يعيبرانيين3
1آي اَيثْمَا صَّالِحِين، ذ كنِّيو إِي يدْجَان ذ يمْعَشَارن ذݣ ؤُڒَاغِي نِّي إِي د يُوْسِين زݣ وجنَّا. فكَّرث مْلِيح ذِي عِيْسَى، نتَّا ذ اَرَّسُوْل نتَّا ذ ڒفْقِي اَمقّْرَان ن لْإِيمَان إِي خَاس نْشهّذ نشِّين.2ئِخْذم عِيْسَى س لْإِذن ن ونِّي إِي ثِيد يعيّْنن مَامّش يݣَّا نَّبِي مُوْسَى ؤُڒَا ذ نتَّا يخْذم س لْإِذن ن أَربِّـي ذِي اَيثْبَاب ن ثدَّارْث ثكْمَاڒ ن أَربِّـي.3شُوْف، عِيْسَى يُوْفِي-ث يسْذَاهدْج لْعَظَمَا كْتَار زِي نَّبِي مُوْسَى مَامّش يدْجَا بَاب ن ثدَّارْث يسْذَاهدْج شَّان كْتَار زِي أَيثْبَاب ن ثدَّارْث نِّي إِي ذِنِّي د يُوْرو.4لِأَنَّا كُڒ ثَدَّارْث غَارس ونِّي إِي ثن د يُوْرْون أُو مَارَّا يجِّي-ثن-د أَربِّـي.5تُوْغَا نَّبِي مُوْسَى يخدّم نِيشَان ذ اَمْسخَّار، ئِتْعَاوَان اَيثْبَاب ن ثدَّارْث ثكْمَاڒ ن أَربِّـي، ئِشهّذ خ ثْمسْڒَايِين تُوْغَا عَاذ إِي غَا يتْوَابشَّرن ذِي لْمُسْتَقْبل.6وَلَكِن لْمَسِيح نتَّا ذ مِّيس يحكّم خ اَيثْبَاب ن ثدَّارْث ن أَربِّـي، ئِتْكلَّاف زَّايْسن نِيشَان. أُو نشِّين ذ اَيثْبَاب-أَ ن ثدَّارْث نّس يعْنِي مڒَا نطّف مْلِيح ذِي زْعَامث نّغ أُو ذِي لْأَمَال نّغ إِي خف نْتفْتَاخَر.7خ مَانَايَا اَمُّو يقَّار أَرُّوْح يقدّْسن: نْهَارَا مڒَا ثسْڒِيم إِ صُّوْت ن أَربِّـي،8وَار سقْسِيحث شَا ؤُڒَاون نْوم مَامش إِي ݣِّين أَيث-إِسْرَائِيل وَامِي ذَايِي عْصَان ذِي ڒْوقْث نِّي ن ڒْمِحْنث ذِي ڒخْڒَا.9ذݣ ومْشَان نِّي ڒجْذُوْذ نْوم زعّْمن-اَيِي س ثْغنَّانْت اَذ ࢲرن نش مِين عنِّيغ، وَاخَّا ؤُڒَا ذِي اَرْبعِين يسݣّْوُوْسَا ࢲْرِين ڒخْذَايم ينُو.10خ مَانَاينِّي سْعصّْبن-اَيِي يِوْذَان ن زْمَان نِّي. نِّيغ نش قَا ڒبْدَا تْبعَّاذن خَافِي س وُوْڒَاون نْسن، ئِبْرِيذن ينُو وَار ثن سِّينن شَا نِثْنِي.11سّنِّي جُّوْدْجغ س وغْضَاب ينُو نِّيغ عمَّارْص اَذ اَذْفن ذِي اَرَّاحث ينُو.12آي اَيثْمَا، حْضَام يخف نْوم بَاش ؤُڒَا ذ يجّن زَّايْوم وَار غَارس يتِيڒِي وُوْڒ ذ اَبرْشَان نِغ وَار ذَايس يتِيڒِي بُو لْإِيمَان بَاش وَار يتْبعِّيذ شَا نتَّا خ أَربِّـي يدَّرن.13لَّا، مڒَا نْزمَّر أَ نِيْنِي <نْهَارَا>، أَتَاف اَذ تْشجّْعم اَيَاوْيَا كُڒ نْهَار بَاش وَار ذِنِّي يتِيڒِي حَدّ زَّايْوم اَذ يذْوڒ يقْسح وُوْڒ نّس اَث تخْذع ڒْمُعْصِيْث نّس.14أَقَا نشِّين أَ نِيڒِي ذ يمْعَشَارن ذِي لْمَسِيح يعْنِي مڒَا نقِّيم نطّف مْلِيح اَڒ ونݣَّارُو ذِي تِّقث نِّي إِي تُوْغَا غَارْنغ ذ اَمزْوَارُو.15مَامّش يقَّار لْكِتَاب: <نْهَارَا مڒَا ثسْڒِيم إِ صُّوْت نّس، وَار سقْسِيحث شَا ؤُڒَاون نْوم مَامش إِي ݣِّين أَيث-إِسْرَائِيل وَامِي ث عْصَان.>16شُوْف، مِين عْنَان يِنِّي يسْڒِين ؤُݣِين اَذ ݣّن اَرَّاي إِ أَربِّـي؟ يَاش ذ يوْذَان نِّي مَارَّا إِݣ يسُوْفغ نَّبِي مُوْسَى زِي مِصْرَا نِغ؟17مِين عْنَان يِنِّي يسْعصَّابن أَربِّـي ذِي اَرْبعِين يسْݣُّوُوْسَا نِّي؟ يَاش ذ يِنِّي يعْصَان أَربِّـي منْضَارن ذِنِّي ذِي ڒخْڒَا نِّي اَم يمُّوْضَاس نِغ؟18أُو مِين عْنَان يِنِّي إِي خف يجُّوْدْج أَربِّـي ينَّا-ٱسن عمَّارْص اَذ اَذْفن ذِي أَرَّاحث ينُو؟ يَاش ذ يِنِّي وَار يتْطِيعِين شَا نِغ؟19إِيوَا نشِّين نتْوَاڒَا بلِّي تُوْغَا وَار زمَّرن شَا اَذ اَذْفن ذِي أَرَّاحث ن سِيذِي أَربِّـي مِينْزِي ؤُݣِين اَذ اَمْنن.
Wycliffe Bible Translators, Inc.