ارسل17
1عْذُوْن خ ثنْدِينْت ن ومْفِيپُـوْلِيس ذ ثنْدِينْت ن وپُـوْلُوْنْيَا، ؤُوْضن غَار ثنْدِينْت ن سَالُوْنِيك مَانِي ثدْجَا ذِنِّي يجّن ن ثمْزِيذَا ن أَيث-إِسْرَائِيل.2يُوْذف بُوْلُس غَار ثمْزِيذَا نِّي مَامّش يتݣّ ڒبْدَا. ثْڒَاثَا ن سِيمَانَاث كُڒ نْهَار ن سّبْث ن لْعِبَادَا يتمْنَاقَاش اَكِذْسن يقَّار-اَسن مِين يُوْرِين ذِي لْكُتُب.3ئِسفْهَام-يثن يسْبيَّان-اَسن دَّلِيل خ مَامّش أُو لَابُد لْمَسِيح اَذ يتْوَاعدّب اَذ د يكَّر زِي ڒْموْث. ينَّا-ٱسن قَا عِيْسَى-يَا إِي زِي كنِّيو تْبشَّارغ نتَّا س يِيخف نّس ذ لْمَسِيح.4قْتَانْعن ڒبْعَاض زَّايْسن مُوْنن اَك بُوْلُس ذ سِيلَاس. أَكِذْسن خَربِّي ن ييُوْنَانِيْين إِي يتݣّْوْذن أَربِّـي. أَكِذْسن عَاوذ اَطَّاس ن ثمْغَارِين زِي ثِنِّي إِي غَار ثدْجَا لْمَرْتَبَا.5وَلَكِن يسْرَائِيلِيْين نّغْنِي حسْذن-ثن، رُوْحن سْمُوْنن-د زِي سُّوْق يجّن ن لْمجْمُوْع ن يكْرُوْشَّارن يعفَّانن بَاش اَذ ݣّن سّْدَع، سْنكَّرن ڒْفَوْضَا ذِي ثنْدِينْت. هجْمن خ ثدَّارْث ن يِجّن قَّارن-اَس يَاسِين رزُّوْن خ بُوْلُس ذ سِيلَاس حمَا اَثن سلّْمن إِ ڒْغَاشِي.6وَامِي وَار ثن ؤُفِين شَا، جَرّن يَاسِين ذ ڒبْعَاض ن اَيثْمَاثْنغ غَار لْحُكَّام ن ثنْدِينْت. سْنكَّرن ثْغُوْيّث قَّارن: "يرْيَازن نِّي إِي ݣِّين لْفِتْنَا ذِي مَارَّا دُّنشْت، ڒخُّو اَقَاثن ذَا7ذ ينوْجِيون غَار يَاسِين وَانِيتَا. مَارَّا يِـيْنَا عصَّان ڒْقَانُوْن ن لْمَلِك قَيْصَر قَّارن قَا ذِنِّي يجّن ن وزدْجِيذ نّغْنِي قَّارن-اَس عِيْسَى."8وَامِي شَّعْب ذ لْحُكَّام ن ثنْدِينْت سْڒِين إِ مَانَايَا، ئِكَّر يجّن ن سّْدَع ذ اَمقّْرَان.9سّنِّي طّْفن لْكَفَالَا زِي يَاسِين ذ ينّغْنِي، ضڒْقن-اَسن.10سّنِّي س دْجِيڒث نِّي اَيثْمَاثْنغ سّكّن بُوْلُس ذ سِيلَاس غَار ثنْدِينْت ؤُمِي قَّارن بِيرْيَا. وَامِي ؤُوْضن، ؤُذْفن غَار ثمْزِيذَا ن أَيث-إِسْرَائِيل.11أَيث-بِيرْيَا نِثْنِي حْسن زݣ اَيث-سَالُوْنِيك، قبّْڒن اَوَاڒ ن أَربِّـي ذغْيَا س ڒفْرَاحث. قَّارن ذِي لْكُتُب كُڒ نْهَار بَاش اَذ سّْنن اَوَاڒ نِّي إِي قَّارن بُوْلُس ذ سِيلَاس مَا ذ صَّح نِغ لَّا.12ؤُمْنن اَطَّاس زَّايْسن. ؤُمْننْت خَربِّي ن ثمْغَارِين ثِيُوْنَانِيِين غَارْسنْت