Read 𐴔𐴡𐴃𐴞 2

𐴔𐴡𐴃𐴞2

𐴀𐴞𐴏𐴝𐴤𐴌𐴠 𐴉𐴡𐴕𐴋𐴞𐴃𐴢 𐴀𐴡𐴥𐴑𐴧𐴡𐴓𐴡𐴌 𐴃𐴝𐴓𐴝𐴐𐴢

¹𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴌 𐴁𐴝𐴀𐴣𐴐𐴧𐴝 𐴈𐴠𐴥𐴌𐴟𐴊𐴡𐴌 𐴇𐴝𐴓𐴠, 𐴁𐴠𐴃𐴠𐴥𐴓𐴈𐴠𐴔 𐴐𐴡𐴥𐴀𐴌𐴡𐴃𐴢 𐴀𐴞𐴏𐴝𐴤 𐴎𐴡𐴌𐴔𐴡 𐴀𐴡𐴥𐴘 𐴁𐴝𐴦𐴊𐴠, 𐴉𐴟𐴑 𐴔𐴞𐴑𐴧𐴝𐴥𐴃𐴧𐴟 𐴇𐴡𐴦𐴎𐴧𐴡𐴕 𐴉𐴡𐴕𐴋𐴞𐴃𐴢 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴙𐴐𐴧𐴠𐴥,²𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝 𐴎𐴞𐴁𐴝𐴤 𐴎𐴡𐴌𐴔𐴡 𐴀𐴡𐴥𐴘𐴧𐴠 𐴀𐴞𐴥𐴁𐴝 𐴇𐴡𐴍𐴠𐴥؟ 𐴀𐴝𐴣𐴀𐴌𐴝 𐴉𐴟𐴑 𐴔𐴞𐴑𐴧𐴝𐴥 𐴀𐴞𐴥𐴁𐴝𐴌 𐴃𐴝𐴌𐴝 𐴊𐴠𐴑𐴞𐴥 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴞𐴤 𐴊𐴠.“

³𐴇𐴞𐴥𐴘𐴝𐴕 𐴉𐴟𐴥𐴕𐴞 𐴁𐴝𐴀𐴣𐴐𐴧𐴝 𐴈𐴠𐴥𐴌𐴟𐴊𐴢 𐴉𐴠𐴌𐴠𐴐𐴝𐴕 𐴀𐴡𐴥𐴘𐴒𐴞𐴓𐴒𐴡𐴘, 𐴇𐴠𐴥𐴕𐴊𐴞𐴓𐴧𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴡𐴥.⁴𐴘𐴡𐴥𐴒𐴧𐴗𐴝𐴘𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴁𐴠𐴒𐴧𐴟𐴥𐴕𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴊𐴡𐴓𐴝𐴒𐴡𐴌𐴞𐴥, 𐴀𐴞𐴥𐴃𐴝𐴌𐴝𐴃𐴧𐴟 𐴔𐴡𐴀𐴏𐴞𐴤 𐴇𐴡𐴍𐴠𐴥 𐴎𐴡𐴌𐴔𐴡 𐴀𐴡𐴥𐴘𐴁𐴝𐴌 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴎𐴝𐴏𐴝𐴘 𐴒𐴡𐴙𐴅𐴧𐴞𐴥𐴓𐴢.⁵𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴌 𐴁𐴠𐴃𐴠𐴥𐴓𐴈𐴠𐴔 𐴀𐴡𐴃𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴡𐴁𐴞𐴘𐴠 𐴀𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴠𐴥:⁶’𐴀𐴡𐴥 𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴌 𐴁𐴠𐴃𐴠𐴥𐴓𐴈𐴠𐴔,𐴘𐴡𐴇𐴟𐴥𐴊𐴞𐴘𐴝𐴌 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴃𐴟𐴘 𐴇𐴡𐴕𐴡𐴤 𐴔𐴞𐴑𐴧𐴝𐴥𐴃𐴧𐴟 𐴐𐴡𐴥𐴣𐴍𐴡 𐴕𐴡;𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌 𐴁𐴟𐴥𐴃𐴡𐴃𐴧𐴟 𐴀𐴠𐴀𐴕 𐴀𐴠𐴥𐴎𐴧𐴡𐴕 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴝𐴘𐴁𐴡𐴤,𐴎𐴞𐴁𐴝𐴤𐴘𐴠 𐴀𐴝𐴣𐴀𐴌 𐴁𐴡𐴕𐴊𐴝 𐴀𐴞𐴏𐴌𐴝𐴥𐴙𐴓𐴞𐴌𐴠 𐴏𐴡𐴌𐴝𐴘𐴁𐴡𐴥.‘ “

