متى12
1ذݣ وُوْسَّان نِّي ذِي نْهَار ن سّبْث ن لْعِبَادَا يعْذُو عِيْسَى ذݣ وبْرِيذ ذِي ڒْوسْط ن يمنْدِي، ئِمحْضَارن نّس دْجُوْزن ݣُّوْرن تكّْسن ثِيْذرِين تتّن-ثنْت.2وَامِي ثن ࢲْرِين شَا ن يِوْذَان زِي ڒْحِزب ن يفَرِّيسِيْين نَّان-اَس إِ عِيْسَى: "خْزَر! ئِمحْضَارن نّش تݣّن مِين يدْجَان حْرَام ذِي نْهَار ن سّبْت ن لْعِبَادَا."3ئِنْدق-د عِيْسَى ينَّا-ٱسن: "مَا وَار ثغْرِيم شَا مِين يݣَّا دَاود وَامِي تُوْغَا يدْجُوْز نتَّا ذ يِنِّي اَكِذس؟4يُوْذف غَار ثمْزِيذَا ن أَربِّـي يُوْفَا ذِنِّي اَغْرُوْم نِّي إِي يدْجَان ذ صّذْقث يشِّي-ث نتَّا ذ يِنِّي إِي كِذس؛ وَاخَّا مَانَاينِّي وَار يدْجِي شَا حَلَال غِير إِ ڒْفُقَهَا وَاهَا.5نِغ وَار ثغْرِيم شَا ذِي شَّرِيعَا ن مُوْسَى بلِّي ڒْفُقَهَا تْخَاڒَافن زَعْمَا نْهَار ن سّبْث ن لْعِبَادَا ذِي ثمْزِيذَا ن أَربِّـي بْڒَا مَا ثن يحَاسّب حَدّ؟6قَّارغ-اَوم: ذَانِيتَا ذِنِّي يجّن كْتَار زِي ثمْزِيذَا ن أَربِّـي.7مْڒِي ثْفهْمم ڒْمَعْنَا ن وَاوَاڒ-أَ إِي يقَّار أَربِّـي: <خْسغ اَذ ترحْمم يوْذَان، وَار خْسغ شَا اَذ تْغَرْصم إِ ڒبْهَايم>، أَتَاف وَار ثْحكّْمم شَا خ يِنِّي وَار يݣِّين مِينْخف.8ڒَاحقَّاش مِّيس ن بْنَاذم إِݣ يدْجَان ذ لْحَاكم خ نْهَار ن سّبْث."9يُوْيُور سّنِّي عِيْسَى، يُوْذف غَار يِجّن ن ثمْزِيذَا ن أَيث-إِسْرَائِيل.10يُوْفَا ذِنِّي يجّن ن ورْيَاز فُوْس نّس يمُّوْث. ڒخْدّنِّي سّقْسَان عِيْسَى رزُّوْن اَث تَاهْمن نَّان-اَس: "مَا حَلَال اَذ تسْݣنْفِيذ شَان يِجّن ذِي نْهَار ن سّبْت ن لْعِبَادَا مَا لَّا؟"11ينَّا-ٱسن عِيْسَى: "مڒَا شَان يِجّن زَّايْوم غَارس يج وحُوْڒِي يوْضَا-يَاس ذِي ثْسْرَافْث ذِي نْهَار ن لْعِبَادَا، مَا ثِيذ يطّف اَثِيذ يسِيڒِي مَا لَّا؟12إِيوَا بْنَاذم يسݣّْوَا اَطَّاس س وَاطَّاس زݣ يِج وحُوْڒِي! عْلَاحْسَاب مَانَايَا حَلَال اَذ تݣّذ ڒْخِير ذِي نْهَار ن لْعِبَادَا."13ڒخْدّنِّي ينَّا-ٱس عِيْسَى إِ لْمُعَاق نِّي: "سَرّح فُوْس نّش." ئِسَرّح-يث أُوْشَا يذْوڒ وفُوْس نّس يݣنْفَا، مْلِيح اَم وفُوْس نّغْنِي.14فّْغن يِوْذَان ن