فليمون1
1نش ذ بُوْلُس اَقَايِي ذ اَمحْبُوْس عْلَاحْسَاب عِيْسَى لْمَسِيح اَكِذِي ؤُمَاثْنغ تِيْمُوْتَاوُس. تَارِيغ ثَبْرَات-أَ إِ فِلِيْمُوْن يدْجَان ذ اَمْعَاشَر نّغ إِي خَانغ يعِيزّن،2ذ ؤُتْشْمَاثْنغ عَابْـيَا ذ ؤُمَاثْنغ أَرْكِيْـپُّـوْس ونِّي إِي كِذْنغ يتمْعَاشَرن اَم يِجّن ن ؤُمْجَاهذ، أُو عَاوذ ذ جْمَاعث ن ڒْمُوْمِنِين يتْمُوْنَان ذِي ثدَّارْث نّش.3أَكِذْوم يِيڒِي اَرْضَا ذ ڒهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.4ڒبْدَا تْشكَّرغ أَربِّـي ينُو خْمِي تْفكَّرغ ذَايش ذِي ثْࢲَادْجِيث ينُو.5قَا نش تسْڒِيغ خ لْإِيمَان نّش إِي ذَايش زِي سِيذِيثْنغ عِيْسَى ذ ڒمْحِبّث نّش غَار مَارَّا صَّالِحِين.6تتَّارغ إِ أَربِّـي خ ثمْعَاشَرْث نّغ ذِي لْإِيمَان اَش ثَاوِي غَار يِجّن ن ڒفْهَامث ثكْمَاڒ خ كُڒ ثَمسْڒَايْث ثَصبْحَانْت إِݣ يدْجَان غَارْنغ ذِي لْمَسِيح.7آي ؤُمَا، ڒمْحِبّث إِي غَارش شك تِيشّ-اَيِي-د يجّن ن ڒفْرَاحث ذ ؤُشجَّع ذ اَمقّْرَان مِينْزِي شك ثْسِيْحمِّيذ ؤُڒَاون ن صَّالِحِين.8إِذن، مِين يتْخصَّان اَذ تݣّذ زمَّرغ نش اَش أَمَرغ س زْعَامث ذِي لْمَسِيح اَث تݣّذ،9وَلَكِن حْسن اَش تَّارغ مَانَايَا س ڒمْحِبّث. إِيوَا نش ذ بُوْلُس اَقَايِي نُمْغَارغ، ڒخُّو اَقَايِي عَاوذ ذِي ڒحْبس عْلَاحْسَاب سِيذِيثْنغ عِيْسَى.10تتَّارغ-شك خ وَانِيسَامُو ونِّي يدْجَان اَم ممِّي، أَرِّيغ-ث نش ذ مِّي وَامِي تُوْغَاث اَكِذِي ذِي ڒحْبس.11قْبڒ إِ مَانَايَا تُوْغَا نتَّا وَار ش ينفّع شَا، ڒخُّو يذْوڒ اَذَانغ ينفّع نش ذ شك.12أَقَا نش تَارِّيغ-اَش-ث-يذ اَخْمِي غَا ش د سّكّغ ؤُڒ ينُو.13مشْحَاڒ نش تُوْغَا رزُّوْغ اَكِذِي يقِّيم ذَانِيتَا اَذَايِي يعَاون ذݣ ؤُمْشَان نّش زݣ وَامِي دْجِيغ ذَانِيتَا ذِي ڒحْبس-أَ عْلَاحْسَاب لْإِنْجِيل.14وَلَكِن نش وَار خْسغ شَا اَذ ݣّغ شَان ن ڒْحَاجث بْڒَا اَرَّاي نّش؛ نش خْسغ ڒْخِير نّش اَذَايِي د يَاس س ڒْخَاضَر نّش مَاشِي س يِجّن ن بزّز زَّايِي لَّا.15نتَّا يمْكن خ سَّبَاب-أَ إِي خَاك يفَرق ذݣ يِجّن ن لْمُدَّا بَاش اَغَارش د يذْوڒ ڒخُّو إِ ڒبْدَا.16وَلَكِن ڒخُّو مَاشِي اَم يسْمغ، نتَّا حْسن زݣ يسْمغ: أَم ؤُمَاش إِي خَاش يعِيزّن. نتَّا يعِيزّ خَافِي، وَلَكِن شك يعِيزّ خَاش كْتَار: ذِي ڒْخذْمث أُو عَاوذ اَم ؤُمَاش ذِي سِيذِيثْنغ.17فَلِهَاذَا، مڒَا ثْحسْبذ-اَيِي ذ اَمْعَاشَر نّش، قْبڒ-يث اَخْمِي ذَايِي ثْقبْڒذ نش.18مڒَا يضْڒم-يش ذِي شَا ن ثْمسْڒَايْث نِغ مڒَا ذِنِّي شَان ن ومَرْوَاس جَارَاوم، حْسب-يث خَافِي نش.19قَا نش ذ بُوْلُس تَارِيغ مَانَايَا س وفُوْس ينُو: أَذَاش ث خدْجْسغ نش. بْڒَا مَا ٱذَاش ينِيغ قَا تَّارْسغ-اَش ؤُڒَا ذ ثُوْذَارْث نّش.20وَاه آي ؤُمَا، خْسغ اَزَّايك ربْحغ يجّن ن نّْفَع ذِي سِيذِيثْنغ، سِيْحْمَا-ٱيِي ؤُڒ ينُو ذِي لْمَسِيح.21نش تْأَكَادغ س طَّاعَا نّش، س مَانَايَا تَارِيغ-اَش-د ثَبْرَات-أَ سّْنغ شك اَذ تݣّذ كْتَار زِي مِين ذَاش تْطَالَابغ.22أُو عَاوذ سوْجذ-اَيِي يجّن ن ثْغُوْرْفَات، تْمنِّيغ اَغَارْوم د عقْبغ عْلَاحْسَاب ثْࢲَادْجِيث نْوم.23ئِسَاوَّاض-اَش-د سْڒَام پَـافْرَاس ونِّي إِي كِذِي يدْجَان ذ اَمحْبُوْس عْلَاحْسَاب عِيْسَى لْمَسِيح.24سَاوَّاضن-اَش-د سْڒَام عَاوذ مَرْقُوْس ذ أَرِسْتَارْخُوْس ذ دِيْمَاس ذ لُوْقَا يدْجَان مَارَّا ذ يمْعَاشَرن ينُو.25أَذ يِيڒِي اَك اَرُّوْح نْوم اَرْضَا ن سِيذِيثْنغ عِيْسَى لْمَسِيح.
Wycliffe Bible Translators, Inc.