1 Timotej5
Bašo udovice
1E pophure manuše ma opomenin silaja, nego vaker leske sar te dadeske ko than, a e ternenge sar phraleske ko than,2e pophure romnenge sar dajenge ko than, a e terne džuvlenge sar phenjenge ko than, šukar nameraja.3Poštojnen e udovicen so nane koj te arakhel len.4Ama, ako e udovica isi la čhave ili unukija, ola najanglal neka sikloven te sikaven pobožnost, arakhindor pumare kherutnen hem agjar ka iranen pumare dadenge hem dajenge, soske adavaj šukar anglo Devel.5A i čačutni udovica so nane koj te arakhel la, oj čhivela pi nada ko Devel, hem dive rat molinela pe hem rodela pomoš taro Devel.6Ama okoja udovica so živinela samo lake te ovel šukar, oj tani muli, iako tani dživdi.7Vaker lenge sa akava, te na ovel nikoj krivo.8Sekoj so na arakhela pe familija, a najanglal pe kherutnen, adava cidingja pe tari vera hem tano pološno taro neverniko.9Nijekh udovica našti te ovel čhivdi ko spisako bašo pomožiba, osven ako nane la poviše taro šovardeš berš, so sine romni jekhe romeskiri,10hem oj trebela te ovel pendžardi šukar deloncar: bajlarindor čhaven, sikavindor gostoprimstvo, thovindor o pre e Devleskere manušengere, pomožindor okolen soj tane ko problemi, hem posvetindor pes ko sekova šukar delo.11A e terne udovicen, ma čhiv ko spisako bašo pomožiba, adaleske so koga i želba e teloskiri ka cidel len e Hristostar, ka mangen te len rom.12Agjar anena upra peste osuda, soske phagle pumaro prvo dendo lafi anglo Devel.13Osven adava ola siklona te ovel mrzale hem te džan taro kher ko kher, hem na samo soj mrzale, nego kerena špijolnukija hem mešinena pe kaj so nane lengiri buti, vakerindor bukja so na trebela.14Adaleske sovetinava e terne udovicen te ženinen pe, te ovel len čhave, te dikhen po kher, hem te na den than e dušmaneske baši iftira.15Adaleske so, nesave više cidinge pe e veratar hem gele palo Beng.16Ako nesavi romni soj tani vernička isi la udovice so arakhela len, neka kerel agjar te pomožinel len, te na perel o pharipe upri crkva, te šaj i crkva te pomožinel okole udovicen so čače nane koj te arakhel len.Bašo starešine
17O starešine so šukar vodinena i crkva zaslužinena duplo poštovanje, posebno okola so propovedinena hem so sikavena.18Adaleske so o Sveto Lil vakerela: “Ma phande o muj e guruveskoro, te na hal dži kote kerela buti e giveja” hem “O rabotnikon zaslužinela pi plata.” 19Ma prifatin i tužba protiv o starešina, osven ako isi duj ili trin svedokija.20Ama okola starešine so grešinena opomenin len anglo sarinen, te šaj javera da te daran te grešinen.21Dava tut sovli anglo Devel hem anglo Isus Hristos hem anglo birime angejla, te ikere tut ko sa akava bizo te sudine, hem te na ikere nikaskiri strana.22Ma sigjar te čhive te vasta upro nekaste hem ma te ovel tut ništo javerengere grevoncar. Iker tut čisto.23Čhinav te pije samo pani hem le hari mol bašo to želudniko hem bašo adava so but puti sijan nasvalo.24Nesave manušengere grevija dikhona jasno, hem angleder dikhola deka ka oven osudime. A isi nesave so lengere grevija ka dikhon ko sudo.25Agjar e manušengere šukar dejla jasno dikhona, a hem koga na dikhona da, našti te ačhoven garavde.The Word for the World International