Read 𐴔𐴡𐴃𐴞 1

𐴔𐴡𐴃𐴞1

𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴉𐴞𐴏𐴧𐴝𐴥𐴕

¹𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴊𐴝𐴖𐴟𐴊𐴡𐴌 𐴕𐴡𐴏𐴡𐴥𐴓𐴢 𐴀𐴡𐴌, 𐴀𐴝𐴦𐴌 𐴊𐴝𐴖𐴟𐴊𐴢 𐴀𐴡𐴥𐴙𐴓𐴊𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴕𐴡𐴏𐴡𐴥𐴓𐴡𐴌. 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴉𐴞𐴏𐴧𐴝𐴥𐴕𐴡𐴌 𐴉𐴡𐴌𐴞𐴏𐴡 𐴀𐴠𐴕𐴊𐴞𐴓𐴧𐴝:

²𐴀𐴞𐴁𐴌𐴝𐴇𐴞𐴥𐴔𐴡𐴌 𐴉𐴟𐴖𐴝 𐴀𐴞𐴏𐴝𐴈𐴝𐴥𐴑; 𐴀𐴞𐴏𐴝𐴈𐴝𐴥𐴑𐴡𐴌 𐴉𐴟𐴖𐴝 𐴘𐴝𐴑𐴟𐴁𐴢; 𐴘𐴝𐴑𐴟𐴁𐴡𐴌 𐴉𐴟𐴖𐴝 𐴘𐴡𐴇𐴟𐴥𐴊𐴝 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴁𐴝𐴥𐴘𐴧𐴝𐴙𐴕.³𐴘𐴡𐴇𐴟𐴥𐴊𐴝𐴌 𐴉𐴟𐴖𐴝 𐴉𐴝𐴌𐴠𐴏𐴢 𐴀𐴠𐴊𐴧𐴠 𐴎𐴠𐴌𐴝, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴔𐴝𐴦 𐴀𐴝𐴐𐴧𐴞𐴥𐴓𐴢 𐴃𐴝𐴔𐴝𐴌; 𐴉𐴝𐴌𐴠𐴏𐴡𐴌 𐴉𐴟𐴖𐴝 𐴇𐴞𐴏𐴌𐴡𐴕; 𐴇𐴞𐴏𐴌𐴡𐴕𐴡𐴌 𐴉𐴟𐴖𐴝 𐴌𐴝𐴔.⁴𐴌𐴝𐴔𐴡𐴌 𐴉𐴟𐴖𐴝 𐴀𐴝𐴔𐴧𐴞𐴕𐴝𐴊𐴝𐴁𐴢; 𐴀𐴝𐴔𐴧𐴞𐴕𐴝𐴊𐴝𐴁𐴡𐴌 𐴉𐴟𐴖𐴝 𐴕𐴝𐴐𐴡𐴕; 𐴕𐴝𐴐𐴡𐴕𐴡𐴌 𐴉𐴟𐴖𐴝 𐴏𐴝𐴥𐴓𐴔𐴡𐴕.