Read 𐴔𐴝𐴌𐴑𐴟𐴏𐴢 1

𐴔𐴝𐴌𐴑𐴟𐴏𐴢1

𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴃𐴡𐴁𐴡𐴓𐴞𐴑

¹𐴘𐴝𐴀𐴕 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴉𐴟𐴖𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴑𐴟𐴥𐴐𐴈𐴡𐴥𐴁𐴡𐴌,²𐴎𐴠𐴕𐴊𐴞𐴓𐴧𐴝 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴑𐴞𐴃𐴝𐴁𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤:”𐴏𐴡𐴀, 𐴀𐴝𐴀𐴛 𐴀𐴝𐴣𐴀𐴌 𐴈𐴡𐴥𐴁𐴡𐴌𐴒𐴗𐴝𐴌𐴠 𐴃𐴟𐴣𐴀𐴝𐴥𐴣𐴌 𐴀𐴝𐴒𐴠 𐴊𐴞𐴉𐴠𐴍𐴝𐴥𐴙𐴌,𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴣𐴌 𐴉𐴡𐴣𐴃𐴢 𐴃𐴡𐴘𐴧𐴝𐴌 𐴒𐴡𐴌𐴞𐴥𐴁𐴡.“ ³”𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴠𐴎𐴧𐴡𐴕𐴠 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴀𐴠𐴀𐴕 𐴈𐴡𐴀𐴌,’𐴔𐴝𐴁𐴟𐴊𐴡𐴌 𐴉𐴡𐴣𐴃𐴢 𐴃𐴡𐴘𐴧𐴝𐴌 𐴒𐴡𐴌𐴡𐴤;𐴀𐴞𐴥𐴁𐴝𐴌 𐴌𐴝𐴏𐴃𐴝 𐴀𐴟𐴎𐴟 𐴒𐴡𐴌𐴡𐴤.‘ “