⁷𐴇𐴠𐴥𐴃𐴟𐴕𐴡𐴃𐴢 𐴈𐴠𐴥𐴌𐴟𐴊𐴠 𐴉𐴡𐴕𐴋𐴞𐴃𐴢 𐴄𐴟𐴥𐴕𐴡𐴌𐴠 𐴀𐴝𐴙𐴊𐴧𐴡𐴕𐴠 𐴔𐴝𐴃𐴝𐴘 𐴎𐴝𐴕𐴞𐴓𐴡𐴘𐴧𐴠𐴥 𐴊𐴠, 𐴃𐴝𐴌𐴝 𐴖𐴝 𐴁𐴡𐴌𐴝𐴁𐴡𐴌 𐴇𐴡𐴃𐴟𐴥𐴕𐴡𐴃𐴢 𐴊𐴝𐴈𐴝𐴤 𐴒𐴞𐴥𐴀𐴓𐴢.⁸𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴁𐴠𐴃𐴠𐴥𐴓𐴈𐴠𐴔𐴡𐴃𐴢 𐴊𐴞𐴉𐴠𐴍𐴝𐴥𐴘𐴧𐴠, ”𐴃𐴟𐴣𐴀𐴝𐴥𐴌𐴝 𐴎𐴝𐴘 𐴇𐴠𐴥 𐴒𐴟𐴌𐴝 𐴉𐴟𐴖𐴝 𐴖𐴝𐴌𐴠 𐴐𐴟𐴥𐴕𐴊𐴡𐴌𐴒𐴡𐴌𐴞 𐴃𐴟𐴖𐴡𐴒𐴡𐴥𐴘. 𐴀𐴞𐴥𐴁𐴝𐴌𐴠 𐴓𐴡𐴦𐴃𐴢 𐴉𐴝𐴘𐴓𐴠 𐴀𐴝𐴣𐴀𐴌𐴠𐴥 𐴈𐴡𐴥𐴁𐴡𐴌 𐴊𐴞𐴥𐴘𐴡, 𐴎𐴠𐴀𐴕𐴠 𐴀𐴝𐴀𐴛 𐴘𐴡𐴥 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴌𐴞𐴥 𐴉𐴝𐴌𐴞.“

