𐴔𐴡𐴃𐴞23
𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴓𐴝𐴉𐴢 𐴈𐴡𐴃𐴝𐴤
1𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴌𐴠 𐴀𐴠𐴊𐴧𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠,2”𐴐𐴡𐴥𐴌𐴞𐴘𐴡𐴃𐴢 𐴁𐴟𐴎𐴝𐴥𐴘𐴊𐴞 𐴁𐴡𐴓𐴧𐴝 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥𐴙𐴓𐴊𐴠 𐴔𐴟𐴀𐴏𐴝𐴌 𐴎𐴝𐴒𐴝𐴃𐴢.3𐴇𐴠𐴥𐴃𐴡𐴓𐴧𐴝, 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴀𐴕 𐴒𐴡𐴙𐴃𐴧𐴡𐴥 𐴈𐴡𐴀, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴒𐴡𐴙𐴅𐴧𐴡𐴥 𐴀𐴠𐴊𐴧𐴠 𐴔𐴝𐴙𐴕𐴧𐴡, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴒𐴡𐴌𐴠𐴥 𐴊𐴠 𐴇𐴞𐴥𐴀𐴕 𐴕𐴡 𐴒𐴡𐴙𐴅𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴎𐴞𐴀𐴕 𐴈𐴡𐴀 𐴇𐴞𐴥𐴀𐴕 𐴃𐴡 𐴕𐴞𐴎𐴠 𐴕𐴡 𐴒𐴡𐴌𐴠𐴥.4𐴀𐴞𐴥𐴃𐴝𐴌𐴝 𐴁𐴡𐴥𐴌-𐴁𐴡𐴥𐴌 𐴉𐴟𐴣𐴎𐴝𐴤 𐴀𐴡𐴥𐴑𐴧𐴡𐴓𐴢 𐴁𐴝𐴣𐴊𐴞𐴥 𐴔𐴝𐴙𐴕𐴐𐴡𐴥𐴌 𐴈𐴝𐴣𐴊𐴡𐴌 𐴖𐴡𐴌𐴠 𐴃𐴟𐴓𐴞𐴤 𐴊𐴠𐴥, 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴓𐴝𐴌𐴞 𐴁𐴡𐴓𐴧𐴝 𐴀𐴞𐴥𐴃𐴝𐴌𐴝 𐴕𐴞𐴎𐴠 𐴀𐴠𐴒𐴧𐴗𐴝𐴤 𐴀𐴡𐴦𐴣𐴓𐴢 𐴀𐴟𐴥𐴊𐴧𐴗𐴝 𐴊𐴞𐴃𐴡 𐴕𐴡 𐴏𐴝𐴀.5”𐴀𐴞𐴥𐴃𐴝𐴌𐴝 𐴎𐴞𐴀𐴕 𐴒𐴡𐴌𐴠𐴥 𐴇𐴞𐴥𐴀𐴕 𐴔𐴝𐴙𐴕𐴐𐴡𐴥𐴌𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴁𐴠 𐴒𐴡𐴌𐴠𐴥; 𐴀𐴞𐴥𐴃𐴝𐴌𐴝 𐴃𐴡 𐴂𐴝𐴑-𐴑𐴝𐴓𐴝𐴔𐴡𐴌 𐴀𐴝𐴘𐴝𐴃𐴢 𐴓𐴠𐴙𐴑𐴧𐴝𐴥 𐴃𐴝𐴁𐴞𐴏𐴡𐴌𐴠 𐴋𐴡𐴣𐴀𐴌 𐴒𐴡𐴥𐴌𐴞 𐴁𐴝𐴕𐴝, 𐴀𐴠𐴊𐴧𐴠 𐴕𐴞𐴎𐴡𐴌 𐴉𐴟𐴐𐴝𐴥𐴑𐴡𐴌 𐴇𐴝𐴣𐴌𐴝𐴌 𐴊𐴡𐴀𐴘𐴢 𐴓𐴝𐴔𐴁𐴝 𐴒𐴡𐴌𐴠𐴥.6𐴀𐴞𐴥𐴃𐴝𐴌𐴝 𐴔𐴠𐴓𐴝-𐴐𐴡𐴥𐴁𐴝𐴃𐴢 𐴁𐴝𐴌𐴞𐴥𐴑 𐴎𐴝𐴒𐴝 𐴀𐴠𐴊𐴧𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴟𐴣𐴏𐴡𐴓𐴢 𐴃𐴡𐴑𐴧𐴝𐴌 𐴇𐴝𐴊𐴞𐴌𐴝𐴤𐴃𐴢 𐴁𐴡𐴘𐴃𐴡𐴥 𐴉𐴡𐴏𐴡𐴥𐴕 𐴒𐴡𐴌𐴠𐴥,7𐴀𐴞𐴥𐴃𐴝𐴌𐴝 𐴀𐴝𐴌𐴡𐴤, 𐴁𐴝𐴎𐴝𐴌𐴠-𐴁𐴝𐴎𐴝𐴌𐴠 𐴏𐴡𐴥𐴓𐴝𐴔 𐴉𐴝𐴘𐴃𐴡, 𐴀𐴠𐴊𐴧𐴠 𐴔𐴝𐴙𐴕𐴐𐴠𐴥 𐴀𐴞𐴥𐴃𐴝𐴌𐴝𐴌𐴠 ’𐴌𐴝𐴁𐴧𐴞𐴥, 𐴌𐴝𐴁𐴧𐴞𐴥‘ 𐴈𐴡𐴀𐴘𐴢 𐴋𐴝𐴑𐴞𐴓𐴠𐴥 𐴉𐴡𐴏𐴡𐴥𐴕 𐴒𐴡𐴌𐴠𐴥.8”𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌𐴠 ’𐴌𐴝𐴁𐴧𐴞𐴥‘ 𐴋𐴝𐴈𐴝 𐴕𐴡 𐴁𐴝𐴘𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴀𐴟𐴏𐴃𐴝𐴃𐴢 𐴃𐴡 𐴀𐴠𐴒𐴧𐴗𐴝𐴤 𐴀𐴠𐴥𐴕𐴝, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴀𐴡𐴥𐴘𐴓𐴝𐴊𐴠 𐴁𐴝𐴥𐴘 𐴁𐴝𐴥𐴘.9𐴊𐴟𐴕𐴞𐴘𐴝𐴙𐴃𐴢 𐴇𐴡𐴕𐴡𐴤𐴑𐴞𐴘𐴡𐴌𐴠 𐴁𐴝𐴉𐴢 𐴕𐴡 𐴋𐴝𐴑𐴞𐴘𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢 𐴃𐴡 𐴀𐴠𐴑𐴒𐴗𐴝𐴥 𐴀𐴠𐴥𐴕𐴝, 𐴎𐴞𐴁𐴝𐴤 𐴕𐴞𐴥𐴑𐴞 𐴀𐴝𐴏𐴔𐴝𐴕𐴡𐴃𐴢 𐴀𐴝𐴏𐴠𐴤.10𐴃𐴟𐴣𐴀𐴝𐴥𐴌𐴝𐴌𐴠 ’𐴏𐴡𐴥𐴊𐴧𐴝𐴌‘ 𐴋𐴝𐴈𐴝 𐴕𐴡 𐴁𐴝𐴘𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴏𐴡𐴥𐴊𐴧𐴝𐴌 𐴃𐴡 𐴀𐴠𐴑𐴒𐴗𐴝𐴥 𐴀𐴠𐴥𐴕𐴝, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤.11𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴠𐴦𐴕𐴞𐴑𐴞 𐴀𐴠𐴁𐴧𐴠 𐴋𐴡𐴣𐴀𐴌, 𐴀𐴞𐴥𐴃𐴠 𐴃𐴟𐴣𐴀𐴝𐴥𐴌𐴝𐴌 𐴈𐴝𐴥𐴀𐴊𐴠𐴔 𐴁𐴡𐴕𐴡𐴗𐴑.12𐴎𐴠𐴦𐴕𐴞𐴑𐴞 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴋𐴡𐴣𐴀𐴌 𐴑𐴟𐴥𐴖𐴝𐴓𐴝, 𐴀𐴞𐴥𐴃𐴝𐴌𐴠 𐴐𐴡𐴥𐴣𐴍𐴡 𐴒𐴡𐴌𐴝𐴥 𐴎𐴝𐴘𐴁𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴐𐴡𐴥𐴣𐴍𐴡 𐴑𐴟𐴥𐴖𐴝𐴓𐴝, 𐴀𐴞𐴥𐴃𐴝𐴌𐴠 𐴋𐴡𐴣𐴀𐴌 𐴒𐴡𐴌𐴝𐴥 𐴎𐴝𐴘𐴁𐴡.𐴀𐴝𐴓𐴠𐴔 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴀𐴞𐴏𐴝𐴤𐴌 𐴀𐴝𐴉𐴏𐴟𐴥𐴏𐴢
