متى13
1نْهَار نِّي، ئِفّغ عِيْسَى زِي ثدَّارْث يقِّيم طَّارْف ن ڒبْحَر.2مُوْنن-د خَاس اَطَّاس ن ڒْغَاشِي. س زْحَامث نِّي يرُوْح ينْيَا ذݣ يِجّن ن ثْغَرَّابُوْت يقِّيم ذَايس. ئِوْذَان قِّيمن مَارَّا خ شّطّ ن ڒبْحَر.3ئِقَّار-اَسن اَطَّاس ن ثْمسْڒَايِين س ڒمْعَانِي ينَّا-ٱسن: "صنّْطث! ئِفّغ وفدْجَاح اَذ يزْرع.4وَامِي يزرّع، ثوْضَا-يَاس شَان زَّرِّيعث خ طَّارْف ن وبْرِيذ، ؤُسِين-د يجْضَاض شِّين-تث.5شَان زَّرِّيعث ثوْضَا-يَاس جَار يِزْرَا وَار ذِنِّي بُو شَاڒ اَطَّاس. ثغْمِي-د ذغْيَا ڒَاحقَّاش وَار ثُوْدْجِيغ شَا ذِي ثْمُوْرْث اَطَّاس.6وَلَكِن وَامِي ثْسُوْمَّر ثْفُوْشْت، ثْنزْڒف ڒخْدّنِّي ثِيْسْرَاو ڒَاحقَّاش يࢲوْرَان نّس وَار ؤُوْثِين شَا غَار ڒَادْجغ ن ثْمُوْرْث.7شَان زَّرِّيعث ثوْضَا جَار يسنَّانن. غْمِين-د اَكِس يسنَّانن نِّي جيّْفن-تث.8وَلَكِن شَان زَّرِّيعث ثوْضَا خ ثْمُوْرْث ثَصبْحَانْت، ثݣَّا ثِيْذرِين. ڒبْعَاض ݣِّينْت مِيَّا، ڒبْعَاض ݣِّينْت ستِّين، ڒبْعَاض ݣِّينْت ثْڒَاثِين.9صنّط مْلِيح آ ونِّي يتْسْڒَان."10قَارّْبن-د غَارس يمحْضَارن نّس نَّان-اَس: "مَايمِّي إِي كِسن ثسَّاوَاڒذ س ڒمْعَانِي؟"11ئِنْدق-د عِيْسَى ينَّا-ٱسن: "ئِتْوَاسْمح إِ كنِّيو اَذ تسّْنم مِين ينُوْفَّارن ذِي ڒْمُلْك وجنَّا. وَلَكِن نِثْنِي لَّا، وَار ذَاسن يتْوَاسْمح شَا.12ڒَاحقَّاش ونِّي يدْجَان غَارس يتْمَارْنِي-يَاس، أَغَارس يِيڒِي اَطَّاس. وَلَكِن ونِّي وَار غَار يدْجِي شَا، ئِتْوَاكْسِي-يَاس ؤُڒَا ذ مِين غَارس.13خ مَانَايَا إِي كِسن سَّاوَاڒغ س ڒمْعَانِي. وَاخَّا خزَّرن، وَار تْوِيڒِين شَا. وَاخَّا تسْڒَان، وَار تسْڒِين شَا وَار فهّْمن إِ شَا.14أَمنِّي إِي ذَاسن يتْكمَّاڒ وَاوَاڒ ن نَّبِي إِشَعْيَا إِݣ ينَّا ذݣ يِجّن ن زْمَان:<شْحَاڒ مَا تسْڒِيم وَار تفْهِيمم،شْحَاڒ مَا ثْخزَّرم وَار تْوِيڒِيم.15ڒَاحقَّاش شَّعْب-أَ، ؤُڒ نّس يذْوڒ اَم وزْرُو،عْڒَاين وَار تسْڒِين وَالُو،قّْنن ثِيطَّاوِين نْسن.حمَا وَار تْوِيڒِين شَا س ثِيطَّاوِين نْسن،وَار تسْڒِين شَا س يمجَّان نْسن،وَار فهّْمن شَا س وُوْڒَاون نْسن،أَغَارِي د ذوْڒن، أَثن سْݣنْفِيغ.