Přečtěte si 𐴔𐴝𐴌𐴑𐴟𐴏𐴢 2

𐴔𐴝𐴌𐴑𐴟𐴏𐴢2

𐴀𐴠𐴎𐴧𐴡𐴕 𐴀𐴝𐴣𐴃𐴟𐴌𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹𐴇𐴡𐴦𐴊𐴧𐴞𐴕 𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴑𐴝𐴂𐴝𐴌𐴕𐴝𐴈𐴟𐴥𐴔𐴡𐴃𐴢 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥, 𐴉𐴟𐴥𐴕𐴝 𐴒𐴞𐴥𐴘𐴠 𐴊𐴠, 𐴀𐴞𐴥𐴁𐴝 𐴒𐴡𐴥𐴌𐴡𐴃𐴢 𐴀𐴝𐴏𐴠𐴤.²𐴁𐴝𐴦𐴊𐴠 𐴇𐴠𐴥𐴍𐴠 𐴀𐴠𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴎𐴡𐴔𐴝 𐴀𐴡𐴥𐴘𐴒𐴞𐴘𐴡𐴘, 𐴒𐴡𐴥𐴌 𐴒𐴝𐴥𐴕 𐴒𐴟𐴣𐴍𐴝 𐴁𐴡𐴥𐴌𐴞 𐴊𐴟𐴖𐴝𐴌𐴡𐴌 𐴋𐴝𐴥𐴑𐴠 𐴀𐴟𐴥𐴊𐴧𐴗𐴝 𐴀𐴝𐴌 𐴎𐴝𐴒𐴝 𐴕𐴟 𐴀𐴝𐴐𐴧𐴞𐴥𐴓𐴢. 𐴀𐴝𐴦𐴌 𐴀𐴞𐴏𐴝𐴤 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.³𐴇𐴠𐴥 𐴀𐴡𐴑𐴃𐴡𐴥𐴃𐴢 𐴇𐴠𐴥𐴍𐴠 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴀𐴝𐴙𐴐𐴧𐴠𐴥, 𐴉𐴟𐴥𐴖𐴝𐴣𐴃𐴞 𐴀𐴞𐴥𐴃𐴝𐴌𐴝 𐴀𐴠𐴑 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴡𐴌𐴠 𐴏𐴝𐴙𐴌 𐴎𐴡𐴕𐴡𐴌 𐴀𐴝𐴥𐴃𐴝 𐴁𐴡𐴀𐴘𐴢 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤.⁴𐴀𐴝𐴦𐴌 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴔𐴝𐴕𐴟𐴥𐴙𐴐𐴡𐴌 𐴎𐴝𐴔𐴡𐴓𐴧𐴝 𐴁𐴡𐴥𐴓𐴞 𐴀𐴞𐴥𐴁𐴝𐴌 𐴀𐴞𐴥𐴣𐴘𐴡𐴃𐴢 𐴎𐴝𐴘 𐴕𐴡 𐴉𐴝𐴌𐴠𐴌, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴀𐴟𐴎𐴟-𐴀𐴟𐴎𐴟 𐴖𐴡𐴃𐴧𐴟𐴥 𐴏𐴝𐴥𐴊𐴡𐴌 𐴄𐴝𐴓𐴞 𐴓𐴝𐴌𐴞𐴉𐴠𐴥𐴓𐴝𐴘𐴧𐴠, 𐴀𐴝𐴦𐴌 𐴈𐴝𐴕𐴝 𐴒𐴡𐴌𐴞𐴥𐴉𐴠𐴓𐴝𐴘 𐴁𐴝𐴦𐴊𐴠, 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝 𐴕𐴠𐴙𐴄𐴧𐴝 𐴀𐴝𐴏𐴠𐴤 𐴊𐴠 𐴁𐴞𐴏𐴝𐴥𐴕𐴝 𐴖𐴝 𐴓𐴝𐴔𐴝𐴘𐴊𐴞𐴘𐴠𐴥.⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴀𐴞𐴔𐴝𐴕 𐴊𐴠𐴑𐴞𐴥 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴡 𐴉𐴟𐴃𐴢, 𐴃𐴡𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠.“