ڒْحِزب ن يفَرِّيسِيْين شِيطّْنن جَارَاسن مَامّش غَا ݣّن اَذ نْغن عِيْسَى.15ئِسّن عِيْسَى مَانَاينِّي يُوْيُوْر سّنِّي. ذْفَارن-ث اَبرُّو ن يِوْذَان، ئِسْݣنْفَا مَارَّا يمهْڒَاش نْسن.16ئِوصَّا-ثن ينَّا-ٱسن وَار تْخبَّارم حَدّ خَافِي.17مَانَايَا حمَا اَذ يفّغ وَاوَاڒ إِي ينَّا سِيذِي أَربِّـي إِ نَّبي إِشَعْيَا ذݣ يِجّن ن زْمَان:18<ذ وَانِيتَا ذ اَخدَّام ينُو إِݣ يخْضَرغ،ونِّي إِي خَافِي يعِيزّن إِي خف اَرْضِيغ.أَذَايس ݣّغ أَرُّوْح يقدّْسن،أَذ يخبَّار يِنِّي زِي ڒݣْنُوْس س ڒْحَقّ.19وَار يتْمنْغِي اَك حَدّ،وَار يسْنكَّر بُو ثْغُويِّيث،وَار يتْسْڒِي حَدّ إِ وَاوَاڒ نّس ذݣ يبْرِيذن.20وَار يتْرزِّي بُو غَانِيم يميّْڒن،وَار يسخْسَاي ثْفَاوْث ن ثفْثِيڒْت يتݣّن دّخَّان،أَڒ غَا يرْبح ڒْحَقّ.21ذݣ يِيسم نّس ڒݣْنُوْس اَذ ݣّن لْأَمَال.> 22سّنِّي شَان يِوْذَان ؤُوِين-اَس-د إِ عِيْسَى يجّن ن ورْيَاز ذ اَضَرْغَاڒ ذ اَزيْنُوْن ذَايس جّنّ. ئِسْݣنْفَا-ث عِيْسَى حمَا اَذ يسِّيوڒ اَذ يتْوَاڒَا.23قِّيمن ڒْغَاشِي نِّي تْعجّْبن مَارَّا نَّان: "مَاشِي ذ وَانِيتَا إِݣ يدْجَان ذ مِّيس ن دَاود نِغ؟"24تسْڒَان ڒْحِزب ن يفَرِّيسِيْين إِ وَاوَاڒ نْسن نَّان-اَسن: "بْنَاذم-أَ يسُوْفُوْغ جْنُوْن مِينْزِي اَرَّايس ن جْنُوْن ؤُمِي قَّارن بْعَلْزَبُوْل يُوْش-اَس جّْهذ-أَ."25ئِسّن عِيْسَى مِين نْوَان ينَّا-ٱسن: "مْكُڒ لْممْلَكَا إِي ذِي تْمنْغَان أَيثْبَاب نّس يجّن اَك ونّغْنِي اَذ تْنهْذم. مْكُڒ ثَنْدِينْت نِغ ذ ثَدَّارْث إِي ذِي تْمنْغَان اَيثْبَاب نّس يجّن اَك ونّغْنِي وَار ثْزمَّر اَذ تقِّيم.26مڒَا شِّيطَان يسُوْفُوْغ شِّيطَان، أَتَاف اَذ يقْضَا خ يِيخف نّس. مَامّش غَا ثݣّ اَذ تقِّيم لْممْلَكَا نّس؟27نش مڒَا سُوْفُوْغغ جْنُوْن س جّْهذ ن بْعَلْزَبُوْل نِّي زَعْمَا، ئِنِيم-اَيِي كنِّيو مَامّش تݣّن يِوْذَان نْوم سُوْفُوْغن-ثن ؤُڒَا ذ نِثْنِي؟ نِثْنِي س يِيخف نْسن تْبيَّانن بلِّي كنِّيو وَار غَارْوم بُو ڒْحَقّ ذِي مِين ثقَّارم.28نش، مڒَا سُوْفُوْغغ جْنُوْن س أَرُّوْح ن أَربِّـي، أَقَا ڒْمُلْك ن أَربِّـي يُوْسَا-د غَارْوم.29إِيوَا مَامّش؟ وَار يزمَّر حَدّ اَذ يهْجم خ ثدَّارْث ن شَان يِجّن يجْهذ بَاش اَذ يَاشَار اَݣْڒَا نّس إِلَّا مڒَا يشدّ-يث ذ اَمزْوَارُو. أُوْشَا اَذَاس يَاوِي مَارَّا مِين غَارس ذِي ثدَّارْث.30ونِّي وَار كِذِي يدْجِين شَا، أَتَاف اَقَاث ضد ينُو. ونِّي وَار كِذِي يسْمُوْنن، أَتَاف نتَّا يتْزدْجَاع.31أَقَا قَّارغ-اَوم: أَذ تْوَاغْفَرنْت مَارَّا ڒْمُعْصِيَاث إِي تݣّن يِوْذَان ذ كُڒ اَوَاڒ نِّي وَار يحْڒِين إِي قَّارن خ أَربِّـي. وَلَكِن ونِّي غَا يِينِين شَان وَاوَاڒ وَار يحْڒِين خ أَرُّوْح يقدّْسن، أَتَاف وَار ذَاس يغفَّر شَا.32ونِّي غَا يِينِين شَان وَاوَاڒ وَار يحْڒِين خ مِّيس ن بْنَاذم، أَتَاف اَخَاس يغْفَر. وَلَكِن ونِّي غَا يِينِين شَان وَاوَاڒ وَار يحْڒِين خ أَرُّوْح يقدّْسن، أَتَاف وَار خَاس يغفَّر شَا لَّا ذِي دُّنشْت-أَ أُو لَّا ذِي لْأَخِيرَا.33مڒَا ثَشجَّارْث ذ ثَصبْحَانْت، أَتَاف اَذ تَارو مِين يدْجَان ذ اَصبْحَان. مڒَا ثَشجَّارْث ذ ثَعفَّانْت، أَتَاف اَذ تَارو مِين يدْجَان ذ اَعفَّان. ثَشجَّارْث ثْظهَّار-د س مِين تَارو.34آ ثَارْوَا يفِيغرَان، مَامّش غَا ثݣّم اَذ تِينِيم اَوَاڒ اَصبْحَان أُو كنِّيو ذ يعفَّانن؟ ڒَاحقَّاش اَقمُّوْم ن بْنَاذم يسَّاوَاڒ مِين يدْجَان ذݣ وُوْڒ نّس.35بْنَاذم اَصبْحَان يسُوْفُوْغ-د مِين يدْجَان ذ اَصبْحَان زِي ڒْكنْز اَصبْحَان ن وُوْڒ نّس. بْنَاذم اَعفَّان يسُوْفُوْغ-د مِين يدْجَان ذ اَعفَّان زِي ڒْكنْز اَعفَّان ن وُوْڒ نّس.36أَذَاوم ينِيغ: أَقَا يُوْم لْحِسَاب ذ لْعِقَاب اَذ تْوَاحَاسْبن يِوْذَان خ مْكُڒ اَوَاڒ يخْوَان إِي سِّيوْڒن.37ڒَاحقَّاش عْلَاحْسَاب اَوَاڒن نّش اَقَاش بَرِيء نِغ عْلَاحْسَاب اَوَاڒن نّش اَذ تْوَاعقّْبذ."38ڒبْعَاض ن يمْسڒْمَاذن ن شَّرِيعَا ذ ڒْحِزب ن يفَرِّيسِيْين نَّان-اَس إِ عِيْسَى: "آ لْمُعَلِّم، نخْس أَ نْࢲر يجّن ن لْعَلَامَا ذ ثَمقّْرَانْت زَّايك."39ئِنْدق-د عِيْسَى ينَّا-ٱسن: "ئِوْذَان يعفَّانن ن ڒْوقْث-أَ يخدّْعن أَربِّـي رزُّوْن لْعَلَامَا. ينَّا-ٱسن: لَّا، وَار ذَاسن يتْمُوْشِّي إِلَّا لْعَلَامَا نِّي ن نَّبِي