لواحي4
1منْبَعْد إِ مَانَايَا ࢲْرِيغ يجّن ن ثوَّارْث ثْنُوْرْزم ذݣ وجنَّا، سْڒِيغ إِ ثْمِيجَّا نِّي إِي غَارِي د يسِّيوْڒن زِي قْبڒ صُّوْت نّس يݣَّا اَم زَّمَّار، ثنَّا-ٱيِي-د: "ݣَعّذ-د ذَانِيتَا اَذَاش د سْمظْهَارغ مِين لَابُد غَا يوقْعن منْبَعْد إِ مَانَايَا."2ڒخْدّنِّي يهْوَا-د خَافِي أَرُّوْح ن أَربِّـي، ئِمظْهَار-د ذِنِّي يجّن ن لْعَرْش ذݣ وجنَّا يقِّيم خَاس يجّن.3ونِّي خَاس يقِّيمن يتْشَابَّاه ذِي ثزْرُوْت ن لْيَشب ذ لْعَقِيق اَزݣّْوَاغ. ئِجّن ن ثسْڒِيث ن ونْࢲَار ثنّض-اَس-د إِ لْعَرْش-أَ، تْشَابَّاه ذِي ثزْرُوْت ثَزيْزَاوْث ن زُّمُرُّد.4نّْضن-اَس-د إِ لْعَرْش-أَ اَرْبعَا و عِشْرِين ن لْعَرْشَاث، خَاسن اَرْبعَا و عِشْرِين ن يمْغَارن ݣِّين اَرُّوْض ذ اَشمْڒَاڒ، كُڒ يجّن زَّايْسن غَارس تَّاج ن دّْهب خ وزدْجِيف نّس.5ئِتفّغ-د زِي لْعَرْش وَاسَّام ذ يغُوْيَان ذ وَاجَّاج. زَّاث إِ لْعَرْش ذِنِّي سبْعَا ن يصْفضَاون ن ثْمسِّي شعّْڒن، يِيْنَا نِثْنِي ذ سبْعَا ن اَرُّوْحَاث ن أَربِّـي.6زَّاث إِ لْعَرْش ذِنِّي اَم ڒبْحَر ن جَّاج يصْفَا اَطَّاس. ذِنِّي اَربْعَا ن لْمخْلُوقَاث يدَّرن ذِي ڒْوسْط، نّْضن-اَس-د إِ لْعَرْش غَارْسن ثِيطَّاوِين غَار زَّاث ذ ذفَّار.7لْمخْلُوْق اَمزْوَارُو يتْشَابَّاه ذِي سّْبَع. وِيس ثْنَاين يتْشَابَّاه ذݣ وينْدُوْز. وِيس ثْڒَاثَا غَارس اَغمْبُوْب اَم بْنَاذم. وِيس اَرْبعَا يتْشَابَّاه ذِي نْسر يطَّاون.8كُڒ يجّن زِي لْمخْلُوقَاث-أَ غَارس ستَّا ن وَافْرِيون، كُڒ اَفْرِيو يشُّوْر س ثِيطَّاوِين خ جِّهتَاين. قَّارن دْجِيڒث ذ نْهَار بْڒَا مَا ٱذ بدّن:"مشْحَاڒ عَظِيم، عَظِيم، عَظِيم، سِيذِي أَربِّـي يزمَّرن إِ كُڒْشِي.نتَّا ذ ونِّي إِي تُوْغَا يدْجَان، ذ ونِّي إِي يدْجَان، ذ ونِّي عَاذ إِي د غَا يَاسن."9لْمخْلُوْقَاث-أَ مڒْمِي مَا سمْغَارن تْوقَّارن حمّْذن-اَس إِ ونِّي يقِّيمن خ لْعَرْش إِݣ يدَّرن إِ ڒبْدَا ن ڒبْدَاث،10سّنِّي عَاوذ اَرْبعَا أُو عِشْرِين نِّي ن يمْغَارن تْركَّاعن-اَس إِ ونِّي يقِّيمن خ لْعَرْش، تْسجَّاذن-اَس إِ ونِّي يدَّرن إِ ڒبْدَا ن ڒبْدَاث. كُڒ يجّن زَّايْسن ينطَّر تَّاج نّس زَّاث إِ لْعَرْش يقَّار:11"آ مَوْلَانَا آ سِيذِي أَربِّـي نّغ،ذ شك إِي يسْذَاهدْجن لْعَظَمَا ذ ؤُوقَّار ذ جّْهذ،ڒَاحقَّاش شك ثْخڒْقذ كُڒْشِي،س ڒْخَاضَر نّش تْوَاخڒْقنْ-د اَقَاثن دْجَان."
Wycliffe Bible Translators, Inc.