13”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴝𐴙𐴕𐴐𐴡𐴥𐴃𐴧𐴟 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴁𐴡𐴕 𐴒𐴡𐴌𐴞𐴥𐴉𐴠𐴓𐴡; 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴘𐴡𐴥 𐴕𐴡 𐴒𐴡𐴥𐴓𐴡 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴃𐴡 𐴏𐴝𐴥𐴌 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥 𐴒𐴡𐴥𐴙𐴓𐴃𐴡 𐴕𐴡 𐴊𐴡.14𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴑 𐴔𐴞𐴑𐴧𐴝𐴥𐴃𐴧𐴟 𐴃𐴟𐴣𐴀𐴝𐴥𐴌𐴝 𐴃𐴡 𐴌𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴒𐴡𐴥𐴌 𐴀𐴡𐴥𐴑𐴧𐴡𐴓𐴢 𐴓𐴟𐴄𐴢 𐴒𐴡𐴌𐴞𐴥𐴉𐴠𐴓𐴡, 𐴀𐴝𐴌𐴀𐴠𐴑 𐴔𐴞𐴑𐴧𐴝𐴥𐴃𐴧𐴟 𐴔𐴝𐴙𐴕𐴐𐴡𐴥𐴌𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴓𐴝𐴔𐴁𐴝-𐴓𐴝𐴔𐴁𐴝 𐴊𐴟𐴖𐴝 𐴒𐴡𐴌𐴡𐴤. 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴏𐴝𐴥𐴣𐴎𐴝 𐴁𐴞𐴐𐴞𐴤 𐴋𐴡𐴣𐴀𐴌 𐴉𐴝𐴘𐴁𐴝.15”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴊𐴡𐴥𐴌𐴔𐴡𐴃𐴢 𐴀𐴝𐴕𐴞𐴤 𐴁𐴡𐴓𐴧𐴝 𐴊𐴡𐴙𐴅𐴧𐴝-𐴊𐴡𐴙𐴅𐴧𐴝 𐴀𐴠𐴊𐴧𐴠 𐴎𐴝𐴒𐴝-𐴎𐴝𐴒𐴝 𐴓𐴝𐴔𐴁𐴝 𐴏𐴡𐴉𐴡𐴥𐴌 𐴒𐴡𐴌𐴡𐴤; 𐴀𐴝𐴦𐴌 𐴎𐴠𐴣𐴃𐴧𐴠𐴥 𐴀𐴠𐴎𐴧𐴡𐴕 𐴀𐴝𐴕𐴞𐴤 𐴉𐴝𐴌𐴡, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴠 𐴕𐴞𐴎𐴡𐴌 𐴃𐴟𐴥𐴖𐴝𐴌𐴡 𐴊𐴟𐴘 𐴒𐴟𐴕 𐴎𐴟𐴎𐴟𐴑𐴞 𐴁𐴝𐴕𐴡.16”𐴀𐴡𐴥 𐴀𐴝𐴣𐴊𐴝𐴤 𐴉𐴡𐴣𐴃𐴢 𐴊𐴝𐴈𐴡𐴥𐴘𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴃𐴟𐴣𐴀𐴝𐴥𐴌𐴝 𐴈𐴡𐴀 𐴊𐴠, ’𐴇𐴡𐴕𐴡𐴤𐴑𐴞𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴈𐴡𐴏𐴡𐴥𐴔 𐴇𐴝𐴥𐴘𐴓𐴠, 𐴑𐴠𐴏𐴧𐴟𐴥 𐴕𐴡; 𐴔𐴡𐴕𐴃𐴡𐴌 𐴇𐴡𐴕𐴡𐴤𐴑𐴞𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴐𐴟𐴥𐴕𐴝𐴌 𐴈𐴡𐴏𐴡𐴥𐴔 𐴇𐴝𐴥𐴘𐴓𐴠, 𐴇𐴞𐴥𐴘𐴝𐴕 𐴈𐴝𐴥𐴔𐴝𐴈𐴝 𐴀𐴝𐴊𐴝𐴘 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.