⁵𐴏𐴝𐴥𐴓𐴔𐴡𐴕𐴡𐴌 𐴉𐴟𐴖𐴝 𐴁𐴡𐴀𐴝𐴎𐴢, 𐴘𐴡𐴥𐴒𐴧𐴗𐴝𐴌 𐴔𐴝𐴦 𐴀𐴝𐴐𐴧𐴞𐴥𐴓𐴢 𐴌𐴝𐴇𐴝𐴥𐴁𐴝; 𐴁𐴡𐴀𐴝𐴎𐴡𐴌 𐴉𐴟𐴖𐴝 𐴀𐴡𐴁𐴠𐴊𐴢, 𐴘𐴡𐴥𐴒𐴧𐴗𐴝𐴌 𐴔𐴝𐴦 𐴀𐴝𐴐𐴧𐴞𐴥𐴓𐴢 𐴌𐴟𐴀𐴃𐴢; 𐴀𐴡𐴁𐴠𐴊𐴡𐴌 𐴉𐴟𐴖𐴝 𐴅𐴠𐴏𐴞.⁶𐴅𐴠𐴏𐴞𐴌 𐴉𐴟𐴖𐴝 𐴁𐴝𐴀𐴣𐴐𐴧𐴝 𐴊𐴝𐴖𐴟𐴊𐴢.
𐴊𐴝𐴖𐴟𐴊𐴡𐴌 𐴉𐴟𐴖𐴝 𐴏𐴡𐴥𐴓𐴡𐴔𐴝𐴕, 𐴘𐴡𐴥𐴒𐴧𐴗𐴝𐴌 𐴔𐴝𐴦 𐴀𐴡𐴥𐴙𐴓𐴊𐴠 𐴁𐴡𐴌𐴐𐴞𐴥𐴁𐴝, 𐴎𐴞𐴁𐴝𐴤 𐴀𐴝𐴒𐴠 𐴀𐴟𐴌𐴞𐴘𐴝𐴌 𐴁𐴡𐴖𐴢 𐴀𐴝𐴐𐴧𐴞𐴥𐴓𐴢.⁷𐴏𐴡𐴥𐴓𐴡𐴔𐴝𐴕𐴡𐴌 𐴉𐴟𐴖𐴝 𐴌𐴠𐴇𐴡𐴁𐴡𐴔; 𐴌𐴠𐴇𐴡𐴁𐴡𐴔𐴡𐴌 𐴉𐴟𐴖𐴝 𐴀𐴝𐴁𐴞𐴘𐴝𐴤; 𐴀𐴝𐴁𐴞𐴘𐴝𐴤𐴌 𐴉𐴟𐴖𐴝 𐴀𐴝𐴏𐴝.⁸𐴀𐴝𐴏𐴝𐴌 𐴉𐴟𐴖𐴝 𐴅𐴠𐴇𐴡𐴥𐴐𐴝𐴉𐴝𐴃𐴢; 𐴅𐴠𐴇𐴡𐴥𐴐𐴝𐴉𐴝𐴃𐴡𐴌 𐴉𐴟𐴖𐴝 𐴅𐴡𐴌𐴝𐴔; 𐴅𐴡𐴌𐴝𐴔𐴡𐴌 𐴉𐴟𐴖𐴝 𐴀𐴟𐴎𐴞𐴘𐴝.⁹𐴀𐴟𐴎𐴞𐴘𐴝𐴌 𐴉𐴟𐴖𐴝 𐴅𐴡𐴃𐴝𐴔; 𐴅𐴡𐴃𐴝𐴔𐴡𐴌 𐴉𐴟𐴖𐴝 𐴀𐴝𐴇𐴝𐴤𐴎𐴢; 𐴀𐴝𐴇𐴝𐴤𐴎𐴡𐴌 𐴉𐴟𐴖𐴝 𐴈𐴠𐴥𐴎𐴠𐴑𐴞𐴘𐴝.¹⁰𐴈𐴠𐴥𐴎𐴠𐴑𐴞𐴘𐴝𐴌 𐴉𐴟𐴖𐴝 𐴔𐴝𐴕𐴝𐴏𐴠𐴥; 𐴔𐴝𐴕𐴝𐴏𐴠𐴥𐴌 𐴉𐴟𐴖𐴝 𐴀𐴝𐴔𐴡𐴕; 𐴀𐴝𐴔𐴡𐴕𐴡𐴌 𐴉𐴟𐴖𐴝 𐴅𐴡𐴏𐴞𐴥𐴘𐴝.¹¹𐴅𐴡𐴏𐴞𐴥𐴘𐴝𐴌 𐴉𐴟𐴖𐴝 𐴅𐴠𐴑𐴡𐴕𐴞𐴥𐴘𐴝 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴁𐴝𐴥𐴘𐴧𐴝𐴙𐴕. 𐴀𐴞𐴥𐴃𐴝𐴌𐴝𐴌 𐴎𐴡𐴌𐴔𐴡 𐴀𐴡𐴣𐴃𐴧𐴠𐴤 𐴀𐴡𐴥𐴀𐴙𐴓𐴢 𐴎𐴠𐴣𐴃𐴧𐴠𐴥 𐴀𐴞𐴏𐴌𐴝𐴥𐴙𐴓𐴢 𐴑𐴡𐴗𐴔𐴡𐴌𐴠 𐴁𐴡𐴕𐴊𐴞 𐴁𐴝𐴕𐴝𐴘 𐴁𐴝𐴁𐴞𐴓𐴡𐴕 𐴊𐴠𐴐𐴡𐴃𐴢 𐴓𐴡𐴘𐴎𐴝𐴌.

¹²𐴀𐴞𐴀𐴕 𐴀𐴡𐴥𐴙𐴓𐴊𐴠 𐴀𐴞𐴥𐴃𐴝𐴌𐴝𐴌𐴠 𐴁𐴡𐴕𐴊𐴞 𐴁𐴝𐴕𐴝𐴘 𐴁𐴝𐴁𐴞𐴓𐴡𐴕𐴡𐴃𐴢 𐴓𐴡𐴘𐴎𐴝𐴘 𐴁𐴝𐴦𐴊𐴠: 𐴅𐴠𐴑𐴡𐴕𐴞𐴥𐴘𐴝𐴌 𐴉𐴟𐴖𐴝 𐴐𐴝𐴥𐴓𐴃𐴞𐴘𐴠𐴓𐴢, 𐴐𐴝𐴥𐴓𐴃𐴞𐴘𐴠𐴓𐴡𐴌 𐴉𐴟𐴖𐴝 𐴎𐴠𐴌𐴟𐴁𐴝𐴁𐴠𐴓𐴢.¹³𐴎𐴠𐴌𐴟𐴁𐴝𐴁𐴠𐴓𐴡𐴌 𐴉𐴟𐴖𐴝 𐴀𐴝𐴁𐴞𐴇𐴟𐴥𐴊𐴢; 𐴀𐴝𐴁𐴞𐴇𐴟𐴥𐴊𐴡𐴌 𐴉𐴟𐴖𐴝 𐴀𐴠𐴓𐴞𐴘𐴝𐴑𐴞𐴥𐴔; 𐴀𐴠𐴓𐴞𐴘𐴝𐴑𐴞𐴥𐴔𐴡𐴌 𐴉𐴟𐴖𐴝 𐴀𐴝𐴎𐴡𐴌.¹⁴𐴀𐴝𐴎𐴡𐴌𐴡𐴌 𐴉𐴟𐴖𐴝 𐴏𐴝𐴥𐴊𐴡𐴑; 𐴏𐴝𐴥𐴊𐴡𐴑𐴡𐴌 𐴉𐴟𐴖𐴝 𐴀𐴝𐴑𐴞𐴔; 𐴀𐴝𐴑𐴞𐴔𐴡𐴌 𐴉𐴟𐴖𐴝 𐴀𐴠𐴓𐴞𐴇𐴟𐴥𐴊𐴢.¹⁵𐴀𐴠𐴓𐴞𐴇𐴟𐴥𐴊𐴡𐴌 𐴉𐴟𐴖𐴝 𐴀𐴠𐴓𐴞𐴘𐴝𐴎𐴝𐴌; 𐴀𐴠𐴓𐴞𐴘𐴝𐴎𐴝𐴌𐴡𐴌 𐴉𐴟𐴖𐴝 𐴔𐴝𐴃𐴝𐴕; 𐴔𐴝𐴃𐴝𐴕𐴡𐴌 𐴉𐴟𐴖𐴝 𐴘𐴝𐴑𐴟𐴁𐴢.¹⁶𐴀𐴝𐴦𐴌 𐴘𐴝𐴑𐴟𐴁𐴡𐴌 𐴉𐴟𐴖𐴝 𐴀𐴡𐴥𐴙𐴓𐴊𐴠 𐴔𐴡𐴌𐴞𐴘𐴝𐴔𐴡𐴌 𐴇𐴡𐴥𐴐𐴡𐴔 𐴘𐴟𐴏𐴟𐴥𐴉𐴢. 𐴇𐴠𐴥 𐴔𐴡𐴌𐴞𐴘𐴝𐴔𐴡𐴃𐴧𐴟 𐴀𐴞𐴏𐴝𐴤 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢, 𐴎𐴞𐴁𐴝𐴤𐴌𐴠 𐴔𐴡𐴀𐴏𐴞𐴤 𐴁𐴡𐴥𐴓𐴞 𐴈𐴡𐴀.

