ارسل4
1ؤُسِين-د ڒْحِزب ن يصَدُّوْقِيْين ذ ڒْفُقَهَا ذ ؤُمقّْرَان ن يعسَّاسن ن ثمْزِيذَا ثَمقّْرَانْت ن أَيث-إِسْرَائِيل، ؤُفِين بُطْرُس ذ يُوْحَنَّا سَّاوَاڒن اَك يِوْذَان.2وَار ذَاسن يعْجِيب بُو ڒْحَاڒ قَاع وَامِي ؤُفِين بُطْرُس ذ يُوْحَنَّا سڒْمَاذن تْحدَّاثن إِ يِوْذَان خ عِيْسَى قَّارن بلِّي يوْذَان اَذ د كَّرن زِي ڒْموْث.3كَّرن طّْفن بُطْرُس ذ يُوْحَنَّا سِيذْفن-ثن ذِي ڒحْبس جِّين-ثن ذِنِّي اَڒ ثِيوشَّا مِينْزِي يعْذُو ڒْحَاڒ.4أَطَّاس ن يِوْذَان إِي يسْڒِين إِ وَاوَاڒ نْسن ؤُمْنن. يرْيَازن نِّي إِي يُوْمْنن ڒخُّو ؤُوْضن غَار يِجّن خمْسَاڒَاف إِذْسن.5ثِيوشَّا نّس مُوْنن ذِي لْقُدْس يمقّْرَانن ن أَيث-إِسْرَائِيل ذ اَرُّوْيَاس نْسن ذ يمْسڒْمَاذن ن شَّرِيعَا.6تُوْغَا ذِنِّي حَنِين إِݣ يدْجَان ذ اَرَّايس ن ڒْفُقَهَا ذ قِيَافَا ذ يُوْحَنَّا ذ إِسْكَنْدَر ذ يِنِّي يدْجَان زِي ڒحْبَاب ن اَرَّايس ن ڒْفُقَهَا.7ؤُوِين-د بُطْرُس ذ يُوْحَنَّا سْبدّن-ثن ذِي ڒْوسْط نْسن نَّان-اَسن: "مَان جّْهذ نِغ ذ يِيسم إِي زِي تݣّم مَانَايَا؟"8بُطْرُس يشُّوْر-د س أَرُّوْح يقدّْسن ڒخْدّنِّي ينَّا-ٱسن: "آ لْحُكَّام آي يمقّْرَانن ن شَّعْب!9مَا تݣّم-اَنغ لْإِسْتِجْوَاب نْهَارَا عْلَاحْسَاب يجّن ن ڒْخِير إِي نݣَّا ذݣ ونشْرُوْف-أَ عْلَاحْسَاب مَامّش يݣنْفَا؟10إِيوَا يتْخصَّا اَذ تسّْنم كنِّيو ذ مَارَّا أَيث-إِسْرَائِيل بلِّي اَرْيَاز-أَ إِي ذَا يبدّن زَّاثْوم يݣّنْفَا س يِيسم ن عِيْسَى لْمَسِيح زِي نَاصِرَا. كنِّيو ثْصلّْبم-ث، وَلَكِن أَربِّـي يسكَّر-يث-يذ زِي ڒْموْث.11عِيْسَى-يَا نتَّا ذ اَزْرُو نِّي إِي ثْعِيفّم كنِّيو يبنَّاين. ڒخُّو يذْوڒ ذ اَزْرُو اَصبْحَان اَقَاث ذِي ثْغمَّارْث ن دْسَاس.12وَار يزمَّر حَدّ اَذ ينْجم بْڒَا زَّايس نتَّا. لِأَنَّا وَار ذِنِّي ؤُڒَا ذ يجّن ن يِيسم نّغْنِي جَار إِ يرْيَازن ذِي دُّنشْت-أَ اَزَّايس نتْوَاسنْجم إِلَّا نتَّا."13خْزَرن لْحُكَّام نِّي ذِي زْعَامث ن بُطْرُس ذ يُوْحَنَّا ؤُفِين-ثن وَار غْرِين شَا نِثْنِي ذ يوْذَان عَادِي. قِّيمن تْعجّْبن، عقْڒن-ثن تُوْغَاثن اَك عِيْسَى.14عَاوذ تْوَاڒَان اَرْيَاز نِّي يݣنْفَا يبدّ ذِنِّي اَكِذْسن، وَار ؤُفِين مِين غَا ينِين.15لْحُكَّام نِّي ؤُمَرن بُطْرُس ذ يُوْحَنَّا اَذ فّْغن بَارَّا اَذ جّن جْمَاعث نِّي ن لْحُكَّام اَذ مْشَاوَارن وَاحذْسن.16نَّان: "مِين غَا نݣّ إِ ثْنَاين-أَ ن يرْيَازن؟ وَار نْزمَّر شَا أَ ننْكَر لْمُعْجِيزَا-يَا إِي ݣِّين اَقَا ثْمظْهَار-اَسن-د إِ مَارَّا يمزْذَاغ ن لْقُدْس.17وَلَكِن لَابُد اَذَاسن نعْڒم بَاش سَّا اَڒ تْسَاونْت وَار سِّيوِيڒن غَار حَدّ عْلَاحْسَاب يسم ن عِيْسَى بَاش وَار يتنْتَاشَار شَا ؤُسڒْمذ-أَ ذِي شَّعب."18سِيذْفن-ثن-د، ؤُمَرن-ثن نَّان-اَسن وَار سَّاوَاڒث وَار سڒْمَاذث حَدّ عْلَاحْسَاب يسم ن عِيْسَى.19ئِنْدق-د بُطْرُس ذ يُوْحَنَّا نَّان-اَسن: "حكْمث كنِّيو، مَا مْلِيح زَّاث إِ أَربِّـي أَ نْطَاع إِ وَاوَاڒ نّس نِغ إِ وَاوَاڒ نْوم؟