‘17𐴀𐴡𐴥 𐴁𐴠𐴑𐴟𐴉𐴢 𐴀𐴠𐴊𐴧𐴠 𐴀𐴝𐴣𐴊𐴝𐴤 𐴀𐴡𐴥𐴑𐴧𐴡𐴓𐴢! 𐴇𐴡𐴕 𐴕𐴝𐴥𐴕 𐴁𐴞𐴐𐴞𐴤 𐴋𐴡𐴣𐴀𐴌, 𐴐𐴟𐴥𐴕𐴝 𐴕𐴠𐴥 𐴕𐴝𐴥𐴑𐴞 𐴐𐴟𐴥𐴕𐴝𐴌𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴠𐴥 𐴊𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏؟18𐴃𐴟𐴣𐴀𐴝𐴥𐴌𐴝 𐴘𐴝𐴀𐴕 𐴀𐴡𐴥 𐴈𐴡𐴀 𐴊𐴠 𐴑𐴞, ’𐴇𐴡𐴕𐴡𐴤𐴑𐴞𐴘𐴠 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴈𐴡𐴏𐴡𐴥𐴔 𐴇𐴝𐴥𐴘𐴓𐴠, 𐴑𐴠𐴏𐴧𐴟𐴥 𐴕𐴡; 𐴔𐴡𐴕𐴃𐴡𐴌 𐴇𐴡𐴕𐴡𐴤𐴑𐴞𐴘𐴠 𐴇𐴞𐴥𐴘𐴝𐴕𐴡𐴌 𐴖𐴡𐴌𐴠 𐴀𐴝𐴏𐴠𐴤 𐴊𐴠 𐴑𐴟𐴌𐴁𐴝𐴕𐴞𐴌 𐴈𐴡𐴏𐴡𐴥𐴔 𐴇𐴝𐴥𐴘𐴓𐴠, 𐴇𐴞𐴥𐴘𐴝𐴕 𐴈𐴝𐴥𐴔𐴝𐴈𐴝 𐴀𐴝𐴊𐴝𐴘 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.‘19𐴀𐴡𐴥 𐴀𐴝𐴣𐴊𐴝𐴤 𐴀𐴡𐴥𐴑𐴧𐴡𐴓𐴢! 𐴇𐴡𐴕 𐴕𐴝𐴥𐴕 𐴁𐴞𐴐𐴞𐴤 𐴋𐴡𐴣𐴀𐴌, 𐴑𐴟𐴌𐴁𐴝𐴕𐴞 𐴕𐴠 𐴕𐴝𐴥𐴑𐴞 𐴑𐴟𐴌𐴁𐴝𐴕𐴞𐴌𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴠𐴥 𐴊𐴠 𐴑𐴟𐴌𐴁𐴝𐴕𐴞-𐴒𐴝𐴥𐴣؟20𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴈𐴡𐴏𐴡𐴥𐴔 𐴇𐴝𐴥, 𐴀𐴞𐴥𐴃𐴠 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴖𐴡𐴌𐴠 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴁𐴠 𐴈𐴡𐴏𐴡𐴥𐴔 𐴇𐴝𐴥.21𐴀𐴝𐴦𐴌 𐴎𐴠𐴦𐴕𐴞𐴑𐴞 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴈𐴡𐴏𐴡𐴥𐴔 𐴇𐴝𐴥, 𐴀𐴞𐴥𐴃𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴁𐴟𐴥𐴃𐴡𐴌𐴠 𐴃𐴝𐴥𐴑𐴠 𐴊𐴠 𐴀𐴞𐴥𐴁𐴝𐴌 𐴁𐴠 𐴈𐴡𐴏𐴡𐴥𐴔 𐴇𐴝𐴥.22𐴎𐴠𐴦𐴕𐴞𐴑𐴞 𐴀𐴝𐴏𐴔𐴝𐴕𐴡𐴌 𐴈𐴡𐴏𐴡𐴥𐴔 𐴇𐴝𐴥, 𐴀𐴞𐴥𐴃𐴠 𐴀𐴝𐴓𐴧𐴝𐴌 