⁹𐴀𐴞𐴥𐴃𐴝𐴌𐴝 𐴁𐴝𐴀𐴣𐴐𐴧𐴝𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴁𐴝𐴐𐴝𐴥 𐴓𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴉𐴟𐴑 𐴔𐴞𐴑𐴧𐴝𐴥 𐴎𐴠 𐴃𐴝𐴌𐴝 𐴊𐴠𐴙𐴑𐴧𐴞𐴥𐴓𐴢, 𐴘𐴞𐴥𐴁𐴝 𐴉𐴟𐴖𐴝 𐴖𐴝 𐴎𐴞𐴘𐴡𐴥𐴣𐴃𐴢 𐴀𐴝𐴏𐴠𐴤 𐴀𐴞𐴥𐴣𐴘𐴡𐴃𐴢 𐴎𐴝𐴘 𐴕𐴡𐴥 𐴃𐴞𐴥𐴘𐴝 𐴉𐴡𐴙𐴅𐴧𐴡𐴕𐴃𐴡 𐴀𐴞𐴥𐴃𐴝𐴌𐴝𐴌 𐴀𐴝𐴒𐴠-𐴀𐴝𐴒𐴠 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢.¹⁰𐴃𐴝𐴌𐴝 𐴖𐴝 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝 𐴀𐴡𐴥𐴊𐴡𐴌𐴁𐴝𐴀𐴌𐴝 𐴑𐴟𐴥𐴐𐴞 𐴀𐴡𐴥𐴘𐴧𐴠.¹¹𐴀𐴞𐴥𐴃𐴝𐴌𐴝 𐴒𐴡𐴥𐴌 𐴒𐴝𐴥𐴕𐴡𐴃𐴢 𐴉𐴡𐴀𐴣𐴏𐴞𐴘𐴡𐴌𐴠, 𐴉𐴟𐴖𐴝 𐴖𐴝𐴌𐴠 𐴀𐴞𐴥𐴁𐴝𐴌 𐴔𐴝𐴦 𐴔𐴡𐴌𐴞𐴘𐴝𐴔𐴡𐴌 𐴉𐴟𐴥𐴖𐴝𐴣𐴃𐴞 𐴊𐴠𐴙𐴑𐴧𐴠𐴥; 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴔𐴠𐴍𐴞𐴃𐴢 𐴉𐴡𐴌𐴞 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴙𐴅𐴧𐴠𐴥. 𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴁𐴝𐴐𐴧𐴟𐴤 𐴒𐴟𐴥𐴕 𐴑𐴟𐴥𐴓𐴞 𐴐𐴟𐴥𐴕𐴝, 𐴓𐴟𐴁𐴝𐴕 𐴀𐴠𐴊𐴧𐴠 𐴔𐴟𐴌 𐴀𐴝𐴣𐴃𐴡𐴌 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌𐴠 𐴇𐴝𐴥𐴊𐴞𐴘𐴝 𐴊𐴞𐴦𐴘𐴠𐴥.¹²𐴀𐴝𐴦𐴌 𐴈𐴠𐴥𐴌𐴟𐴊𐴡𐴌 𐴇𐴠𐴥𐴍𐴠 𐴖𐴝𐴦𐴉𐴠𐴏𐴢 𐴕𐴡 𐴎𐴝𐴘𐴃𐴡 𐴐𐴡𐴥𐴂𐴧𐴡𐴕𐴡𐴃𐴢 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴟𐴥𐴣𐴐𐴞𐴘𐴝𐴌𐴞 𐴉𐴝𐴘, 𐴀𐴞𐴥𐴃𐴝𐴌𐴝 𐴀𐴝𐴌𐴀𐴠𐴑 𐴁𐴡𐴓𐴞 𐴕𐴞𐴎𐴡𐴌 𐴔𐴟𐴓𐴧𐴟𐴑𐴡𐴃𐴢 𐴉𐴞𐴥𐴌𐴞 𐴒𐴞𐴦𐴘𐴠𐴥𐴒𐴡𐴘.

