ارسل3
1ئِجّن ن نْهَار غَار ثْڒَاثَا وعشِّي ذي ڒْوقْث ن ثْࢲَادْجِيث، بُطْرُس ذ يُوْحَنَّا ݣَعّْذن غَار ثمْزِيذَا ثَمقّْرَانْت ن أَيث-إِسْرَائِيل.2ؤُفِين ذِنِّي يجّن ن ورْيَاز ذ اَنشْرُوْف يخْڒق-د اَمنِّي. تَاوِين-ث-يذ يِوْذَان غَار ثوَّارْث ن ثمْزِيذَا ؤُمِي قَّارن <ثَوَّارْث ثَصبْحَانْت>، سْرُوْسَان-ث ذِنِّي مْكُڒ نْهَار اَذ يتَّار غَار ينِّي يتَاذْفن غَار ثمْزِيذَا ثَمقّْرَانْت.3وَامِي يࢲْرَا ونشْرُوْف نِّي بُطْرُس ذ يُوْحَنَّا تَاذْفن غَار ثمْزِيذَا ثَمقّْرَانْت، ئِبْذَا يتتَّار-اَسن صَّذَقَا.4بُطْرُس ذ يُوْحَنَّا خزَّرن ذَايس مْلِيح، ينَّا-ٱس بُطْرُس: "خْزَر-د غَارْنغ!"5ئِخْزَر غَارْسن، ئِتْغِيڒ-اَس اَذَاس ؤُشن شَان ڒْحَاجث.6ئِنْدق-د بُطْرُس ينَّا-ٱس: "نش وَار غَاري نُّقَارْث نِغ ذ دّْهب. وَلَكِن زِي مِين غَارِي نش اَذَاش ث ؤُشغ. ينَّا-ٱس: عْلَاحْسَاب يسم ن عِيْسَى لْمَسِيح زي نَاصِرَا، كَّر ؤُيُوْر!"7يُوْشَا-ٱس فُوْس يطّف-يث زݣ وفُوْس نّس اَفُوْسِي يسْݣَعّذ-يث، ڒخْدّنِّي ثِشْعبِين نّس ذ يضَارن نّس ݣنْفَان.8ئِنخْضف يبدّ خ يضَارن نّس يبْذَا يݣُّوْر. يُوْذف اَكِذْسن غَار ثمْزِيذَا ثَمقّْرَانْت يݣُّوْر ينطّو يحمّذ أَربِّـي.9وَامِي ث ࢲْرِين مَارَّا يوْذَان يݣُّوْر يحمّذ أَربِّـي،10عقْڒن-ث نَّان ذ وَانِيتَا تُوْغَا يتْغِيمَان يتتَّار زَّاث إِ ثمْزِيذَا ثَمقّْرَانْت غَار ثوَّارْث ؤُمِي قَّارن <ثَوَّارْث ثَصبْحَانْت.> قِّيمن تْعجّْبن اَطَّاس، ذهّْشن زِي مِين ذَاس يوقْعن.11أَرْيَاز نِّي يݣنْفَان يطّف ذِي بُطْرُس ذ يُوْحَنَّا. مَارَّا يوْذَان نِّي قِّيمن ذهّْشن، رُوْحن غَارْسن تَازّْڒن غَار ومْشَان ؤُمِي قَّارن <أَسْقِيف ن سُلِيمَان.>12وَامِي ثن يࢲْرَا بُطْرُس ينَّا-ٱسن: "آي يرْيَازن ن أَيث-إِسْرَائِيل، مَايمِّي ثتْعجّْبم خ مَانَايَا؟ مَايمِّي ذَايْنغ تْخزَّرم اَمُّو؟ مَا تْفكَّرم س جّْهذ نّغ نِغ س طَّاعَا نّغ إِي زِي نَارَّا اَرْيَاز-أَ يݣُّوْر؟