Leia 𐴎𐴝𐴇𐴠𐴥𐴌𐴞 21

𐴎𐴝𐴇𐴠𐴥𐴌𐴞21

𐴕𐴡𐴘𐴝 𐴀𐴝𐴏𐴔𐴝𐴕 𐴀𐴠𐴊𐴧𐴠 𐴕𐴡𐴘𐴝 𐴎𐴡𐴁𐴞𐴕

¹𐴁𐴝𐴦𐴊𐴠 𐴀𐴝𐴀𐴛 𐴀𐴠𐴑𐴧𐴝𐴥𐴕 𐴕𐴡𐴘𐴝 𐴀𐴝𐴏𐴔𐴝𐴕 𐴀𐴠𐴊𐴧𐴠 𐴀𐴠𐴑𐴧𐴝𐴥𐴕 𐴕𐴡𐴘𐴝 𐴎𐴡𐴁𐴞𐴕 𐴊𐴠𐴙𐴑𐴧𐴞𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴡𐴀𐴘𐴓𐴝𐴌 𐴀𐴝𐴏𐴔𐴝𐴕 𐴀𐴠𐴊𐴧𐴠 𐴉𐴡𐴀𐴘𐴓𐴝𐴌 𐴎𐴡𐴁𐴞𐴕 𐴃𐴡 𐴐𐴠𐴥𐴐𐴢 𐴀𐴡𐴥𐴘𐴒𐴞𐴘𐴡𐴘, 𐴇𐴡𐴕𐴡𐴤 𐴊𐴡𐴙𐴅𐴧𐴝 𐴘𐴡𐴥 𐴀𐴝𐴌 𐴕𐴝𐴥𐴘.²𐴃𐴝𐴌𐴉𐴡𐴌𐴠 𐴀𐴝𐴀𐴛 𐴊𐴠𐴙𐴑𐴧𐴞𐴥 𐴊𐴠, 𐴂𐴝𐴑 𐴐𐴡𐴥𐴀𐴌 𐴒𐴝𐴥𐴕, 𐴘𐴝𐴥𐴕𐴞 𐴕𐴡𐴘𐴝 𐴅𐴠𐴌𐴟𐴥𐴏𐴝𐴓𐴠𐴔 𐴔𐴝𐴥𐴕 𐴀𐴝𐴏𐴔𐴝𐴕𐴡𐴃𐴧𐴟 𐴀𐴝𐴓𐴧𐴝𐴌 𐴇𐴝𐴣𐴏𐴡𐴥𐴃𐴧𐴟 𐴓𐴝𐴔𐴞 𐴀𐴝𐴘𐴧𐴠𐴤𐴌; 𐴇𐴞𐴥𐴘𐴝𐴕𐴡𐴌𐴠 𐴊𐴟𐴓𐴞𐴥𐴌𐴠 𐴊𐴟𐴓𐴝𐴤 𐴓𐴧𐴝 𐴇𐴝𐴥𐴣𐴎𐴝 𐴉𐴝𐴥𐴚𐴒𐴡𐴌𐴞 𐴇𐴝𐴥𐴣𐴎𐴝 𐴒𐴞𐴥𐴘𐴠.³𐴁𐴝𐴦𐴊𐴠 𐴀𐴝𐴀𐴛 𐴃𐴡𐴑𐴃𐴡𐴥 𐴒𐴝𐴥𐴕𐴡𐴃𐴧𐴟 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴞, 𐴀𐴠𐴀𐴕 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴝𐴓𐴧𐴝 𐴃𐴝𐴥𐴑𐴞𐴁𐴝𐴌 𐴎𐴝𐴒𐴝 𐴘𐴝𐴓𐴝 𐴀𐴞𐴕𐴏𐴝𐴥𐴕𐴡𐴌 𐴁𐴟𐴥𐴃𐴡𐴌𐴠. 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴁𐴡, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴁𐴡𐴕𐴊𐴝 𐴀𐴡𐴥𐴘𐴁𐴡. 𐴀𐴝𐴓𐴧𐴝 𐴕𐴞𐴎𐴠 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴡𐴥𐴘𐴁𐴡 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴀𐴝𐴓𐴧𐴝 𐴀𐴡𐴥𐴘𐴁𐴡.