⁴𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝 𐴀𐴝𐴀𐴘𐴢 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥 𐴊𐴠, 𐴒𐴟𐴕𐴝𐴤𐴌 𐴔𐴝𐴉𐴢 𐴉𐴝𐴘 𐴁𐴡𐴓𐴧𐴝 𐴃𐴡𐴖𐴝𐴥 𐴒𐴡𐴌𐴞𐴥 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴃𐴡.⁵𐴉𐴟𐴌𐴝 𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴠𐴊𐴧𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴃𐴝𐴔𐴝𐴥𐴔 𐴁𐴝𐴥𐴐𐴞𐴕𐴊𐴝 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴞 𐴘𐴡𐴥𐴒𐴧𐴗𐴝𐴌 𐴇𐴝𐴣𐴏𐴠 𐴒𐴞𐴦𐴘𐴠𐴥, 𐴀𐴝𐴦𐴌 𐴕𐴞𐴎𐴡𐴌-𐴕𐴞𐴎𐴡𐴌 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴢 𐴐𐴞𐴥𐴑𐴝𐴌 𐴒𐴡𐴌𐴞𐴥 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴃𐴢 𐴘𐴡𐴥𐴒𐴧𐴗𐴝𐴃𐴧𐴟 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥.⁶𐴘𐴝𐴇𐴝𐴥𐴘𐴝𐴘𐴠 𐴀𐴟𐴣𐴄𐴡𐴌 𐴑𐴠𐴣𐴐𐴢 𐴓𐴡𐴘 𐴁𐴝𐴕𐴝𐴘𐴧𐴝 𐴇𐴡𐴦𐴌 𐴉𐴞𐴣𐴊𐴞𐴥𐴃𐴡, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴑𐴠𐴣𐴙𐴓𐴡𐴃𐴢 𐴏𐴝𐴔𐴝𐴌𐴝𐴌 𐴊𐴟𐴖𐴝𐴓𐴞 𐴁𐴝𐴙𐴕𐴊𐴝𐴤 𐴃𐴝𐴥𐴑𐴞𐴃𐴡. 𐴘𐴡𐴥𐴒𐴧𐴗𐴝𐴘𐴠 𐴈𐴝𐴥𐴘𐴃𐴡 𐴊𐴠 𐴀𐴡𐴥𐴙𐴓𐴊𐴠 𐴉𐴞𐴥𐴌𐴞𐴚 𐴀𐴠𐴊𐴧𐴠 𐴎𐴡𐴦𐴣𐴓𐴡𐴌 𐴔𐴡𐴊𐴟𐴥.⁷𐴘𐴡𐴥𐴒𐴧𐴗𐴝𐴘𐴠 𐴀𐴠𐴕𐴊𐴞𐴓𐴧𐴝 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥, ”𐴀𐴝𐴀𐴛 𐴁𐴝𐴦𐴊𐴠 𐴀𐴠𐴀𐴕 𐴀𐴠𐴑𐴎𐴡𐴕 𐴀𐴝𐴘𐴧𐴠𐴤𐴌, 𐴎𐴞𐴁𐴝𐴤𐴌 𐴃𐴡𐴑𐴧𐴝 𐴀𐴝𐴣𐴀𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌. 𐴀𐴝𐴀𐴛 𐴕𐴞𐴘𐴟𐴥𐴌𐴞 𐴀𐴞𐴥𐴁𐴝𐴌 𐴐𐴠𐴕𐴄𐴝𐴥𐴌𐴡𐴌 𐴉𐴞𐴥𐴃𐴝 𐴑𐴟𐴥𐴓𐴞 𐴁𐴡𐴓𐴧𐴝 𐴀𐴟𐴥𐴊𐴧𐴗𐴝 𐴓𐴝𐴦𐴘𐴠𐴑 𐴕𐴡.⁸𐴀𐴝𐴀𐴛 𐴊𐴠 𐴃𐴟𐴣𐴀𐴝𐴥𐴌𐴝𐴌𐴠 𐴉𐴝𐴕𐴞𐴥𐴃𐴢 𐴀𐴠𐴥𐴕𐴝 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴌, 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴂𐴝𐴑-𐴌𐴟𐴀 𐴓𐴡𐴥𐴘 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴁𐴡.“

𐴀𐴞𐴏𐴝𐴤𐴌 𐴁𐴝𐴥𐴂𐴄𐴞𐴏𐴔𐴝

⁹𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴞𐴏𐴝𐴤 𐴒𐴝𐴓𐴞𐴓𐴡𐴌 𐴉𐴝𐴌𐴝 𐴕𐴝𐴏𐴝𐴥𐴌𐴝𐴃𐴡𐴃𐴧𐴟 𐴀𐴝𐴀𐴘𐴧𐴡𐴌𐴠 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴃𐴢 𐴘𐴝𐴇𐴝𐴥𐴘𐴝𐴃𐴧𐴟 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥.¹⁰𐴀𐴞𐴏𐴝𐴤 𐴉𐴝𐴕𐴞𐴥𐴃𐴧𐴟 𐴑𐴟𐴓𐴡𐴃𐴢 𐴀𐴟𐴙𐴄𐴧𐴠𐴥𐴒𐴝𐴘 𐴔𐴡𐴃𐴧𐴡𐴌, 𐴀𐴞𐴥𐴁𐴝𐴘𐴠 𐴊𐴠𐴑𐴠𐴥𐴌 𐴊𐴠, 𐴀𐴝𐴏𐴔𐴝𐴕 𐴑𐴟𐴥𐴓𐴞𐴎𐴝𐴌𐴒𐴡𐴘 𐴀𐴝𐴦𐴌 𐴂𐴝𐴑-𐴌𐴟𐴀 𐴈𐴡𐴘𐴃𐴡𐴌𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘 𐴀𐴞𐴥𐴁𐴝𐴌 𐴖𐴡𐴌𐴠 𐴓𐴝𐴔𐴠𐴌.¹¹𐴀𐴝𐴦𐴌 𐴇𐴠𐴥𐴣𐴃𐴧𐴠 𐴀𐴝𐴏𐴔𐴝𐴕𐴡𐴃𐴧𐴟 𐴀𐴠𐴒𐴧𐴗𐴝𐴤 𐴀𐴝𐴁𐴝𐴏𐴢 𐴀𐴝𐴙𐴐𐴧𐴠𐴥 𐴊𐴠, ”𐴃𐴟𐴀𐴛 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴉𐴟𐴖𐴝, 𐴃𐴟𐴣𐴀𐴝𐴥𐴣𐴌𐴠 𐴓𐴡𐴥𐴘 𐴀𐴝𐴀𐴛 𐴁𐴞𐴐𐴞𐴤 𐴑𐴟𐴥𐴐𐴞.“