يُوْنس.40أَمش يسعْذُو يُوْنس ثڒْتِيَّام جَار دْجِيَاڒِي ذ وُوْسَّان ذݣ وعدِّيس ن وسْڒم اَمقّْرَان، أَمنِّي إِي غَا يسعْذُو مِّيس ن بْنَاذم ثڒْتِيَّام جَار دْجِيَاڒِي ذ وُوْسَّان ذݣ وعدِّيس ن ثْمُوْرْث.41يُوْم لْحِسَاب ذ لْعِقَاب اَذ د كَّرن يمزْذَاغ ن ثنْدِينْت ن نِينْوَى اَك يِوْذَان ن ڒْوقْث-أَ اَخَاسن شثْشَان، ڒَاحقَّاش اَيثْبَاب ن ثنْدِينْت ن نِينْوَى تُوْبن وَامِي ثن ينْهَا نَّبِي يُوْنس. أُو ذَانِيتَا يجّن ذ اَمقّْرَان زِي يُوْنس.42يُوْم لْحِسَاب ذ لعِقَاب، أَذ تكَّر لْمَلِكَا ن لْجَنُوْب اَك يِوْذَان ن ڒْوقْث-أَ اَخَاسن ثْشثْشَا، ڒَاحقَّاش ثُوْسَا-د نتَّاث زِي ثْمُوْرْث يُوْݣْجن حمَا اَذ تْصنّط إِ ڒفْهَامث ن سُلِيمَان. أُو ذَانِيتَا يجّن ذ اَمقّْرَان زِي سُلِيمَان.43شُوْف، خْمِي غَا يتْوَاسُوْفغ جّنّ اَعفَّان زِي شَان بْنَاذم، أَتَاف اَذ يݣُّوْر ذݣ يمُوْشَان يُوْزْغن يرزُّو اَمْشَان مَانِي غَا يريّح. مڒَا وَار يُوْفِي شَا،44أَتَاف اَذ يِينِي اَقَا نش اَذ رَاحغ اَذ ذوْڒغ غَار ثدَّارْث ينُو مَانِيس إِي فّْغغ. سّنِّي اَغَارس يذْوڒ اَت يَاف ثخْوَا، ثعْذڒ، ثنْقَا.45أُوْشَا اَذ يرَاح اَذ د يَاوِي سبْعَا ن جْنُوْن نّغْنِي ذ يعفَّانن كْتَار زَّايس حمَا اَذ ذوْڒن كُڒْشِي اَذَايس زذْغن. أَتَاف اَذ تِيڒِي لْحَالَا ثَنݣَّارُوْت ن بْنَاذم نِّي ذ ثَعفَّانْت كْتَار زِي لْحَالَا نّس ثَمزْوَارُوْت. أَمنِّي إِي ذَاسن غَا ثوْقع إِ يِوْذَان يعفَّانن ن ڒْوقْث-أَ."46عَاذ يسَّاوَاڒ عِيْسَى اَك ڒْغَاشِي وَامِي غَارس د تُوْسَا يمَّاس ذ أَيثْمَاس، بدّن بَارَّا إِ ثدَّارْث رزُّوْن اَكِذس سِّيوْڒن.47ينَّا-ٱس شَان يِجّن إِ عِيْسَى: "أَقَا يمَّاش ذ أَيثْمَاش بدّن غَار بَارَّا رزُّوْن اَكِذش سِّيوْڒن."48ئِنْدق-د عِيْسَى ينَّا-ٱس إِ ونِّي إِي كِذس يسِّيوْڒن: "مِين عْنَان يمَّا ذ أَيثْمَا؟"49ئِسْوِيࢲذ س وفُوْس نّس غَار يمحْضَارن نّس ينَّا: "أَقَا يمَّا ذ أَيثْمَا."50ينَّا-ٱس: "ونِّي يتݣّن س مِين يخس بَابَا إِي يدْجَان ذݣ وجنَّا، أَتَاف نتَّا ذ ؤُمَا ذ ؤُتْشْمَا ذ يمَّا."
Wycliffe Bible Translators, Inc.