لوقا4
1ئِذْوڒ-د عِيْسَى زݣ يِغْزَار ن لْأُرْدُن يشُّوْر س أَرُّوْح يقدّْسن، ڒخْدّنِّي يُوْوِي-ث أَرُّوْح نِّي غَار ڒخْڒَا.2ئِكَّا ذِنِّي اَرْبعِين يُوْم يتْجرَّاب-يث إِبْڒِيس. ذݣ وُوْسَّان نِّي وَار يشِّي وَالُو. وَامِي كمّْڒن وُوْسَّان نِّي يدْجُوْز.3ئِكَّر إِبْڒِيس ينَّا-ٱس إِ عِيْسَى: "شك مڒَا ذ مِّيس ن أَربِّـي، إِنِي-يَاسن إِ يِزْرَا-يَا اَذ ذوْڒن ذ اَغْرُوْم."4يَارَّا خَاس عِيْسَى ينَّا-ٱس: "لَّا، لْكِتَاب يقَّار: <بْنَاذم وَار يتْعِيش شَا س وغْرُوْم وَاهَا.>"5ئِكَّر إِبْڒِيس يُوْوِي عِيْسَى غَار يِجّن ن ومْشَان يُوْعْڒَا، ئِسْمظْهَار-اَس-د مَارَّا لْممْلَاكَاث ن دُّنشْت-أَ ذݣ يِجّن ن دْقِيقث.6ينَّا-ٱس إِبْڒِيس: "أَذَاش ؤُشغ مَارَّا جّْهذ-أَ ذ لْعَظَمَا-يَا نْسنْت ڒَاحقَّاش نش ثمُّوْش-اَيِي، أَت ؤُشغ إِ وُوْمِي مَا خْسغ.7مڒَا ثْسجّْذذ-اَيِي، أَذ يِيڒِي قَاع مَانَايَا إِ شك."8ينَّا-ٱس عِيْسَى: "لَّا، لْكِتَاب يقَّار: <سجّذ إِ سِيذِي أَربِّـي نّش، عْبذ-يث نتَّا وَاحْذس.>"9ئِكَّر إِبْڒِيس يُوْوِي عِيْسَى غَار ثنْدِينْت ن لْقُدْس، ئِسِيڒِي-ث خ ثْقِيشَّات ن ثمْزِيذَا ثَمقّْرَانْت ينَّا-ٱس: "شك مڒَا ذ مِّيس ن أَربِّـي، نْݣز سَّانِيتَا غَار ثْمُوْرْث10أَقَا لْكِتَاب يقَّار: <قَا أَربِّـي اَذ يوصَّا بَاش اَش حْضَانْت لْمَلَائِكَاث نّس.>11عَاوذ يقَّار: <أَش يْسِينْت خ يفَاسّن نْسنْت بَاش وَار ثرْقِيفذ ؤُڒَا ذ يج وزْرُو س وضَار نّش.>"12ئِنْدق-د عِيْسَى ينَّا-ٱس: "لَّا، لْكِتَاب يقَّار: <وَار تْجَرَّاب شَا سِيذِي أَربِّـي نّش.>"13إِبْڒِيس وَامِي يكمّڒ اَكِذس مَارَّا اَجرَّاب نِّي، ئِكَّر يبعّذ خَاس اَڒ يِجّن ن ثْوَاڒَا نّغْنِي.14ئِذْوڒ عِيْسَى غَار ثْمُوْرْث ن لْجَلِيل س جّْهذ ن أَرُّوْح يقدّْسن، ئِتنْتَاشَر ڒخْبَار نّس مَارَّا ذِي جْوَايه نِّي.15ئِسڒْمَاذ ذِي ثمْزِيذَاوِين نْسن سمْغَارن-ث مَارَّا يوْذَان.16يُوْسَا-د غَار وبِيلَاج ن نَاصِرَا مَانِي يربَّا. نْهَار ن سّبْث ن لْعِبَادَا يرُوْح غَار ثمْزِيذَا اَم ڒبْدَا، ئِكَّر حمَا اَذ يغَر.17ؤُشِين-اَس لْكِتَاب نِّي ن نَّبِي إِشَعْيَا، يرْزم-يث يُوْفَا اَمْشَان إِي ذِي يُوْرَا وَاوَڒ-أَ:18<أَقَا أَرُّوْح ن سِيذِي أَربِّـي اَقَاث خَافِي،ئِخْضَر-اَيِي حمَا اَذ بشَّرغ ڒْمُسَاكِين.