Read 𐴎𐴝𐴇𐴠𐴥𐴌𐴞 20

𐴎𐴝𐴇𐴠𐴥𐴌𐴞20

𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌

¹𐴃𐴝𐴌𐴉𐴡𐴌𐴠 𐴀𐴝𐴀𐴛 𐴀𐴠𐴥𐴒𐴧𐴗𐴝 𐴉𐴞𐴥𐴌𐴞𐴏𐴃𐴝 𐴊𐴠𐴙𐴑𐴧𐴞𐴥 𐴎𐴞𐴁𐴝𐴤 𐴀𐴝𐴏𐴔𐴝𐴕𐴡𐴃𐴧𐴟 𐴓𐴝𐴔𐴞 𐴀𐴝𐴘𐴧𐴠𐴤𐴌; 𐴀𐴞𐴥𐴁𐴝𐴌 𐴀𐴝𐴥𐴃𐴡𐴃𐴢 𐴀𐴡𐴄𐴝𐴥𐴘 𐴒𐴝𐴣𐴃𐴡𐴌 𐴏𐴝𐴁𐴞𐴤 𐴖𐴝 𐴀𐴠𐴊𐴧𐴠 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴏𐴞𐴥𐴘𐴡𐴓𐴢 𐴀𐴝𐴏𐴠𐴤.²𐴀𐴞𐴥𐴁𐴝𐴘𐴠 𐴕𐴝𐴒𐴝𐴤 𐴖𐴝𐴌𐴠 𐴊𐴡𐴥𐴌𐴞𐴉𐴠𐴓𐴝𐴘𐴧𐴠, 𐴘𐴝𐴥𐴕𐴞 𐴉𐴟𐴌𐴝𐴕𐴝 𐴇𐴝𐴥𐴉𐴢 𐴎𐴞𐴁𐴝𐴤𐴌𐴠 𐴀𐴞𐴁𐴞𐴓𐴞𐴥𐴐𐴢 𐴘𐴝𐴥 𐴐𐴡𐴥𐴘𐴃𐴝𐴕 𐴈𐴡𐴖𐴝𐴤 𐴎𐴝 𐴀𐴞𐴥𐴃𐴝𐴌𐴠; 𐴁𐴝𐴦𐴊𐴠 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌𐴡𐴓𐴧𐴝 𐴁𐴝𐴣𐴊𐴞𐴥𐴉𐴠𐴓𐴝𐴘𐴧𐴠.³𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴠 𐴀𐴡𐴄𐴝𐴥𐴘 𐴒𐴝𐴣𐴃𐴡𐴃𐴢 𐴉𐴠𐴥𐴓𐴝𐴘𐴊𐴞 𐴘𐴞𐴥𐴁𐴝 𐴁𐴡𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴀𐴝𐴦𐴌 𐴘𐴞𐴥𐴁𐴝𐴃𐴢 𐴔𐴡𐴀𐴌 𐴓𐴝𐴒𐴝𐴘𐴊𐴞𐴘𐴠𐴥, 𐴎𐴠𐴀𐴕𐴠 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌 𐴉𐴟𐴌𐴝 𐴕𐴡𐴥 𐴀𐴡𐴥𐴘𐴧𐴡 𐴉𐴡𐴙𐴅𐴧𐴡𐴕𐴃𐴡 𐴀𐴞𐴥𐴃𐴠 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴓𐴧𐴡𐴃𐴡𐴃𐴢 𐴀𐴝𐴌 𐴓𐴡𐴘𐴎𐴝𐴘 𐴕𐴡 𐴉𐴝𐴌𐴠; 𐴁𐴠𐴐𐴡𐴥𐴑 𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴠 𐴀𐴠𐴏𐴧𐴝𐴥𐴃𐴡𐴓𐴧𐴝 𐴀𐴠𐴌𐴞𐴊𐴞𐴘𐴝 𐴎𐴝𐴘𐴁𐴝𐴌 𐴀𐴝𐴏𐴠𐴤.