⁶𐴇𐴠𐴥𐴍𐴠 𐴇𐴡𐴦𐴎𐴧𐴡𐴕 𐴀𐴝𐴓𐴠𐴔 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴊𐴞𐴓𐴠-𐴊𐴞𐴓𐴠 𐴁𐴝𐴥𐴉𐴠𐴌 𐴊𐴠,⁷”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴃𐴝𐴤 𐴑𐴞𐴘𐴝𐴥 𐴈𐴡𐴀𐴌؟ 𐴀𐴞𐴁𐴝𐴤𐴘𐴠 𐴃𐴡 𐴑𐴟𐴉𐴠𐴥𐴌𐴞 𐴒𐴡𐴌𐴠𐴥𐴌! 𐴏𐴞𐴌𐴞𐴥𐴉𐴢 𐴀𐴝𐴓𐴧𐴝 𐴁𐴝𐴊𐴠 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴉𐴝𐴌𐴡𐴘𐴝 𐴇𐴡𐴕 𐴀𐴝𐴏𐴠𐴤؟“

⁸𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴌𐴟𐴀𐴃𐴢 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴊𐴠, 𐴀𐴞𐴥𐴃𐴝𐴌𐴝 𐴊𐴞𐴓𐴠-𐴊𐴞𐴓𐴠 𐴇𐴠𐴥𐴕𐴊𐴞𐴓𐴧𐴝 𐴁𐴝𐴥𐴉𐴠𐴌. 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴊𐴞𐴓𐴠-𐴊𐴞𐴓𐴠 𐴇𐴞𐴥𐴀𐴕 𐴑𐴞𐴘𐴝𐴥 𐴁𐴝𐴥𐴉𐴡𐴌؟⁹𐴀𐴠 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴘𐴃𐴠𐴤 𐴇𐴡𐴕 𐴕𐴝𐴥𐴕 𐴀𐴝𐴏𐴝𐴤𐴕, 𐴑𐴞 ’𐴃𐴡𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠,‘ 𐴀𐴝𐴦𐴌 𐴕𐴝𐴥𐴑𐴞, ’𐴀𐴟𐴄𐴢, 𐴃𐴡𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴝𐴥𐴣𐴄𐴢؟‘¹⁰𐴓𐴠𐴑𐴞𐴕 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌, 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴁𐴝𐴌 𐴑𐴠𐴥𐴔𐴡𐴃𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴀𐴝𐴏𐴠𐴤.“𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠,¹¹”𐴀𐴝𐴀𐴛 𐴃𐴡𐴌𐴠𐴥 𐴈𐴡𐴀𐴙𐴌, 𐴀𐴟𐴄𐴢, 𐴃𐴡𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴒𐴡𐴥𐴌𐴡𐴃𐴢 𐴎𐴝𐴦𐴒𐴡𐴥𐴘.“¹²𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴀𐴟𐴙𐴄𐴧𐴠𐴥, 𐴀𐴝𐴦𐴌 𐴃𐴡𐴌𐴝𐴃𐴡𐴌𐴞 𐴁𐴞𐴏𐴝𐴥𐴕𐴝 𐴖𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴁𐴝𐴀𐴌𐴑𐴟𐴓𐴠 𐴒𐴞𐴦𐴘𐴠𐴥𐴒𐴡𐴘. 𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴀𐴠𐴀𐴕 𐴈𐴡𐴀𐴘𐴢, ”𐴀𐴝𐴣𐴀𐴌𐴝 𐴀𐴠𐴕𐴊𐴞𐴓𐴧𐴝 𐴇𐴝𐴌𐴁𐴝𐴌 𐴇𐴡𐴕𐴡𐴤𐴊𐴞𐴕 𐴕𐴡𐴥 𐴊𐴠𐴑𐴞𐴥!“

