1 Timotej6
Bašo robija
1Sarine soj tane telo ropstvo trebela te dikhen pumare gospodaren dostojno hem ko celo poštovanje, te šaj te na vakerel pe nešto lošno e Devleskere anaveske hem amaro učibe.2A okola robija so lengere gospodajra tane vernikija, ma te dikhen len potele soske tane phrajla ki vera. Nego trebela te služinen lenge panda pošukar, adaleske so lengere gospodajra tane vernikija, soj tane mangle taro pumare robija hem o gospodajra isi len korist tari lengiri buti.Akava sikav hem rode e manušendar te keren.
O hovavno učibe hem o mangipe e parengoro
3Ako nekoj sikavela javerčhani hem na soglasinela pe e saste učibaja taro amaro Gospodari o Isus Hristos hem o učibe tari pobožnost,4ov tano ko baro hem ništo na džanela. Asavko nane sasto hem interesinela pe samo akošibaske, te iranel lafija, kotar so iklola ljubomora, mariba, lošna lafija hem lošna sumne,5hem stalno zakačinela pe maškar o manuša so isi len rumimi godi, soj cidime taro čačipe hem so mislinena deka preku i pobožnost ka barvajloven.6Ama čače i pobožnost tani baro barvalipe ako tano o manuš zadovolno adaleja so isi le.7Adaleske so ništo na angjen ko akava sveto, i ništo našti te legara lestar.8Ama ako isi amen hajbe hem šeja, trebela adaleja te ova zadovolna.9A okola so mangena te barvajloven perena ko iskušenia hem ki zamka, hem ko but dilinipa hem ko lošna želbe so legarena e manušen ko propast hem ko uništiba.10Adaleske so o mangipe e parengoro tano koreno bašo sa o lošnipe. Nesave manuša doborom mukhle pe ko adava, i pele tari vera hem ange peske but muke.O šukar svedoštvo e verakoro
11Ama tu, e Devleskoro manuš, naš taro sa akava hem dža palo pravednost, pobožnost, vera, mangipe, trpelivost hem krotkost.12Vodin šukar i borba e veraja, le o večno životo soleske o Devel vikingja tut, baši so anglo but svedokija svedočingjan šukar baši ti vera.13Anglo Devel, so dela životo bašo sa, hem anglo Isus Hristos, koj svedočindor anglo Pontij Pilat, dengja šukar svedoštvo, naredinava tuke,14te arakhe akaja naredba bizi mana dži ko dive koga ka avel amaro Gospodari o Isus Hristos.15O Devel ka kerel adava ko pravo vreme, o blagoslovimo Devel hem o jekh Vladiteli, o Caro upro sa o cajra hem o Gospodari upro sa o gospodajra.16Ov tano jekh so nikat nane te merel hem živinela ki svetlina so nikoj našti te avel. Le nikoj na dikhla le, ni šaj te dikhel le. Leske čest hem sila ko sa o vekija. Amin.Sovet e barvalenge
17Naredin e barvalenge ko akava sveto te na oven ko baro, ni ma te nadinen pe ko barvalipe, soj doborom nesigurno, nego te nadinen pe ko barvalo Devel so dela amen sa bašo uživibe,18te keren šukaripe, te oven barvale šukar deloncar hem te oven manuša so ka den hem te oven spremna te delinen.19Agjar ola ka kheden barvalipe sar zoralo temeli bašo vreme so avela, te šaj te ikeren pe ko čačutno životo.O posledno pozdrav
20Timotej, arakh šukar adava soj tuke dendo. Cide tut taro bidevleskere manuša so vakerena čuče lafija, hem cide taro hovavno učibe so vikinela pe “Džandipe” hem o učibe soj tano protiv o čačipe,21so nesave manuša kerindor adava cidinge pe tari vera.I blagodat neka ovel tumencar.
The Word for the World International