⁴𐴁𐴝𐴦𐴊𐴠 𐴀𐴝𐴀𐴛 𐴃𐴡𐴑𐴃𐴡𐴥 𐴀𐴡𐴥𐴑𐴧𐴡𐴓𐴢 𐴊𐴠𐴙𐴑𐴧𐴞𐴥, 𐴇𐴞𐴥𐴀𐴕𐴡𐴌 𐴖𐴡𐴌𐴠 𐴎𐴠𐴃𐴝𐴌𐴝𐴤 𐴁𐴡𐴘𐴍𐴝𐴤 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴌𐴠 𐴁𐴞𐴏𐴝𐴌 𐴒𐴡𐴌𐴞𐴥𐴁𐴝𐴌 𐴑𐴠𐴥𐴔𐴡𐴃𐴝 𐴊𐴞𐴦𐴘𐴝 𐴒𐴞𐴘𐴠𐴥. 𐴀𐴝𐴀𐴛 𐴀𐴟𐴘𐴃𐴝𐴌𐴝𐴤𐴌 𐴌𐴟𐴀 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴊𐴠𐴙𐴑𐴧𐴞𐴥 𐴎𐴠𐴃𐴝𐴌𐴝𐴤𐴌 𐴈𐴡𐴓𐴧𐴝 𐴀𐴡𐴥𐴑𐴧𐴡𐴓𐴢 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴡𐴥𐴕𐴠 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔𐴡𐴌 𐴎𐴡𐴌𐴞𐴘𐴝 𐴈𐴝𐴍𐴞𐴉𐴠𐴥𐴓𐴝 𐴒𐴞𐴥𐴘𐴠, 𐴎𐴠𐴃𐴝𐴌𐴝𐴤 𐴇𐴝𐴥𐴘𐴡𐴖𐴝𐴕 𐴕𐴗𐴝𐴥𐴌𐴠 𐴘𐴝𐴥 𐴘𐴞𐴥𐴁𐴝𐴌 𐴔𐴟𐴃𐴧𐴞𐴌𐴠 𐴏𐴡𐴥𐴘𐴊𐴝 𐴕𐴡𐴥 𐴒𐴡𐴌𐴠𐴥 𐴀𐴠𐴊𐴧𐴠 𐴕𐴞𐴎𐴡𐴌 𐴑𐴟𐴖𐴝𐴓𐴡𐴃𐴢 𐴘𐴝𐴥 𐴀𐴝𐴥𐴃𐴡𐴃𐴢 𐴘𐴞𐴥𐴁𐴝𐴌 𐴕𐴞𐴐𐴝𐴥𐴕 𐴑𐴡𐴁𐴟𐴓𐴢 𐴕𐴡𐴥 𐴒𐴡𐴌𐴠𐴥. 𐴀𐴞𐴥𐴃𐴝𐴌𐴝 𐴎𐴞𐴕𐴊𐴝 𐴀𐴡𐴥𐴘 𐴔𐴡𐴀𐴏𐴞𐴤𐴌 𐴉𐴟𐴥𐴖𐴝𐴣𐴃𐴞 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌 𐴉𐴝𐴥𐴕 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.⁵𐴀𐴡𐴙𐴕𐴧𐴡 𐴔𐴟𐴌𐴟𐴊𐴝 𐴀𐴡𐴥𐴑𐴧𐴡𐴓𐴢 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌 𐴉𐴟𐴌𐴝 𐴕𐴡𐴥 𐴀𐴡𐴥𐴘𐴧𐴡 𐴉𐴡𐴙𐴅𐴧𐴡𐴕𐴃𐴡 𐴎𐴞𐴕𐴊𐴝 𐴕𐴡𐴥. 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴉𐴡𐴀𐴘𐴓𐴝𐴁𐴝𐴌.⁶𐴔𐴟𐴁𐴝𐴌𐴠𐴑 𐴀𐴠𐴊𐴧𐴠 𐴂𐴝𐴑 𐴔𐴝𐴕𐴟𐴥𐴙𐴐𐴢 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴠𐴦𐴕𐴞𐴑𐴞 𐴇𐴠𐴥 𐴉𐴡𐴀𐴘𐴓𐴝𐴁𐴝𐴌 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴃𐴢 𐴐𐴝𐴥𐴔𐴞𐴓𐴢 𐴃𐴝𐴥𐴑𐴠; 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴊𐴟𐴏𐴝𐴥𐴌𐴝 𐴔𐴡𐴦𐴃𐴡𐴌 𐴇𐴡𐴕𐴡𐴤 𐴃𐴝𐴦𐴑𐴡𐴃𐴢 𐴕𐴝𐴥𐴘, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴔𐴡𐴀𐴏𐴞𐴤𐴌 𐴀𐴞𐴔𐴝𐴔 𐴀𐴡𐴥𐴘𐴁𐴡, 𐴀𐴝𐴦𐴌 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌 𐴉𐴝𐴥𐴕 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥𐴁𐴡.

