1 أَيث-كورينث8
1فَا لْمَكْلَا يتْقدَّامن إِ لْأَصْنَام. نشِّين مَارَّا إِذْنغ غَارْنغ ثُوْسْنَا، يعْنِي نسّن ثِمسْڒَايِين. ثُوْسْنَا-يَا إِي نسّن تْسُوْفَّا يوْذَان س تَّكبُّر، وَلَكِن ڒمْحِبّث تَرْنِي ذَايْنغ جّْهذ.2ئِجّن مڒَا يتْغِير-اَس يسّن، لَّا وَار يسِّين شَا. عَاذ يتْخصَّا-يَاس اَذ يسّن.3وَلَكِن ونِّي يتْحِبَّان أَربِّـي، أَتَاف أَربِّـي يسّن-يث نتَّا.4أَمَّا لْمَكْلَا يتْقدَّامن إِ لْأَصْنَام، نسّن لْأَصْنَام دْجَان ذِي دُّنشْت-أَ وَلَكِن ذ يخَرِّيقن وَاهَا. نسّن نشِّين يجّن ن أَربِّـي إِݣ يدْجَان، وَاحْذس.5وَاخَّا زَعْمَا قَّارن بلِّي ذِنِّي أَربِّـيثن ذݣ وجنَّا ذ ثْمُوْرْث، يعْنِي غَارْسن أَربِّـيثن نْسن مُجُوْدِين ذ سِّيَاذِيثْسن مُجُوْدِين.6وَلَكِن نشِّين غَارْنغ يجّن ن أَربِّـي وَاحْذس، نتَّا ذ بَابَاثْنغ. زَّايس نتَّا دْجَانْت مَارَّا ثِمسْڒَايِين، نشِّين ندْجَا إِ نتَّا. عَاوذ غَارْنغ يجّن ن سِيذِيثْنغ، يعْنِي عِيْسَى لْمَسِيح. زِي نتَّا مِيزِي خڒْقنْت مَارَّا ثِمسْڒَايِين، زَّايس مِيزِي نخْڒق نشِّين.7وَلَكِن مَاشِي يوْذَان قَاع سّْنن مَانَايَا. ڒبْعَاض ن يِوْذَان تُوْغَا غَارْسن لْأَصْنَام ذ دِّين نْسن يجْهذ. مڒَا تتّن لْمَكْلَا-يَا يتْقدَّامن إِ لْأَصْنَام اَتَاف يتْغِير-اَسن مَانَايَا ذ صَّح، ضَّمِير نْسن يضعْفن اَتَاف اَذ يخْنز.8إِيوَا مَاشِي ذ لْمَكْلَا إِي ذَانغ غَا يسْقَارّْبن غَار أَربِّـي؛ لَّا، وَار ذَانغ ينفّع شَا مڒَا نشَّا نِغ وَار نشِّي شَا.9وَلَكِن حْضَام يخف نْوم ذِي لْحُرِّيَا-يَا نْوم ثَانِيتَا بَاش وَار ثْغطّْڒم شَا يِنِّي يضعْفن ذِي لْإِيمَان نْسن اَذ وْضَان.10شُوْف، ونِّي ؤُمِي غَار يدْجَا لْإِيمَان يضْعف. مَعْلِيك يࢲْرِي-ش شك غَارك ثُوْسْنَا زَعْمَا تتّذ ذݣ يِجّن ن زَّاوْيِث ن لْأَصْنَام، إِڒِي ثْشجّْعذ-ث شك حمَا ؤُڒَا ذ نتَّا اَذ يشّ لْمَكْلَا يتْقدَّامن إِ لْأَصْنَام، نِغ لَّا؟11أُو س ثُوْسْنَا-يَا نّش زَعْمَا اَذ تْدمَّرذ ؤُمَاثْنغ وَانِيتَا يضعْفن إِي خف يمُّوْث لْمَسِيح.12خْمِي ثْعصِّيم اَيثْمَاثْوم تْضَرَّام ضَّمِير نْسن يضعْفن، أَتَاف ذ لْمَسِيح إِي ثْعصَّام.13خ مَانَايَا مڒَا لْمَكْلَا ينُو ثْغطّڒ ؤُمَا ذِي ڒْمُعْصِيّث، أَتَاف عمَّارْص اَذ شّغ اَيْسُوْم عَاوذ حمَا وَار غطّْڒغ شَا ؤُمَا.
Wycliffe Bible Translators, Inc.