𐴀𐴞𐴏𐴝𐴤𐴌𐴠 𐴀𐴠𐴕𐴃𐴝𐴥𐴕 𐴒𐴡𐴙𐴅𐴧𐴠𐴥

¹²𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴂𐴝𐴑-𐴌𐴟𐴀𐴘𐴠 𐴀𐴞𐴥𐴁𐴝𐴌𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴊𐴞𐴉𐴠𐴍𐴝𐴥𐴘𐴊𐴞𐴘𐴠.¹³𐴀𐴝𐴦𐴌 𐴇𐴠𐴥𐴍𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴞𐴥𐴁𐴝𐴌𐴠 𐴐𐴡𐴥𐴘𐴃𐴝𐴕𐴠 𐴏𐴝𐴓𐴞𐴐𐴢 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴀𐴠𐴕𐴃𐴝𐴥𐴕 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴁𐴝 𐴅𐴡𐴚𐴒𐴡𐴓𐴞 𐴅𐴝𐴕𐴟𐴖𐴝𐴌 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴡, 𐴀𐴝𐴦𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴇𐴠𐴥𐴊𐴔𐴡𐴃𐴢 𐴒𐴡𐴙𐴃𐴧𐴡𐴥.

𐴒𐴝𐴓𐴞𐴓𐴡𐴃𐴢 𐴀𐴞𐴏𐴝𐴤𐴌 𐴈𐴝𐴔𐴡𐴌 𐴐𐴟𐴥𐴌𐴟

¹⁴𐴘𐴝𐴇𐴝𐴥𐴘𐴝𐴌𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥 𐴁𐴝𐴦𐴊𐴠, 𐴀𐴞𐴏𐴝𐴤 𐴒𐴝𐴓𐴞𐴓𐴡𐴃𐴢 𐴀𐴝𐴀𐴘𐴢 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠,¹⁵𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢, ”𐴀𐴡𐴑𐴃𐴡𐴥 𐴀𐴡𐴥𐴘𐴧𐴠, 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘. 𐴃𐴡𐴖𐴝𐴥 𐴒𐴡𐴌𐴡𐴤 𐴀𐴠𐴊𐴧𐴠 𐴑𐴟𐴥𐴐𐴈𐴡𐴥𐴁𐴡𐴌𐴡𐴌𐴠 𐴀𐴠𐴑𐴞𐴕 𐴒𐴡𐴌𐴡𐴤.“