𐴐𐴡𐴥𐴘𐴃𐴝𐴕 𐴇𐴝𐴥𐴌𐴞𐴒𐴞𐴘𐴡𐴘

⁷𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌 𐴒𐴟𐴎𐴡𐴌𐴞 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴐𐴡𐴥𐴘𐴃𐴝𐴕𐴡𐴌𐴠 𐴀𐴞𐴥𐴃𐴝𐴌 𐴎𐴞𐴘𐴡𐴥𐴓𐴡𐴃𐴧𐴟 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝 𐴎𐴝𐴘𐴁𐴡,⁸𐴁𐴝𐴦𐴊𐴠 𐴀𐴞𐴥𐴃𐴠 𐴊𐴟𐴕𐴞𐴘𐴝𐴙𐴌 𐴏𐴝𐴘𐴌𐴡𐴥 𐴑𐴟𐴕𐴝𐴃𐴢 𐴀𐴝𐴏𐴠𐴤 𐴊𐴠 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝𐴘 𐴁𐴡𐴓𐴧𐴝 𐴕𐴠𐴦𐴓𐴞𐴁𐴡𐴥, 𐴘𐴝𐴥𐴕𐴞 𐴘𐴝𐴅𐴟𐴥𐴅 𐴀𐴠𐴊𐴧𐴠 𐴔𐴝𐴅𐴟𐴥𐴅 𐴀𐴡𐴌𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴓𐴝𐴌𐴝𐴥𐴘 𐴓𐴧𐴝 𐴎𐴡𐴔𐴝 𐴒𐴡𐴌𐴞𐴥𐴁𐴡. 𐴀𐴞𐴥𐴃𐴝𐴌𐴝𐴌 𐴒𐴡𐴕𐴝 𐴊𐴡𐴙𐴅𐴧𐴝𐴌 𐴏𐴡𐴌𐴡𐴌 𐴁𐴝𐴓𐴟𐴌 𐴇𐴠𐴥𐴊𐴟𐴕 𐴀𐴡𐴥𐴘𐴁𐴡.⁹𐴀𐴞𐴥𐴃𐴝𐴌𐴝 𐴎𐴡𐴁𐴞𐴕𐴡𐴌 𐴀𐴝𐴒𐴝𐴒𐴟𐴌𐴝 𐴉𐴡𐴥𐴓𐴞𐴎𐴝𐴘, 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴃𐴝𐴥𐴑𐴠 𐴊𐴠 𐴎𐴝𐴒𐴝 𐴒𐴝𐴥𐴕𐴡𐴌𐴠 𐴒𐴠𐴥𐴌𐴒𐴗𐴝𐴓𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴘𐴝𐴥𐴕𐴞 𐴀𐴞𐴥𐴁𐴝𐴌 𐴀𐴝𐴊𐴡𐴙𐴅𐴧𐴝 𐴐𐴡𐴥𐴀𐴌 𐴒𐴝𐴥𐴕 𐴀𐴡𐴌𐴠; 𐴔𐴡𐴕𐴃𐴡𐴌 𐴀𐴝𐴏𐴔𐴝𐴕𐴡𐴃𐴧𐴟 𐴀𐴡𐴦𐴙𐴕 𐴕𐴝𐴎𐴞𐴓𐴢 𐴀𐴡𐴥𐴘 𐴀𐴞𐴥𐴃𐴝𐴌𐴝𐴌𐴠 𐴇𐴝𐴥𐴓𐴝𐴑 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.¹⁰𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴒𐴞𐴘𐴠𐴥 𐴊𐴠 𐴇𐴠𐴥 𐴀𐴞𐴁𐴞𐴓𐴞𐴥𐴐𐴡𐴌𐴠 𐴒𐴡𐴥𐴕𐴋𐴡𐴑𐴠 𐴎𐴡𐴓𐴠 𐴊𐴠 𐴀𐴡𐴦𐴙𐴕𐴡𐴌 𐴋𐴞𐴀𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠, 𐴎𐴠𐴍𐴠𐴥 𐴇𐴝𐴥𐴘𐴡𐴖𐴝𐴕 𐴕𐴗𐴝𐴥 𐴀𐴠𐴊𐴧𐴠 𐴔𐴞𐴏𐴝𐴥 𐴕𐴡𐴁𐴞 𐴖𐴝 𐴘𐴡𐴥 𐴀𐴝𐴏𐴠𐴤. 𐴇𐴠𐴥𐴍𐴠 𐴀𐴞𐴥𐴃𐴝𐴌𐴝 𐴊𐴞𐴕𐴠 𐴌𐴝𐴘𐴃𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴇𐴝𐴥𐴔𐴞𐴐𐴝 𐴀𐴝𐴎𐴝𐴁𐴢 𐴉𐴝𐴘𐴁𐴡.