13لَّا، ذ أَربِّـي ن ڒجْذُوْذ نّغ يعْنِي أَربِّـي ن بْرَاهِيم ذ أَربِّـي ن إِسْحَاق ذ أَربِّـي ن يعْقُوْب. لِأَنَّا ذ نتَّا إِي د يسْبيّْنن لْعَظَمَا نّس ذݣ وخدَّام نّس عِيْسَى. وَلَكِن ذ كنِّيو إي ث يسلّْمن إ لْحُكَّام ثنْكَرم-ث زَّاث إِ بِيلَاطُوْس وَامِي تُوْغَا يرزُّو اَذَاس يضْڒق.14ونِّي يدْجَان عَظِيم ذ صَّالِح ثنْكَرم-ث، ونِّي يدْجَان ذ اَمحْبُوْس ذ لْمُجْرِيم ثتَّارم خَاس إِ بِيلَاطُوْس اَذَاوم د يتْوَاضْڒق.15ثنْغِيم ونِّي يدْجَان ذ لْأَصل ن ثُوْذَارْث، وَلَكِن أَربِّـي يسكَّر-يث-يذ زِي ڒْموْث، نشِّين نشْهذ خَاس.16ذݣ يِيسم ن عِيسى يعْنِي ذ لْإِيمَان س يِيسم نّس، أَقَا اَرْيَاز-أَ إِي تْوَاڒَام إِي ثسّْنم يذْوڒ يجْهذ. س لْإِيمَان نّس ذِي عِيْسَى إِي زِي يݣنْفَا قَاع مَامّش تْوَاڒَام مَارَّا كنِّيو.17ڒخُّو سّْنغ آي أَيثْمَا بلِّي ثݣِّيم مَانَاينِّي إِ عِيْسَى س ڒقْفَاڒث نْوم كنِّيو ذ اَرُّوْيَاس نْوم.18أَمُّو يكمّڒ وَاوَاڒ نّس إِي ينَّا أَربِّـي إِ مَارَّا لْأَنْبِيَا زِي قْبڒ، يعْنِي يتْخصَّا لْمَسِيح نّس اَذ يتْوَاعدّب.19س مَانَايَا تُوْبث، ذوْڒث غَار أَربِّـي حمَا اَذ تْوَاكّْسنْت ڒْمُعْصِيَاث نْوم. حمَا اَذ د تَاس ثْسَعَّات ن لْفَرَج زِي سِيذِي أَربِّـي، أَذ د يسّكّ لْمَسِيح إِي تُوْغَا ذَاوم يتْوَاخْضَرن زِي قْبڒ يعْنِي عِيْسَى.21ئِتْخصَّا نتَّا اَذ يقّيم ذݣ وجنَّا اَڒ ڒْوقْث إِي ذِي غَا يتْوَاعْذڒ كُڒْشِي عْلَاحْسَاب اَوَاڒن ن لْأَنْبِيَا صَّالِحِين إِي ذَاسن ينَّا أَربِّـي ذݣ يِجّن ن زْمَان.22أَقَا ينَّا مُوْسَى: أَذَاوم د يُوْش سِيذِي أَربِّـي نْوم يجّن ن نَّبِي زݣ أَيثْمَاثْوم اَم نش. ئِتْخصَّا اَذ تْصنّْطم إِ مَارَّا مِين ذَاوم غَا يِيني.23قَا مَارَّا ونِّي وَار ذَاس يتْصنِّيطم شَا غَار نَّبِي نِّي اَذ يتْوَاكّس زِي ڒْقُوْم اَذ ينهْذم.24أَقَا نَّبِي صَامْوِيل ذ مَارَّا لْأَنْبِيَا إِي ثِيذ يذْفَارن خبَّارن خ وُوْسَّان-أَ يِيْنَا إِي ذِي ندْجَا.25كنِّيو ذ دُّوْرِّيث ن لْأَنْبِيَا. كنِّيو ذ ثَارْوَا ن ڒْعَهذ نِّي إِݣ يݣَّا أَربِّـي اَك ڒجْذُوْذ نْوم. ينَّا-ٱس أَربِّـي إِ بْرَاهِيم: زِي دُّوْرِّيث نّش إي زِي غَا بَرْكغ مَارَّا ڒݣْنُوْس ن ثْمُوْرْث-أَ.26وَامِي ذَاوم د يُوْشَا أَربِّـي اَخدَّام نّس عِيسَى، ذ اَمزْوَارُو يسّكّ-اَوم-ث-يذ إِ كنِّيو بَاش اَكنِّيو يبَرك، يعْنِي اَذ يسْبعّذ مْكُڒ يجّن زَّايْوم خ شَّرّْ نّس."
Wycliffe Bible Translators, Inc.