أَيث-فيليـپـي2
1مڒَا كنِّيو تْوَاشجّْعم س لْمَسِيح نِغ ثتْهِلَّام ذِي ڒمْحِبّث نّس نِغ ثْشَرّْشم اَك أَرُّوْح نّس، نِغ ثُوْفِيم ذَايس اَرَّحْمث ذ لْحَنَانَا،2أَتَاف يتْخصَّا اَذ تْكمّْڒم إِ ڒفْرَاحث ينُو اَغَارْوم يِيڒِي اَرَّاي ذ يجّن ذ ڒمْحِبّث ذ يشْتن، كنِّيو اَذ تِيڒِيم ذ يجّن اَغَارْوم ثِيڒِي يجّن ن لْفِكْرَا.3وَار تݣّم وَالُو زِي لْأَنَانِيَا نِغ زِي تَّكبُّر. بْڒَا تَّكبُّر وقَّرم ينّغْنِي حْسن زݣ يِيخف نْوم.4ئِتْخصَّا كُڒ يجّن زَّايْوم وَار يخزَّر شَا مِين ث يتْهِيمَان وَاهَا. ئِتْخصَّا-ث عَاوذ اَذ يخْزَر مِين يتْهِيمَان إِ يِنّغْنِي.5أَرَّاي نْوم يتْخصَّا اَذ يِيڒِي اَم اَرَّاي ن عِيْسَى لْمَسِيح.6نتَّا اَقَاث ذ صِّفث ن أَربِّـي، وَلَكِن وَامِي يمْقُدَّا اَك أَربِّـي وَار ينْوِي شَا اَذ يطّف ذِي مَانَاينِّي.7لَّا، نتَّا يَارَّا يخف نّس ذ وَالُو يطّف يجّن ن صِّفث اَم يِيسْمغ، يعْنِي يخْڒق-د اَم صِّفث ن بْنَاذم.8وَامِي د يمظْهَار اَم صِّفث ن يِجّن ن بْنَاذم، ئِسهْوَا-د يخف نّس يطَاع حتَّا وَامِي يمُّوْث يجّن ن ڒْموْث ذِي صَّلِيب.9خ مَانَاينِّي يسْݣَعّذ-يث أَربِّـي غَار وجنَّا قَاع، يݣَّا-ٱس يسم نِّي إِي يدْجَان ذݣ وجنَّا خ يِيسمَاون مَارَّا.10بَاش خ يِيسم نِّي ن عِيْسَى اَذ ركْعن مَارَّا خ يفَادّن نْسن، يِنِّي يدْجَان ذݣ وجنَّا ذ يِنِّي يدْجَان ذِي ثْمُوْرْث ذ يِنِّي يدْجَان سْوَادَّاي ن ثْمُوْرْث.11أَذ يعْتَرف كُڒ يِيڒس اَذ يِينِي خ عِيْسَى لْمَسِيح قَا نتَّا ذ سِيذِيثْنغ اَزَّايس يسمْغَار أَربِّـي بَابَاثْنغ.12إِذن آي يمْعِيزّن ينُو، مَامش تُوْغَا ثتْطَاعَام ڒبْدَا زِي قْبڒ وَامِي تُوْغَايِي اَكِذْوم، أَمنِّي عَاوذ إِي غَا ذَايِي ثْطَاعم وَامِي خَاوم غَابغ. يعْنِي اَذ تقِّيمم تݣّم لْمجْهُوْد بَاش اَذ تْكمّْڒم مْلِيح ذݣ وسنْجم نْوم س يِجّن ن ثِيݣّْوْذِي ذ يِجّن ن تَرْجِيجِي.13مِينْزِي ذ أَربِّـي إِݣ يسْخدَّامن اَرَّاي نْوم ذ ڒخْذَايم نْوم بَاش اَذ تݣّم لْغَرَض نّس ذ اَصبْحَان.14ݣّث مَارَّا ثِمسْڒَايِين بْڒَا مَا ٱذ تْشثْشَام بْڒَا مَا ٱذ تْمنْغم.15أَمُّو اَذ تِيڒِيم بَرِئِن بْڒَا ڒْعِيب ذِي ڒْوسْط ن يِوْذَان ن ڒْوقْث-أَ يعوّْجن يخَروْضن. ذَايْسن إِي ثْرقّم اَم يِيثْرَان ذِي