⁴𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴏𐴟𐴑𐴡𐴃𐴧𐴟 𐴇𐴝𐴥𐴀𐴌 𐴏𐴟𐴑𐴡𐴌 𐴉𐴝𐴕𐴞𐴥 𐴉𐴟𐴣𐴏𐴞𐴥𐴊𐴞𐴁𐴡; 𐴇𐴡𐴕𐴡𐴤 𐴔𐴡𐴦𐴃𐴢 𐴀𐴝𐴌 𐴕𐴡 𐴃𐴝𐴥𐴑𐴞𐴁𐴡; 𐴇𐴡𐴕𐴡𐴤 𐴉𐴠𐴌𐴠𐴐𐴝𐴕𐴞, 𐴈𐴝𐴣𐴊𐴝𐴕𐴞, 𐴘𐴝𐴥 𐴊𐴟𐴑 𐴀𐴡𐴥 𐴀𐴝𐴌 𐴕𐴡 𐴃𐴝𐴥𐴑𐴞𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴒𐴡𐴌 𐴒𐴟𐴥𐴕 𐴃𐴡 𐴉𐴟𐴥𐴌𐴝𐴘𐴒𐴞𐴘𐴡𐴘.“

⁵𐴃𐴡𐴑𐴃𐴡𐴥 𐴒𐴝𐴥𐴕𐴡𐴃𐴢 𐴁𐴡𐴘𐴍𐴝𐴤 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴏𐴝𐴀, 𐴀𐴝𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴕𐴡𐴘𐴝 𐴒𐴡𐴌𐴞𐴥𐴉𐴠𐴓𐴝𐴙𐴌.“ 𐴀𐴞𐴥𐴁𐴝𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴞𐴀𐴕 𐴓𐴠𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴡𐴃𐴝𐴤 𐴀𐴞𐴀𐴕 𐴁𐴞𐴐𐴧𐴝𐴥𐴐𐴊𐴝𐴌 𐴀𐴠𐴊𐴧𐴠 𐴏𐴡𐴥𐴘𐴧𐴞.“

⁶𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴈𐴡𐴀𐴌 𐴊𐴠, ”𐴘𐴝𐴓𐴝 𐴉𐴟𐴥𐴌𐴝𐴘𐴧𐴠. 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴓𐴉𐴝 𐴀𐴠𐴊𐴧𐴠 𐴀𐴡𐴔𐴞𐴥𐴒𐴝, 𐴘𐴝𐴥𐴕𐴞 𐴀𐴝𐴖𐴝𐴓𐴢 𐴀𐴠𐴊𐴧𐴠 𐴀𐴝𐴑𐴠𐴥𐴌. 𐴎𐴠𐴃𐴝𐴌𐴝𐴤 𐴃𐴞𐴌𐴝𐴥𐴐𐴞 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴌𐴠 𐴀𐴝𐴀𐴛 𐴎𐴞𐴕𐴊𐴞𐴒𐴞 𐴊𐴠𐴦 𐴊𐴠 𐴉𐴝𐴕𐴞𐴥𐴌 𐴎𐴡𐴥𐴕𐴧𐴝𐴃𐴧𐴟 𐴉𐴝𐴕𐴞𐴥 𐴊𐴞𐴦𐴘𐴟𐴔, 𐴀𐴠𐴁𐴧𐴠 𐴔𐴝𐴦𐴕𐴝.