𐴐𐴟𐴥𐴌𐴟𐴌 𐴐𐴝𐴥𐴌𐴞𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴋𐴝𐴙𐴑𐴧𐴠𐴥

¹⁶𐴀𐴞𐴏𐴝𐴤 𐴒𐴝𐴓𐴞𐴓𐴢 𐴋𐴞𐴀𐴌 𐴇𐴝𐴣𐴏𐴝 𐴁𐴝𐴥𐴘 𐴎𐴝𐴦𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴁𐴝𐴘𐴠 𐴏𐴝𐴥𐴘𐴔𐴡𐴕𐴡𐴌𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴁𐴝𐴥𐴘 𐴀𐴠𐴕𐴊𐴠𐴌𐴞𐴘𐴝𐴏𐴡𐴌𐴠 𐴊𐴠𐴙𐴑𐴧𐴠𐴥. 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴋𐴞𐴀𐴃𐴢 𐴎𐴝𐴓𐴢 𐴔𐴝𐴌𐴠𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴎𐴝𐴙𐴓𐴧𐴝 𐴀𐴝𐴐𐴧𐴞𐴥𐴓𐴢.¹⁷𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴕𐴟𐴥𐴙𐴐𐴢 𐴊𐴡𐴥𐴌𐴠 𐴊𐴠 𐴎𐴝𐴙𐴓𐴧𐴝 𐴁𐴝𐴕𐴝𐴘𐴧𐴟𐴥𐴔.“¹⁸𐴀𐴞𐴥𐴃𐴝𐴌𐴝 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴃𐴝𐴌𐴝𐴌 𐴎𐴝𐴓𐴢 𐴓𐴟𐴕 𐴀𐴠𐴌𐴞, 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

¹⁹𐴇𐴞𐴥𐴘𐴝𐴕𐴃𐴟 𐴀𐴠𐴑𐴧𐴝𐴥𐴒𐴡𐴌𐴞 𐴒𐴞𐴦𐴘𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴘𐴠 𐴎𐴠𐴁𐴠𐴊𐴝𐴙𐴌 𐴉𐴟𐴖𐴝 𐴘𐴝𐴑𐴟𐴁𐴡𐴌𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴁𐴝𐴥𐴘 𐴘𐴡𐴇𐴝𐴥𐴕𐴧𐴝𐴌𐴠 𐴊𐴠𐴙𐴑𐴧𐴠𐴥, 𐴎𐴠𐴃𐴝𐴌𐴝𐴤 𐴕𐴡𐴦𐴌 𐴖𐴡𐴌𐴠 𐴎𐴝𐴓𐴢 𐴄𐴟𐴕𐴠𐴌.²⁰𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴥𐴇𐴡𐴕 𐴔𐴝𐴃𐴝𐴘𐴧𐴠𐴥, 𐴃𐴡𐴥𐴘 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴁𐴝𐴉𐴢 𐴎𐴠𐴁𐴠𐴊𐴝𐴙𐴌𐴠 𐴕𐴡𐴦𐴃𐴢 𐴔𐴟𐴎𐴟𐴌 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴀𐴠𐴌𐴞, 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

