ارسل16
1يُوْوض بُوْلُس غَار ثنْدِينْت ن دِرْبَا ذ ثنْدِينْت ن لِيْسْتْرَا، يُوْفَا ذِنِّي يجّن ن ومحْضَار قَّارن-اَس تِيْمُوْتَاوُس. يمَّاس نتَّاث ذ ثَئِسْرَائِيلِيث ذ ڒْمُوْمْنَا، بَابَاس ذ اَيُوْنَانِي.2أَيثْمَاثْنغ إِي يدْجَان ذِي ثنْدِينْت ن إِكُوْنْيَا ذ لِيسْتْرَا سِّيوْڒن مْلِيح خ تِيْمُوْتَاوُس.3يݣَّا-ٱس طَّهَارث بُوْلُس وَامِي يخس اَث يَاوِي اَكِذس. يݣَّا-ٱس اَمنِّي عْلَاحْسَاب يسْرَائِيلِيْين يدْجَان ذݣ يمُوْشَان نِّي نِثْنِي مَارَّا سّْنن بلِّي بَابَاس ذ اَيُوْنَانِي.4خْمِي يݣُّوْر بُوْلُس ذ يمدُّوْكَاڒ نّس زݣ وبِيلَاج غَار وبِيلَاج يقَّار-اَسن ڒُوْصِيَاث نِّي ثِنِّي إِي ݣِّين اَرُّسُل ذ يمقّْرَانن ن جْمَاعث ن ڒْمُوْمِنِين ذِي لْقُدْس حمَا ٱثنْت ذْفَارن يِوْذَان.5أَمنِّي ثِجُمَاع ن ڒْمُوْمِنِين تجْهِيذنْت ذِي لْإِيمَان، كُڒ نْهَار يَرنِّي لْعَدَد نْسنْت.6بُوْلُس ذ يمدُّوْكَاڒ نّس كِّين خ جْوَايه ن فْرِيْجْيَا ذ ݣَالَاطْيَا، وَار ثن يجِّي شَا أَرُّوْح يقدّْسن ٱذ بشَّرن س وَاوَاڒ ن أَربِّـي ذِي لْإِقْلِيم ن آسْيَا.7وَامِي ؤُوْضن غَار لْحُدُوْد ن مِيْسْيَا، قدْجْبن اَذ اَذْفن لْإِقْلِيم ن بِيثِينْيَا وَلَكِن وَار ثن يجِّي شَا اَرُّوْح ن عِيْسَى.8س مَانَايَا سمْحن ذِي مِيسْيَا هْوَان غَار ثنْدِينْت ن تْرَاوْس.9ذِي دْجِيڒث نِّي يهْوَا-د يجّن ن لْوَاحِي خ بُوْلُس يࢲْرَا ذَايس يجّن ن وثَرَّاس زِي لْإِقْلِيم ن مَاسِدُوْنْيَا يبدّ يتْطَلَاب-يث يقَّار-اَس زْوَا-د غَارْنغ غَار مَاسِدُوْنْيَا عَاوْن-اَنغ.10وَامِي صَافِي يࢲْرَا لْوَاحِي نِّي بُوْلُس، نكَّر نشِّين نْسوْجذ حمَا أَ نْسَفر ڒخْدّنِّي غَار لْإِقْلِيم ن مَاسِدُوْنْيَا. نفْهم بلِّي أَربِّـي يتْڒَاغَا-د خَانغ اَثن نْبشَّر س لْإِنْجِيل ذِنِّي.11سّنِّي نْسَفر ذݣ وغَرَّابُو زِي ثنْدِينْت ن تْرَاوْس، نْرُوْح نِيشَان غَار ثنْدِينْت ن سَامُوْتْرَاكْيَا. ثِيوشَّا نّس نْرُوْح غَار ثنْدِينْت ن نِيَاپُـوْلِيس.12سّنِّي نْرُوْح غَار فِيلِيپِّـي، نتَّاث ذ يجّن ن ثنْدِينْت ثُوْسَا-د ذِي لْوِلَايَا ثَمزْوَارُوْت ن لْإِقْلِيم ن مَاسِدُوْنْيَا، سْتَعْمَارن-تث يرُوْمَانِيْين. نقِّيم ذِنِّي ذِي ثنْدِينْت نِّي ڒبْعَاض ن وُوْسَّان.13ذِي نْهَار ن سّبْث ن لْعِبَادَا نفّغ زِي ثوَّارْث ن ثنْدِينْت نْرُوْح غَار طَّارف ن يِغْزَار، تْغِيڒ-اَنغ أَ نَاف ذِنِّي يجّن ن ومْشَان ن ثْࢲَادْجِيث. نقِّيم نسَّاوَاڒ اَك ثمْغَارِين نِّي إِي نُوْفَا ذِنِّي يمُوْنن.14أَكِذْسنْت ذِنِّي يجّن ن ثمْغَارْث ثسْڒَا-يَانغ قَّارن-اَس لِيدْيَا. نتَّاث زِي ثنْدِينْت ن ثِيَاتْرَا ثزْنُوْزَا ثْشُوْقّت نِّي إِي يغْڒَان لُّوْن نّس ذ لِّيلَا، ثْعبّذ أَربِّـي. يرْزم-اَس سِيذِي أَربِّـي ؤُڒ نّس بَاش اَذ تْصنّط إِ وَاوَاڒ ن بُوْلُس.15وَامِي ثتْوَاطهَّار س وَامَان نتَّاث ذ ڒحْبَاب نّس، ثتَّار زَّايْنغ ثنَّا-ٱنغ: "أَرَاحم-د غَار ثدَّارْث ينُو قِّيمم اَكِذِي يعْنِي مڒَا ثْتيّْقم بلِّي نش ؤُمْنغ زِي سِيذِي أَربِّـي." ثْحشّم-اَنغ نتَّاث اَڒ وَامِي نقْبڒ.16ئِجّن ن نْهَار وَامِي نْرُوْح غَار ومْشَان نِّي مَانِي تْࢲَادْجَان يِوْذَان، ثْمڒْقَا ٱكِذْنغ يجّن ن ثِيسْمغْث نتَّات ذ ثَكهَّانْت تَاوِي-د س سِّحر نّس اَطَّاس ن تْمنْيَاث إِ اَيثْبَاب نّس.17تْبَاع-اَنغ-د نشِّين ذ بُوْلُس تْعيَّاض ثقَّار قَا يرْيَازن-أَ عبّْذن أَربِّـي يُوْعْڒَان، تْبشَّارن-كنِّيو س وبْرِيذ إِي زِي غَا ثْنجْمم!18ثݣَّا مَانَاينِّي اَطَّاس ن نْهُوْرَاث، بُوْلُس وَار ذَاس يعْجِيب بُو ڒْحَاڒ. ئِنقْڒب-د غَارس ينَّا-ٱس إِ جّنّ نِّي إِي ذَايس: "نش تَامَرغ-شك عْلَاحْسَاب يسم ن عِيْسَى لْمَسِيح اَزَّايس ثفّْغذ." ڒخْدّنِّي يفّغ جّنّ نِّي زَّايس ذݣ ومْشَان.19أَيثْبَاب ن ثِيسْمغْث نِّي وَامِي ؤُفِين ثَوَّارْث ن لْمَنْدَا نْسن صَافِي ثْبلّْع خَاسن، كَّرن طّْفن بُوْلُس ذ سِيلَاس جَرّن-ثن غَار سَّاحَا غَار لْحُكَّام.20قدّْمن-ثن غَار لْحُكَّام نَّان-اَسن: "يرْيَازن-أَ ذ يسْرَائِيلِيْين تݣّن-اَنغ ڒْفَوْضَا ذِي ثنْدِينْت.21سڒْمَاذن لْعَادَاث وَار نْزمَّر شَا اَثنْت نقْبڒ نِغ اَزَّايْسنْت نخْذم مِنْزِي نشِّين ذ يرُوْمَانِيْين."22ڒخْدّنِّي مُوْنن ڒْغَاشِي هجْمن خ بُوْلُس ذ سِيلَاس، لْحُكَّام نِّي شرّْݣن-اَسن اَرُّوْض ؤُمَرن خَاسن بَاش اَذَاسن ؤُشن اَعْمُوْذ.23ؤُوْثِين-ثن اَطَّاس س وعْمُوْذ نْضَرن-ثن ذِي ڒحْبس. نَّان-اَس إِ لْحَارِس ن ڒحْبس عسّ خَاسن مْلِيح.24وَامِي يسْڒَا نتَّا اَوَاڒ-أَ، ئِرُوْح يݣِّي-ثن غَار ذَاخڒ قَاع ن ڒحْبس يقّن-يثن زݣ يضَارن نْسن غَار يكشُّوْضن يذقْڒن.25غَار ڒْوسْط ن دْجِيڒث بُوْلُس ذ سِيلَاس تْࢲَادْجَان تْغنَّاجن يزْڒَان إِ أَربِّـي، تسْڒَان-اَسن يمحْبَاس.26عْلَاغَفْلَا