⁷𐴎𐴠𐴦𐴕𐴞𐴑𐴞 𐴎𐴞𐴃𐴞 𐴀𐴝𐴘𐴧𐴠𐴤 𐴀𐴞𐴥𐴃𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴔𐴞𐴌𐴝𐴏𐴢 𐴉𐴝𐴘𐴁𐴡; 𐴀𐴝𐴀𐴛 𐴀𐴞𐴥𐴃𐴝𐴌 𐴀𐴝𐴓𐴧𐴝 𐴀𐴡𐴥𐴘𐴧𐴟𐴔 𐴀𐴝𐴦𐴌 𐴀𐴞𐴥𐴃𐴠 𐴀𐴝𐴣𐴀𐴌 𐴉𐴟𐴖𐴝 𐴀𐴡𐴥𐴘𐴁𐴡.⁸𐴔𐴡𐴕𐴃𐴡𐴌 𐴏𐴠𐴥𐴓𐴉𐴝𐴊𐴟𐴥𐴌𐴝𐴌, 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌, 𐴒𐴞𐴥𐴕𐴝𐴘𐴞 𐴈𐴝𐴔-𐴒𐴡𐴌𐴡𐴤𐴘𐴝𐴌, 𐴑𐴟𐴥𐴕𐴞𐴌, 𐴎𐴠𐴕𐴝𐴤𐴑𐴟𐴌 𐴀𐴡𐴌, 𐴅𐴝𐴊𐴟𐴒𐴡𐴌 𐴀𐴡𐴌, 𐴔𐴟𐴃𐴧𐴞-𐴉𐴟𐴣𐴎𐴡𐴘𐴝𐴌, 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴔𐴞𐴏𐴝𐴥𐴑𐴟𐴌 𐴀𐴡𐴥𐴑𐴧𐴡𐴓𐴡𐴌 𐴁𐴝𐴥𐴑 𐴀𐴡𐴥𐴘𐴁𐴡 𐴊𐴠 𐴀𐴡𐴦𐴙𐴕 𐴀𐴠𐴊𐴧𐴠 𐴒𐴡𐴥𐴕𐴋𐴡𐴑𐴠 𐴎𐴡𐴓𐴠 𐴊𐴠 𐴇𐴝𐴥𐴁𐴞𐴘𐴝 𐴎𐴟𐴎𐴟𐴑; 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴊𐴟𐴏𐴝𐴥𐴌𐴝 𐴔𐴡𐴦𐴃𐴢.“

𐴕𐴡𐴘𐴝 𐴅𐴠𐴌𐴟𐴥𐴏𐴝𐴓𐴠𐴔

⁹𐴃𐴝𐴌𐴉𐴡𐴌𐴠 𐴎𐴠 𐴇𐴝𐴥𐴣𐴃𐴧𐴗𐴝 𐴉𐴞𐴥𐴌𐴞𐴏𐴃𐴝𐴃𐴧𐴟 𐴀𐴝𐴇𐴠𐴥𐴌𐴞𐴌 𐴇𐴝𐴥𐴣𐴃𐴧𐴝𐴕 𐴀𐴝𐴉𐴡𐴃𐴢 𐴉𐴟𐴌𐴝𐴘𐴧𐴝 𐴇𐴝𐴥𐴣𐴃𐴧𐴗𐴝 𐴉𐴞𐴘𐴝𐴓𐴝 𐴀𐴝𐴐𐴧𐴞𐴥𐴓𐴢, 𐴇𐴞𐴥𐴀𐴕𐴡𐴃𐴧𐴟 𐴀𐴠𐴑𐴒𐴗𐴝𐴥𐴘𐴠 𐴀𐴝𐴀𐴘𐴢 𐴀𐴝𐴣𐴀𐴌𐴠𐴥 𐴈𐴡𐴀𐴌 𐴊𐴠, ”𐴀𐴠𐴍𐴠𐴥 𐴀𐴝𐴘𐴧𐴡𐴤, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴊𐴟𐴓𐴞𐴥, 𐴘𐴝𐴥𐴕𐴞 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀 𐴖𐴝𐴌 𐴁𐴡𐴖𐴢 𐴊𐴝𐴈𐴝𐴤𐴘𐴧𐴟𐴔.“¹⁰𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴂𐴝𐴑-𐴌𐴟𐴀𐴌 𐴁𐴟𐴥𐴃𐴡𐴌𐴠 𐴒𐴡𐴥𐴌𐴞 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴠𐴊𐴧𐴠 𐴀𐴟𐴣𐴏𐴡𐴓𐴢 𐴉𐴝𐴀𐴌𐴡𐴃𐴢 𐴓𐴡𐴘𐴒𐴞𐴘𐴠𐴥, 𐴀𐴝𐴦𐴌 𐴀𐴝𐴣𐴀𐴌𐴠𐴥 𐴂𐴝𐴑 𐴐𐴡𐴥𐴀𐴌 𐴅𐴠𐴌𐴟𐴥𐴏𐴝𐴓𐴠𐴔 𐴔𐴝𐴥𐴕 𐴊𐴝𐴈𐴝𐴤𐴘𐴧𐴠, 𐴎𐴞𐴘𐴝𐴥𐴕 𐴀𐴝𐴏𐴔𐴝𐴕𐴡𐴃𐴧𐴟 𐴀𐴝𐴓𐴧𐴝𐴌 𐴇𐴝𐴣𐴏𐴡𐴥𐴃𐴧𐴟 𐴓𐴝𐴔𐴞 𐴀𐴝𐴘𐴧𐴠𐴤𐴌,¹¹𐴎𐴞𐴘𐴝𐴥𐴕𐴡𐴃𐴢 𐴀𐴝𐴓𐴧𐴝𐴌 𐴃𐴡𐴎𐴡𐴓𐴧𐴞 𐴀𐴝𐴏𐴠𐴤. 