𐴀𐴠𐴎𐴧𐴡𐴕 𐴈𐴡𐴥𐴌𐴝𐴉𐴢 𐴅𐴞𐴕𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢

²¹𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴑𐴝𐴂𐴝𐴌𐴕𐴝𐴈𐴟𐴥𐴔𐴡𐴃𐴢 𐴒𐴞𐴦𐴘𐴠𐴥, 𐴀𐴝𐴦𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴝𐴙𐴐𐴧𐴠𐴥 𐴌𐴝𐴥𐴌 𐴀𐴞𐴏𐴝𐴤 𐴃𐴡𐴌𐴝𐴃𐴡𐴌𐴞 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴎𐴝𐴘 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.²²𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴃𐴝𐴦𐴓𐴞𐴔𐴠 𐴀𐴝𐴔𐴧𐴟𐴥𐴑 𐴀𐴡𐴥𐴘𐴎𐴝𐴘𐴃𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴃𐴝𐴦𐴓𐴞𐴔 𐴊𐴞𐴃𐴡 𐴊𐴠 𐴀𐴠𐴎𐴧𐴡𐴕 𐴀𐴝𐴊𐴞𐴥𐴑𐴝𐴌 𐴀𐴡𐴓𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞, 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴕𐴡.²³𐴇𐴠𐴥𐴍𐴠 𐴀𐴞𐴥𐴃𐴝𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴀𐴠𐴎𐴧𐴡𐴕 𐴈𐴡𐴥𐴌𐴝𐴉𐴢 𐴅𐴞𐴕𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠,²⁴”𐴀𐴡𐴥 𐴀𐴞𐴏𐴝𐴤 𐴕𐴝𐴏𐴝𐴥𐴌𐴞, 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴃𐴟𐴣𐴀𐴝𐴥𐴣𐴌 𐴑𐴞𐴦 𐴈𐴝𐴔 𐴀𐴝𐴏𐴠𐴤؟ 𐴃𐴟𐴀𐴛 𐴀𐴝𐴣𐴀𐴌𐴝𐴌𐴠 𐴊𐴡𐴥𐴚𐴐𐴡 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴡𐴥 𐴊𐴠 𐴕𐴠𐴥؟ 𐴀𐴝𐴀𐴛 𐴎𐴝𐴕𐴞 𐴃𐴟𐴀𐴛 𐴇𐴡𐴕, 𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴀𐴝𐴓𐴧𐴝𐴌 𐴂𐴝𐴑𐴎𐴡𐴕 𐴕𐴗𐴝𐴥.“

²⁵𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴅𐴞𐴕 𐴕𐴗𐴝𐴥𐴌𐴠 𐴅𐴠𐴥𐴅𐴧𐴠𐴍𐴝𐴘 𐴈𐴡𐴀𐴌 𐴊𐴠, ”𐴕𐴞𐴎𐴝𐴥𐴔 𐴀𐴡𐴥, 𐴘𐴡𐴒𐴧𐴗𐴝𐴥𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞𐴎𐴝𐴒𐴡𐴥𐴘.“²⁶𐴃𐴡𐴥𐴘 𐴇𐴠𐴥 𐴈𐴡𐴥𐴌𐴝𐴉𐴢 𐴅𐴞𐴕𐴠 𐴘𐴡𐴥𐴒𐴧𐴗𐴝𐴌𐴠 𐴔𐴟𐴏𐴡𐴌𐴞 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴒𐴟𐴎𐴡𐴌𐴝𐴕 𐴔𐴝𐴌𐴞 𐴘𐴡𐴥𐴒𐴧𐴗𐴝𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞𐴒𐴞𐴘𐴡𐴥𐴘.

²⁷𐴇𐴞𐴥𐴘𐴝𐴕𐴠 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴠𐴀𐴕 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴘𐴝𐴀𐴕 𐴑𐴞𐴦؟ 𐴘𐴝𐴀𐴕 𐴃𐴡 𐴀𐴠𐴑𐴧𐴝𐴥𐴕 𐴕𐴡𐴘𐴝 𐴃𐴝𐴦𐴓𐴞𐴔! 𐴀𐴞𐴥𐴁𐴝𐴘𐴠 𐴀𐴝𐴊𐴞𐴥𐴑𐴝𐴌𐴠 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴡𐴌𐴠 𐴀𐴟𐴥𐴊𐴧𐴗𐴝 𐴇𐴡𐴥𐴑𐴟𐴔 𐴊𐴠𐴥 𐴀𐴝𐴦𐴌 𐴇𐴞𐴥𐴀𐴕𐴠 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴔𐴝𐴕𐴠!“²⁸𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴁𐴝𐴌 𐴈𐴡𐴥𐴁𐴡𐴌 𐴒𐴝𐴓𐴞𐴓𐴡𐴌 𐴏𐴝𐴘𐴌𐴡𐴥 𐴋𐴝𐴥𐴑𐴡𐴌 𐴀𐴠𐴓𐴝𐴑𐴝 𐴁𐴠𐴒𐴧𐴟𐴥𐴕𐴡𐴃𐴢 𐴉𐴡𐴥𐴓𐴞𐴒𐴞𐴘𐴡𐴘.