> 16وَلَكِن سَّعْذ نْوم كنِّيو وَامِي ثِيطَّاوِين نْوم تْوَاڒَانْت، سَّعْذ نْوم وَامِي يمجَّان نْوم تسْڒَان.17أَقَا تسْڒَام ڒْحَقّ: أَطَّاس ن لْأَنْبِيَا ذ ڒْمُوْمِنِين رْزُوْن اَذ ࢲرن مِين تْوَاڒَام، وَلَكِن وَار ث ࢲْرِين شَا. رْزُوْن اَذ سْڒن مِين تسْڒَام، وَلَكِن وَار ث سْڒِين شَا.18إِيوَا صنّْطث ڒْمَعْنَا ن وفدْجَاح نِّي يزرّْعن.19ئِجّن يتْسْڒَا إِ وَاوَاڒ خ ڒْمُلْك وجنَّا وَار ث يتفْهِيم شَا. يعْنِي نتَّا اَم زَّرِّيعث نِّي إِݣ يوْضَان خ وبْرِيذ. ئِتْرَاح وعفَّان نِّي ن إِبْڒِيس، يتكّس اَوَاڒ نِّي يتْوَازرْعن ذَايس ذݣ وُوْڒ.20زَّرِّيعث نِّي إِݣ يوْضَان جَار يِزْرَا نتَّاث اَم شَان بْنَاذم إِݣ يتْسْڒَان إِ وَاوَاڒ ن أَربِّـي يقْبڒ-يث س ڒفْرَاحث.21وَامِي وَار يُوْوْثِي بُو يࢲوْرَان مْلِيح ذغْيَا تْنقْڒَاعن. خْمِي د تَاسنْت شَان ڒمْحَاين نِغ ذ شَان وعدّب خ سَّبَاب ن وَاوَاڒ ن أَربِّـي، ذغْيَا يتفّغ اَبْرِيذ.22زَّرِّيعث نِّي إِݣ يوْضَان جَار يسنَّانن نتَّاث اَم يِجّن ن بْنَاذم إِي يتْسْڒَان إِ وَاوَاڒ ن أَربِّـي ذَايس اَمْنُوْس ن دُّنشْت، يشمّث-يث طّْمَع ن وَاݣْڒَا، سّنِّي يتْوَاجيّف وَاوَاڒ ن أَربِّـي وَار ينفّع شَا.23وَلَكِن زَّرِّيعث نِّي إِݣ يوْضَان ذِي ثْمُوْرْث ثَصبْحَانْت نتَّاث اَم شَان بْنَاذم إِݣ يتْسْڒَان إِ وَاوَاڒ ن أَربِّـي، ئِفهّم-اَس يتَارو. ئِجّن يتَارو مِيَّا، ئِجّن ستِّين، ئِجّن ثْڒَاثِين."24ئِسِّيوڒ عِيْسَى س يِجّن ن ڒْمَعْنَا نّغْنِي ينَّا-ٱسن: "ڒْمُلْك وجنَّا يݣَّا اَم يِجّن ن ورْيَاز يزْرع زَّرّيعث ثَصبْحَانْت ذݣ ومَرْجع نّس.25ئِجّن ن دْجِيڒث وَامِي طّْصن مَارَّا يوْذَان، يُوْسَا-د ڒَعْذُو نّس يزْرع زَّرِّيعث ن يسنَّانن اَك زَّرِّيعث نِّي ن يِرْذَان ڒخْدّنِّي يَرْوڒ.26وَامِي د ݣَعّْذن يِرْذَان ݣِّين ثِيْذرِين، ڒخْدّنِّي ݣَعّْذن-د اَكِذْسن ؤُڒَا ذ يسنَّانن.27ؤُسِين-د يخدَّامن نَّان-اَس إِ بَاب ن ومَرْجع: آ سِيذِي، شك ثْزرْعذ زَّرِّيعث ثَصبْحَانْت ذݣ ومَرْجع نّش. إِيوَا مَانِيس ذَاس د كِّين يسنَّانن-أَ؟28ينَّا-ٱسن: شَان ڒَعْذُو إِݣ يݣِّين مَانَايَا. نَّان-اَس يخدَّامن نّس: مَا ثخْسذ أَ نْرَاح أَ نكّس يسنَّانن-أَ؟