ئِسّكّ-اَيِي-د اَذ خْبَرغ لْحُرِّيَا إِ يمحْبَاس،يِنِّي يتْوَاضَرْغْڒن اَثن اَرّغ تْوَاڒَان،يِنِّي يتْوَاضڒْمن اَذَاسن د رْخُوْغ.19أَذ خْبَرغ خ وسݣّْوَاس ن اَرْضَا ن سِيذِي أَربِّـي.>20ئِبلّع لْكِتَاب نِّي، يَارَّا-ٱس-ث إِ وخدَّام يقِّيم. مَارَّا يِنِّي يدْجَان ذِي ثمْزِيذَا قِّيمن تخزَّارن ذَايس.21ئِبْذَا يقَّار-اَسن: "نْهَارَا قَا يفّغ-د وَاوَاڒ ن لْكِتَاب-أَ إِي ؤُمِي ثسْڒِيم."22مَارَّا سَّاوَاڒن خَاس مْلِيح، تْعجّْبن ذݣ وَاوَاڒن يصبْحَانن إِي د يفّْغن زݣ وقمُّوْم نّس. نَّان خَاس: مَا وَار يدْجِي شَا وَانِيتَا ذ مِّيس ن يُوْسف؟23ينَّا-ٱسن عِيْسَى: "بْڒَا شّكّ اَذَايِي ثِينِيم ڒْمَعْنَا-يَا: شك آي اَضْبِيب مْڒِي ثدَّاوِيذ، إِڒِي ثدَّاوِيذ يخف نّش. أَذَايِي ثِينِيم عَاوذ قَا مِين نسْڒَا يوقْعن ذݣ وبِيلَاج ن كَفرْنَاحُوْم، ڒخُّو مَانَاينِّي اݣّ-يث ؤُڒَا ذَانِيتَا ذِي ثْمُوْرْث نّش."24ينَّا-ٱسن: "أَقَا تسْڒَام ڒْحَقّ: وَار يدْجِي شَا شَان نَّبِي قبْڒن-ث ذِي ثْمُوْرْث نّس.25أَقَا تسْڒَام ڒْحَقّ: تُوْغَا ذِنِّي اَطَّاس ن ثَاجَّاڒِين ذِي ثْمُوْرْث ن أَيث-إِسْرَائِيل ذِي زْمَان ن نَّبِي إِلْيَاس وَامِي وَار يُوْوْثِي بُو ونْࢲَار ثڒْت سْنِين أُو ستّ شْهُوْر وَامِي يوْقع يجّن ن بُوْهيُّوْف ذِي ثْمُوْرْث ثكْمَاڒ.26وَلَكِن ثَاجَّاڒِين نِّي وَار غَارْسنْت د يتْوَاسّكّ شَا نَّبِي إِلْيَاس، ئِتوَاسّكّ-د غِير غَار يِشْتن ن ثَاجَّاڒْث وَاهَا ذِي دْشَار ن صَرپْـتَا ذِي ثْمُوْرْث ن صَيْدَا.27عَاوذ تُوْغَا اَطَّاس ن يِوْذَان هڒْشن ذَايْسن جْذَام ذِي ثْمُوْرْث ن أَيث-إِسْرَائِيل ذِي زْمَان نِّي ن نَّبِي أَلِيشَع. أَربِّـي وَار زَّايْسن يسْݣنْفِي ؤُڒَا ذ يجّن، ئِسْݣنْفَا إِلَّا نُعْمَان زِي سُوْرْيَا."28يِنِّي يمُوْنن ذِي ثمْزِيذَا وَامِي سْڒِين إِ وَاوَاڒ-أَ غضْبن اَطَّاس.29كَّرن سُوْفْغن-ث غَار بَارَّا ن ثنْدِينْت. ؤُوِين-ث غَار جَّرْف ن وذْرَار مَانِي ثبْنَا ثنْدِينْت نْسن بَاش اَث سيّْبن خ جَّرْف نِّي.30وَلَكِن نتَّا يفْڒث-اَسن يُوْيُور.31ئِرُوْح عِيْسَى غَار وبِيلَاج