𐴃𐴡𐴑𐴃𐴡𐴥𐴌 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴖𐴡𐴌𐴠 𐴎𐴞𐴁𐴝𐴤 𐴁𐴡𐴘𐴧𐴠𐴥 𐴀𐴞𐴥𐴁𐴝𐴌 𐴁𐴠 𐴈𐴡𐴏𐴡𐴥𐴔 𐴇𐴝𐴥.23”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴉𐴟𐴊𐴞𐴕𐴝𐴌, 𐴔𐴝𐴏𐴧𐴖𐴝𐴤 𐴁𐴝𐴇𐴡𐴥𐴌 𐴀𐴡𐴌, 𐴀𐴠𐴊𐴧𐴠 𐴎𐴞𐴌𐴝𐴌 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴊𐴡𐴦, 𐴓𐴠𐴑𐴞𐴕 𐴐𐴡𐴥𐴌𐴞𐴘𐴡𐴃𐴢 𐴀𐴡𐴌 𐴁𐴞𐴐𐴞𐴤 𐴊𐴝𐴔𐴞 𐴈𐴡𐴃𐴝𐴤 𐴌𐴠, 𐴘𐴝𐴥𐴕𐴞 𐴀𐴞𐴕𐴏𐴝𐴥𐴉𐴢, 𐴌𐴝𐴇𐴝𐴥𐴔 𐴀𐴠𐴊𐴧𐴠 𐴀𐴞𐴔𐴝𐴕𐴊𐴝𐴌𐴞𐴌𐴠 𐴃𐴟𐴣𐴀𐴝𐴥𐴌𐴝 𐴁𐴝𐴊𐴢 𐴊𐴞𐴉𐴠𐴥𐴓𐴡. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴞𐴀𐴕 𐴀𐴡𐴥 𐴒𐴡𐴌𐴡𐴤𐴕 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴀𐴟𐴀𐴙𐴕 𐴀𐴡𐴥 𐴁𐴝𐴊𐴢 𐴕𐴡 𐴊𐴡𐴕 𐴀𐴝𐴐𐴧𐴞𐴥𐴓𐴢.24𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴝𐴣𐴊𐴝𐴤 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴝𐴌𐴝𐴤 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴉𐴡𐴣𐴃𐴢 𐴊𐴝𐴈𐴡𐴥, 𐴎𐴠𐴃𐴝𐴌𐴝𐴤 𐴀𐴠𐴒𐴧𐴗𐴝𐴤 𐴔𐴝𐴏𐴞𐴥𐴌𐴠 𐴀𐴟𐴥𐴊𐴧𐴗𐴝 𐴏𐴝𐴥𐴘𐴧𐴡𐴌𐴠 𐴉𐴠𐴥𐴓𐴝𐴘𐴊𐴡, 𐴔𐴡𐴕𐴃𐴡𐴌 𐴀𐴟𐴣𐴄𐴢 𐴒𐴞𐴓𐴞𐴉𐴠𐴥𐴓𐴡.25”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴉𐴞𐴘𐴝𐴓𐴝𐴌 𐴀𐴠𐴊𐴧𐴠 𐴃𐴝𐴥𐴓𐴁𐴝𐴏𐴡𐴕𐴡𐴌 𐴁𐴝𐴀𐴌𐴋𐴝𐴥𐴑 𐴏𐴝𐴥𐴉𐴢 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴇𐴞𐴥𐴀𐴕𐴡𐴌 𐴁𐴟𐴥𐴃𐴡𐴌𐴠 𐴊𐴠 𐴃𐴟𐴣𐴀𐴝𐴥𐴌𐴝 𐴎𐴟𐴓𐴟𐴥𐴔 𐴀𐴠𐴊𐴧𐴠 𐴓𐴝𐴓𐴏𐴞𐴥 𐴒𐴡𐴌𐴞𐴥 𐴉𐴝𐴘𐴧𐴡𐴥 𐴊𐴠 𐴇𐴞𐴥𐴀𐴕𐴠 𐴉𐴟𐴌𐴝𐴘𐴧𐴝.26𐴀𐴡𐴥 𐴀𐴝𐴣𐴊𐴝𐴤 𐴉𐴠𐴥𐴌𐴡𐴐𐴞! 