𐴇𐴞𐴥𐴘𐴝𐴕𐴡𐴌 𐴏𐴡𐴏𐴧𐴡𐴈𐴝𐴕𐴞 𐴁𐴞𐴐𐴞𐴤 𐴑𐴞𐴔𐴡𐴃𐴞 𐴅𐴡𐴇𐴝𐴥𐴌𐴡𐴌 𐴋𐴡𐴥𐴙𐴓𐴧𐴝, 𐴘𐴝𐴥𐴕𐴞 𐴉𐴡𐴥𐴍𐴞𐴑𐴡𐴌 𐴋𐴡𐴥𐴙𐴓𐴧𐴝 𐴏𐴝𐴥𐴉𐴢 𐴅𐴝𐴏𐴂𐴝𐴌 𐴅𐴡𐴇𐴝𐴥𐴌𐴡𐴌 𐴋𐴡𐴥𐴙𐴓𐴢.¹²𐴇𐴞𐴥𐴘𐴝𐴕𐴡𐴃𐴢 𐴁𐴝𐴌𐴡𐴥 𐴖𐴝𐴕 𐴒𐴠𐴙𐴄𐴢 𐴀𐴡𐴓𐴝 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴀𐴠𐴊𐴧𐴠 𐴀𐴟𐴣𐴏𐴡𐴓𐴢 𐴋𐴠𐴁𐴝𐴓𐴢 𐴀𐴝𐴏𐴠𐴤, 𐴀𐴝𐴦𐴌 𐴇𐴠𐴥 𐴒𐴠𐴙𐴄𐴢 𐴃𐴟𐴕𐴡𐴃𐴢 𐴁𐴝𐴌𐴡𐴥 𐴖𐴝 𐴉𐴞𐴥𐴌𐴞𐴏𐴃𐴝 𐴀𐴝𐴏𐴠𐴤. 𐴒𐴠𐴙𐴄𐴢 𐴇𐴞𐴥𐴀𐴕𐴡𐴃𐴢 𐴕𐴝𐴔 𐴀𐴡𐴥𐴑𐴧𐴡𐴓𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤, 𐴎𐴞𐴀𐴕 𐴀𐴡𐴥𐴙𐴓𐴊𐴠 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴁𐴝𐴌𐴡𐴥 𐴈𐴝𐴥𐴀𐴕𐴊𐴝𐴕𐴡𐴌 𐴕𐴝𐴔.¹³𐴃𐴞𐴕 𐴕𐴝𐴥𐴕 𐴒𐴠𐴙𐴄𐴢 𐴉𐴟𐴑 𐴔𐴞𐴑𐴧𐴝𐴥 𐴃𐴧𐴟, 𐴃𐴞𐴕 𐴕𐴝𐴥𐴕 𐴒𐴠𐴙𐴄𐴢 𐴀𐴟𐴃𐴧𐴡𐴌 𐴔𐴞𐴑𐴧𐴝𐴥 𐴃𐴧𐴟, 𐴃𐴞𐴕 𐴕𐴝𐴥𐴕 𐴒𐴠𐴙𐴄𐴢 𐴊𐴡𐴀𐴙𐴕 𐴔𐴞𐴑𐴧𐴝𐴥 𐴃𐴧𐴟, 𐴀𐴝𐴦𐴌 𐴃𐴞𐴕 𐴕𐴝𐴥𐴕 𐴒𐴠𐴙𐴄𐴢 𐴉𐴡𐴏𐴞𐴥𐴔 𐴔𐴞𐴑𐴧𐴝𐴥 𐴃𐴧𐴟.¹⁴𐴐𐴡𐴥𐴀𐴌𐴡𐴌 𐴋𐴠𐴁𐴝𐴓𐴢 𐴓𐴝𐴕 𐴁𐴝𐴌𐴡𐴥 𐴖𐴝 𐴁𐴟𐴕𐴞𐴘𐴝𐴊𐴞𐴌 𐴉𐴝𐴃𐴧𐴡𐴥𐴌𐴡𐴌 𐴖𐴡𐴌𐴠 𐴁𐴝𐴕𐴝 𐴒𐴞𐴘𐴠𐴥, 𐴀𐴝𐴦𐴌 𐴇𐴞𐴥𐴀𐴕𐴡𐴃𐴢 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀 𐴖𐴝𐴌 𐴁𐴝𐴌𐴡𐴥 𐴎𐴡𐴕 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴕𐴝𐴔 𐴀𐴝𐴏𐴠𐴤.