لْمَرْتَبَا، ؤُمْنن عَاوذ اَطَّاس ن ييُوْنَانِيْين.13ئِسْرَائِيلِيْين نِّي ذِي ثنْدِينْت ن سَالُوْنِيك اَرِّين-د ڒخْبَار بُوْلُس يتْبشَّار س وَاوَاڒ ن أَربِّـي ذِي ثنْدِينْت ن بِيرْيَا. ؤُسِين-د غَار بِيرْيَا بْذَان تݣّن يخَارْوِيضن سْهَاجن خَاس ڒْغَاشِي.14ڒخْدّنِّي اَيثْمَاثْنغ سّكّن بُوْلُس غَار ڒبْحَر، ئِقِّيم سِيلَاس ذ تِيْمُوْتَاوُس ذِي ثنْدِينْت ن بِيرْيَا.15يرْيَازن نِّي إِي رُوْحن اَك بُوْلُس سِّيوْضن-ث غَار ثنْدِينْت ن ؤُتِينَا سّنِّي ذوْڒن-د. ئِوصَّا-ثن بُوْلُس ينَّا-ٱسن: إِنِيم-اَسن إِ سِيلَاس ذ تِيْمُوْتَاوُس اَرَاحم-د غَارِي ذغْيَا.16بُوْلُس وَامِي تُوْغَا يتْرَاجَا سِيَلَاس ذ تِيْمُوْتَاوُس ذِي ثنْدِينْت نِّي ن ؤُتِينَا يتْوَاڒَا ثَنْدِينْت نِّي ثْعمَّر س لْأَصْنَامَاث وَار ذَاس يعْجِيب بُو ڒْحَاڒ.17ئِتمْنَاقَاش ذِي ثمْزِيذَا اَك يسْرَائِيلِيْين ذ ينّغْنِي يتݣّْوْذن أَربِّـي، ئِتمْنَاقَاش عَاوذ اَك يِنِّي إِي كذ يتمْسڒْقَا كُڒ نْهَار ذِي سَّاحَا ن ثنْدِينْت.18شَان لْفَلَسِفَا ؤُمِي قَّارن يبِيكُوْرِيْين ذ شَان لْفَلَسِفَا نّغْنِي ؤُمِي قَّارن يرِيوَاقِيْين بْذَان تمْنَاقَاشن اَك بُوْلُس نَّان ڒبْعَاض زَّايْسن، مِين يخس اَذ يِينِي وَانِيتَا يتْـپـڒْپِـيڒن وَاهَا؟ نَّان يِوْذَان نّغْنِي يمْكن يتْبشَّار س أَربِّـيثن ن دُّوَل. نَّان مَانَايَا مِينْزِي بُوْلُس يتْبشَّار س عِيْسَى ذ لْقِيَامَا.19ؤُوِين بُوْلُس ندْهن-ث غَار لْمَجْلِس نْسن ؤُمِي قَّارن أَرْيُوْبَاݣُوْس نَّان-اَس: "نْرزُّو أَ نسّن تَّعْلِيم-أَ ن جْذِيذ إِي زِي ثْسڒْمَاذذ شك.20ثِمسْڒَايِين-أَ نتْعجّب ذَايْسنْت، عمَّارص وَار نسْڒِي خ مِين ثقَّارذ شك. نخْس أَ نسّن ڒْمَعْنَا نْسنْت."21(إِيوَا مَارَّا يمزْذَاغ ن ؤُتِينَا نِغ ذ ڒْبَارَّانِي إِي ذَايس يزذْغن سْعدُّوْن مَارَّا ڒْوقْث نْسن ذݣ وَاوَاڒ نِغ ذݣ وصنّط ن شَان ڒْحَاجث ذ جْذِيذ.)22ڒخْدّنِّي يبدّ بُوْلُس ذِي ڒْوسْط ن لْمَجْلِس ينَّا-ٱسن: "آي يرْيَازن ن ؤُتِينَا، نش تْوَاڒِيغ كنِّيو ثْشغْڒم اَطَّاس ذِي دِّين.23أَخْمِي تْسَارِيغ نش، خزَّرغ مْلِيح ذِي زَّاوْيَاث نْوم مَانِي ثْعبّْذم. ࢲْرِيغ ذِنِّي يجّن ن ڒْمذْبَح ؤُرِينْت ذَايس ثِيْرَا، ثِيْرَا نِّي قَّارنْت: أَربِّـي نِّي