𐴀𐴝𐴒𐴠 𐴉𐴞𐴘𐴝𐴓𐴝𐴌 𐴀𐴠𐴊𐴧𐴠 𐴃𐴝𐴥𐴓𐴁𐴝𐴏𐴡𐴕𐴡𐴌 𐴁𐴟𐴥𐴃𐴡𐴌𐴡𐴌 𐴋𐴝𐴥𐴑 𐴏𐴝𐴥𐴉𐴢 𐴒𐴡𐴌𐴞𐴥𐴉𐴠𐴓𐴡, 𐴃𐴡𐴥𐴘 𐴁𐴝𐴀𐴌𐴋𐴝𐴥𐴑 𐴀𐴡𐴥 𐴏𐴝𐴥𐴉𐴢 𐴀𐴡𐴥𐴘𐴎𐴝𐴘𐴁𐴡𐴘.27”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴕𐴊𐴞𐴓𐴧𐴝 𐴈𐴡𐴁𐴡𐴌𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕𐴡𐴌𐴠 𐴊𐴡𐴥𐴓𐴝 𐴒𐴡𐴌𐴝𐴥 𐴒𐴞𐴥𐴘𐴠. 𐴇𐴞𐴥𐴀𐴕 𐴁𐴝𐴀𐴃𐴧𐴟 𐴏𐴝𐴘𐴃𐴠𐴥 𐴊𐴠 𐴐𐴟𐴥𐴕𐴊𐴡𐴌, 𐴔𐴡𐴕𐴃𐴡𐴌 𐴁𐴟𐴥𐴃𐴡𐴌𐴠 𐴔𐴡𐴌𐴝 𐴔𐴝𐴙𐴕𐴐𐴡𐴥𐴌 𐴀𐴝𐴥𐴣𐴋𐴧𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴠𐴊𐴧𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴇𐴡𐴣𐴏𐴝𐴌𐴝 𐴓𐴡𐴘 𐴉𐴟𐴌𐴝𐴘𐴧𐴝.28𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥, 𐴔𐴝𐴙𐴕𐴐𐴠𐴥 𐴁𐴝𐴀𐴃𐴧𐴟 𐴏𐴝𐴘𐴃𐴠𐴥 𐴉𐴡𐴌𐴇𐴠𐴥𐴏𐴒𐴝𐴌 𐴊𐴠𐴑𐴠𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴔𐴟𐴕𐴝𐴉𐴠𐴥𐴑𐴞 𐴀𐴠𐴊𐴧𐴠 𐴑𐴟𐴈𐴝𐴔𐴠 𐴉𐴟𐴌𐴝𐴘𐴧𐴝.29”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴈𐴡𐴁𐴡𐴌𐴡𐴌𐴠 𐴁𐴝𐴕𐴝𐴘𐴃𐴟𐴓𐴡𐴥, 𐴀𐴝𐴦𐴌 𐴉𐴡𐴌𐴇𐴠𐴥𐴏𐴒𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴈𐴡𐴁𐴡𐴌𐴡𐴌𐴠 𐴇𐴝𐴥𐴣𐴎𐴡.30𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴈𐴡𐴀 𐴊𐴠, ’𐴎𐴡𐴊𐴞 𐴀𐴝𐴣𐴀𐴌𐴝 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴡𐴑𐴃𐴡𐴥𐴃𐴢 𐴃𐴝𐴥𐴑𐴞𐴃𐴝𐴔, 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴑𐴟𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴣𐴀𐴌𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴐𐴡𐴥𐴌𐴞𐴑 𐴕𐴡 𐴀𐴡𐴥𐴘𐴃𐴝𐴔.