𐴁𐴡𐴀𐴗𐴃𐴢 𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

²⁹𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴞 𐴔𐴡𐴃𐴧𐴡𐴌, 𐴘𐴝𐴑𐴟𐴁𐴢 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌 𐴉𐴟𐴥𐴖𐴝𐴣𐴃𐴞 𐴏𐴝𐴥𐴘𐴔𐴡𐴕 𐴀𐴠𐴊𐴧𐴠 𐴀𐴠𐴕𐴊𐴠𐴌𐴞𐴘𐴝𐴏𐴡𐴌 𐴒𐴡𐴥𐴌𐴡𐴃𐴢 𐴒𐴞𐴦𐴘𐴠𐴥.³⁰𐴇𐴠𐴥𐴣𐴃𐴧𐴠 𐴏𐴝𐴥𐴘𐴔𐴡𐴕𐴡𐴌 𐴇𐴡𐴥𐴖𐴌𐴞 𐴒𐴝𐴦𐴃𐴎𐴡𐴌𐴠 𐴁𐴞𐴏𐴝𐴥𐴕𐴝𐴃𐴢 𐴉𐴡𐴌𐴞 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴀𐴠𐴥𐴇𐴡𐴕 𐴀𐴞𐴏𐴝𐴤𐴌𐴠 𐴘𐴡𐴥𐴒𐴧𐴗𐴝𐴌 𐴁𐴝𐴦𐴁𐴟𐴃𐴠 𐴎𐴝𐴕𐴝𐴘𐴧𐴠𐴥.³¹𐴀𐴞𐴥𐴁𐴝 𐴘𐴡𐴥𐴒𐴧𐴗𐴝𐴌 𐴋𐴝𐴥𐴑𐴠 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌𐴠 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞 𐴃𐴟𐴙𐴓𐴧𐴞𐴥𐴓𐴢, 𐴃𐴡𐴥𐴘 𐴘𐴡𐴥𐴒𐴧𐴗𐴝𐴃𐴧𐴟 𐴒𐴝𐴦𐴃𐴎𐴡𐴌 𐴒𐴞𐴦𐴘𐴠𐴥𐴒𐴡𐴘, 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

³²𐴇𐴝𐴥𐴣𐴎𐴞𐴕𐴧𐴝 𐴁𐴠𐴙𐴓𐴢 𐴒𐴡𐴥𐴓𐴞 𐴁𐴝𐴦𐴊𐴠, 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴁𐴞𐴘𐴝𐴌𐴝𐴙𐴔𐴧𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴠𐴊𐴧𐴠 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴙𐴕𐴧𐴞𐴤𐴓𐴢.³³𐴀𐴝𐴦𐴌 𐴒𐴟𐴣𐴍𐴝 𐴐𐴡𐴥𐴀𐴌𐴡𐴌 𐴔𐴝𐴕𐴟𐴥𐴙𐴐𐴢 𐴊𐴟𐴖𐴝𐴌𐴡𐴌 𐴒𐴟𐴌𐴝𐴃𐴢 𐴎𐴡𐴔𐴝 𐴀𐴡𐴥𐴀𐴙𐴓𐴢.³⁴𐴀𐴞𐴏𐴝𐴤𐴘𐴠 𐴁𐴡𐴀𐴗𐴃𐴢 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴒𐴡𐴙𐴅𐴧𐴠𐴥 𐴎𐴠𐴃𐴝𐴌𐴝𐴤 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴁𐴞𐴘𐴝𐴌𐴝𐴔𐴠 𐴊𐴟𐴑 𐴉𐴝𐴦𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴠𐴊𐴧𐴠 𐴁𐴡𐴀𐴗𐴃𐴢 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴘𐴧𐴠; 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴞𐴃𐴡𐴥 𐴕𐴡 𐴊𐴞𐴃𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕𐴠 𐴀𐴞𐴥𐴁𐴝 𐴇𐴡𐴕 𐴊𐴠 𐴏𐴞𐴕𐴞𐴥𐴃𐴡.