¹⁵𐴎𐴞𐴁𐴝𐴤𐴘𐴠 𐴀𐴝𐴣𐴀𐴌 𐴓𐴡𐴥𐴘 𐴈𐴡𐴃𐴝𐴤 𐴈𐴡𐴘𐴧𐴠𐴥, 𐴀𐴞𐴥𐴁𐴝𐴃𐴧𐴟 𐴀𐴠𐴒𐴧𐴗𐴝𐴤 𐴔𐴝𐴉𐴡𐴕𐴞𐴌 𐴓𐴡𐴍𐴞𐴥 𐴀𐴝𐴏𐴠𐴤 𐴎𐴞𐴁𐴝𐴤 𐴐𐴟𐴥𐴕𐴝𐴌; 𐴐𐴡𐴥𐴀𐴌 𐴒𐴝𐴥𐴕 𐴀𐴡𐴌𐴠, 𐴇𐴞𐴥𐴘𐴝𐴕𐴡𐴌 𐴒𐴠𐴙𐴄𐴢 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠, 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴋𐴠𐴁𐴝𐴓𐴡𐴌𐴠 𐴔𐴝𐴉𐴞 𐴁𐴡𐴓𐴧𐴝.¹⁶𐴐𐴡𐴥𐴀𐴌 𐴒𐴝𐴥𐴕 𐴏𐴝𐴙𐴌 𐴑𐴟𐴙𐴕𐴧𐴝; 𐴇𐴞𐴥𐴘𐴝𐴕𐴡𐴌 𐴓𐴝𐴔𐴁𐴝 𐴎𐴠𐴊𐴧𐴟𐴥𐴌 𐴉𐴝𐴃𐴝𐴥𐴌𐴞 𐴘𐴡𐴥 𐴇𐴠𐴥𐴊𐴧𐴟𐴌. 𐴀𐴞𐴥𐴁𐴝𐴘𐴠 𐴐𐴡𐴥𐴀𐴌 𐴒𐴝𐴥𐴕 𐴓𐴡𐴍𐴞𐴥 𐴖𐴝 𐴓𐴡𐴥𐴘 𐴔𐴝𐴙𐴂𐴧𐴠𐴥 𐴌𐴝𐴥𐴌 𐴁𐴝𐴌𐴡𐴥 𐴀𐴝𐴥𐴎𐴝𐴌 𐴑𐴟𐴕𐴞 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥; 𐴇𐴞𐴥𐴘𐴝𐴕𐴡𐴌 𐴓𐴝𐴔𐴁𐴝, 𐴉𐴝𐴃𐴝𐴥𐴌𐴞 𐴀𐴠𐴊𐴧𐴠 𐴖𐴡𐴌𐴔𐴞𐴑𐴧𐴝𐴥 𐴁𐴡𐴌𐴝𐴁𐴡𐴌.¹⁷𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕𐴡𐴌 𐴋𐴠𐴁𐴝𐴓𐴢 𐴓𐴝𐴕𐴡𐴌𐴠 𐴀𐴞𐴕𐴏𐴝𐴥𐴕𐴞 𐴔𐴝𐴉𐴠 𐴔𐴝𐴙𐴂𐴧𐴠𐴥 𐴌𐴝𐴥𐴌, 𐴀𐴠𐴑 𐴐𐴡𐴥𐴀 𐴏𐴝𐴓𐴞𐴐𐴢-𐴏𐴝𐴙𐴌 𐴀𐴝𐴥𐴃𐴢 𐴀𐴡𐴥𐴘𐴧𐴠, 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴉𐴞𐴥𐴌𐴞𐴏𐴃𐴝𐴘𐴠 𐴘𐴡𐴥 𐴔𐴝𐴉𐴠.