29ينَّا-ٱسن: لَّا، بَاش وَار كِذْسن ثْقدْجْعم شَا ؤُڒَا ذ يرْذَان.30اجّث يرْذَان اَذ مغَرن اَك يسنَّانن. أَخْمِي د غَا يَاوض ڒْوقْث ن ومْجَار اَذَاسن ينِيغ إِ يشوَّارن: اكّْسث يسنَّانن ذ اَمزْوَارُو سْمُوْنم-ثن شدّم-ثن حمَا اَذ حَرْقن. وَلَكِن يرْذَان جمْعم-ثن اَوِيم-ثن غَار ثسْرَافِين ينُو."31ينَّا-ٱسن عِيْسَى يجّن ن ڒْمَعْنَا نّغْنِي: "ڒْمُلْك وجنَّا يݣَّا اَم يِجّن ن زَّرِّيعث ن يِجّن ن نُّوْع ن اَرْبِيع قَّارن-اَس بُوْݣَرْذَاڒ. ييْسِي-ت يجّن ن ورْيَاز يࢲُّو-ت ذݣ ومَرْجع نّس.32تِيڒِي نتَّاث ذ ثَمزْيَانْت قَاع خ مَارَّا ثِحبَّا. وَلَكِن خْمِي تمْغَر ثْذوّڒ كْتَار زِي مَارَّا اَرْبِيع. ثْذوّڒ ذ ثَشجَّارْث، تَاسن-د يِجْضَاض تݣّن ذَايس ڒَعْوَاش نْسن."33ينَّا-ٱسن عِيْسَى يجّن ن ڒْمَعْنَا نّغْنِي: "ڒْمُلْك وجنَّا اَم ؤُنْتُوْن ثيْسِي-ث يِجّن ن ثمْغَارْث ثُوْݣّْوَا زَّايس ڒْمُوْدّ ن وَارن، أَنْتُوْن نِّي يسْݣَعّذ-يث-يذ مَارَّا."34قَاع مَانَايَا ينَّا-ث عِيْسَى إِ يِوْذَان س ڒمْعَانِي. وَار كِذْسن يسِّيوِيڒ إِلَّا س ڒمْعَانِي وَاهَا.35حمَا اَذ يكمّڒ وَاوَاڒ إِي ينَّا سِيذِي أَربِّـي إِ نَّبي إِشَعْيَا ذݣ يِجّن ن زْمَان:<أَكِسن سِّيوْڒغ س ڒمْعَانِي،أَذ سخْبَرغ مِين ينُّوْفَّرن زݣ وَامِي ثدْجَا دُّنشْت.>" 36يجَّا عِيْسَى ڒْغَاشِي نِّي يُوْذف غَار ثدَّارْث. ڒخْدّنِّي ؤُسِين-د غَارس يمحْضَارن نّس نَّان-اَس: "فسّر-اَنغ ڒْمَعْنَا ن يسنَّانن ذݣ ومَرْجع."37ئِنْدق-د عِيْسَى ينَّا-ٱسن: "ونِّي يزرّْعن زَّرِّيعث ثَصبْحَانْت نتَّا ذ مِّيس ن بْنَاذم.38أَمَرْجع نتَّا ذ دُّنشْت. زَّرِّيعث ثَصبْحَانْت نتَّاث ذ ثَارْوَا ن ڒْمُلْك وجنَّا. ئِسنَّانن نِثْنِي ذ ثَارْوَا ن وعفَّان نِّي ن إِبْڒِيس.39ڒَعْذُو إِݣ يزرّْعن يسنَّانن نتَّا ذ إِبْڒِيس. ڒْوقْث ن ومْجَار نتَّاث ذ ڒفْنَا ن زْمَان. ئِخدَّامن نِثْنِي ذ لْمَلَائِكَاث.40أَمشْنَاو مَامّش يسْمُوْن وفدْجَاح يسنَّانن يسْحرّق-يثن ذِي ثْمسِّي، أَمنِّي إِي غَا ثِيڒِي ڒفْنَا ن زْمَان.41أَذ د يسّكّ مِّيس ن بْنَاذم لْمَلَائِكَاث نّس، أَذ كّْسنْت زِي ڒْمُلْك نّس مَارَّا مِين يتْسبَّابن ذِي ڒْمُعْصِيَاث ذ يِنِّي يتݣّن شَّرّْ.42أَثن نْضَرن ذِي ڒْكُوْشث ن ثْمسِّي مَانِي غَا يڒِين يمطَّاون ذ وغࢲَّاࢲ ن ثغْمَاس.43وَلَكِن ڒْمُوْمِنِين اَذ شْعشْعن اَم ثْفُوْشْت ذِي ڒْمُلْك ن بَابَاثْسن. صنّط مْلِيح آ ونِّي يتْسْڒَان.44ڒْمُلْك وجنَّا اَمشْنَاو يجّن ن ڒْكنْز يخْزن ذِي شَان ومَرْجع، يُوْفِي-ث شَان حَدّ يعَاوذ يسْنُوْفَّر-يث. أُوْشَا س ڒفْرَاحث نِّي إِي ذَايس، يزّنْز مَارَّا مِين غَارس يسْغَا اَمَرْجع نِّي.45ڒْمُلْك وجنَّا اَمشْنَاو يجّن ن تَّاجَر إِي يرزُّو خ جُّوْهَر اَصبْحَان.46وَامِي يُوْفَا يجّن ن جُّوْهَر يغْڒَان، ئِزّنْز مَارَّا مِين غَارس يسْغِي-ث.47ڒْمُلْك وجنَّا اَمشْنَاو ثْرَاشَّا ينْضَر-يت يج وبحْرِي ذِي ڒبْحَر، ثطّف مْكُڒ نُّوْع ن وسْڒم.48وَامِي ثْعمَّر ثْرَاشَّا سُوْفْغن-ت-يد يبحْرِيْين غَار طَّارْف ن ڒبْحَر. قِّيمن، بْذَان تِخْضَارن ݣِّين يسڒْمَان يصبْحَانن ذِي ثْسُوْدْجَاثِين، يسڒْمَان يعفَّانن نْضَرن-ثن.49أَمُّو إِي غَا يِيڒِي نْهَار إِي ذِي غَا يفْنَا زْمَان: أَذ د اَسنْت لْمَلَائِكَاث اَذ فرْننْت ڒْكُفَّار زِي ڒْمُوْمِنِين؛50أَثْن نْضَرنْت ذِي ڒْكُوْشث ن ثْمسِّي مَانِي غَا يڒِين يمطَّاون ذ وغࢲَّاࢲ ن ثغْمَاس."51ينَّا-ٱسن عِيْسَى إِ يمحْضَارن نّس: "مَا ثْفهْمم مَارَّا مَانَايَا؟" نَّان-اَس: "وَاه آ سِيذِي."52ينَّا-ٱسن: "كُڒ اَمسڒْمَاذ ن شَّرِيعَا ن مُوْسَى إِݣ يفهْمن ڒْمُلْك وجنَّا نتَّا اَم يِجّن ن بَاب ن ثدَّارْث إِݣ يسُوْفُوْغن ثِمسْڒَايِين ثِقْذِيمِين نِغ ذ جْذِيذ زِي مَانِي يخْزن ڒْكنْز نّس."53وَامِي يكمّڒ عِيْسَى ڒمْعَانِي نِّي، يُوْيُوْر سّنِّي.54ئِذْوڒ غَار ثْمُوْرْث نّس يبْذَا يسڒْمَاذ ذِي ثمْزِيذَا نْسن. تْعجّْبن ذَايس نَّان: "مَانِي يُوْفَا ڒفْهَامث-أَ إِي ذَاس يمُّوْشن ذ لْمُعْجِزَاث-أَ؟55مَا وَار يدْجِي شَا وَانِيتَا ذ مِّيس ن ونجَّار؟ مَا وَار يدْجِي يمَّاس ذ مَرْيَم؟ أَيثْمَاس، ئِجّن قَارن-اَس يَعْقُوْب، ئِجّن ذ يُوْسف، ئِجّن ذ سِمْعَان، ئِجّن ذ يَهُوْذَا مَا لَّا؟56مَا وَار دْجِينْت شَا سُوْيْثْمَاس اَقَاثنْت اَكِذْنغ ذَانِيتَا؟ إِيوَا مَانِيس ذَاس د يكَّا مَارَّا مَانَايَا؟"57خ مَانَاينِّي وَار ث قْبِيڒن شَا.
ئِكَّر عِيْسَى ينَّا-ٱسن: "نَّبِي محْتَارم مَانِي مَا، وَلَكِن ذݣ وبِيلَاج نّس ذ ثدَّارْث نّس لَّا!"58ئِݣَّا ذِنِّي عِيْسَى ذْرُوْس ن لْمُعْجِزَاث ڒَاحقَّاش لْإِيمَان نْسن ذ وقْلِيل.
ئِكَّر عِيْسَى ينَّا-ٱسن: "نَّبِي محْتَارم مَانِي مَا، وَلَكِن ذݣ وبِيلَاج نّس ذ ثدَّارْث نّس لَّا!"58ئِݣَّا ذِنِّي عِيْسَى ذْرُوْس ن لْمُعْجِزَاث ڒَاحقَّاش لْإِيمَان نْسن ذ وقْلِيل.
Wycliffe Bible Translators, Inc.