𐴒𐴝𐴓𐴞𐴓𐴡𐴃𐴢 𐴀𐴞𐴏𐴝𐴤𐴌 𐴃𐴡𐴁𐴡𐴓𐴞𐴑

³⁵𐴁𐴝𐴦𐴊𐴠 𐴁𐴞𐴀𐴕𐴧𐴝 𐴑𐴟𐴥𐴁𐴢 𐴏𐴡𐴥𐴀𐴌𐴠 𐴀𐴝𐴕𐴊𐴝𐴤𐴌 𐴃𐴝𐴥𐴑𐴞𐴃𐴠, 𐴀𐴞𐴏𐴝𐴤 𐴀𐴟𐴍𐴞𐴤 𐴒𐴡𐴥𐴌𐴡𐴃𐴧𐴟 𐴕𐴠𐴦𐴓𐴞 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝𐴃𐴢 𐴒𐴞𐴦𐴘𐴠𐴥, 𐴀𐴝𐴦𐴌 𐴇𐴠𐴥𐴍𐴠 𐴊𐴟𐴖𐴝 𐴒𐴡𐴙𐴅𐴧𐴠𐴥.³⁶𐴏𐴝𐴥𐴘𐴔𐴡𐴕 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴃𐴟𐴖𐴝𐴘𐴃𐴡𐴥 𐴕𐴠𐴦𐴙𐴓𐴧𐴠𐴥.³⁷𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴃𐴟𐴖𐴝𐴘 𐴉𐴝𐴘 𐴈𐴡𐴀𐴌 𐴊𐴠, ”𐴁𐴠𐴒𐴧𐴟𐴥𐴕𐴠 𐴃𐴟𐴣𐴀𐴝𐴥𐴣𐴌 𐴃𐴝𐴓𐴝𐴐𐴢 𐴒𐴡𐴌𐴠𐴥𐴌.“

³⁸𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴝𐴃𐴠𐴇𐴝𐴣𐴏𐴡𐴥𐴌 𐴇𐴡𐴕𐴡𐴤 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴎𐴝𐴘, 𐴎𐴠𐴀𐴕𐴠 𐴇𐴠𐴥𐴍𐴠 𐴘𐴡𐴥 𐴀𐴝𐴀𐴛 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴉𐴝𐴌𐴞, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴇𐴠𐴥𐴃𐴡𐴓𐴧𐴝 𐴁𐴠 𐴕𐴠𐴦𐴙𐴓𐴧𐴞𐴥.“³⁹𐴃𐴡𐴥𐴘 𐴀𐴞𐴥𐴁𐴝 𐴒𐴝𐴓𐴞𐴓𐴡𐴌 𐴀𐴝𐴒𐴝𐴒𐴟𐴌𐴝 𐴎𐴝𐴘-𐴎𐴝𐴘 𐴀𐴞𐴥𐴃𐴝𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢 𐴀𐴠𐴊𐴧𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴃𐴢 𐴀𐴝𐴐𐴧𐴞𐴥𐴓𐴢.

𐴀𐴠𐴎𐴧𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴠

⁴⁰𐴀𐴠𐴎𐴧𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴏𐴡𐴥𐴘𐴊𐴝 𐴒𐴡𐴌𐴞𐴥 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴏𐴝𐴘𐴓𐴠𐴥 𐴀𐴝𐴣𐴀𐴌𐴠𐴥 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥.“

⁴¹𐴀𐴞𐴏𐴝𐴤𐴃𐴧𐴟 𐴉𐴠𐴄𐴉𐴟𐴌𐴞 𐴕𐴞𐴎𐴡𐴌 𐴀𐴝𐴥𐴃𐴢 𐴁𐴝𐴌𐴝𐴤𐴘 𐴘𐴡𐴥𐴒𐴧𐴗𐴝𐴌𐴠 𐴊𐴡𐴥𐴙𐴅𐴧𐴠, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴝𐴀𐴛 𐴏𐴝𐴀𐴘𐴢; 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴡𐴒𐴡𐴘.“⁴²𐴃𐴡𐴥𐴘 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴘𐴡𐴥𐴒𐴧𐴗𐴝𐴃𐴧𐴟 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴔 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴘𐴡𐴥𐴒𐴧𐴗𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴒𐴞𐴘𐴡𐴘.