𐴀𐴝𐴇𐴠𐴥𐴌𐴡𐴃𐴡𐴌 𐴁𐴞𐴏𐴝𐴌

¹¹𐴁𐴝𐴦𐴊𐴠 𐴀𐴝𐴀𐴛 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴊𐴡𐴥𐴓𐴝 𐴃𐴡𐴑𐴃𐴡𐴥 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴖𐴡𐴌𐴠 𐴁𐴡𐴘𐴍𐴝𐴤 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝𐴌𐴠 𐴊𐴠𐴙𐴑𐴧𐴞𐴥, 𐴎𐴞𐴁𐴝𐴤𐴌 𐴔𐴟𐴀𐴕𐴃𐴟 𐴎𐴡𐴁𐴞𐴕 𐴀𐴠𐴊𐴧𐴠 𐴀𐴝𐴏𐴔𐴝𐴕 𐴊𐴝𐴥𐴘𐴒𐴞𐴘𐴠𐴒𐴡𐴘, 𐴀𐴝𐴦𐴌 𐴇𐴞𐴥𐴀𐴕𐴠 𐴇𐴡𐴕𐴡𐴤 𐴎𐴝𐴒𐴝 𐴕𐴡𐴥 𐴉𐴝𐴦.¹²𐴃𐴝𐴌𐴉𐴡𐴌𐴠 𐴀𐴝𐴀𐴛 𐴋𐴡𐴣𐴀𐴌-𐴐𐴡𐴥𐴣𐴍𐴡 𐴃𐴝𐴔𐴝𐴥𐴔 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴃𐴡𐴑𐴃𐴡𐴥 𐴒𐴝𐴥𐴕𐴡𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘𐴧𐴝 𐴊𐴠𐴙𐴑𐴧𐴞𐴥, 𐴀𐴝𐴦𐴌 𐴑𐴞𐴃𐴝𐴁𐴢 𐴀𐴡𐴥𐴑𐴧𐴡𐴓𐴢 𐴑𐴟𐴥𐴓𐴝𐴒𐴞𐴘𐴠. 𐴀𐴝𐴌𐴡𐴤 𐴀𐴠𐴑𐴒𐴗𐴝𐴥 𐴑𐴞𐴃𐴝𐴁𐴢 𐴑𐴟𐴥𐴓𐴝𐴒𐴞𐴘𐴠, 𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴎𐴞𐴕𐴊𐴞𐴒𐴞𐴌-𐴑𐴞𐴃𐴝𐴁𐴢; 𐴁𐴝𐴦𐴊𐴠 𐴇𐴠𐴥 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴈𐴝𐴔 𐴔𐴡𐴎𐴞𐴕 𐴁𐴞𐴏𐴝𐴌 𐴒𐴡𐴌𐴝𐴥 𐴒𐴞𐴥𐴘𐴠, 𐴎𐴠 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴇𐴠𐴥 𐴑𐴞𐴃𐴝𐴁𐴢 𐴂𐴟𐴥𐴕𐴡𐴃𐴢 𐴓𐴠𐴑𐴝𐴥 𐴒𐴞𐴥𐴀𐴓𐴢.