أَيث-ؤُفَسُوْس6
1آي يحنْجِيرن طَاعم إ لْوَالِدِين نْوم ذِي سِيذِيثْنغ، أَقَا مَانَايَا نِيشَان إِݣ يدْجَا.2لْكِتَاب يقَّار: <وقَّر بَابَاش ذ يمَّاش.> وَار ذِنِّي بُو شَان ڒُوْصِيّث نّغْنِي قْبڒ إِ ثَانِيتَا يُوْشَا-د اَكِذس أَربِّـي يجّن ن لْوَعْد.3يعْنِي ينَّا: <حمَا اَغَارك ثِيڒِي مَارَّا مْلِيح، حمَا اَذ يڒِين وُوْسَّان نّش ذِي دُّنشْت-أَ ذ يزيْرَارن.>4آي يبَابَاثن، وَار سغْضَابم شَا يحنْجِيرن نْوم، ربَّام-ثن خ تَّرْبِيّث ذ وسڒْمذ ن سِيذِيثْنغ.5آي يسمْغَان، طَاعم إِ أَيثْبَاب نْوم ذِي دُّنشْت-أَ، وقَّرم-ثن ݣّْوْذم-ثن س يِجّن ن وُوْڒ يصْفَا اَمشْنَاو مَّامش ثْطَاعَام إِ لْمَسِيح.6طَاعم-اَسن مَاشِي غِير خْمِي ذَاوم تْبدَّان غَار وزدْجِيف وَاهَا اَذَاسن ثْعجْبم؛ لَّا، أَذ تِيڒِيم اَم يسمْغَان ن لْمَسِيح اَذ تݣّم س ڒْخَاضَر نْوم مِين يخس أَربِّـي.7خذْمم س يِجّن ن ڒْخَاضَر نْوم اَخْمِي ثْخدّْمم إِ سِيذِيثْنغ مَاشِي إِ يرْيَازن.8ئِتْخصَّا كنِّيو اَذ تسّْنم مَارَّا ڒْخِير إِي غَا ثݣّم اَكنِّيو يجَزَا خَاس سِيذِيثْنغ وَاخَّا كنِّيو ذ يسمْغَان نِغ ذ أَيثْبَاب نْسن.9أُو كنِّيو آي أَيثْبَاب ن يسمْغَان اَذَاسن ثݣّم كِيف-كِيف، مَاشِي اَثن تْسِݣّْوْذم. أَقَا ثسّْنم بلِّي بَاب نْوم ذ بَاب نْسن نتَّا ذ يجّن اَقَاث ذݣ وجنَّا، وَار يتݣّ بُو س وُوْذمَاون.10أَقَا اَوَاڒ ينُو اَنݣَّارُو: جهْذث س سِيذِي أَربِّـي أُو س لْقُوَّا نّس ثَمقّْرَانْت.11ݣّم خَاوم مَارَّا ڒسْنَاح ن أَربِّـي بَاش اَذ تسْبدّم مِين خَاوم يتْشِيطِّين إِبْڒِيس.12لِأَنَّا نشِّين وَار نتْمنْغِي شَا ضد إِ يِوْذَان ن ويْسُوْم ذ يذَامّن. لَّا، نتْمنْغَا ضذ ن ثْزمَّار ن ثَادْجسْت-أَ ثَانِيتَا ن زْمَان-أَ ذ يِنِّي إِݣ يحكّْمن ذ يِنِّي إِݣ يجهْذن ذِي ثَادْجسْت-أَ. نشِّين نتْمنْغَا ضذ ن شَّيَاطِين يعفَّانن إِݣ يدْجَان ذݣ يمُوْشَان ن يجنَّاثن.13س مَانَايَا يْسِيث غَارْوم مَارَّا ڒسْنَاح ن أَربِّـي بَاش وَار تْركّْوِيڒم شَا ذِي نْهَار ن شَّرّْ. أُو مڒَا ثݣِّيم مَانَايَا مَارَّا، أَتَاف اَذ تْبدّم.14بدّم بَعْدَا نِيشَان، حزّْمم اَحزَّام نِّي ن لْحَقِيقَا إِي تݣّم ذِي نّصّ. ݣّم عَاوذ ثْجِيلِيت نِّي ن ڒحْذِيذ ن ڒْحَقّ.15قّْنم ثِسِيڒَا إِ يضَارن نْوم بَاش اَذ تسْوجْذم يخف نْوم اَذ تْبشَّرم س لْإِنْجِيل ن ڒهْنَا.16أَذ تيْسِيم ڒبْدَا لْإِيمَان نْوم اَم يِجّن ن لْحِمَايَا خ وفُوْس إِي زِي غَا ثْسخْسِيم مَارَّا فْڒِيتْشَاث نِّي يحَرّْقن ن وعفَّان نِّي ن إِبْڒِيس.17يْسِيث عَاوذ لْكَسْك ن وسفْڒث، سْخذْمم اَكِذس سِّيف نِّي ن أَرُّوْح يقدّْسن إِݣ يدْجَان ذ اَوَاڒ ن أَربِّـي.18مَارَّا ظُّرُوْف إِي ذِي ثدْجَام تَّارم إِ أَربِّـي خَاسن س أَرُّوْح يقدّْسن س مَارَّا لْأَنْوَاع ن ثْࢲَادْجِيث ذ دُّعَاء. سْخذْمم ڒَعْقڒ نْوم ذِي مَانَايَا، أَرّم-د ڒْبَاڒ نْوم س يِجّن ن صّْبَر، تَّارم خ مَارَّا صَّالِحِين.19تَّارم خَافِي نش عَاوذ مڒْمِي مَا رزْمغ اَقمُّوْم ينُو اَذَايِي مُوْشّن وَاوَاڒن إِي زِي غَا بشَّرغ س ڒْمَعْنَا ينُوْفَّرن ن لْإِنْجِيل.20عْلَاحْسَاب لْإِنْجِيل-أَ وَانِيتَا إِي تِيڒِيغ نش ذ يجّن ن سَّفِير شَرّْفغ س سْنَاسڒ. ࢲَّادْجم كنِّيو بَاش اَزَّايس بشَّرغ بْڒَا مَا ٱذ ݣّْوْذغ عْلَاحْسَاب لْوَاجِب ينُو.21رزُّوْغ اَذ تسّْنم مَامش دْجِيغ ذ مِين تݣّغ. ذ ؤُمَا تُوْشِيق يعِيزّن إِي ذَاوم غَا يِينِين مَارَّا مَانَايَا. نتَّا ذ يجّن ن وخدَّام نِيشَان ذِي سِيذِيثْنغ.22تْسكِّيغ-اَوم-ث-يذ إِ كنِّيو خ سَّبَاب-أَ وَانِيتَا بَاش اَذ تسّْنم مَامش دْجِيغ نش اَذ يشجّع ؤُڒَاون نْوم.23أَذ يِيڒِي ڒهْنَا إِ أَيثْمَاثْنغ ذ ڒمْحِبّث اَك لْإِيمَان زِي أَربِّـي بَابَاثْنغ ذ سِيذِيثْنغ عِيْسَى لْمَسِيح.24أَذ يِيڒِي اَرْضَا إِ مَارَّا يِنِّي إِݣ يتْحِبَّان سِيذِيثْنغ عِيْسَى لْمَسِيح س يِجّن ن ڒمْحِبّث وَار ثْفنِّي شَا عمَّارْص.
Wycliffe Bible Translators, Inc.