𐴀𐴞𐴏𐴝𐴤𐴘𐴠 𐴓𐴠𐴀𐴜𐴞𐴌𐴠 𐴋𐴝𐴙𐴑𐴧𐴠𐴥

¹³𐴀𐴞𐴏𐴝𐴤 𐴀𐴝𐴁𐴝𐴌 𐴁𐴝𐴀𐴌𐴠 𐴕𐴠𐴦𐴓𐴞 𐴋𐴞𐴀𐴌 𐴇𐴝𐴣𐴏𐴝𐴃𐴢 𐴒𐴞𐴦𐴘𐴠𐴥; 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.¹⁴𐴀𐴞𐴥𐴁𐴝 𐴎𐴝𐴘𐴃𐴠-𐴎𐴝𐴘𐴃𐴠 𐴊𐴠𐴑𐴠𐴥𐴌 𐴊𐴠, 𐴀𐴝𐴓𐴉𐴝𐴥𐴘𐴧𐴝𐴏𐴡𐴌 𐴉𐴟𐴖𐴝 𐴓𐴠𐴀𐴜𐴞 𐴇𐴝𐴥𐴎𐴝𐴕𐴝 𐴃𐴟𐴓𐴠𐴥 𐴊𐴠 𐴒𐴡𐴥𐴌𐴡𐴃𐴢 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠. 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴡.“𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴀𐴟𐴍𐴞𐴤 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

¹⁵𐴘𐴝𐴥𐴌𐴁𐴝𐴦𐴊𐴠 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴞𐴏𐴝𐴤 𐴎𐴠𐴣𐴃𐴧𐴠𐴥 𐴓𐴠𐴀𐴜𐴞𐴌 𐴒𐴡𐴥𐴌𐴡𐴃𐴢 𐴈𐴝𐴥𐴕𐴝 𐴈𐴝𐴥𐴀𐴌, 𐴁𐴡𐴀𐴗𐴃𐴢 𐴎𐴡𐴕 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴌𐴞 𐴀𐴝𐴐𐴧𐴞𐴥𐴓𐴢 𐴊𐴠 𐴁𐴡𐴀𐴗𐴃𐴢 𐴎𐴡𐴕 𐴀𐴝𐴐𐴧𐴞𐴥𐴓𐴢.¹⁶𐴉𐴠𐴥𐴌𐴡𐴐𐴞𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌𐴡𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴀𐴌 𐴊𐴠 𐴊𐴠𐴑𐴞𐴥, 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴑𐴞𐴘𐴝𐴥 𐴈𐴝𐴥𐴕𐴝 𐴈𐴝𐴥𐴀؟“

¹⁷𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴃𐴡 𐴋𐴝𐴑𐴄𐴡𐴌 𐴕𐴡 𐴓𐴝𐴒𐴠, 𐴔𐴡𐴕𐴃𐴡𐴌 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴠 𐴓𐴝𐴒𐴠. 𐴀𐴝𐴀𐴛 𐴊𐴝𐴖𐴡𐴃𐴢 𐴊𐴞𐴃𐴡 𐴀𐴝𐴙𐴐𐴧𐴞𐴤 𐴊𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴕𐴡, 𐴁𐴡𐴥𐴓𐴑𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠.“

𐴌𐴟𐴎𐴝𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

¹⁸𐴀𐴠𐴑𐴁𐴝𐴌, 𐴘𐴝𐴇𐴝𐴥𐴘𐴝𐴌 𐴐𐴝𐴥𐴌𐴞𐴃𐴢 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴌𐴟𐴎𐴝 𐴌𐴝𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴘𐴝𐴇𐴝𐴥𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞𐴌 𐴐𐴝𐴥𐴌𐴞𐴃𐴢 𐴀𐴡𐴥𐴑𐴧𐴡𐴓𐴠 𐴃𐴡 𐴌𐴟𐴎𐴝 𐴌𐴝𐴑𐴠𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴑𐴞𐴘𐴝𐴥 𐴌𐴟𐴎𐴝 𐴕𐴡 𐴌𐴝𐴑𐴠𐴥؟“