¹³𐴎𐴠 𐴔𐴡𐴌𐴝 𐴀𐴡𐴥𐴑𐴧𐴡𐴓𐴢 𐴊𐴡𐴙𐴅𐴧𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝𐴌𐴠 𐴊𐴡𐴙𐴅𐴧𐴝𐴘𐴠 𐴃𐴟𐴓𐴞𐴤𐴊𐴞𐴘𐴠, 𐴀𐴝𐴦𐴌 𐴔𐴡𐴦𐴃𐴠 𐴀𐴠𐴊𐴧𐴠 𐴉𐴝𐴃𐴝𐴓𐴉𐴟𐴌𐴠 𐴘𐴡𐴥 𐴇𐴞𐴥𐴀𐴕𐴡𐴃𐴢 𐴎𐴠 𐴔𐴡𐴌𐴝 𐴀𐴡𐴥𐴑𐴧𐴡𐴓𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴃𐴟𐴓𐴞𐴤𐴊𐴞𐴘𐴠; 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴈𐴝𐴔 𐴔𐴡𐴎𐴞𐴕 𐴁𐴞𐴏𐴝𐴌 𐴒𐴡𐴌𐴝𐴥 𐴒𐴞𐴥𐴘𐴠.¹⁴𐴁𐴝𐴦𐴊𐴠 𐴔𐴡𐴦𐴃𐴡𐴌𐴠 𐴀𐴠𐴊𐴧𐴠 𐴉𐴝𐴃𐴝𐴓𐴉𐴟𐴌𐴡𐴌𐴠 𐴀𐴡𐴦𐴙𐴕𐴡𐴌 𐴋𐴞𐴀𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠. 𐴀𐴡𐴦𐴙𐴕𐴡𐴌 𐴋𐴞𐴀 𐴀𐴡𐴥𐴙𐴓𐴊𐴠 𐴊𐴟𐴏𐴝𐴥𐴌𐴝 𐴔𐴡𐴦𐴃𐴢.¹⁵𐴎𐴝𐴌-𐴎𐴝𐴌 𐴕𐴝𐴔 𐴇𐴠𐴥 𐴎𐴞𐴕𐴊𐴞𐴒𐴞𐴌-𐴑𐴞𐴃𐴝𐴁𐴡𐴃𐴢 𐴓𐴠𐴑𐴝𐴥 𐴒𐴞𐴥𐴘𐴠 𐴊𐴠 𐴉𐴝𐴦 𐴕𐴡𐴥 𐴎𐴝, 𐴀𐴞𐴥𐴃𐴝𐴌𐴠-𐴀𐴞𐴥𐴃𐴝𐴌𐴠 𐴘𐴡𐴥 𐴇𐴠𐴥 𐴀𐴡𐴦𐴙𐴕𐴡𐴌 𐴋𐴞𐴀𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠.

The Word for the World International

https://app.library.bible/content/87faca8b51c22590