¹⁷𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴀𐴞𐴁𐴌𐴝𐴇𐴞𐴥𐴔𐴡𐴃𐴧𐴟 𐴓𐴡𐴥𐴃𐴞 𐴊𐴝𐴖𐴟𐴊𐴢 𐴉𐴡𐴙𐴅𐴧𐴡𐴕𐴃𐴡 𐴏𐴡𐴙𐴊𐴧𐴡𐴥 𐴉𐴞𐴏𐴧𐴝𐴥𐴕. 𐴊𐴝𐴖𐴟𐴊𐴡𐴃𐴧𐴟 𐴓𐴡𐴥𐴃𐴞 𐴁𐴝𐴁𐴞𐴓𐴡𐴕𐴡𐴃𐴢 𐴁𐴡𐴕𐴊𐴞𐴃𐴢 𐴓𐴡𐴘𐴎𐴝 𐴉𐴡𐴙𐴅𐴧𐴡𐴕𐴃𐴡 𐴏𐴡𐴙𐴊𐴧𐴡𐴥 𐴉𐴞𐴏𐴧𐴝𐴥𐴕; 𐴀𐴝𐴦𐴌 𐴁𐴡𐴕𐴊𐴞 𐴁𐴝𐴕𐴝𐴘 𐴁𐴝𐴁𐴞𐴓𐴡𐴕𐴡𐴃𐴢 𐴓𐴡𐴘𐴎𐴝𐴃𐴧𐴟 𐴓𐴡𐴥𐴃𐴞 𐴔𐴡𐴀𐴏𐴞𐴤 𐴉𐴡𐴙𐴅𐴧𐴡𐴕𐴃𐴡 𐴏𐴡𐴙𐴊𐴧𐴡𐴥 𐴉𐴞𐴏𐴧𐴝𐴥𐴕.

𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴎𐴡𐴌𐴔𐴡

¹⁸𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴎𐴡𐴌𐴔𐴡 𐴀𐴠𐴕𐴊𐴞𐴓𐴧𐴝 𐴒𐴡𐴌𐴞 𐴀𐴡𐴥𐴘𐴧𐴠: 𐴀𐴞𐴥𐴁𐴝𐴌 𐴔𐴝𐴦 𐴔𐴡𐴌𐴞𐴘𐴝𐴔𐴡𐴌 𐴎𐴟𐴌𐴝𐴒𐴝𐴃𐴝𐴤 𐴘𐴟𐴏𐴟𐴥𐴉𐴢 𐴓𐴡𐴥𐴘 𐴀𐴡𐴥𐴀𐴙𐴓𐴢, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴔𐴞𐴓𐴔𐴞𐴓𐴝𐴁𐴢 𐴒𐴡𐴌𐴞𐴥𐴁𐴝𐴌 𐴀𐴝𐴒𐴠, 𐴂𐴝𐴑-𐴌𐴟𐴀𐴌 𐴑𐴟𐴊𐴟𐴌𐴟𐴃𐴠 𐴇𐴞𐴥𐴁𐴝 𐴇𐴝𐴥𐴔𐴞𐴓𐴢 𐴀𐴡𐴥𐴘𐴧𐴠 𐴊𐴠 𐴉𐴝𐴦 𐴒𐴞𐴘𐴠𐴥.¹⁹𐴇𐴞𐴥𐴁𐴝𐴌 𐴇𐴡𐴥𐴐𐴡𐴔 𐴘𐴟𐴏𐴟𐴥𐴉𐴢 𐴉𐴡𐴌𐴇𐴠𐴥𐴏𐴒𐴝𐴌 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴃𐴧𐴟 𐴎𐴠𐴃𐴧𐴡𐴥𐴃𐴢 𐴔𐴡𐴌𐴞𐴘𐴝𐴔𐴡𐴌𐴠 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴐𐴡𐴥𐴌𐴡𐴔 𐴊𐴞𐴥𐴃𐴡 𐴔𐴡𐴕𐴠 𐴕𐴡 𐴈𐴡𐴀𐴌, 𐴇𐴞𐴥𐴁𐴝𐴃𐴧𐴟 𐴎𐴟𐴘𐴃𐴠𐴥𐴒𐴡𐴌𐴞 𐴀𐴝𐴓𐴡𐴑 𐴀𐴡𐴥𐴘𐴎𐴝𐴘𐴃𐴡𐴘 𐴕𐴞𐴘𐴡𐴃𐴢 𐴒𐴡𐴙𐴅𐴧𐴞𐴥𐴓𐴢.