¹⁸𐴋𐴠𐴁𐴝𐴓𐴢 𐴓𐴝𐴕 𐴅𐴝𐴏𐴂𐴝𐴌 𐴅𐴡𐴇𐴝𐴥𐴌 𐴓𐴡𐴥𐴘 𐴁𐴝𐴕𐴝𐴘𐴧𐴝; 𐴀𐴝𐴦𐴌 𐴐𐴡𐴥𐴀𐴌 𐴒𐴝𐴥𐴕 𐴏𐴝𐴥𐴉𐴢 𐴀𐴝𐴘𐴕𐴝𐴌 𐴋𐴡𐴥𐴙𐴓𐴧𐴝 𐴇𐴝𐴥𐴄𐴞 𐴐𐴟𐴥𐴕𐴝𐴌.¹⁹𐴇𐴠𐴥 𐴐𐴡𐴥𐴀𐴌𐴡𐴌 𐴋𐴠𐴁𐴝𐴓𐴡𐴌 𐴁𐴟𐴕𐴞𐴘𐴝𐴊𐴞𐴌 𐴉𐴝𐴃𐴧𐴡𐴥𐴌 𐴒𐴟𐴥𐴕 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴑𐴞𐴔𐴡𐴃𐴞 𐴅𐴡𐴇𐴝𐴥𐴌 𐴓𐴡𐴥𐴘 𐴇𐴝𐴥𐴣𐴎𐴝𐴘𐴧𐴝. 𐴉𐴡𐴀𐴘𐴓𐴝 𐴁𐴟𐴕𐴞𐴘𐴝𐴊𐴞𐴌 𐴉𐴝𐴃𐴧𐴡𐴥𐴌𐴒𐴗𐴝𐴥 𐴅𐴝𐴏𐴂𐴝𐴌𐴡𐴌 𐴋𐴡𐴥𐴙𐴓𐴧𐴝 𐴏𐴡𐴏𐴡𐴙𐴑𐴧𐴝, 𐴊𐴟𐴏𐴝𐴥𐴌𐴝 𐴖𐴝 𐴏𐴝𐴉𐴝𐴘𐴝𐴌 𐴋𐴡𐴥𐴙𐴓𐴧𐴝 𐴐𐴟𐴥𐴌𐴔𐴝 𐴌𐴡𐴙𐴚𐴒𐴝, 𐴃𐴞𐴏𐴝𐴥𐴌𐴝 𐴖𐴝 𐴑𐴝𐴓𐴏𐴠𐴥𐴋𐴝𐴕𐴞𐴌 𐴋𐴡𐴥𐴙𐴓𐴧𐴝 𐴀𐴝𐴏𐴔𐴝𐴕𐴞 𐴌𐴡𐴙𐴚𐴒𐴝, 𐴏𐴝𐴙𐴌 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴀𐴠𐴔𐴠𐴌𐴝𐴓𐴋𐴡𐴌 𐴋𐴡𐴥𐴙𐴓𐴧𐴝 𐴀𐴝𐴥𐴙𐴓𐴢,²⁰𐴉𐴝𐴣𐴏𐴢 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴏𐴝𐴌𐴋𐴡𐴕𐴞𐴑𐴏𐴡𐴌 𐴋𐴡𐴥𐴙𐴓𐴧𐴝 𐴊𐴡𐴥𐴓𐴝 𐴀𐴠𐴊𐴧𐴠 𐴔𐴞𐴍𐴝𐴤 𐴌𐴡𐴙𐴚𐴒𐴝, 𐴏𐴡𐴥 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴏𐴝𐴌𐴊𐴞𐴘𐴝𐴏𐴡𐴌 𐴋𐴡𐴥𐴙𐴓𐴧𐴝 𐴐𐴡𐴥𐴌𐴁𐴡𐴃𐴞 𐴌𐴡𐴙𐴚𐴒𐴝, 