⁴³𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴊𐴡𐴌𐴡𐴤𐴒𐴡𐴌𐴞 𐴕𐴞𐴐𐴡𐴥𐴃𐴢 𐴒𐴡𐴌𐴞𐴥 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴊𐴟𐴣𐴌𐴝𐴘𐴊𐴞𐴘𐴠𐴥,⁴⁴𐴘𐴡𐴥𐴒𐴧𐴗𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴏𐴝𐴘𐴧𐴡𐴥, 𐴇𐴡𐴕𐴡𐴤𐴑𐴞𐴘𐴡𐴌𐴠 𐴑𐴠𐴏𐴧𐴟𐴥 𐴕𐴡 𐴎𐴝𐴕𐴝𐴘𐴧𐴡𐴥; 𐴁𐴡𐴥𐴓𐴑𐴠 𐴎𐴡𐴦, 𐴕𐴞𐴎𐴡𐴌𐴠𐴥 𐴀𐴞𐴔𐴝𐴔𐴡𐴌 𐴇𐴝𐴣𐴏𐴠 𐴊𐴝𐴈𐴡𐴥𐴒𐴡𐴘, 𐴀𐴝𐴦𐴌 𐴃𐴟𐴀𐴛 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴡 𐴊𐴠 𐴇𐴞𐴥𐴘𐴝𐴕 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴒𐴡𐴁𐴝𐴤 𐴀𐴡𐴥 𐴉𐴝𐴕, 𐴔𐴟𐴀𐴏𐴝𐴘𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠 𐴇𐴠𐴥 𐴑𐴟𐴌𐴁𐴝𐴕𐴞 𐴊𐴡𐴒𐴡𐴥𐴘.“⁴⁵𐴓𐴠𐴑𐴞𐴕 𐴘𐴡𐴥𐴒𐴧𐴗𐴝 𐴁𐴝𐴀𐴌𐴠 𐴎𐴝𐴘𐴒𐴡𐴥𐴘 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴎𐴝𐴕𐴝𐴘-𐴎𐴝𐴕𐴝𐴘 𐴀𐴝𐴒𐴝𐴒𐴟𐴌𐴝 𐴇𐴠𐴥 𐴈𐴡𐴥𐴁𐴡𐴌 𐴉𐴡𐴥𐴓𐴝𐴃𐴢 𐴊𐴡𐴙𐴅𐴧𐴠, 𐴀𐴠𐴊𐴧𐴟𐴥𐴌 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴏𐴝𐴤 𐴇𐴡𐴕𐴡𐴤 𐴐𐴡𐴥𐴀𐴌𐴡𐴌 𐴁𐴟𐴥𐴃𐴡𐴌𐴠 𐴀𐴝𐴌 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴒𐴡𐴥𐴓𐴞 𐴕𐴡𐴥 𐴉𐴝𐴌𐴠, 𐴁𐴡𐴥𐴓𐴑𐴠 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝𐴃𐴢 𐴎𐴝𐴘 𐴃𐴝𐴥𐴑𐴝 𐴉𐴡𐴙𐴅𐴧𐴠𐴥. 𐴃𐴡𐴀 𐴀𐴝𐴒𐴝𐴒𐴟𐴌𐴝𐴃𐴧𐴟 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴘𐴃𐴡𐴤.

The Word for the World International

https://app.library.bible/content/87faca8b51c22590