يوْقع يجّن ن زِّنْزَال ذ اَمقّْرَان اَڒ وَامِي نْهزّن ؤُڒَا ذ دْسَاسَاث ن ڒحْبس. نُوْرْزْمنْت ثوُّوْرَا نّس مَارَّا، عَاوذ نُوْفْسْڒنْت-اَسن سْنَاسڒ إِ يمحْبَاس مَارَّا.27وَامِي د يفَاق لْحَارِس ن ڒحْبس زݣ يِضص يُوْفَا ثِوُّوْرَا ن ڒحْبس نُوْرْزْمنْت تْغِيڒ-اَس يمحْبَاس نِّي اَروْڒن، ئِجْبذ-د سِّيف حمَا ٱذ ينغ يخف نّس.28ئِڒَاغَا-يَاس-د بُوْلُس س جّْهذ ينَّا-ٱس: "لَّا! غَارك اَذ تْضَرّذ يخف نّش، قَا نشِّين عَاذ اَقَانغ ذَا مَارَّا إِذْنغ!"29ينَّا لْحَارِس ن ڒحْبس شعّْڒم ڒفْنَارَاث. ئِرُوْح يتَازّڒ غَار بُوْلُس ذ سِيلَاس يسجّذ-اَسن غَار يضَارن نْسن يبْذَا يترْجِيجِي.30ئِسُوْفغ-يثن-د ينَّا-ٱسن: "آ سِيَاذِي، مِين غَا ݣّغ بَاش اَذ نجْمغ؟"31نَّان-اَس: "أَمن زِي سِيذِيثْنغ عِيْسَى اَذ تْنجْمذ شك ذ ڒحْبَاب نّش."32بْذَان تْبشَّرن-ث نتَّا ذ مَارَّا ڒحْبَاب نّس س وَاوَاڒ ن سِيذِيثْنغ.33ذِي ثْسَعَّات نِّي س دْجِيڒث، يُوْوِي-ثن لْحَارِس ن ڒحْبس يمْسح-اَسن يجَارِّيحن. ڒخْدّنِّي يتْوَاطهَّار س وَامَان نتَّا ذ مَارَّا ڒحْبَاب نّس.34يُوْوِي-ثن غَار ثدَّارْث نّس يُوْشَا-اَسن اَذ شّن. ئِفَرح نتَّا ذ مَارَّا ڒحْبَاب نّس مِينْزِي ؤُمْنن زِي أَربِّـي.35وَامِي د يصْبح ڒْحَاڒ، لْحُكَّام سّكّن يمْخَازْنِيْين غَار لْحَارِس ن ڒحْبس نَّان-اَس: ضْڒق-اَسن إِ يرْيَازن-أَ!36لْحَارِس يخبَّر بُوْلُس ينَّا-ٱس قَا ؤُمَرن-كنِّيو لْحُكَّام اَذ تْوَاضڒْقم. صَافِي فّْغث، رُوْحث ذِي ڒهْنَا!37ينَّا-ٱسن بُوْلُس إِ يمْخَازْنِيْين نِّي: "ؤُوْثِين-اَنغ زَّاث إِ يِوْذَان بْڒَا ڒْقَانُوْن نْضَرن-اَنغ ذِي ڒحْبس، وَلَكِن نشِّين غَارْنغ لْجِنْسِيَا ن رُوْمَا. ڒخُّو نِثْنِي، مَا رزُّوْن اَذَانغ سُوْفْغن وَار د يتَارِّي حَدّ ڒخْبَار؟" ينَّا-ٱسن: "لَّا، ئِتْخصَّا ٱذ د اَسن لْحُكَّام نِّي س يِيخف نْسن اَذَانغ سُوْفْغن!"38ئِمْخَازْنِيْين نِّي رُوْحن عَاوْذن-اَسن اَوَاڒ-أَ إِ لْحُكَّام، لْحُكَّام نِّي نْخڒْعن وَامِي سّْنن بلِّي بُوْلُس ذ سِيلَاس ذ يرُوْمَانِيْين.39ؤُسِين-د غَارْسن تتَّارن زَّايْسن اَذَاسن سَامْحن، سُوْفْغن-ثن زِي ڒحْبس تَّارن زَّايْسن اَذ فّْغن زِي ثنْدِينْت.40وَامِي فّْغن زِي ڒحْبس رُوْحن غَار ثدَّارْث ن لِيْدْيَا. ࢲْرين ذِنِّي اَيثْمَاثْسن شجّْعن-ثن، سّنِّي ؤُيُوْرن.
Wycliffe Bible Translators, Inc.