa pe pare, ulo baro bokhalipe ki adaja phuv i togaš le na sine le so te hal.15I gelo te kerel buti ko jekh manuš so živinela sine adathe. Adava manuš bičhalgja le ko pe nive te arakhel e balen.16O čhavo doborom sine bokhalo so mangela sine te hal adava so hana o bale, ama nikoj na dengja le ni adava da.17Koga osvestingja pe, vakergja ki peste: ‘Me dadeskere rabotnikija isi len poviše hajbaske, a me akate merava bokhatar!18Ka uštav hem ka iranav man ko mo dad hem ka phenav leske: “Mo dad, grešingjum anglo Devel hem angla tute!19Na zaslužinava te vakerav deka sijum to čhavo. Primin man sar jekh rabotniko te kerav buti ki tute.”’20I uštilo hem gelo ko po dad. Ama panda duraldan leskoro dad dikhla le sar avela, pelo leske žal, prastandilo ko po čhavo, gušingja le hem čumingja le.21Togaš o čhavo vakergja: ‘Mo dad, grešingjum anglo Devel hem angla tute! Na zaslužinava te vakerav deka sijum to čhavo.’22Ama o dad vakergja pe slugenge: ‘Sigate! Anen leske o najšužo šej hem uraven le! Čhiven leske i angrustik ko naj hem o sandale ko pre!23Anen o najšužo telco hem čhinen le, te ha hem te veselina amen,24soske akava mo čhavo sine mulo, a akana tano dživdo, našavdo sine, a akana tano arakhlo.’ I počminge te veselinen pe.25A ko adava momenti leskoro pobaro čhavo sine ki niva. I ko iranibe, koga alo paše uzo kher, šungja bašalibe hem khelibe.26Togaš vikingja jekhe sluga hem pučlja le soj adava.27O sluga phengja leske: ‘To phral irangja pe khere hem to dad čhingja e najšuže telco, adaleske so dikhla le dživdo hem sasto.’28I o pobaro čhavo holangja hem na mangla te khuvel ko kher. Togaš iklilo leskoro dad hem molingja le te khuvel.29Ama ov odgovoringja pe dadeske: ‘Akje sa doborom berša sar robo poštojnava tut hem nikat na phagljum to lafi, a tu nikat na dengjan man ni tikni buzni te šaj me amalencar te veselina man.30Ama koga alo akava to čhavo so hala to barvalipe rumime džuvlencar, tu čhingjan leske e najšuže telco.’31A leskoro dad phengja leske: ‘Mo čhavo, tu sekat sijan mancar. I sa so isi man tano tlo.32Ama, amen mora sine te veselina amen hem te radujna amen soske akava, to phral, sine mulo, a akana tano dživdo; našavdo sine, a akana tano arakhlo!’ ”The Word for the World International