20وَار نْزمَّر شَا أَ نجّ خ مِين نࢲْرَا نِغ خ مِين نسْڒَا."21اَرْنِين سِيݣّْوْذن-ثن، ڒخْدّنِّي ضڒْقن-اَسن. وَار ؤُفِين مَامّش ذَاسن غَا ݣّن اَثن عَاقْبن مِينْزِي مَارَّا يوْذَان حمّْذن أَربِّـي خ مِين يوقْعن.22أَرْيَاز-أَ يݣنْفَان س لْمُعْجِيزَا نِّي غَارس كْتَار زِي اَرْبعِين يسݣّْوُوْسَا.23غِير ضڒْقن-اَسن-د إِ بُطْرُس ذ يُوْحَنَّا، رُوْحن غَار يمدُّوْكَاڒ نْسن عَاوْذن-اَسن مَارَّا مِين ذَاسن نَّان اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل.24وَامِي سْڒِين إِ مَانَايَا، تَّارن إِ أَربِّـي ذِي ثْࢲَادْجِيث مَارَّا إِذْسن نَّان-اَس: "يَا مَوْلَانَا ذ شك يخڒْقن اَجنَّا ذ ثْمُوْرْث ذ ڒبْحَر ذ مَارَّا مِين ذَايْسن.25ذ شك إِي ينَّان س أَرُّوْح يقدّْسن س يِيڒس ن جدِّيثْنغ دَاود ڒْعَبْذ نّش وَامِي ينَّا:مَايمِّي ڒݣْنُوْس غضْبن اَطَّاس؟مَايمِّي يوْذَان تْشِيطِينن ذِي ڒْخَاوِي؟26سوْجَاذن يزدْجِيذن ن ثْمُوْرْث يخف نْسن،مُوْنن اَرُّوْيَاس اَك وَايَاوْيَا،بَاش اَذ عَارّْضن إِ سِيذِي أَربِّـي ذ لْمَسِيح نّس.27لِأَنَّ ذ صَّح اَزدْجِيذ هِيرُدُوْس ذ لْحَاكم بُنْطْيُوْس بِيلَاطُس مُوْنن اَك أَيث-إِسْرَائِيل ذ يِنِّي وَار يدْجِين شَا زِي أَيث-إِسْرَائِيل ذِي ثنْدِينْت-أَ. تَافْقن ضد إِ وخدَّام نّش يقدّْسن عِيْسَى إِي ثِيخْضَرذ.28ݣِّين قَاع مِين تُوْغَا ثْزمّْمذ اَذ يوْقع س وفُوْس ذ ڒْخَاضَر نّش.29آ سِيذي، ڒخُّو خْزَر مَامّش ذَانغ تْهدَّاذن، ؤُش-اَنغ إِ نشِّين لْعِبَاد نّش أَ نسِّيوڒ س وَاوَاڒ نّش س زْعَامث.30سَرّح فُوْس نّش بَاش اَذ تسْݣنْفِيذ اَذ تسْبيّْنذ لْمُعْجِزَاث ذ لْبُرْهَانَاث عْلَاحْسَاب يسم ن عِيْسَى اَخدَّام نّش يقدّْسن."31وَامِي كمّْڒن ثْࢲَادْجِيث نِّي ينْهزّ ومْشَان نِّي مَانِي مُوْنن، شُّوْرن نِثْنِي مَارَّا س أَرُّوْح يقدّْسن سَّاوَاڒن س وَاوَاڒ ن أَربِّـي س يِجّن ن زْعَامث.32جْمَاعث نِّي ن ڒْمُوْمِنِين غَارْسن ؤُڒ نْسن ذ ڒَعْقڒ نْسن كِيف-كِيف. ؤُڒَا ذ يجّن زَّايْسن وَار يحسّب مِين غَارس نّس وَاحْذس، شَرّْشن مَارَّا ثِمسْڒَايِين جَارَاسن.33شهّْذن اَرُّسُل س يِجّن ن جّْهذ ذ اَمقّْرَان خ لْقِيَامَا إِي يݣَّا سِيذِيثْنغ عِيْسَى وَامِي يكَّر زِي ڒْموْث. أَربِّـي يݣَّا خَاسن مَارَّا يجّن ن لْبَرَكَا ثمْغَار.34وَار يدْجِي ؤُڒَا ذ يجّن زَّايْسن مَا يحْذَاج. لِأَنَّا يِنِّي إِي غَار يدْجَا ثِمُوْرَا ذ ثُوْذْرِين تْرَاحن زْنُوْزَان-ثنْت تَاوِين-د تْمنْيَاث نِّي،35سْرُوْسَان-ثنت غَار يضَارن ن اَرُّسُل تْفرَّاقنْت-ثنْت عْلَاحْسَاب مْكُڒ يجّن مِين يحْذَاج.36ذِنِّي يجّن قَّارن-اَس يُوْسف، عَاوذ سمَّان-ث اَرُّسُل س بَرْنَابَا يعْنِي <ونِّي يتْشجَّاعن.> نتَّا زِي شُّرْفَا ن اَيث-لَاوِي ذ مِّيس ن ثنْدِينْت ن قُبْرُص.37ئِكَّر يزّنْز يجّن ن ثْمُوْرْث إِي غَارس، يُوْوِي-د تْمنْيَاث نِّي يسرْس-يثنْت غَار يضَارن ن اَرُّسُل.
Wycliffe Bible Translators, Inc.