دُّنشْت-أَ خْمِي ذَاسن تْقدَّامم اَوَاڒ ن ثُوْذَارْث. أَمنِّي اَذ فْتَخَرغ ذِي نْهَار نِّي ن لْمَسِيح نش وَار ؤُزِّيڒغ شَا وَار خْذِيمغ شَا ذِي ڒْخَاوِي وَاهَا.17نش فَرّْحغ اَكِذْوم س يِجّن ن ڒفْرَاحث مَعْلِيش مڒَا فرّْغن-اَيِي-د وَاهَا اَم يِجّن ن صّذْقث ن يذَامّن خ دْبِيحث نْوم إِي تْقدَّامم كنِّيو س لْإِيمَان نْوم.18أَمنِّي عَاوذ ؤُڒَا ذ كنِّيو يتْخصَّا اَكِذِي ثْفَرْحم س يِجّن ن ڒفْرَاحث.19تْمنِّيغ س عِيسَى لْمَسِيح اَذَاوم د سّكّغ تِيْمُوْتَاوُس ذغْيَا بَاش خْمِي ذَايِي د غَا يَارّ ڒخْبَار خَاوم اَذَايِي يسْفَرح.20وَار غَارِي ذَا حَدّ اَم نتَّا تْهِيمَا-ث لْحَالَا نْوم.21مَارَّا رزُّوْن مِين ذَاسن يتْهِيمَان إِ يِيخف نْسن وَاهَا، مَاشِي مِين يتْهِيمَان إِ عِيسَى لْمَسِيح.22أَمَّا تِيْمُوْتَاوُس نتَّا ثسّْنم-ث ملْتَازم س يِيخف نّس، ئِخدّم اَكِذِي ذِي لْإِنْجِيل اَم يِجّن ن وحَرْمُوْش يخدّم اَك بَابَاس.23خ مَانَايَا، تْمنِّيغ اَذَاوم ثِيذ سّكّغ وَلَكِن تْرَاجِيغ اَذ ࢲرغ مَامش غَا عْذُوْنْت لْمَشَاكِل ينُو.24أُو نش اَقَايِي مْتيّْقن ذِي سِيذِيثْنغ اَغَارْوم د اَسغ ذغْيَا ؤُڒَا ذ نش.25شُوْف، تْوَاڒِيغ لَابُد اَذَاوم د اَرّغ ؤُمَا پَـارْفُوْلِيتُس ونِّي إِي كِذِي يتمْعَشَارن اَم شَا ن ومْجَاهذ. نتَّا ذ اَمسخَّار نْوم ونِّي إِي ذَايِي د تسّكّم بَاش اَذَايِي يتْهِيلَّا.26ئِتْوحَّاش-يكنِّيو اَطَّاس مَارَّا إِذْوم، ييْسِي خَاوم اَمْنُوْس عَاوذ وَامِي د ثَارِّيم ڒخْبَار تُوْغَا يهْڒش.27وَاه، تُوْغَا يهْڒش ذ صَّح. تُوْغَا عْڒَاين يمُّوْث وَلَكِن أَربِّـي يرْحم-يث. وَار يدْجِي شَا نتَّا وَاهَا، يرْحم-اَيِي ؤُڒَا ذ نش بَاش وَار خَافِي يتْمَارْنِي ڒْهمّْ خ ڒْهمّْ.28خ مَانَاينِّي اَذَاوم ثِيذ سّكّغ ڒخُّو ذ اَبْرِيذ بَاش اَذ تْفَرْحم خْمِي ث غَا ثࢲرم أُو عَاوذ وَار ذَايِي يتِيڒِي بُو ومْنُوْس.29رحّْبم-ث س سِيذِيثْنغ س يِجّن ن ڒفْرَاحث ذ تَمقّْرَانْت، وقَّرث يرْيَازن اَم نتَّا.30مَايمِّي؟ تُوْغَا عْڒَاين يمُّوْث عْلَاحْسَاب ڒْخذْمث ن لْمَسِيح مِينْزِي يغَامَر س ثُوْذَارْث نّس وَامِي يرزُو اَذ يخْذم مِين وَار ثْزمَّرم شَا اَذ تْخذْمم كنِّيو زِي لْوَاجِب نْوم غَارِي.
Wycliffe Bible Translators, Inc.