𐴇𐴝𐴥𐴣𐴃𐴢 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴑𐴌𐴞𐴏𐴡𐴓𐴝𐴙𐴄𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴓𐴡𐴙𐴊𐴧𐴝, 𐴀𐴝𐴣𐴐𐴄𐴡 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴁𐴠𐴌𐴝𐴓𐴡𐴌 𐴋𐴡𐴥𐴙𐴓𐴧𐴝 𐴉𐴝𐴕𐴞𐴥 𐴌𐴡𐴙𐴚𐴒𐴝, 𐴕𐴡𐴖 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴄𐴡𐴂𐴝𐴎𐴡𐴌 𐴋𐴡𐴥𐴙𐴓𐴧𐴝 𐴐𐴟𐴥𐴕𐴝 𐴌𐴡𐴙𐴚𐴒𐴝, 𐴊𐴡𐴐𐴢 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴑𐴌𐴞𐴏𐴡𐴂𐴌𐴠𐴙𐴏𐴡𐴌 𐴋𐴡𐴥𐴙𐴓𐴧𐴝 𐴈𐴡𐴌𐴝 𐴀𐴝𐴥𐴙𐴓𐴢, 𐴀𐴠𐴒𐴝𐴌𐴡 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴅𐴝𐴏𐴠𐴕𐴊𐴡𐴌 𐴋𐴡𐴥𐴙𐴓𐴧𐴝 𐴓𐴝𐴓𐴢 𐴌𐴡𐴙𐴚𐴒𐴝, 𐴁𐴝𐴌𐴡𐴥 𐴕𐴡𐴔𐴁𐴡𐴥𐴌𐴡𐴌𐴒𐴗𐴝𐴥 𐴀𐴝𐴔𐴠𐴃𐴞𐴏𐴃𐴡𐴌 𐴋𐴡𐴥𐴙𐴓𐴧𐴝 𐴁𐴝𐴘𐴡𐴙𐴕𐴧𐴝 𐴌𐴡𐴙𐴚𐴒𐴝.²¹𐴁𐴝𐴌𐴡𐴥 𐴖𐴝𐴕 𐴒𐴠𐴙𐴄𐴢 𐴃𐴟𐴕 𐴁𐴝𐴌𐴡𐴥 𐴖𐴝 𐴔𐴟𐴑𐴃𐴝; 𐴀𐴠𐴑𐴧𐴝𐴥𐴕 𐴒𐴠𐴙𐴄𐴢 𐴀𐴠𐴑𐴒𐴗𐴝𐴥𐴌 𐴊𐴡𐴥𐴌𐴠 𐴔𐴟𐴑𐴃𐴝. 𐴐𐴡𐴥𐴀𐴌𐴡𐴌 𐴌𐴝𐴏𐴃𐴝 𐴒𐴝𐴥𐴕 𐴏𐴝𐴥𐴉𐴢 𐴀𐴝𐴘𐴕𐴝𐴌 𐴋𐴡𐴥𐴙𐴓𐴧𐴝 𐴇𐴝𐴥𐴄𐴞 𐴐𐴟𐴥𐴕𐴝𐴌.