ن كَفرْنَاحُوم إِݣ يدْجَان ذِي ثْمُوْرْث ن لْجَلِيل، ئِبْذَا يسڒْمَاذ يوْذَان ذِنِّي ذِي نْهَار ن لْعِبَادَا نْسن كُڒ سّبْث.32قِّيمن يِوْذَان نِّي تْعجّْبن ذݣ وسڒْمذ نّس مِينْزِي غَارس سُّلْطَا إِي زِي يسڒْمَاذ.33ؤُفِين ذِي ثمْزِيذَا نِّي يجّن ن ورْيَاز ذَايس يجّن ن جّنّ ذ اَعفَّان. ئِبْذَا يسْنكَّر ثْغُوْيّث س جّْهذ34ينَّا-ٱس إِ عِيْسَى: "مِين ذَايْنغ ثْرزُّوْذ آ عِيْسَى نَاصِرِي؟ مَا ثُوْسِيذ-د اَخَانغ ثقْضِيذ؟ نش قَا سّْنغ مِين ثعْنِيذ؛ شك ذ لْعَظِيم ن أَربِّـي!"35ئِزيَّار-يث عِيْسَى ينَّا-ٱس: "سْتُوْك شك، فّغ زَّايس!" ئِسغْضڒ جَّن اَرْيَاز نِّي غَار ثْمُوْرْث ذِي ڒْوسْط نْسن ڒخْدّنِّي يفّغ زَّايس وَار ذَاس يݣِّي وَالُو.36قِّيمن مَارَّا يوْذَان نِّي ذهّْشن نَّان إِ وَايَاوْيَا: "مِين يعْنَا مَانَايَا؟ ئِتْأَمَر ؤُڒَا ذ جْنُوْن يعفَّانن س يِجّن ن سُّلْطَا ذ ثْزمَّار نِثْنِي تفّْغن."37ئِتنْتَاشَر ڒخْبَار نّس ذِي مْكُڒ اَمْشَان ذِي جْوَايه نِّي.38سّنِّي عِيْسَى يفّغ-د زِي ثمْزِيذَا نِّي يُوْذف غَار ثدَّارْث ن سِمْعَان. يُوْفَا ذِنِّي ثَذْݣّوَاڒْث ن سِمْعَان قَا ثهْڒش ذَايس ثِمسِّي اَطَّاس، تَّارن زَّايس حمَا اَت يسْݣنْفَا.39يُوْذَار اَغَارس يسْبدّ ثِمسِّي ثفّغ-يت. ذݣ ومْشَان ثكَّر ثبْذَا تْسخَّار خَاسن.40وَامِي ثغْڒِي ثْفُوْشْت غَار ثْمدِّيث، ئِوْذَان ؤُوِين غَار عِيْسَى يمهْڒَاش نْسن كُڒ يجّن مَامش يݣَّا ڒهْڒَاش نّس. مْكُڒ يجّن زَّايْسن يسْرُوْسَا خَاس فُوْس نّس يسْݣنْفَا-ث.41زݣ وَاطَّاس ن يِوْذَان عَاوذ تفّْغن جْنُوْن سْنكَّرن ثْغُوْيّث قَّارن-اَس قَا شك ذ مِّيس ن أَربِّـي." وَلَكِن نتَّا يتْزيَّار-يثن، وَار ثن يتجِّي شَا اَذ سِّيوْڒن مِينْزِي سّْنن نتَّا ذ لْمَسِيح.42وَامِي يصْبَح ڒْحَاڒ يفّغ عِيْسَى يرُوْح غَار يِجّن ن ومْشَان ن ڒخْڒَا. ئِوْذَان نِّي بْذَان رزُّوْن خَاس، ؤُسِين-د غَارس طّْفن-ث حمَا وَار خَاسن يݣُّوْر شَا.43ينَّا-ٱسن: "لَّا، نش يتْخصَّا-ٱيِي اَذ بشَّرغ س ڒْمُلْك ن أَربِّـي ذِي ثْندَّام نّغْنِي مِينْزِي تْوَاسّكّغ-د إِ مَانَايَا."44ئِرُوْح يتْحدَّاث ذِي ثمْزِيذَاوِين نْسن ن يَهُوْذِيَا.
Wycliffe Bible Translators, Inc.