‘31𐴇𐴠𐴥𐴀𐴕𐴒𐴡𐴌𐴞 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴕𐴞𐴎𐴡𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴡𐴥 𐴊𐴠, 𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴑𐴟𐴥𐴕 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝𐴌 𐴉𐴟𐴀𐴝𐴙𐴕.32𐴘𐴝𐴓𐴝 𐴎𐴡𐴦, 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴎𐴞𐴀𐴕 𐴐𐴟𐴥𐴌𐴟 𐴒𐴡𐴙𐴅𐴧𐴞𐴥𐴓𐴢, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴉𐴟𐴌𐴟𐴏𐴧𐴝𐴃𐴢 𐴒𐴡𐴌𐴞𐴥𐴉𐴠𐴓𐴡𐴒𐴡𐴘.33”𐴀𐴡𐴥 𐴇𐴝𐴥𐴉𐴡𐴌 𐴉𐴟𐴀𐴝𐴙𐴕 𐴇𐴝𐴥𐴉𐴢 𐴀𐴡𐴥𐴑𐴧𐴡𐴓𐴢! 𐴃𐴟𐴣𐴀𐴝𐴥𐴌𐴝 𐴎𐴟𐴎𐴟𐴑𐴡𐴌 𐴇𐴡𐴥𐴑𐴟𐴔𐴡𐴃𐴧𐴟 𐴑𐴠𐴀𐴕𐴒𐴡𐴌𐴞 𐴇𐴝𐴥𐴌𐴞𐴁𐴝؟34𐴇𐴠𐴥𐴃𐴡𐴓𐴧𐴝, 𐴉𐴟𐴥𐴕𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴕𐴡𐴁𐴞, 𐴒𐴞𐴘𐴝𐴕𐴞 𐴔𐴝𐴕𐴟𐴥𐴙𐴐𐴢, 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴙𐴌; 𐴃𐴟𐴣𐴀𐴝𐴥𐴌𐴝 𐴈𐴠𐴥𐴕𐴃𐴟 𐴇𐴡𐴊𐴟𐴥𐴕𐴡𐴌𐴠 𐴑𐴟𐴥𐴕 𐴒𐴡𐴌𐴞𐴥𐴁𐴝 𐴀𐴠𐴊𐴧𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴁𐴝, 𐴀𐴝𐴦𐴌 𐴇𐴡𐴊𐴟𐴥𐴕𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴐𐴡𐴀𐴣𐴑 𐴔𐴝𐴌𐴞𐴁𐴝𐴥 𐴀𐴠𐴊𐴧𐴠 𐴐𐴡𐴥𐴀𐴌𐴠-𐴐𐴡𐴥𐴀𐴌𐴠 𐴓𐴡𐴌𐴝𐴘𐴁𐴝𐴥.35𐴇𐴠𐴥𐴃𐴡𐴓𐴧𐴝 𐴊𐴟𐴕𐴞𐴘𐴝𐴙𐴃𐴢 𐴎𐴠𐴊𐴟𐴥𐴕 𐴁𐴠𐴈𐴡𐴏𐴟𐴥𐴌 𐴔𐴝𐴕𐴟𐴥𐴙𐴐𐴡𐴌𐴠 𐴑𐴟𐴥𐴕 𐴒𐴡𐴌𐴝𐴥 𐴒𐴞𐴥𐴘𐴠, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴡𐴥𐴘𐴁𐴝 𐴊𐴠 𐴃𐴟𐴣𐴀𐴝𐴥𐴌𐴝, 𐴁𐴠𐴈𐴡𐴏𐴟𐴥𐴌 𐴀𐴝𐴁𐴠𐴓𐴡𐴌 𐴓𐴡𐴖𐴢 𐴖𐴡𐴥𐴃𐴧𐴟 𐴓𐴡𐴥𐴃𐴞 𐴁𐴠𐴌𐴠𐴑𐴝𐴘𐴧𐴡𐴏𐴡𐴌 𐴉𐴟𐴖𐴝 𐴎𐴝𐴑𐴝𐴌𐴞𐴥𐴘𐴝𐴌 𐴓𐴡𐴖𐴢 𐴉𐴡𐴙𐴅𐴧𐴡𐴕𐴃𐴡, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴀𐴠𐴊𐴧𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴔𐴝𐴎𐴠𐴥𐴔𐴝𐴙𐴅𐴧𐴝 𐴑𐴟𐴥𐴕 𐴒𐴡𐴙𐴅𐴧𐴞𐴥𐴓𐴝.36𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴡𐴥𐴘𐴁𐴡 𐴊𐴠 𐴀𐴠 𐴕𐴡𐴏𐴡𐴥𐴓𐴢.𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢
37”𐴅𐴠𐴌𐴟𐴥𐴏𐴝𐴓𐴠𐴔, 𐴀𐴡𐴥 𐴅𐴠𐴌𐴟𐴥𐴏𐴝𐴓𐴠𐴔, 𐴃𐴟𐴘 𐴎𐴠𐴦𐴕𐴞𐴑𐴞 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴑𐴡𐴃𐴡𐴥𐴓𐴢 𐴒𐴡𐴌𐴡𐴤𐴏𐴢 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤𐴌𐴠 𐴃𐴡𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠 𐴀𐴞𐴥𐴃𐴝𐴌𐴝𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴡𐴏𐴢. 𐴑𐴟𐴀𐴣𐴌𐴞-𐴑𐴟𐴌𐴝𐴤𐴘𐴠 𐴎𐴠𐴕𐴊𐴞𐴓𐴧𐴝 𐴕𐴞𐴎𐴡𐴌 𐴏𐴡𐴥𐴀 𐴀𐴡𐴥𐴑𐴧𐴡𐴓𐴡𐴌𐴠 𐴘𐴞𐴥𐴁𐴝𐴌 𐴉𐴝𐴑𐴡𐴌 𐴁𐴟𐴥𐴃𐴡𐴌𐴠 𐴎𐴡𐴔𐴝 𐴒𐴡𐴌𐴞𐴥 𐴌𐴝𐴑𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴃𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴎𐴡𐴔𐴝 𐴒𐴡𐴌𐴞𐴥 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴝𐴀𐴛 𐴇𐴡𐴃𐴡𐴥 𐴁𐴝𐴌 𐴏𐴝𐴘𐴧𐴞𐴥 𐴊𐴠 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴕𐴡𐴥 𐴏𐴡𐴀.38𐴉𐴟𐴥𐴕𐴡, 𐴃𐴟𐴣𐴀𐴝𐴥𐴌𐴝𐴌 𐴒𐴡𐴥𐴌 𐴃𐴟𐴣𐴀𐴝𐴥𐴌𐴝𐴌 𐴏𐴟𐴑𐴡𐴌 𐴔𐴟𐴀𐴕𐴃𐴟 𐴏𐴝𐴥𐴌𐴝𐴒𐴡𐴌 𐴀𐴡𐴥𐴘𐴎𐴝𐴘𐴁𐴡𐴘.39𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴡𐴃𐴡𐴥𐴑𐴧𐴝𐴓𐴢 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴝 𐴎𐴠𐴃𐴡𐴥𐴑𐴧𐴝𐴓𐴢 𐴃𐴟𐴣𐴀𐴝𐴥𐴌𐴝 𐴕𐴡𐴥 𐴈𐴡𐴀 𐴊𐴠, ’𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤 𐴔𐴝𐴁𐴟𐴊𐴡𐴌 𐴕𐴝𐴔𐴠 𐴀𐴝𐴘𐴧𐴠𐴤𐴌.‘ “The Word for the World International