𐴀𐴞𐴅𐴞𐴤𐴂𐴢 𐴊𐴠𐴐𐴡𐴃𐴢 𐴊𐴝𐴥𐴘𐴒𐴞𐴘𐴠𐴒𐴡𐴘

¹³𐴉𐴡𐴕𐴋𐴞𐴃𐴢 𐴄𐴟𐴥𐴕 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴔𐴝𐴁𐴟𐴊𐴡𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴘𐴟𐴏𐴟𐴥𐴉𐴡𐴌𐴠 𐴐𐴡𐴥𐴂𐴧𐴡𐴕𐴡𐴃𐴢 𐴊𐴝𐴈𐴝𐴤 𐴊𐴞𐴥 𐴈𐴡𐴀𐴌 𐴊𐴠, ”𐴀𐴟𐴍𐴡𐴥, 𐴉𐴟𐴖𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴝𐴦𐴌𐴠 𐴓𐴡𐴦𐴘𐴢 𐴀𐴞𐴅𐴞𐴤𐴂𐴡𐴃𐴢 𐴊𐴝𐴥𐴘𐴎𐴡𐴒𐴡𐴘. 𐴀𐴝𐴀𐴛 𐴎𐴠𐴃𐴡𐴥𐴊𐴞𐴕 𐴕𐴡𐴥 𐴈𐴡𐴀𐴘𐴢 𐴇𐴠𐴥𐴃𐴡𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴇𐴠𐴥𐴍𐴠 𐴃𐴝𐴥𐴑𐴞𐴘𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴠𐴥𐴌𐴟𐴊𐴠 𐴉𐴟𐴖𐴝 𐴖𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴃𐴟𐴖𐴝𐴘𐴁𐴡𐴥.“

¹⁴𐴇𐴠𐴥𐴃𐴟𐴕𐴡𐴃𐴢 𐴘𐴟𐴏𐴟𐴥𐴉𐴢 𐴀𐴟𐴍𐴞𐴤 𐴌𐴝𐴙𐴃𐴢 𐴃𐴝𐴥𐴑𐴞𐴃𐴠 𐴉𐴟𐴖𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴝𐴦𐴌𐴠 𐴓𐴡𐴦𐴘𐴢, 𐴀𐴞𐴅𐴞𐴤𐴂𐴡𐴓𐴧𐴝 𐴁𐴝𐴐𐴝𐴥 𐴓𐴡𐴥𐴘𐴧𐴠,¹⁵𐴀𐴝𐴦𐴌 𐴈𐴠𐴥𐴌𐴟𐴊𐴢 𐴕𐴡𐴥 𐴔𐴡𐴌𐴠 𐴉𐴡𐴙𐴅𐴧𐴡𐴕𐴃𐴡 𐴇𐴠𐴥𐴍𐴠 𐴃𐴝𐴥𐴙𐴑𐴧𐴞𐴓𐴢. 𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴔𐴝𐴁𐴟𐴊𐴠 𐴕𐴡𐴁𐴞𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥, ”𐴀𐴝𐴀𐴛 𐴀𐴝𐴣𐴀𐴌 𐴉𐴟𐴖𐴝𐴌𐴠 𐴀𐴞𐴅𐴞𐴤𐴂𐴡𐴃𐴧𐴟 𐴋𐴝𐴈𐴝𐴘 𐴀𐴝𐴙𐴕𐴧𐴞𐴤.“