²⁰𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴁𐴝𐴥𐴉𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴝𐴁𐴟𐴊𐴡𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴐𐴡𐴥𐴂𐴧𐴡𐴕𐴡𐴃𐴢 𐴊𐴝𐴈𐴝𐴤 𐴊𐴞𐴥 𐴈𐴡𐴀𐴌 𐴊𐴠, ”𐴀𐴡𐴥 𐴊𐴝𐴖𐴟𐴊𐴡𐴌 𐴕𐴡𐴏𐴡𐴥𐴓𐴢 𐴘𐴟𐴏𐴟𐴥𐴉𐴢, 𐴔𐴡𐴌𐴞𐴘𐴝𐴔𐴡𐴌𐴠 𐴁𐴞𐴘𐴝𐴥 𐴒𐴡𐴙𐴃𐴧𐴠𐴤 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌 𐴉𐴠𐴍𐴡𐴃𐴢 𐴎𐴠 𐴉𐴟𐴖𐴝 𐴀𐴡𐴥𐴘𐴧𐴠 𐴀𐴞𐴥𐴁𐴝 𐴂𐴝𐴑-𐴌𐴟𐴀𐴌 𐴑𐴟𐴊𐴟𐴌𐴟𐴃𐴠 𐴀𐴡𐴥𐴘𐴧𐴠 𐴊𐴠.²¹𐴇𐴞𐴥𐴁𐴝𐴃𐴧𐴟 𐴀𐴠𐴥𐴒𐴧𐴗𐴝 𐴔𐴡𐴌𐴡𐴃𐴉𐴟𐴖𐴝 𐴀𐴡𐴥𐴘𐴁𐴡, 𐴃𐴟𐴀𐴛 𐴀𐴞𐴥𐴁𐴝𐴌 𐴕𐴝𐴔 𐴀𐴞𐴏𐴝𐴤 𐴌𐴝𐴑𐴞𐴥𐴁𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴃𐴝𐴌𐴝𐴌 𐴒𐴟𐴕𐴝𐴤𐴃𐴧𐴟 𐴁𐴝𐴏𐴝𐴘𐴁𐴡𐴥.“

²²𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴔𐴝𐴁𐴟𐴊𐴠 𐴕𐴡𐴁𐴞𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥,²³”𐴏𐴡𐴀, 𐴀𐴠𐴑 𐴑𐴟𐴖𐴝𐴥𐴌𐴞 𐴔𐴝𐴘𐴝𐴉𐴟𐴖𐴝 𐴇𐴝𐴥𐴔𐴞𐴓𐴢 𐴀𐴡𐴥𐴘𐴁𐴡, 𐴀𐴝𐴦𐴌 𐴇𐴞𐴥𐴁𐴝𐴃𐴧𐴟 𐴀𐴠𐴥𐴒𐴧𐴗𐴝 𐴔𐴡𐴌𐴡𐴃𐴉𐴟𐴖𐴝 𐴀𐴡𐴥𐴘𐴁𐴡, 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴕𐴝𐴔 𐴌𐴝𐴑𐴞𐴥𐴁𐴡 𐴊𐴠 𐴀𐴞𐴔𐴧𐴝𐴕𐴟𐴀𐴠𐴓𐴢,“ 𐴎𐴞𐴘𐴝𐴥𐴕𐴡𐴌 𐴃𐴡𐴌𐴅𐴟𐴔𐴝 𐴀𐴡𐴥𐴙𐴓𐴊𐴠, 𐴀𐴝𐴓𐴧𐴝 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞.

²⁴𐴁𐴝𐴦𐴊𐴠 𐴘𐴟𐴏𐴟𐴥𐴉𐴠 𐴒𐴟𐴥𐴔𐴡𐴃𐴧𐴟 𐴀𐴟𐴍𐴞𐴤 𐴀𐴟𐴕𐴊𐴞𐴓𐴧𐴝 𐴒𐴡𐴙𐴅𐴧𐴠𐴥 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴔𐴝𐴁𐴟𐴊𐴡𐴌 𐴉𐴞𐴥𐴌𐴞𐴏𐴃𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴓𐴢, 𐴘𐴡𐴥𐴒𐴧𐴗𐴝𐴘𐴠 𐴔𐴡𐴌𐴞𐴘𐴝𐴔𐴡𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴝𐴘𐴧𐴠,²⁵𐴔𐴡𐴕𐴃𐴡𐴌 𐴇𐴞𐴥𐴁𐴝𐴃𐴧𐴟 𐴉𐴟𐴖𐴝 𐴖𐴝 𐴎𐴡𐴌𐴔𐴡 𐴕𐴡𐴥 𐴀𐴡𐴥𐴘𐴧𐴡 𐴉𐴡𐴙𐴅𐴧𐴡𐴕𐴃𐴡 𐴇𐴞𐴥𐴁𐴝 𐴓𐴧𐴡𐴥𐴘 𐴔𐴞𐴓𐴔𐴞𐴓𐴝𐴁𐴢 𐴕𐴡𐴥 𐴒𐴡𐴌𐴠𐴥. 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴉𐴟𐴖𐴝 𐴖𐴝𐴌 𐴕𐴝𐴔 𐴀𐴞𐴏𐴝𐴤 𐴌𐴝𐴙𐴑𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590