¹⁹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴊𐴟𐴓𐴝𐴤 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴑𐴞𐴥 𐴁𐴡𐴘𐴌𐴝𐴙𐴃𐴧𐴝 𐴀𐴡𐴥𐴑𐴧𐴡𐴓𐴠 𐴌𐴟𐴎𐴝 𐴌𐴝𐴑𐴞𐴥 𐴉𐴝𐴌𐴠؟ 𐴎𐴠𐴃𐴡𐴥 𐴊𐴞𐴕 𐴊𐴟𐴓𐴝𐴤 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴠, 𐴇𐴠𐴥𐴃𐴡𐴊𐴞𐴕 𐴃𐴡 𐴀𐴞𐴥𐴃𐴝𐴌𐴝 𐴌𐴟𐴎𐴝 𐴌𐴝𐴑𐴞𐴥 𐴕𐴡 𐴉𐴝𐴌𐴠.²⁰𐴔𐴡𐴕𐴃𐴡𐴌 𐴀𐴠𐴀𐴕 𐴊𐴞𐴕 𐴀𐴝𐴘𐴁𐴡𐴤, 𐴎𐴠𐴣𐴃𐴧𐴠𐴥 𐴊𐴟𐴓𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡, 𐴀𐴡𐴕𐴠 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴌𐴟𐴎𐴝 𐴌𐴝𐴑𐴞𐴥𐴁𐴡.

²¹”𐴇𐴡𐴕𐴡𐴤𐴑𐴞𐴘𐴠 𐴃𐴡 𐴉𐴟𐴌𐴝𐴕 𐴉𐴟𐴐𐴝𐴥𐴑𐴡𐴃𐴢 𐴕𐴡𐴘𐴝 𐴇𐴡𐴦𐴌 𐴃𐴝𐴓𐴞 𐴊𐴠𐴊𐴠 𐴕𐴝𐴥𐴘, 𐴎𐴡𐴊𐴞 𐴊𐴞𐴓𐴠𐴥 𐴃𐴡 𐴈𐴠𐴥𐴕𐴃𐴟 𐴕𐴡𐴘𐴝 𐴒𐴝𐴥𐴕 𐴎𐴡𐴥𐴌𐴞𐴎𐴝𐴘𐴁𐴡𐴘, 𐴀𐴝𐴦𐴌 𐴉𐴝𐴥𐴍𐴝 𐴇𐴞𐴥𐴘𐴝𐴕 𐴀𐴝𐴌𐴡𐴤 𐴋𐴡𐴣𐴀𐴌 𐴀𐴡𐴥𐴘𐴎𐴝𐴘𐴁𐴡𐴘.²²𐴇𐴠𐴥𐴕𐴊𐴞𐴓𐴧𐴝, 𐴇𐴡𐴕𐴡𐴤𐴑𐴞𐴘𐴠 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴡𐴌𐴠 𐴉𐴟𐴌𐴝𐴕 𐴏𐴝𐴔𐴝𐴌𐴝𐴌 𐴇𐴡𐴥𐴙𐴓𐴧𐴝𐴃𐴢 𐴌𐴝𐴑𐴠𐴥 𐴊𐴠 𐴕𐴝𐴥𐴘; 𐴎𐴡𐴊𐴞 𐴌𐴝𐴑𐴞𐴥𐴓𐴠 𐴃𐴡 𐴕𐴡𐴘𐴝 𐴌𐴡𐴐𐴧𐴟𐴥𐴕𐴠 𐴇𐴡𐴥𐴙𐴓𐴧𐴝 𐴒𐴟𐴥𐴕 𐴉𐴝𐴥𐴍𐴞𐴉𐴠𐴓𐴝𐴘𐴁𐴡, 𐴃𐴡𐴥𐴘 𐴌𐴡𐴐𐴢 𐴀𐴡𐴥 𐴁𐴡𐴌𐴁𐴝𐴊𐴢 𐴎𐴝𐴘𐴁𐴡𐴘 𐴀𐴝𐴦𐴌 𐴇𐴡𐴥𐴙𐴓𐴧𐴝 𐴒𐴟𐴥𐴕 𐴀𐴡𐴥 𐴁𐴡𐴌𐴁𐴝𐴊𐴢 𐴎𐴝𐴘𐴁𐴡𐴘. 𐴇𐴠𐴥𐴃𐴡𐴓𐴧𐴝, 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴡𐴌𐴠 𐴕𐴡𐴘𐴝 𐴏𐴝𐴔𐴝𐴌𐴝𐴌 𐴇𐴡𐴥𐴙𐴓𐴧𐴝𐴃𐴢 𐴌𐴝𐴑𐴝𐴤 𐴉𐴡𐴌𐴠.“

𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴞𐴣𐴘𐴟𐴌 𐴃𐴟𐴥𐴌 𐴃𐴟𐴓𐴝𐴤

²³𐴀𐴠𐴑𐴁𐴝𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴞𐴏𐴝𐴤 𐴒𐴞𐴣𐴘𐴟𐴌 𐴑𐴟𐴣𐴍𐴝𐴤 𐴁𐴝𐴥𐴘 𐴎𐴝𐴦𐴌, 𐴎𐴝𐴘𐴃𐴠-𐴎𐴝𐴘𐴃𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴒𐴞𐴣𐴘𐴟𐴌 𐴃𐴟𐴥𐴌 𐴀𐴡𐴥𐴑𐴧𐴡𐴓𐴢 𐴃𐴟𐴓𐴝𐴤𐴃𐴢 𐴊𐴡𐴙𐴅𐴧𐴠.²⁴𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴎𐴞𐴘𐴝𐴥𐴕 𐴒𐴡𐴌𐴞𐴥𐴁𐴝𐴌 𐴔𐴝𐴕𐴝𐴥, 𐴀𐴞𐴃𐴝𐴌𐴝𐴤 𐴇𐴞𐴥𐴘𐴝𐴕 𐴑𐴞𐴘𐴝𐴥 𐴒𐴡𐴌𐴠𐴥𐴌؟“

²⁵𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴑𐴞𐴥 𐴘𐴝𐴀𐴕 𐴇𐴡𐴕𐴡𐴤𐴊𐴞𐴕 𐴕𐴡𐴥 𐴉𐴡𐴌𐴡𐴥, 𐴎𐴠𐴣𐴃𐴧𐴠𐴥 𐴊𐴝𐴖𐴟𐴊𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴎𐴡𐴌𐴟𐴌𐴡𐴃𐴢 𐴀𐴡𐴥𐴘𐴧𐴠 𐴀𐴠𐴊𐴧𐴠 𐴁𐴟𐴥𐴑 𐴓𐴝𐴙𐴒𐴧𐴞𐴥𐴓𐴢, 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴘𐴠 𐴑𐴞𐴦 𐴒𐴡𐴙𐴅𐴧𐴞𐴥𐴓𐴢 𐴊𐴠؟²⁶𐴀𐴞𐴥𐴁𐴝𐴘𐴠 𐴃𐴡 𐴁𐴡𐴌𐴡 𐴀𐴞𐴔𐴝𐴔 𐴀𐴝𐴁𐴞𐴘𐴡𐴥𐴃𐴝𐴌 𐴀𐴡𐴑𐴃𐴡𐴥𐴃𐴢 𐴀𐴝𐴓𐴧𐴝𐴌 𐴒𐴡𐴥𐴌𐴡𐴃𐴢 𐴒𐴡𐴥𐴙𐴓𐴧𐴠𐴒𐴡𐴘, 𐴀𐴝𐴦𐴌 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴂𐴠𐴦𐴐𐴢 𐴒𐴡𐴙𐴅𐴧𐴝𐴥 𐴌𐴟𐴄𐴞 𐴈𐴝𐴥𐴀𐴙𐴓𐴢, 𐴎𐴞𐴀𐴕 𐴏𐴞𐴌𐴞𐴥𐴉𐴢 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴈𐴝𐴥𐴘𐴁𐴝𐴌 𐴀𐴠𐴎𐴝𐴎𐴡𐴃𐴢 𐴕𐴝𐴥𐴘. 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕 𐴕𐴞𐴎𐴡𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴊𐴞𐴀𐴓𐴢.“

²⁷𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴁𐴝𐴕𐴝𐴘𐴧𐴠𐴥 𐴊𐴠 𐴀𐴡𐴥𐴙𐴓𐴊𐴠 𐴔𐴝𐴕𐴟𐴥𐴙𐴐𐴢 𐴀𐴡𐴓𐴧𐴝, 𐴔𐴝𐴕𐴟𐴥𐴙𐴐𐴡𐴌𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴓𐴧𐴝 𐴁𐴝𐴕𐴝𐴘𐴧𐴠𐴥 𐴊𐴠 𐴕𐴡.²⁸𐴇𐴠𐴥 𐴀𐴞𐴥𐴏𐴝𐴉𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴀𐴡𐴥 𐴔𐴝𐴓𐴞𐴑.“

The Word for the World International

https://app.library.bible/content/87faca8b51c22590