𐴈𐴠𐴥𐴌𐴟𐴊𐴠 𐴒𐴟𐴌𐴝 𐴉𐴟𐴀𐴝𐴙𐴕 𐴔𐴝𐴌𐴞𐴉𐴠𐴥𐴓𐴝𐴘𐴧𐴠

¹⁶𐴈𐴠𐴥𐴌𐴟𐴊𐴠 𐴎𐴠𐴣𐴃𐴧𐴠𐴥 𐴉𐴡𐴕𐴋𐴞𐴃𐴢 𐴄𐴟𐴥𐴕𐴠 𐴘𐴡𐴥𐴒𐴧𐴗𐴝𐴌𐴠 𐴁𐴡𐴥𐴀𐴣𐴃𐴢 𐴊𐴞𐴥𐴘𐴠 𐴊𐴠 𐴎𐴝𐴙𐴕𐴧𐴠𐴥, 𐴘𐴡𐴥𐴒𐴧𐴗𐴝𐴃𐴧𐴟 𐴁𐴞𐴐𐴞𐴤 𐴒𐴟𐴐𐴧𐴝𐴤 𐴀𐴟𐴙𐴄𐴧𐴠𐴥; 𐴀𐴝𐴦𐴌 𐴇𐴠𐴥 𐴉𐴡𐴕𐴋𐴞𐴃𐴢 𐴄𐴟𐴥𐴕𐴡𐴃𐴧𐴟 𐴎𐴠 𐴀𐴡𐴑𐴃𐴡𐴥𐴌 𐴈𐴡𐴃𐴝𐴤 𐴎𐴝𐴕𐴞𐴓𐴡𐴀𐴙𐴓𐴢 𐴇𐴠𐴥 𐴀𐴡𐴑𐴃𐴡𐴥𐴌 𐴀𐴞𐴥𐴏𐴝𐴉𐴢 𐴔𐴡𐴎𐴞𐴕، 𐴁𐴠𐴃𐴠𐴥𐴓𐴈𐴠𐴔𐴡𐴃𐴢 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴎𐴝𐴒𐴝 𐴀𐴡𐴥𐴑𐴧𐴡𐴓𐴡𐴃𐴢 𐴊𐴟𐴘 𐴁𐴡𐴏𐴡𐴥𐴌 𐴀𐴠𐴊𐴧𐴠 𐴘𐴝𐴥𐴌 𐴕𐴞𐴏𐴡𐴌 𐴎𐴠𐴊𐴟𐴥𐴕 𐴔𐴡𐴌𐴡𐴃𐴉𐴟𐴀𐴝𐴙𐴕 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴔𐴝𐴕𐴟𐴥𐴙𐴐𐴢 𐴊𐴞𐴉𐴠𐴍𐴝𐴥𐴘 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠.¹⁷𐴇𐴞𐴥𐴘𐴝𐴕𐴠 𐴕𐴡𐴁𐴞 𐴘𐴝𐴌𐴔𐴞𐴥𐴘𐴝𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥𐴘𐴧𐴠,¹⁸”𐴌𐴝𐴔𐴝𐴥 𐴐𐴡𐴥𐴀𐴌𐴡𐴃𐴢 𐴀𐴠𐴒𐴧𐴗𐴝𐴤 𐴀𐴝𐴁𐴝𐴏𐴢 𐴉𐴟𐴥𐴕𐴝 𐴒𐴞𐴥𐴘𐴠,𐴈𐴝𐴣𐴊𐴝𐴕𐴞𐴌 𐴀𐴠𐴊𐴧𐴠 𐴁𐴞𐴐𐴞𐴤 𐴉𐴠𐴌𐴠𐴐𐴝𐴕𐴞𐴌.𐴌𐴝𐴇𐴠𐴥𐴓𐴝𐴘𐴠 𐴕𐴞𐴎𐴡𐴌 𐴉𐴟𐴀𐴝𐴙𐴕 𐴊𐴡𐴓𐴧𐴝 𐴈𐴝𐴣𐴊𐴠𐴌,𐴀𐴝𐴦𐴌 𐴃𐴡𐴏𐴡𐴥𐴓𐴧𐴞 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥𐴌,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴝𐴌 𐴕𐴝𐴥𐴘.“

𐴀𐴞𐴅𐴞𐴤𐴂𐴡𐴃𐴧𐴟 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥

¹⁹𐴎𐴠𐴣𐴃𐴧𐴠𐴥 𐴈𐴠𐴥𐴌𐴟𐴊𐴢 𐴔𐴡𐴌𐴞𐴒𐴞𐴘𐴡𐴥𐴘, 𐴔𐴝𐴁𐴟𐴊𐴡𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴘𐴟𐴏𐴟𐴥𐴉𐴡𐴌𐴠 𐴀𐴞𐴅𐴞𐴤𐴂𐴡𐴃𐴢 𐴐𐴡𐴥𐴂𐴧𐴡𐴕𐴡𐴃𐴢 𐴊𐴝𐴈𐴝𐴤𐴊𐴞𐴘𐴠,²⁰𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴟𐴍𐴡𐴥, 𐴉𐴟𐴖𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴝𐴦𐴌𐴠 𐴓𐴡𐴦𐴘𐴢 𐴀𐴞𐴏𐴌𐴝𐴥𐴙𐴓𐴢 𐴔𐴟𐴓𐴧𐴟𐴑𐴡𐴃𐴢 𐴖𐴝𐴦𐴉𐴠𐴏𐴢 𐴎𐴡𐴦𐴒𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴃𐴝𐴌𐴝𐴤 𐴕𐴞𐴑𐴞 𐴉𐴟𐴖𐴝 𐴖𐴝𐴌𐴠 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴃𐴟𐴖𐴝𐴀𐴙𐴓𐴢 𐴀𐴞𐴥𐴃𐴝𐴌𐴝 𐴔𐴡𐴌𐴞𐴒𐴞𐴘𐴡𐴥𐴘.“