إي وَار يتْوَاسّْنن شَا. شُوْف، أَربِّـي نِّي إِي ثْعبّْذم كنِّيو وَار ث ثسِّينم شَا، أَذَاوم ينِيغ نش مِين يعْنَا.24ئِخْڒق-د دُّنشْت-أَ ذ مَارَّا مِين ذَايس، نتَّا ذ سِيذِي أَربِّـي ن وجنَّا ذ ثْمُوْرْث. وَار يزدّغ شَا ذِي زَّاوْيَاث نِّي إِݣ بنَّان يِوْذَان س يفَاسّن نْسن.25وَار خَاس تْسخِّيرن شَا يفَاسّن ن بْنَاذم، نتَّا وَار يتحْذِيجِي وَالُو. ذ نتَّا إِي د يتِيشّن إِ مَارَّا يوْذَان ثُوْذَارْث ذ بُوْحْبڒ ذ مَارَّا ثِمسْڒَايِين نّغْنِي.26زݣ يِجّن ن بْنَاذم إِي زِي د يخْڒق مَارَّا ڒݣْنُوْس بَاش اَذ زذْغن ذِي دُّنشْت-أَ اَمن-ثكْمَاڒ. ئِحدّ-اَسن نْهُوْرَاث ن تَّارِيخ نْسن ذ مَانِي إِي غَا زذْغن.27يݣَّا-ٱسن اَمُّو أَربِّـي حمَا يوْذَان اَخَاس رْزُوْن اَغَارس سْوِيزّْذن س يفَاسّن نْسن اَث اَفن. إِنَّمَا، نتَّا كُڒ يجّن زَّايْنغ وَار خَاس يݣّْوِيج شَا.28زَّايس نتَّا إِي ندَّر، زَّايس نتَّا إِي نْتنْهزَّا، زَّايس نتَّا إِي ندْجَا. مَامّش نَّان ؤُڒَا ذ ڒبْعَاض ن شُّعَرَاء نْوم قَا نشِّين ذ ثَارْوَا نّس.29شُوْف، نشِّين مڒَا ذ ثَارْوَا ن أَربِّـي، ئِتْخصَّا-يَانغ وَار نتْفكِّير شَا بلِّي ونِّي يُوْعْڒَان قَا نتَّا اَم دّْهب نِغ اَم نُّقَارْث نِغ اَم وزْرُو. أَربِّـي وَار يدْجِي شَا ذ لْأَصْنَام إِݣ يتْصنَّاع بْنَاذم س لْفِكْرَا نّس ذ ثْزمَّار نّس.30مَانَايَا أَربِّـي وَار ت يُوْوِي شَا ذِي زْمَان ن ڒقْفَاڒث، وَلَكِن ڒخُّو يُوْمَر مَارَّا يوْذَان ذِي مْكُڒ اَمْشَان بَاش اَذ تُوْبن.31مَايمِّي؟ أَربِّـي يزمّم يجّن ن نْهَار إِي ذِي غَا يحَاسب مَارَّا يوْذَان س ڒْحَقّ خ وفُوْس ن بْنَاذم نِّي إِݣ يخْضَر. يُوْشَا-ٱسن دَّلِيل إِ مَارَّا يوْذَان خ مَانَايَا وَامِي ثِيذ يسكَّر زِي ڒْموْث."32يِيْنَا وَامِي تسْڒَان خ يِوْذَان اَذ د كَّرن زِي ڒْموْث ذِي لْقِيَامَا ضحْشن ڒبْعَاض خَاسن، وَلَكِن ڒبْعَاض نّغْنِي نَّان-اَس قَا نشِّين نخْس اَذَاش نْصنّط ثْوَاڒَا نّغْنِي خ مَانَايَا.33سّنِّي يفّغ بُوُلُس زِي ڒْوسْط نْسن.34ڒبْعَاض زَّايْسن ؤُمْنن مُوْنن اَك بُوْلُس. زَّايْسن دِيُوْنِيسْيُوْس زِي لْمَجْلِس ن أَرْيُوْبَاݣُوْس ذ يِجّن ن ثمْغَارْث قَّارن-اَس دَامَارِيس ذ ينّغْنِي اَكِذْسن.
Wycliffe Bible Translators, Inc.