²²𐴐𐴡𐴥𐴀𐴌 𐴒𐴝𐴥𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴀𐴛 𐴇𐴡𐴕𐴡𐴤 𐴀𐴠𐴁𐴝𐴦𐴊𐴡𐴃𐴢-𐴈𐴝𐴥𐴕𐴝 𐴕𐴡𐴥 𐴊𐴠𐴑𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴁𐴟𐴊𐴢 𐴇𐴝𐴥𐴀𐴌 𐴑𐴟𐴊𐴟𐴌𐴟𐴃𐴖𐴝𐴓𐴝 𐴀𐴝𐴓𐴧𐴝 𐴀𐴠𐴊𐴧𐴠 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀 𐴖𐴝 𐴀𐴡𐴥𐴙𐴓𐴊𐴠 𐴇𐴞𐴥𐴘𐴝𐴕𐴡𐴌 𐴀𐴠𐴁𐴝𐴦𐴊𐴡𐴃𐴢-𐴈𐴝𐴥𐴕𐴝.²³𐴐𐴡𐴥𐴀𐴌 𐴒𐴝𐴥𐴕𐴡𐴃𐴢 𐴉𐴡𐴀𐴌 𐴀𐴡𐴥𐴘 𐴁𐴡𐴓𐴧𐴝 𐴁𐴠𐴙𐴓𐴢 𐴀𐴠𐴊𐴧𐴠 𐴏𐴝𐴕𐴡𐴌 𐴇𐴡𐴕𐴡𐴤 𐴎𐴡𐴌𐴟𐴌𐴡𐴃𐴢 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝𐴘𐴠 𐴇𐴞𐴥𐴘𐴝𐴕𐴡𐴌𐴠 𐴉𐴡𐴀𐴌 𐴒𐴡𐴌𐴠𐴥, 𐴀𐴝𐴦𐴌 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀 𐴖𐴝 𐴀𐴡𐴥𐴙𐴓𐴊𐴠 𐴇𐴞𐴥𐴘𐴝𐴕𐴡𐴌 𐴏𐴠𐴌𐴝𐴑.²⁴𐴑𐴡𐴗𐴔 𐴀𐴡𐴥𐴑𐴧𐴡𐴓𐴢 𐴇𐴞𐴥𐴘𐴝𐴕𐴡𐴌 𐴉𐴡𐴀𐴌𐴠 𐴏𐴡𐴓𐴝𐴉𐴞𐴥𐴌𐴝 𐴒𐴡𐴌𐴞𐴥𐴁𐴡, 𐴀𐴝𐴦𐴌 𐴊𐴟𐴕𐴞𐴘𐴝𐴙𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴊𐴡𐴥𐴕-𐴊𐴡𐴓𐴡𐴃𐴢 𐴀𐴡𐴥𐴑𐴧𐴡𐴓𐴢 𐴇𐴞𐴥𐴘𐴝𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴕𐴞𐴤𐴁𐴡.²⁵𐴊𐴞𐴕𐴡𐴃𐴢 𐴇𐴞𐴥𐴘𐴝𐴕𐴡𐴌 𐴒𐴠𐴙𐴄𐴢 𐴀𐴡𐴥𐴑𐴧𐴡𐴓𐴢 𐴇𐴡𐴕𐴡𐴤𐴊𐴞𐴕 𐴁𐴡𐴕 𐴕𐴡 𐴃𐴝𐴥𐴑𐴞𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴍𐴠 𐴃𐴡 𐴌𐴝𐴙𐴃𐴢 𐴕𐴡 𐴀𐴡𐴥𐴘𐴁𐴡.²⁶𐴀𐴝𐴦𐴌 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌 𐴊𐴡𐴥𐴕-𐴊𐴡𐴓𐴡𐴃𐴢 𐴀𐴠𐴊𐴧𐴠 𐴀𐴞𐴎𐴧𐴡𐴃𐴢 𐴇𐴞𐴥𐴘𐴝𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴕𐴝𐴤 𐴎𐴝𐴘𐴁𐴡.²⁷𐴔𐴡𐴕𐴃𐴡𐴌 𐴇𐴡𐴕𐴡𐴤 𐴕𐴝𐴉𐴝𐴑 𐴅𐴞𐴕𐴞𐴥𐴐𐴢, 𐴒𐴞𐴥𐴕𐴝𐴘𐴞 𐴈𐴝𐴔 𐴒𐴡𐴌𐴠𐴥 𐴊𐴠 𐴘𐴝𐴥 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴀 𐴊𐴠 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴢 𐴇𐴞𐴥𐴘𐴝𐴕𐴡𐴃𐴢 𐴁𐴞𐴓𐴑𐴟𐴥𐴓𐴢 𐴒𐴡𐴥𐴓𐴞 𐴕𐴡 𐴉𐴝𐴌𐴞𐴁𐴡𐴥, 𐴔𐴡𐴕𐴃𐴡𐴌 𐴏𐴞𐴌𐴞𐴥𐴉𐴢 𐴀𐴟𐴘𐴃𐴝𐴌𐴝𐴤 𐴉𐴝𐴌𐴞𐴁𐴡𐴥 𐴎𐴠𐴃𐴝𐴌𐴝𐴤𐴌 𐴕𐴝𐴔 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀 𐴖𐴝𐴌 𐴎𐴞𐴕𐴊𐴞𐴒𐴞𐴌-𐴑𐴞𐴃𐴝𐴁𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤.

The Word for the World International

https://app.library.bible/content/87faca8b51c22590