²¹𐴃𐴡𐴥𐴘 𐴘𐴟𐴏𐴟𐴥𐴉𐴢 𐴀𐴟𐴍𐴞𐴤, 𐴉𐴟𐴖𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴝𐴦𐴌𐴠 𐴓𐴡𐴦𐴘𐴢 𐴀𐴞𐴏𐴌𐴝𐴥𐴙𐴓𐴢 𐴔𐴟𐴓𐴧𐴟𐴑𐴡𐴃𐴢 𐴖𐴝𐴦𐴉𐴠𐴏𐴢 𐴀𐴝𐴀𐴘𐴒𐴞𐴘𐴡𐴘.²²𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴎𐴠𐴃𐴧𐴡𐴥𐴃𐴢 𐴀𐴠𐴕𐴊𐴞𐴓𐴧𐴝 𐴉𐴟𐴥𐴙𐴕𐴧𐴠, 𐴀𐴝𐴌𐴑𐴠𐴓𐴝𐴘𐴡𐴏𐴠 𐴘𐴡𐴇𐴟𐴥𐴊𐴞𐴘𐴝𐴃𐴢 𐴃𐴝𐴌 𐴁𐴝𐴉𐴢 𐴈𐴠𐴥𐴌𐴟𐴊𐴡𐴌 𐴎𐴝𐴒𐴝𐴃𐴢 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴠𐴥𐴌, 𐴃𐴡𐴥𐴘 𐴘𐴡𐴥𐴒𐴧𐴗𐴝 𐴇𐴠𐴥𐴍𐴠 𐴎𐴝𐴘𐴃𐴠 𐴋𐴡𐴦𐴌𐴝𐴘𐴧𐴠𐴥. 𐴁𐴝𐴦𐴊𐴠 𐴐𐴡𐴥𐴂𐴧𐴡𐴕𐴡𐴃𐴢 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴟𐴥𐴣𐴐𐴞𐴘𐴝𐴌𐴞 𐴉𐴝𐴘, 𐴒𐴝𐴓𐴞𐴓𐴢 𐴀𐴠𐴓𐴝𐴑𐴝𐴃𐴢 𐴒𐴞𐴦𐴘𐴠𐴥𐴒𐴡𐴘,²³𐴀𐴝𐴦𐴌 𐴎𐴝𐴘 𐴕𐴝𐴏𐴝𐴥𐴌𐴝𐴃𐴢 𐴕𐴝𐴔𐴡𐴌 𐴀𐴠𐴑𐴧𐴝𐴥𐴕 𐴐𐴡𐴥𐴀𐴌𐴡𐴃𐴢 𐴁𐴡𐴐𐴡𐴥𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠. 𐴇𐴠𐴥𐴕𐴊𐴞𐴓𐴧𐴝 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥, ”𐴀𐴞𐴥𐴁𐴝𐴌𐴠 𐴕𐴝𐴏𐴝𐴥𐴌𐴞 𐴈𐴡𐴖𐴝𐴤 𐴎𐴝𐴘𐴁𐴡.“

The Word for the World International

https://app.library.bible/content/87faca8b51c22590